Menin Ej Tōl n̄an Ia?
Jej kōm̧m̧ani kālet im jokālet ko eļan̄n̄e jej kalimjōk men ko reoktak im ļōmņake ijo renaaj tōl ie ļo̧k.
Jepļaaktok in gospel eo an Jisōs Kraist ej rōjan̄ kōj n̄an ļōmņak kōn ilju jekļaj. Ej kōmeļeļeik jibadbad eo an mour in im lukkuun mour eo n̄an ļoore. Ej kwaļo̧k pepe ko rem̧m̧an kōn ilju jekļaj n̄an tōl kōm̧m̧an ko ad rainin.
N̄an keidi, jej jeļā kajjien armej ro me rej ļōmņak wōt kōn kiiō: kōmaate wōt rainin, m̧ōņōņō wōt rainin, im jab ļōm̧ņak kōn ilju jeklaj.
Tōre in ad im ilju jekļaj enaaj m̧ōņōņō ļo̧k eļan̄n̄e jenaaj ļōmņak kōn ilju jekļaj. Ilo ad kōm̧m̧ani jokālet ko kiiō, jej aikuj kajjitōk iien otemjej , “menin ej tōl n̄an ia?”
I.
Jet jokālet rej kālet ko kōtaan kōm̧m̧ani ak jab kōm̧m̧ani. Iaar ron̄ juon waanjon̄ok in kain kālet rot in ilo juon kweilo̧k eļap an stake ilo Amedka elōn̄ iiō remootļo̧k.
Jikin in ekar juon kāāmbōj in college eo eaiboojoj. Juon jarlepju in rijikuuļ ro rem̧m̧an ded raar jijet ioon ujooj ko. Rikōnono eo eaar kōmeļeļeik jekjek in ekar ba raar lale an squirrel ko reaiboojoj pelto-peltak, ikkure ilo raan wut ko raiboojoj. Jet iien ioon laļ, jet iien lōn̄ ak laļ im ipeļaakin keen wōjke eo. Ak etke ekōm̧ad rijikuuļ ro?
Juon kidu killep ej babu ioon ujooj ko. Ekar kōm̧ad itok limoin rijikuuļ ro, im squirrel eo ekar kōttōbar eo an kidu eo. Kajjojo iien n̄e squirrel eo ej rouni wōjke eo, kidu eo ej tabōļ m̧aanļo̧k jidik im bōjrak jidik n̄e pojak in tōpare. En̄in men eo ekar dāpij itok limoin rijikuuļ ro. Ilo an ejjeļo̧k keroro im m̧akūtkūt, mājeer ekar iokļo̧k wōt ta eo enaaj waļo̧k.
Āliktata, kidu eo eaar keļo̧k im kiji squirrel eo kōn lon̄iin. Juon ainikien in kamijak ewalōn̄tak, innām rijikuuļ ro raar etal im bōk menin mour eo jen kidu eo ak erum̧wij. Squirrel eo eaar mej.
Jabdewōt jen jarlepju eo ren kar kakkōļ squirrel eo jabdewōt iien ilo aer naaj kar kōmakūtkūt pein ļeo ak lio ak lam̧ōj, ak ejjeļo̧k juon eaar kōm̧m̧ane. Raar reilo̧k wōt ilo an men eo jab maron̄ eļļā jāne epaaktok. Ejjeļo̧k juon eaar kajjitōk, “menin ej tōl n̄an ia?” Ke bōklekōt in ewaļo̧k, aolep rej m̧ōkaj in bōbrae ta eo enaaj waļo̧k, bōtaab ekar rum̧wij. Būrom̧ōj eaar ta eo aolep remaron̄ leļo̧k.
Bwebwenato in em̧ool ej āinwōt juon būrabōļ. Ej jerbal ilo men ko jej loi ilo mour ko ad make im ilo mour im jekjek ko ipeļaakid. Ilo ad lo kamijak ta ko renaaj waļo̧k n̄an armej ro ak ro jej iakwe er, ewōr ad kālet n̄an kōnono ak jerbale ak pād wōt. Em̧m̧an n̄an kajjitōkin kōj make, “menin ej tōl n̄an ia?” Ijo jekjek ko reļļap im rem̧ōkaj aer waļo̧k, jejjab maron̄ ejjeļo̧k men jej kōm̧m̧an. Jej aikuj kwaļo̧k kakkōļ ko rekkar ak jipan̄ kijejeto in bōbrae ko bwe ejja wōr iien.
Jokālet ko me iaar kōmeļeļeiki rekōtbuuj kālet ko ikōtaan būki m̧akūtkūt ko ak jab būki m̧akūtkūt ko n̄an jidik. Emakijkij ļo̧k kālet ko ikōtaan juon m̧akūtkūt ak eo juon. Ekoba kālet ko ikōtaan em̧m̧an im nana, ak men eo eļaptata rej kālet ko ikōtaan ruo men em̧m̧an. Bar ijin ej kaikideleel n̄an kajjitōk menin ej tōl n̄an ia. Jej kōm̧m̧ani elōn̄ kālet ko ikōtaan ruo men em̧m̧an, ekkā an kitbuuj elmen ad joļo̧k ad iien. Ejjeļo̧k jorrāān ilo menin ikkure video game ak text ak alooj TV ak kennono ilo cell phone. Ak aolep men kein rekitbuuj ta eo ņaetaer “o̧ņeen iien em̧m̧an,” meļeļeļein bwe eļan̄n̄e jej joļo̧k iien kōm̧m̧an juon men, jej luuji iien em̧m̧an n̄an kōm̧m̧an eo juon. Ijeļā komaron̄ loe bwe jej aikuj in lale jon̄an ta eo jej luji kōn iien ilo ad joļo̧k ilo juon m̧akūtkūt, men̄e em̧m̧an ilo an make.
Jet iien remootļo̧k iaar kōnono kōn “Em̧m̧an, Em̧m̧anļo̧k, Em̧m̧antata.” Ilo kōnono in iaar ba bwe “kōnke jet men rej em̧m̧an ejjab bwe unin n̄an kōm̧m̧ane. Oran men ko rem̧m̧an jemaron̄ kōm̧m̧ani retōr jān jon̄an iien eo ewōr n̄an kadedeļo̧ki. Jet men rem̧m̧anļo̧k jān em̧m̧an, im men kein rej men ko me rej aikuj men ko eļap aer kūnōōr ad ilo mour ko ad. … Jej aikuj do̧o̧d men ko rem̧m̧an jet n̄an kālet ko jet me em̧m̧anļo̧k ak em̧m̧antata.”1
Bōk erreim̧aanļo̧k eo aetok. Ta eo ejelet ilju jekļaj eo ad ilo jokālet ko jej kōm̧m̧ani kiiō? Keememej men eo eaorōk kōn bōk jeļāļo̧kjeņ, ekkatak gospel in, kōkāāl bujen ko ad ilo bōk m̧ōttan kwojkwoj eo, im etal n̄an tampeļ.
II.
“Menin ej tōl n̄an ia?” ebar aorōk n̄an kālet elmen ad joon̄ok ak ļōmņak kōn kōj make. Men eo eaorōktata, kajjojo iaad ej juon nejin Anij kōn juon kōtmene eo n̄an mour indeeo. Kajjojo jon̄o̧k, men̄e ekoba jerbal, armej, piktokid, ak utiej, bajjōk ak jaorōk ilo tōōm̧ ko indeeo. Jab kālet n̄an jon̄e eok make ak ļōmņak kōn kwe make ilo tōōm̧ ko me relikūt jikin in juon kōttōbar me komaron̄ kōttōbare.
Em̧m̧aan ro jeū im jatū, im sister ro remaron̄ loe ak riiti ta eo ij ba ijin, ij kōtmene kwonej jeļā etke ritōl ro rej lewaj katak ko im kapilōk ko jej liwaj. Kōmij iakwe kom̧ im Jemedwōj Ilan̄ im Nejin, Jisōs Kraist, rej iakwe kom̧. Karōk eo Aer n̄an kōj ej “karōk in m̧ōņōņō eo eļap” (Alma 42:8). Karōk eo im kien ko Aer im kain̄i ko im bujen ko rej tōl ļo̧k kōj n̄an m̧ōņōņō eo eļap im lan̄lōn̄ eo ilo mour in im ilo mour eo ej itok. Āinwōt ro rikarejeran Jemed im Nejin, jej kwaļo̧k im kapilōk āinwōt Aer kar tōl kōj kōn Jetōb Kwojarjar. Ejjeļo̧k ad ikdeleel ijelļo̧kin kwaļo̧k ta eo em̧ool im n̄an rōjan̄ kom̧ n̄an kōm̧m̧ane ta Raar kōlaajrake āinwōt juon iaļ n̄an mour indeeo, “menin letok eo eļapata an Anij” (Katak im Bujen ko 14:7).
III.
En̄in bar juon waanjon̄ok eo ejjejet kōn ilju im jekļaj in jokālet ko kōm̧m̧ani kiiō. Waanjon̄ok in ej an kāālet eo eddo n̄an kōm̧m̧an kaarmejete rainin n̄an tōpar kōttōpar eo eaorōk ilju jekļaj.
Ilo juon kweilo̧k eo eļap an stake eo ilo Cali, Colombia, juon sister eaar kwaļo̧k an im ļeo naaj kar m̧areiki ikdeelel in m̧are ilo tampeļ, ilo iien eo ilo an tampeļ eo epaaktata pād ettoļo̧k ilo Peru. Ilo juon iien eaetok, raar kōjparok jāān n̄an wōnāān baj. Āliktata rej uwe ilo baj eo n̄an Bogotá, ak ke rej tōkāāk ļo̧k ijo, raar jeļā bwe eaar obrak baaj eo n̄an Lima, Peru. Remaron̄ kar ro̧o̧l n̄an m̧weeo ilo aer jab m̧are ak m̧are itulikin tampeļ eo. Jeraam̧m̧an, eaar bar wōr juon iaļ. Remaron̄ uwe ilo baaj eo n̄an Lima eļan̄n̄e rej kōņaan jijet ioon laļ ilo baj eo ium̧win ļalem raan im ļalem bon̄. Raar kāālet n̄an kōm̧m̧ane. Liin eaar ba eaar pen, men̄e jet ruwe raar kōtļo̧k jikin jijet ko aer bwe ren jijet bwe ren maron̄ babu ioon laļ.
Ta eo eaar kailbōk eō ilo kōnono in ennaan eo an sister in bwe liin eaar kam̧m̧oolol bwe e im ļeo pāleen ren maron̄ in etal n̄an tampeļ ilo jekjek in, kōnke ukōt jekjek eo raar en̄jake kōn gospel in im jekjek eo raar en̄jake kōn m̧are ilo tampeļ. Irooj eaar kōjeraam̧m̧an er kōn kajoor me eaar itok kōn kaarmejet. Liin eaar kwaļo̧k bwe raan ko aer ļalem n̄an tampeļ eaar juon tōprak eo eļap n̄an kōkajoorļo̧k mour in jetōb eo aer ijeļo̧kin eļōj loļo̧k ko n̄an tampeļ ko kar ejeļo̧k kaarmejet.
Ilo iien eo iaar ron̄ naan in kam̧ool in, iaar ļōmņak kōn oktak ko me ripālele ro rem̧m̧an ded rej dipļo̧ki eļan̄n̄e rej kōm̧m̧ani kālet ko jet—kajejto̧kjān kaarmejete eo eaorōk n̄an m̧are ilo tampeļ.
Em̧m̧an ro jeiū im jatū, jej kōm̧m̧ani kāālet ko ejjeļo̧k jem̧ļo̧kier ilo mour in, jet reļļap im jet reddik. Relikļo̧k, jemaron̄ lo ta oktak eo eļap jet iaan kāālet ko ad karkōm̧m̧an ilo mour ko ad. Jej kōm̧m̧ani kālet im jokālet ko eļan̄n̄e jej kalimjōk men ko reoktak im ļōmņake ijo renaaj tōl ie ļo̧k. Ilo kōm̧m̧ane, jenaaj ļoor kapilōk eo an Būreejtōn Russell M. Nelson n̄an jino juon kōļmenļo̧kjeņ.2 N̄an kōj, jem̧ļo̧k eo ej ilo iaļen bujen eo ilo tampeļ n̄an mour indeeo, menin letok eo eļaptata an Anij.
Ij kam̧ool bwe Jisōs Kraist im m̧ool ko ilo Pinmuur eo An im m̧ool ko jet ilo gospel in An indeeo ilo etan Jisōs Kraist, amen.