Reiļo̧k n̄an Jisōs Kraist

Jān Elder Kim B. Clark

Jān Jiljilimjuonn̄oul eo

Eļan̄n̄e jej reilo̧k n̄an Jisōs Kraist, Enaaj jipan̄ kōj mour kake bujen ko ad n̄an kakūrm̧ool kūr eo ad āinwōt elder ro ilo Israel.

Ke Jisōs eaar etetal iturin Capernaum¹ ijo eobrak kōn jarlepju in armej ro ipeļaakin E, juon kōrā eo elukkuun kar nan̄inmej ium̧win 12 iiō eaar leļo̧k pein im un̄n̄ūr kopā eo An. Im em̧ōkaj an mour.²

Jeje ko rekwojarjar rej kwaļo̧k bwe Jisōs, “ilowaan [kajoor eo] eo eaar ilo̧k jān [E],”³ “Ej oktak ilo bwiljin armej ro”⁴ im “reiļo̧k … bwe en lo lio eaar kōm̧m̧an men in.”⁵ “A ke kōrā eo ej lo e e jab tilekek,”⁶ eaar “bun̄ im̧aan, im kwaļo̧k im̧aan mejān armej otemjej.”⁷

Jisōs eaar ba n̄an e, “Nejū, am̧ tōmak ear kemour eok; kwōn ilo̧k ilo aenōm̧m̧an.”⁸

Jisōs Kraist eaar lo̧mo̧o̧ren kōrā in. Kōrā in eaar mour ilo ānbwin, ak ke Jisōs eaar oktakļo̧k bwe en lo e, kōrā in eaar kwaļo̧k an tōmak ilo E im Eaar kōmour e.⁹ Eaar kōnono n̄an e kōn iakwe, lo̧mo̧o̧ren e kōn kajoor eo An, im kar kōjeraam̧m̧an e kōn aenōm̧m̧an eo An.¹⁰

Em̧m̧aan ro jeiū im jatū, āinwōt rikabwijer priesthood eo ekwojarjar, jej bōk kūņaad ilo jerbal in lo̧mo̧o̧r in. Ilo tōre kein āliktata, em̧ōj an Irooj letok eddo in jerbal in n̄an ioon aeran aolep elder ro an Israel.¹¹ Ewōr juon ad jerbal jān Irooj—jerbal ļo̧k ippān sister ro jeid im jatid, n̄an ad jerbal in karejar ilo juon wāween eo ekwojarar ļo̧k, kōm̧ōkaj aiintok Israel ilo jim̧or ron̄ōl nuknuk eo, ejaake kapijuknene ko ad āinwōt jikin kōjparok tōmak im ekkatak gospel in, im kōpooj laļ in n̄an Itok eo Kein Karuo an Jisōs Kraist.¹²

Ilo aolep men otemjeļo̧k, Rilo̧mo̧o̧r eo eaar kwaļo̧k n̄an kōj iaļ eo: jej aikuj in reiļo̧k im jerbal n̄an Jisōs Kraist āinwōt An kar reiļo̧k im kar jerbal n̄an Jemān.¹³ Rilo̧mo̧o̧r eo eaar ba menin n̄an Rikanaan Josep:

“Reitok n̄an Eō ilo ļōmņak otemjeļo̧k; jab pere, jab mijak.

“Lali kinej kein rekar wākari ikatū, im barāinwōt jenkwan dila kā ilo Peiū im Neō; kom̧in tiljek, kōjparok kien ko Aō, im kom̧ naaj jolōte aelōn̄ in lan̄.”¹⁴

Ilo mour eo m̧okta, Jisōs eaar kallim̧uri Jemān bwe Enaaj kōm̧anm̧an ankilaan Jemān bwe en ad Rilo̧mo̧o̧r im Ripinmuur. Ke Jemān eaar kajjitōk, “Wōn eo Inaaj jilkinļo̧k?”¹⁵ Jisōs eaar uwaak:

“N̄a E, jilkinļo̧k Eō”¹⁶

“Jema, Ankilam en kōm̧m̧an, im aiboojoj eo en Am̧ indeeo.”¹⁷

Ilo aolepān mour eo An, Jisōs eaar mour kōn kallim̧ur in. Ilo ettā, meanwōr, im iakwe Eaar kwaļo̧k katak ko an Jemān im kar kōm̧m̧ane jerbal eo An Jemān kōn kajoor im mālim eo Jemān eaar leļo̧k n̄an E.¹⁸

Jisōs eaar leļo̧k būruwōn n̄an Jemān. Eaar ba:

“Ij iakwe Jema.”¹⁹

“Bwe iien otemjej Ij kōm̧m̧an men ko rej kabun̄būruon.”²⁰

“Iar itok … jab bwe In kōm̧anm̧an ankil Aō, a ankilaan [Jema, eo] ear jilkintok Eō.”²¹

Ilo en̄taan eo An ilo Getsemane, Eaar jar, “A en jab ankil Aō, a Am̧ wōt.”²²

N̄e Irooj ej kūr elder ro ilo Israel n̄an “Reitok n̄an Eō ilo ļōmņak otemjeļo̧k” im “lali kinej kein” ilo An ānbwin jerkakpeje, en̄in ej juon kūr n̄an oktak jān jerawiwi im jān laļ in im oktakļo̧k n̄an E im iakwe im pokake E. Ej juon kūr n̄an kwaļo̧k katak ko An n̄an kōm̧m̧ane jerbal in An ilo wāween eo An. Kōn menin, en̄in ej, juon kūr n̄an lōke E, leļo̧k ankilaad im būruwōd n̄an E, im kōn kajoor in pinmuur eo An jej erom̧ āinwōt E.²³

Em̧m̧aan ro jeiū im jatū, eļan̄n̄e jenaaj reiļo̧k n̄an Jisōs Kraist, Enaaj kōjeraam̧m̧an kōj bwe jen elder ro An ilo Israel—rettā bōro, remeanwōr, rejouj, im reobrak kōn iakwe.²⁴ Im jenaaj bōktok lan̄lōn̄ im kōjeraam̧m̧an ko n̄an gospel in An im Kabun̄ in An n̄an baam̧le ko ad im ro jeid im jatid jim̧or ilo ron̄ōl in nuknuk eo.

Būreejtōn Russell M. Nelson eaar kūr kōj n̄an reilo̧k n̄an Jisōs Kraist ilo wāween in: “Ejjeļo̧k men en epidodo ak kaju erom̧ rikaļoor ro rekajoor. Pedped eo ad aikuj in dim ilo Rilo̧mo̧o̧r eo im gospel eo An. Menin ej aikuj kijejeto ko ad kōļmenļo̧kjeņ n̄an reilo̧k n̄an E ilo aolep ļōmņak. Ak n̄e jej kōm̧m̧ane menin, pere ko ad im mijak ko ad rej jako.”²⁵

Rivet ej juon naan em̧m̧an. Ej meļeļein pen, n̄an dim im pen.²⁶ Jej kalimjōk wōt Jisōs Kraist im gospel eo An n̄an mour kake bujen ko ad.

N̄e mour kake bujen ko ad, rej im̧we aolep men otemjeļo̧k jej ba im kōm̧m̧an. Jej mour kōn bujen²⁷ eobrak kōn ļam̧ waan, aolep raan jerbal kōn tōmak me ej mije kōj ioon Jisōs Kraist: jar kōn tum̧wilaļ in bōro ilo Etan, kwokwoj ioon An naan, oktakļo̧k n̄an E im ukweļo̧k jān jerawiwi ko ad, kōjparok kien ko An bōk m̧ōttan kwojkwoj eo im kōjparok An Raan in Jabōt, kabun̄jar ilo An tampeļ ekwojarjar jon̄an wōt eo jemaron̄e, im kōjerbal An priesthood ekwojarjar n̄an jerbal n̄an ajri ro nejin Anij.

Jerbal in bujen kein rekōpeļļo̧k būruwōd im ad ļōmņak n̄an kajoor in pinmuur eo an Rilo̧mo̧o̧r n̄an im̧we eo an Jetōb Kwojarjar. Ļain im bar ļain ilo oktak ko an Rilo̧mo̧o̧r ilo lukkuun piktokid, jej jino lukkuun oktakļo̧k n̄an E, bwe bujen ko ad ren emourur ilo būruwōd.²⁸

Kallim̧ur ko jej kōm̧m̧ani n̄an Jemedwōj Ilan̄ rejino erom̧ kallim̧ur ko repen, rej erom ikdeleel eo ad eļap. Jemedwōj Ilan̄ ej kallim̧uri kōj n̄an kobrak kōj kōn kam̧m̧oolol im lan̄lōn̄.²⁹. Bujen ko ad rejako ad ļoori ak erom̧ pedped in katak ko jej iakwei me rej im̧we im tōl kōj n̄an ad mije wōt Jisōs Kraist.³⁰

Kain jerbal in wūjļepļo̧k in rej n̄an aolep, dik im rūtto. Kom̧ likao ro ro rej kabwijer Priesthood eo ekwojarjar an Aron, aolep men otemjeļo̧k ko iaar ba joteen in rej jerbal n̄an kom̧. Ij kam̧m̧oolol Anij kōn kom̧. Kwoj kōm̧m̧ane kain̄i im bujen ko rekwojarjar n̄an milien Armej ro Rekwojarjar ilo Raan-ko Āliktata kajjojo wiik. N̄e komij kōpooje, kōjeraam̧m̧ane, ak leto-letak kwojkwoj eo, jerbal in karejar, peptaij ilo tampeļ eo, karuwaineneik tok juon m̧ōttam̧ n̄an juon m̧akūtkūt; ak lo̧mo̧o̧ren juon iaan membōr in doulul eo am̧, kwoj kōm̧m̧ane jerbal in lo̧mo̧o̧r eo. Komaron̄ bar reiļo̧k n̄an Jisōs Kraist im mour kake bujen ko am̧ kajjojo raan. Ij kallim̧uri kom̧ bwe eļan̄n̄e kwoj kōm̧m̧ane, kwonaaj rikarejar eo Irooj ej lōke kiiō im, ilo raan eo ej itok, elder ro rekajoor an Israel.

Em̧m̧aan ro jeiū im jatū, ijeļā bwe menin emaron̄ in kailbōkbōk. Ak jouj keememej naan kein an Rilo̧mo̧o̧r: “I jab make iaō, bwe Jema ej pād Ippa.”³¹ Em̧ool ej āindein ippād. Jejjab make iaad. Irooj Jisōs Kraist im Jemedwōj Ilan̄ rej iakwe kōj, im Rej pād ippād.³² Kōnke Jisōs eaar reiļo̧k n̄an Jemān im kar kadedeļo̧k en̄taan in pinmuur eo eļap, jemaron̄ reiļo̧k n̄an Jisōs Kraist kōn lōke bwe Enaaj jipan̄ kōj.

Ejjeļo̧k iaad en ewāppen. Jet iien jej m̧ōjņo̧. Jej m̧ad im ebbeer. Jej likjab. Ak eļan̄n̄e jej reiļo̧k n̄an Jisōs Kraist kōn būruwōn ukweļo̧k, Enaaj kotak kōj, karreoik kōj jān jerawiwi, jeo̧rļo̧k ad bōd, im kōmour būruwōd. Ej kijenmej im jouj, An pinmuur in iakwe ejjamin jem̧ļo̧k im eban likjab.³³ Enaaj jipan̄ kōj mour kake bujen ko ad n̄an kakūrm̧ool kūr eo ad āinwōt elder ro ilo Israel.

Im bwe Jemed enaaj kōjeraam̧m̧an kōj kōn aolep men otemjeļo̧k rej An pepe—“men otemjeļo̧k … jim̧or ilo lan̄ im ioon laļ, mour eo im meram eo, Jetōb eo im kajoor eo, kar jilkinļo̧k jān ankilaan Jemān kōn Jisōs Kraist, eo Nejin.”³⁴

N̄e meram eo ekwojarjar im kajoor rej itok n̄an mour ko ad, jilu kabwilōn̄lōn̄ ko rej waļo̧k.

Kein kajuon, jemaron̄ loe! Kōn revelesōn jemaron̄ jino loe āinwōt an kar Jisōs lo kōrā eo: jen tulik n̄an būruwōn.³⁵ Ilo ad loe āinwōt an Jisōs loe, Ej kōjeraam̧m̧an kōj n̄an iakwe ro jej jerbal n̄an er kōn An iakwe. Kōn jipan̄ eo An, ro jej jerbal n̄an er renaaj loe Rilo̧mo̧o̧r eo im en̄jake iakwe eo An.³⁶

Kein karuo, ewōr ippād kajoor an priesthood. Ewōr ippād mālim im kajoor eo n̄an jerbal ilo etan Jisōs Kraist n̄an “kōjeraam̧m̧an, tōl, kōjparok, im kōmour ro jet” im bōktok kabwilōn̄lōn̄ ko n̄an ro jej iakwe n̄an dāpij m̧are ko ad im jokne an baam̧le ko.”³⁷

Kein kajilu, Jisōs Kraist ej itok ippād tok! Ijo jej etal ie ļo̧k, Ej itok. N̄e jej kwaļo̧k, Ej bar kwaļo̧k. N̄e jej kaenōm̧m̧an, Ej bar kaenōm̧m̧an. N̄e jej kōjeraam̧m̧an, Ej bar kōjeraam̧m̧an³⁸

Em̧m̧aan ro jeiū im jatū, ejjeļo̧k ke unin ad m̧ōņōņō? Jej! Jej kabwijer priesthood eo an Anij. Ilo ad reiļo̧k n̄an Jisōs Kraist, mour kōn kallim̧ur ko ad, im mije wōt E, jenaaj kobaļo̧k ippān sister ro ad n̄an jerbal in karejare eo ilo juon wāween eo ekwojarjar ļo̧k, aiintok Israel eo ejjeplōklōk ilo jim̧or rōn̄ōl in nuknuk eo, kōkajoorļo̧k im liāpe baam̧le ko ad, im kōpooj laļ in n̄an Itok eo Kein Karuo an Irooj Jisōs Kraist. Enaaj waļo̧k. Ij kam̧ool āindein.

Ij kiil kōn jar in jān būruwō, bwe kōj aolep,kajjojo, renaaj reiļo̧k n̄an Jisōs Kraist ilo aolep ļōmņak. Jab pere. Jab mijak. Ilo etan Jisōs Kraist, Amen.