Tiljek ņae Jatiljek
Ilo an ļapļo̧k an im̧we ko an laļ in bōktok nana, jej aikuj wōnm̧aanļo̧k kōn aolep kijejeto n̄an pād wōt ilo iaļ eo me ej tōlļo̧k kōj ilo kōjparok n̄an Rilo̧mo̧o̧r eo ad.
Iaar loe juōn jain ilo wūntō in juōn m̧ōn wia ej ba, “Happiness, $15.00.” Iaar lukkuun ikdeelel n̄an jeļā ewi jon̄an m̧ōņōņō imaron̄ wiaki kōn $15 ke iaar deļo̧n̄ im lale. Ta eo iaar loe ej bujin kein tōrājab ko redik o̧ņeer im jolōt dikdik ko—ejeļo̧k juon men en iaar loe emaron̄ bōktok n̄an eō kain m̧ōņōņō eo me jain eo ej kwalo̧k! Ium̧win iiō ko m̧aantak, iaar kōļmenļo̧kjeņ elōn̄ katten kōn jain eo im wāween an pidodo n̄an kappukot m̧ōņōņō ilo men ko redik im an jidik wōt iien. Āinwōt membōr ro an Kabun̄ eo an Jisōs Kraist im Armej ro Rekwojarjar ilo Raan-ko Āliktata, jejeram̧m̧an bwe jejeļā elmen kappukōt lukkuun m̧ōņōņō im ia eo epād ie. Jej loe ilo ad kōjparok ad mour kōn gospel eo Irooj im Rilo̧mo̧o̧r eo ad, Jisōs Kraist ekar kajutak e, im ilo kate kōj n̄an erom̧ āinwōt E.
Ewōr juon m̧ōttam eo eaar injinea in tōreein. Juon raan ke eaar ettōr kōn juon tōreiin ilo iaļ eo an, eaar loe juon wa ebōjrak ilo iaļ in tōreiin eo im̧aan. Eaar m̧ōkaj im kile ke wa eo eaar kun im jab maron̄ em̧m̧akūt jān iaļ eo. Eaar m̧ōkaj in kōm̧m̧an bwe tōreiin eo en pād ilo iddin̄, me ej būrāāk ilo men ko ruo im rej aitokļo̧k jilu-ko̧ta in m̧ail (1.2 km) itulikin injin eo, ej ineek 6,500 tōn (5,900 metric tons). Ejjeļo̧k kar kōtmene bwe tōreiin eo enaaj kar maron̄ bōjrak m̧okta jān an dibōj wa eo, im ekar. Em̧m̧an bwe armej ro ilo wa eo raar ron̄ ainikien tōreiin eo im kar ko jān wa eo m̧okta jān an jōrrāān. Ke injinea in ej kōnono ippān police man eo n̄an leļo̧k melele, juon kōrā ellu ej itok n̄an ippāer. Liin ej lam̧ōj im ba eaar lo ta eo eaar waļo̧k innām kamool bwe injinea eo eaar jab kajjieon̄ n̄an kōm̧m̧an jabdewōt bwe en jeer jān wa eo!
Ealikkar, eļan̄n̄e injinea in enkar jeer jān iaļ in tōreiin eo, aolepān tōreiin eo emaron̄ kar jōbwābwe jān iaļ eo im tōrein eo enkar bōjrak ilo kauwōtata. Em̧m̧an bwe jikin ettōr eo ilo iaļ eo ej dāpij wiiļ in tōreiin eo ilo an ettōr m̧aanļo̧k n̄an ijo ej jibadōke jekdoon ta ko rej itok ilo iaļ eo. Jeram̧m̧an n̄an kōj bwe jej bar pād ilo iaļ in, juon iaļ in bujen em̧o̧j ad kallim̧ur kake ke jaar peptaij āinwōt ro uwaan Kabun̄ eo an Jisōs Kraist im Armij ro Rekwojarjar ilo Raan-ko Āliktata. Men̄e jet iien jenaaj ioon jet mennin kapan̄pan̄ ko iaļ eo ad, iaļ in enaaj kōm̧m̧an ad wōnm̧aanļo̧k wōt n̄an wōņāer eo jej jibadōke eļan̄n̄e jenaaj pād wōt ie.
Ettōņak kōn wōjke in mour eo ej kwaļo̧k elmen an jatiljek maron̄ tōlļo̧k kōj jān iaļ in bujen eo. Ļōm̧ņak bwe aen in dāpdep im iaļ eo eaidik im eaedin̄, ak iaļ in bujen eo, rej kajju tōl n̄an wōjke in mour eo, ijo aolep kōjeram̧m̧an ko rej itok jān Rilo̧mo̧o̧r im Pinmuur eo An epeļo̧k n̄an ro ritōmak. Ebar waļo̧k ilo visōn eo juon reba in dān ej pinej jenkwan ettoonon ko an laļ. Jeje ko rekwojarjar ej kōm̧ļeļe bwe reba in “eaar ettōrļo̧k” ial eo aaet eļļā jān “turin” wōjke eo, im jab n̄an e. Laļ in ej eddo kōn kein kōm̧ad ko me rej barāinwōt m̧ōņe ro kāālet er, kōm̧m̧an bwe ren kōwaan aer mour kōn bujen ko aer—aeet tōlļo̧k er n̄an turin wōjke eo, bōtaap jab n̄an wōjke eo. N̄e jejjab tiljek ilo mour kōn bujen ko ad ilo jejjōt, kijejeto ko ad rejatiljek remaron̄ tōlļo̧k kōj n̄an iaļ eo emo̧ ak etaļ ippān ro em̧ōj aer deļo̧n̄e m̧weo eļap. Eļan̄n̄e jejjab tiljek jemaron̄ nej rūm̧ļo̧k ilo m̧wilaļ in reba eo etonoon.1
Elōn̄ juon iaļ in tiljek im juon iaļ in jatiljek n̄an kōm̧m̧an aolep men, ekoba mour kōn gospel in. Ilo ad ļōm̧ņak kōn kallim̧ur ko ad n̄an Rilo̧mo̧o̧r, jej tiljek ke ak jatiljek? Kōn jekjek in kanniōk in ad, jet iien jej ke kōkm̧anman m̧wiļid, jet iien jej ba ke kōm̧m̧an ko ad reppād ilo jab kaiikdeelel ak kobaik juon men em̧m̧an ippān juon men ejjab lukkuun em̧m̧an? Jabdewōt iien jej ba, “ijoke,” “ijelo̧kin,” ak “bōtaap” n̄e ej jejjet n̄an ļoor kapilōk eo an rikanaan ro ad ak tiljek ilo mour kōn gospel, lukkuun m̧ool jej ba, “Naan in rōjan̄ ņe ejjab ekkar n̄an n̄a.” Jemaron̄ kōwaan men kein ilo ad kōņaan, bōtaab m̧ool eo ej, Ejjeļo̧k juon iaļ ejim̧we n̄an kōm̧m̧ane men eo ebōd!
Unin tōl eo an Jodikdik ilo 2019 ej itok jān Jon 14:15, ijo Irooj ej ba: “Eļan̄n̄e kwōj iakwe eō, kōjparok kien ko aō.” Eļan̄n̄e jej iakwe E ilo ad ba, ta jejjab maron̄ kwaļo̧k iakwe ilo ad tiljekļo̧k jidik ilo mour kōn kien ko An ke?
Tiljek ilo mour kōn gospel ejjab meļeļein ke jān kien kijn̄en̄e. Meļeļein ke en ekkar ļōm̧ņak ko ad im m̧wilid āinwōt rikaļoor ro an Jisōs Kraist. Ilo ad lin̄ūri oktak eo ikōtaan tiljek im kōwaan ilo ad mour kōn gospel, erkein jet ļōm̧ņak n̄an kōļmenļo̧jeņ kake:
Jej ke tiljek ilo kabun̄jar ko ad ilo raan in Jabōt im ilo ad kōppopo n̄an bōk kwojkwoj eo kajojo wiik?
Jemaron̄ ke tiljekļo̧k ilo jar ko ad im katak jeje ko rekwojarjar ak ļapļo̧k ad kōjerbal Itok Ļoor Eō—N̄an Kajjojo im Baam̧le ko?
Jej ke tiljek ilo kabun̄jar ko ad ilo tam̧peļ, im jej ke tiljek ilo ad mour kōn bujen ko jaar kōm̧mani jim̧o̧r ilo peptaij im ilo tam̧peļ? Jej ke tiljek ilo paotokid im em̧m̧an in ad nuknuk, eļaptata ilo ijoko im jekjek ko rekwojarjar? Jej ke tiljek ilo wāween ad kōņak garment eo an tam̧peļ ekwojarjar? Ak kōm̧m̧an ko an laļ in rebōklōn̄tak eļapļo̧k jatiljek ilo m̧wil?
Jej ke tiljek ilo ad jerbal in karejar n̄an ro jet im wāween ad kōm̧m̧ani jerbal in kūr ko ad ilo Kabun̄ in, ak jej ke jatiljek ilo kūr ko ad n̄an jipan̄?
Jej ke tiljek ak jatiljek ilo ta ko jej riit im alooji ilo TV im ilo kein alooj im device ko nejid? Jej ke tiljek ilo ad kōnono? Ak jej ke jatiljek im kautiej naan eddo im nana?
Bok in N̄an Kōkajoorļo̧k Jodikdik ro ewōr ie kakien ko me, n̄e ļoori ilo tiljek, enaaj bōktok eļap jeram̧m̧an im jipan̄ kōj pād wōt ilo iaļ in bujen eo. Men̄e kar jeiki n̄an jodikdik ro, kakien kein rejjab jem̧ļo̧k n̄e jej etal jān būrookram ko an Likao ro im Jiron̄ ro. Rekkar n̄an kōj kajjojo aolep iien. Etali kakien kein emaron̄ letok bar jet wāween n̄an ad maron̄ tiljekļo̧k ilo mour kōn gospel in.
Jejjab lelaļļo̧k manit kein ad n̄an kōm̧m̧an bwe jen jab jeno̧lo̧k ak n̄an kōm̧m̧an bwe juon en aenōm̧m̧an. Jej rikaļoor ro an Jisōs Kraist, im āinwōt in jej ļōn̄aj lōn̄tak ro jet n̄an jikin ekwojarjarļo̧k ijo remaron̄ bar bōk leen kōjeraam̧m̧an ko reļļap.
N̄aij kūr kajjojo iaad n̄an kappukōt tōl eo an Jetōb Kwojarjar n̄an jeļā ta menin kōkm̧anm̧anļo̧k ko jej aikuj n̄an tiljekļo̧k ilo kajejjōt mour ko ad ippān bujen ko ad. N̄aij barāinwōt akweļap ippam̧ bwe kwon jab kōnanaik ro jet rej bōk ejja iaļ in wōt. “Ekajet ej aō, Irooj eaar ba.”2 Kōj kajjojo jepād ilo iaļ in eddōk im oktak.
Bwebwenato eo ilo Bok in Mormon kōn riAmlijai ro raar bun̄ jān tōmak em̧m̧an ippa. llo wāween kwaļo̧k n̄an ro jet ke ejako aer koba ippan Jisōs Kraist im Kabun̄ eo An, raar kōkaļļe dam̧aer kōn būrōrō bwe aolep ren loe.3 Ilo juon jekjek eo eoktak, im āinwōt rikaļoor ro an Jisōs Kraist, elmen ad kōkaļļeik kōj make? Epidodo ke an ro jet ro lo pija eo An ilo kōm̧m̧an ko ad im jeļā wōn eo jej pinej-jenkwan ilo wāween ad tiljek kōn mour ko ad?
Āinwōt armej in bujen ro, kar jab karōk bwe jen kobaik kōj ippan laļ in. Em̧ōj kar kūr kōj “jet armej ro roktak”4—juon mennin nōbar! Ilo an ļapļo̧k an im̧we ko an laļ in bōktok nana, jej aikuj wōnm̧aanļo̧k ilo tiljek n̄an pād wōt ilo iaļ eo me ej tōlļo̧k kōj n̄an Rilo̧mo̧o̧r, kōdepakpak ļo̧k kōtaan ad mour in bujen eo ad jān im̧we ko an laļ in.
Ilo aō ļōm̧ņak kōn m̧ōņōņō ejeļo̧k jem̧ļo̧kin, ij kile bwe jet iien jej lo ad pād ilo jōbwābwe. Marok jilōn̄lōn̄ rej waļo̧k wōt ilo ad etal ilo iaļ in bujen in. Kapo im jatiljek remaron̄ kōm̧m̧an bwe jen ukōt iaļ eo ad n̄an marok ko an laļ im ettoļo̧k jān iaļ in bujen eo. Ilo iien eo enaaj waļo̧k endein, rikanaan eo ad ejitōn bōro, Būreejtōn Russell M. Nelson, ekar kūr kōj n̄an ro̧o̧l tok n̄an ial in bujen in im m̧ōkaj in kōm̧m̧ane. Ij kamoolol kōn mennin letok in ukweļo̧k eo im kajoor eo an Pinmuur eo an Rilo̧mo̧o̧r.
Jejjab maron̄ mour juon mour ewāppen. Juon wōt em̧m̧aan eaar maron̄ mour wāppen ke eaar pād ilo laļ in telestial. Kar Jisōs Kraist. Men̄e jejjab wāppen, ro jeiū im jatū, jemaron̄ erreeo: erreeo n̄an bōk kwojkwoj eo, erreeo n̄an kōjeraam̧m̧an ko an tam̧peļ, im erreeo n̄an bōk revelesōn an juon make.
Kiin̄ Benjamin ekar kamool kōjeram̧m̧an im monono eo me ej itok n̄an ro rej tiljek n̄an ļo̧o̧r Rilo̧mo̧o̧r eo: “Im eļapļo̧k, ikōņaan bwe kom̧in ļōmņak kōn jekjek eo ejeraam̧m̧an im ekam̧ōņōņō an ro raar kōjparok kien ko an Anij. Bwe lo, rej jeraam̧m̧an ilo aolep men ko otemjeļo̧k, jim̧or ilo kanniōk im jetōb; im eļan̄n̄e renaaj dāpdep wōt ilo niknik n̄an jem̧ļo̧kin naaj bōk er ilo lan̄, bwe ren maron̄ jokwe ippān Anij ilo wāween m̧ōņōņō eo ejjeļo̧k jem̧ļo̧kin.”5
Jemaron̄ ke wiaik mōņōņō kōn $15.00? Jaab, jejjab maron̄. Mōņōņō eo em̧wilaļ im ejjeļo̧k jem̧ļo̧kin ej itok jān tiljek in mour kōn gospel an Jisōs Kraist. Ilo etan Jisōs Kraist, amen.