Am̧ Bok in Ikkure in Priesthood
Ejake juon am̧ make bok in ikkure kōn ekōjkan am̧ nej kwaļo̧k kwe make āinwōt juon rikaļooor an Kraist.
Tijem̧ba eo ļo̧k, Būreejtōnji eo Kein Kajuon eaar kwaļo̧k ennaan eo ke ļaddik ro 11-iiō dettāer remaron̄ “jino kobaļo̧k ilo … Doulul eo an Priesthood eo an Aron … ilo ijjino in Jānwo̧de n̄e enaaj 12 aer iiō.”1
Eļak tōprak, ilo jinoin iiō in, ekar wōr ro 11 iiō dettaer raar ilbok kōn kar kōtmene eo ke ren kar pād wōt ilo Būraimere m̧ae raan in ļotak eo aer ej itok bōtaap rej kiiō ajeej e kwojkwoj eo ilo Jabōt āinwōt tikōn ro rekāāl tata.
Ij kōļmenļo̧kjen kōn wōn eo eļapļo̧k an ilbok kōn oktak in—tikōn ro ak jineer im jemāer. Enan̄in 80,000, tikōn kāāl, elōn̄ iaar repād ippād joteen in ilo Conference Center in eļap ak rej ron̄jake ak alooj kōn kein jerbal ko raan kein. Kōm ruwainene ilo jem-jati in an priesthood!
Oktak in ekōm̧m̧an bwe kweilok in en eo ilo bwebwenato—ainwōt ke ej ļōn̄tata ro rej kabwijer Aaronic Priesthood renan̄in kar pād ilo juon m̧wen̄an eo an Priesthood ilo kweilo̧k eļap. Ilo iien in em̧m̧an, N̄aij iokļo̧k ennaan in aō eļaptata n̄an likao ro ilo Priesthood eo an Aron.
Katak ko Ekkataki jān Ikkure ko
Āinwōt juon rijikuuļ, elōn̄ iami ej barāinwōt kōļapļo̧k kapāāl ko, ikdeelel ko, im limo ko ilo m̧akutkut ko jet ilo jikuuļ ak jikin katak ko, tiim ko, im kurup ko itulikin jikuuļ, kobaļo̧k ikkure ko.
Aolepān mour e aō eaar em̧m̧an ippā ikkure, n̄aij nōbar ro rej kōļapļo̧k jeļā ko aer ilo ikkure n̄an jon̄an eo me rej ikkure ilo ijoko reļļap. N̄an jet bwe ren lukkuun tijem̧ļo̧k ilo jabdewōt, kobaļo̧k ippān kapeel ko aer ebōk katak, kaarmejet, im elōn̄ awa n̄an kamelmel im ekkatak. Rikkure rōt in rej ron̄ naan ko reddo an rikatakin ro aer im rej m̧ōņōņō in likut turājet men ko rekōņaan kiiō n̄an men eo eļapļo̧k ilju jakļaj.
Ewōr membōr in Kabun̄ im ro rikabjer priesthood eo jejeļā em̧ōj aer en̄jake tōprak in ilo ijo eutiej an rikkure ro retijem̧ļo̧k. Elōn̄ waanjon̄ok ko rem̧m̧an, bōtaab ij kwaļo̧k wōt jejjo n̄an kōjpārok iien. Komaron̄ kile jet iaan rikkure rein: ilo iākiu ,Jeremy Guthrie im Bryce Harper; ilo basketball—Jabari Parker im Jimmer Fredette; ilo soccer, Ricardo Rojas; ilo ikkure ko an rugby, William Hopoate; im ilo football, Taysom Hill im Daniel Sorensen. Kajjojo kar leļo̧k men ko remman n̄an ikkure eo an.
Ilo aer lukkuun tōprak ilo ikkure ko aer, rikkure rein remaron̄ kar ro jinoin tata n̄an kwaļo̧k ke rejjab jet rikkure ro ak rej armej ro rewānik. Raar lukkuun kate er bwe ren em̧m̧anļo̧k ilo ikkure ko aer—im mour kōn gospel in. Rej jutak eļan̄n̄e rej tūppo̧k im rej kajjieon̄ niknik n̄an jem̧ļo̧kin.
Lin̄uri Bok in Ikkure eo
Ilo tiim in ikkure ko, rej kwaļo̧k ikkure ko ekkar n̄an juon jekjek in ikkure im kobaik aolep ilo juon bok in ikkure. Rikkure ro rej katak jerbal ko aeer n̄an kajjojo ikkure. Rikkure ro rej lukkuun katak bok in ikkure eo bwe n̄e ebar wōr ikkure, rejeļā ta ren kōm̧mane, ia im ta ren kōm̧m̧ane.
Pija jān Dave Kaup/REUTERS/stock.adobe.com
Ilo juon wāween eitōnļo̧k wōt in, kōj ro rej kabwijer priesthood eo ewōr ad tiim (juon doulul) im bok in ikkure (jeje ko rekwojarjar im naan ko an rikanaan ro raan kein).
Kwoj ke kōkajoor ro ilo tiim eo am̧?
Ewi jon̄an am̧ kar ekkatak bok in ikkure eo am̧?
Kwoj ke lukkuun meļeļe ta jerbal eo am̧?
Jelmae Menin Jum̧ae
N̄an kōļapļo̧k wōt waanjoon̄o̧k in, rikatakin ro rem̧m̧an rejeļā kajoor im mōjņo̧ ko an tiim eo aer barāinwōt ko an ro rijum̧ae. Rej kōm̧m̧an karōk n̄an ikkure me enaaj leļo̧k n̄an er eļap kōta n̄an wiin. Ak kwe?
Kwōjeļā ta kapo ko kwoj m̧ōjņo̧ kake, im komaron̄ antoone ļo̧k ekōjkan an nej rikowadon̄ eo kajjieon̄ kōm̧akut eok im kōm̧ōjņo̧ik eok. Em̧ōj ke am kōm̧man juon karōk in ikkure im juon bok in ikkure bwe kwon jeļā elmen am̧ nej jerbali mennin jumae ko iooni?
Ilo am̧ iooni elōn̄ kain kapo ko—men̄e n̄e kwoj pād ippān ro jet ak n̄e kwoj make iaam̧ im kalimjok tv—kwōjeļā karōk eo am̧. N̄e juon m̧ōttam ej ba idaak arko̧o̧ļ ak bōk uno kajoor, kwōjeļā ikkure eo. Kwaar ekkatak im jeļā uwaaki.
Kōn juon karōk, juon bok in ikkure, im lokjak eo epen n̄an kōm̧m̧ane ijo ko̧ņaam̧, kwonaaj lo bwe kapo edikļo̧k an kajoor ioom̧. Em̧ōj am̧ kōm̧m̧ane kāālet eo kōn wāween am nej uwaak im ta eo kwonaaj kōm̧m̧ane. Koban aikuj in kālet aolep iien kwoj jelm̧ae menin kapo.
Juon iaan Jon̄oulruo ro eaar kwaļo̧k juon bwebwenato me ej pijaikļo̧k katak in. Āinwōt pris ilo high school, eaar iaio ippān ro m̧ōttan. Ālkin aer kar wia kijeer, raar ettōr ke juon iaar ej ba ren aikuj tōn alooje juon pija. Jōrrāān eo ke ejeļā ke emo an kar alooje pija in. Mekarta n̄e eaar kajju en̄jake ikum̧kum̧ kōn jekjek eo, eaar kar karōk n̄an menin. Peij in eaar kajju tok jen lowaan bok in ikkure in priesthood eo an.
Bōk kūtwōn im kūrtok peran eo an, eaar ba, “ijjab ikdeelel ilo pija ne. Joļo̧k eō ilo m̧weo-im̧ō,” im rekar ekūtwe. Juon ikkure eļam waan tōl ļo̧k n̄an anjo. Iiō ko tokālik, juon iaan ro m̧ōttan bon̄ōn̄ eo ekar kōmeļeļe wāween an kar waanjoon̄o̧k in kar juon kajoor eo eļap n̄an e bwe en jelm̧ae ilo kajoor juon jekjek einļo̧k wōt in ilo jekjek ko an make.
Peij jān Bok in Ikkure eo
Iaar kajjitōk ippān jejjo iaan Rijilōk ro mōtta n̄an kwaļo̧k ikkure ko me komaron̄ in kobaik ilo bok in ikkure eo am̧. Erkein ej jet iaan elmakot ko aer reim̧we:
-
Jar aolep raan kōn eļapļo̧k meram im naan in kam̧ool kōn Jisōs Kraist.
-
Lukkuun ron̄jake katak ko an ro jinem in jem̧am, bisop eo am̧, im ritōl ro am̧ im ilo Doulul eo an Likao ro.
-
Eļļ̧o̧k jān pija ko renana im men ko renana ilo internet.
-
Keememej kallim̧ur ko kwaar kōm̧m̧ani ippān Anij, im jerbal n̄an kōjpāroki.
-
Katak bwebwenato ilo jeje ko rekwojarjar kōn rikanaan ro, im anōk men ko rem̧m̧an kakeer.
-
Kōjeraam̧m̧an ajri ro nejin Jemedwōj Ilan̄ ilo jerbal in jipan̄.
-
Pukot ro m̧ōttam̧ rem̧m̧an me rej jipan̄ eok erom̧ eo kwoj kōņaan erom̧.
-
Kwon tijōm̧ļo̧k ilo FamilySearch, im kappukōt ro nukum etto.
-
Karōk jikin ko n̄an kakije jān men ko renana.
-
Iakwe im jipan̄ kōkajoor mem̧bōr ro jet im doulul in priesthood eo am̧.
iaar bar kōnono ippān rikkure ro im jaar alooje pijaer m̧oktaļo̧k. Ij loe an kaikdeelel bwe raar jab kwaļo̧k kadkadier kōn ta eo rej kōm̧mane, āinwōt rikkure ro retijōm̧ļo̧k, bōtaab kōn wōn er, āinwōt ļadik ro nejin Jemedwōj Ilan̄ im ro rikabwijer priesthood eo an Anij.
Kiō jen ron̄jake ļōm̧ņak kein aer:
-
Jimmer Fredette, en̄iin juon tikōn eo ej ekkatak kilen kōļļaak an tie, ej ba:“Iaar jeļā n̄an atartar wōt “ilo jeļaļo̧kjen im tōmak e aō kōn m̧ool eo an gospel in. Menin eaar tōl eō n̄an … juon rikabwijer priesthood ekarbab im elaptata—juon waanjoon̄o̧k em̧m̧an.”
-
Bryce Harper, āinwōt juon ļeo pālele, ej jeje: “Iaar ļōm̧ņak būn̄būn̄, jeram̧m̧an, im juon nebar in MVP enaaj kar kamōņōņōik eō. Juon men eaar jako. Kōn menin, iaar … kapopo im [deļo̧n̄e] tam̧peļ eo. N̄aij kio pād ilo juon iaaļ n̄an [jepļaak] n̄an Jema ilo Lan̄ im baam̧le indeo—eo me ej lan̄lōn̄ eo eļaptata ilo laļin!”
-
Daniel Sorensen, āinwōt juon mijenede, ejba: “Juon bok in ikkure eo em̧m̧an ej juon karok me ej kōjerbal tōļan im kajoor ko an kajojo ro uwaan tiim eo. … Ilo aō ekkatak im mour kōn katak ko an gospel eo an Jisōs Kraist, Imaron̄ jeļā wāween kōjerbal kajoor ko aō n̄an jipan̄ ilo priesthood.”
-
Jeremy Guthrie, juon mijen būreejtōn, ekar ba: “Āinwōt juon tikōn 12 iiō detta … [iaar en̄jake] an Jetōb kamool n̄an n̄a [bwe] ‘en̄iin ej iien eo … n̄an maanjapopo in ioon Anij.’2 Karōk eo ej tōmak ilo Anij ilo m̧akūtkūt [im] ukweļo̧k ilo Rilo̧mo̧o̧r. … Bok in ikkure in epād ilo jeje ko rekwojarjar im bar ilo rikanaan ro remour.”
-
Jabari Parker, en̄in ej iien ekkapit eo an n̄an opiij eo an elder, ej ba, “ijjab maron̄ antoone armej eo inaaj kar erom̧ eļan̄n̄e iaar jab kōm̧m̧ane jookālet eo bwe n̄ain peptaij. … Ilukuun mōņōņō bwe Anij epād ilo mour eo aō n̄an tōl eō aolep raan.”
-
Ricardo Rojas, jerbal āinwōt juon branch būreejtōn, ej ba: “kōn priesthood eo an [Anij] [jemaron̄] jipan̄ ilo jerbal in An. Kar kūr n̄an kōj bwe jen ‘kajoor im peran em̧m̧an’3 ilo jojomar e mool.” Menin ekar jipan̄e jeram̧m̧an ilo jim̧o̧r jikin iakiu eo im āinwōt juon rikabwijer priesthood.
-
Taysom Hill, āinwōt juon mijinede, ej en̄jake ke gospel an Jisōs Kraist eaar jerbal n̄ane āinwōt juon bok in ikkure n̄an mour eo an. Eaar ba, “Tōmak ilo karōk [Anij an] im kōm̧m̧an jon̄an wōt aō maron̄ n̄an kōm̧mane ijo aō ie eaar letok n̄an eo juon en̄jake in aenōm̧m̧an eļap im monono ilo mour e an, ilo aō jeļā ke Anij emonono kōn kijejeto ko aō.”
-
William Hopoate, ilo kōjeram̧m̧an in aje eo an ļadrik eo nejin ippān emen epepen, ej ba bwe gospel in ejipan̄ e “kwaļo̧k kadkad in karōk eo an rijumae ro im ej letok kajoor ilo jetōb n̄an jelmae made ko rekkan̄ im emmanļo̧k ad jipan̄ ro jet.”
Ak kwe? Kwoj ke kile kadkadum̧ eutiejļo̧k im kwojarjarļo̧k āinwōt nejin Anij, rikabwijer priesthood eo An ekwojarjar? Kōn kadkad in indreo in ilo kōļmenļo̧kjeņ, kōm̧m̧ane juon am̧ karōk in ikkure im bok in ikkure eo an priesthood me enaaj tōl eok ilo iien kapo im kowado̧n̄. Ļōmņak jim̧or kōn jekjek in kadeļo̧n̄ im bōbrae.
Jekjek in kadeļo̧n̄ ej jipan̄ kōkajoor naan in kamool kōļapļo̧k tokjān n̄an pād wōt ilo iaļ eo ejimwe. Waanjon̄ak ekūtbuuj jar aolep raan, katak jeje ko rekwojarjar, pād ilo mōnjar eo im tampeļ, kōļļā juon-m̧ōttan jon̄oul, im ļoor kapilōk ko loe ilo bok jidikdik in N̄an Kōkajoorļo̧k Jodikdik ro .
Jekjek in bōbrae kadeļo̧n̄ ekoba karōk moktaļo̧k ekōjkan am̧ nej jelm̧ae kapo. N̄e kapo eok n̄an kajjitōkin jeļā ko am̧ make, kwojeļa kadede ta kwoj kōm̧m̧ane.
Kwōj aikuji bok in ikkure n̄an menin.
Jab en̄jake in jar rainin ke? Iien n̄an madmōde ikkure you kwaar karōk kadede kake.
Kwoj ke en̄jake an m̧ōjņo̧ ļo̧k am̧ naan in kam̧ool? Ewōr am̧ ikkure n̄an menin. Kwōjeļā ta kwoj kōm̧m̧ane.
Tijem̧ļo̧k Imejān Anij
Kom ej rikabwijer priesthood eo an Anij ekwojarjar. Kijejeto eo am̧ n̄an dāpdep wōt ilo aen in dāpdep eo enaaj ukōt eok n̄an kwojarjar eo me kar ejaake kwe n̄an erom̧.
Ejeļā wōn kwe im ej iakwe eok. Enaaj kōjeraam̧m̧an eok im tōl bun̄tōn ne ko am̧.
Komaron̄ ļōm̧ņak ke kwojjab aurōk, bwe ejjab kwe all-star. Bōtaap menin ejjab m̧ool. Kwojjab jeļā Anij eaar ba, “Men ko rem̧ōjņo̧ an laļ naaj waļo̧ktok im ruprupe ro rellāj im kajoor,”?4
Kōn menin, kwoj ke en̄jake mōjņo̧? jejtokjān? Jeram̧m̧an, em̧ōj am̧ tōpar ļain eo!
Kwoj ke en̄jake jab aorōk? jejļo̧k tokjān? Komaron̄ eo Anij eaikuji.
Ta juon waanjoon̄ak em̧m̧an ļo̧k jān an David kar deļo̧n̄e jikin pata eo ņae juon rijum̧ae eo ekamijak, Goliath? Lōke Irooj, im kōn juon karōk, David eaar jab lo̧mo̧o̧ren e wōt ak bar jar in tariņae eo an Israel!5 Jeļa bwe Irooj enaaj pād wōt ippam̧ eļan̄n̄e kwoj kūrtok am peran n̄an pād ilo kumi eo An. “Eļan̄n̄e Anij ej pād ippād, wōn enaaj jum̧aeik kōj?”6
Emaron̄ kōppeļo̧k kōjem̧ jipan̄ kōj kappukōt kajoor im maron̄ ko jaar jab jeļā ke ewōr ippād.7
Ron̄jake rikatakin ro am̧—jinem im jem̧am̧, bisop eo, im ritōl ro an Doulul eo an Likao. Katake bok in ikkure eo. Riiti jeje ko rekwojarjar. Ekkatak naan ko an rikanaan ro raan kein. Ejake juon am̧ make bok in ikkure kōn ekōjkan am̧ nej kwaļo̧k kwe make āinwōt juon rikaļooor an Kraist.
Jeļā moktaļo̧k kōn ikkure ko kwonaaj kōjerbali n̄an kōkajoor jetōb eo am̧ im bōbrae kapo an rikapo eo.
Kōm̧m̧ane menin im Anij enaaj kōjerbal eok.
Kiiō, bōlen elōn̄ rej joļo̧k er make jān gospel in im etal. Jet remaron̄ jijjōt ijoko rettoļo̧k im alooje ikkure eo. Jet remaron̄ kālet in jijōt ilo jea ko m̧aan, jekdoon n̄e rikatakin eo em̧ōj an kar kajjieon̄ kōdeļo̧n̄ er.. N̄aij karuainene eok n̄an lo̧mo̧o̧ren, rie, im iakwe er āinwōt ro mōttam̧ ilo tiim eo!
Jet rekōņaan deļo̧n̄e ikkure—im rej. Ta eo eaorōktata ejjab ewi jon̄an aer jeļā ak aer m̧ōņōņō in likut er make ilo jikin ikkure eo. Rejjab kōttar aer kūr nōm̧ba ko aer bwe rejeļā kōn eoon eo me ej ba, “eļan̄n̄e ewōr ami ikdeelel n̄an jerbal n̄an Anij ej kūr kom̧ n̄an jerbal in.”8
Komaron̄ likūt eok make ļain eo.
Kwoj kōm̧m̧ane menin ilo am̧ ekkatak im kōjerbal am bok in ikkure in priesthood.
Ilo am̧ etal ilo iaļ eo ļo̧k kwonaaj tūpo̧k im wōtlo̧k—bōlen elōn̄, lukkuun lōn̄ kattōn. Kwojjab wāppen; wōtlo̧k ej m̧ōttan wāween eo me ej kōkāāl eok im jerbal ilo juon wāween eo maron̄ kōkōm̧anm̧anļo̧k im ļapļo̧k jerbal ilo jouj. Rilo̧mo̧o̧r im Pinmuur eo an rej letok iaļ n̄an eļļā jen bwōd ko ad ilo ad ukweļo̧k ilo mool.
Rikkure ro reļļap rej jooļo̧k buki jima awa in kōkm̧anm̧an ļo̧k juon men jidikdik ilo ikkure eo aer. Āinwōt juon rikabwijer priesthood eo, kwoj aikuj ejja kōlm̧enļo̧kjen rōt in. Eļan̄n̄e kwoj likjab, ukweļo̧k im katak jāne. Ekkatak bwe kwon em̧m̧anļo̧k. Lukkuun m̧ool, ijene ej am̧. Kwonaaj ke katake bok in ikkure eo?
Ij rōjan̄ eok: Lōke Irooj. Kōņak nuknuk in tariņae an Anij,9 im deļo̧n̄e ikkure eok.
Ejjab lōn̄ ro rej ikkure ilo ikkure ko reļļap, ak n̄e ej itok n̄an ekkatak, elōn̄ ro me rej kālet n̄an ļoor Kraist.
Ilo mool, mijen eo am̧ in ilo mour in—n̄an katak wāween ko an Anij, deļo̧n̄e iaļ in kaļoor eo, im kōttōbar n̄an mour ekkar n̄an karōk eo an Anij. Anij enaaj jipan̄ im kōjeram̧m̧an eok ilo am̧ reilo̧k n̄an E. Komaron̄ kōm̧m̧ane menin kōnke kwoj juon eo etijem̧ļo̧k imaan Mejen.
N̄aij jar bwe kwonaaj kōm̧m̧ane kallim̧ur n̄an mour karbab n̄an priesthood eo ekwojarjar me kwoj kabwijere im kōttōbar n̄an kōm̧m̧ane ijo koņaam̧ ekwojarjar aolep raan. N̄aij kōjeraam̧m̧an eok kōn maron̄ im ikdeelel n̄an kōm̧m̧an menin. N̄aij kobaikļo̧k naan in kam̧ool in aō kōn kajoor in priesthood eo kwoj kabwijere, kōn rikanaan ro remour, im kōn Jisōs Kraist im ijo Koņaaņ āinwōt ad Rilo̧mo̧o̧r im Ripinmuur. Ilo etan Jisōs Kraist, amen.