Kalōk juon Jikin Koņe im Likōpejn̄ak n̄an Mour in Jetōb
N̄e jej mour kōn gospel eo an Jisōs Kraist, n̄e jej kōjerbal Pinmuur eo an Rilo̧mo̧o̧r im bun̄ m̧aanļo̧k kōn tōmak, jej bōk kajoor ņae rikapo eo.
Ro jeiū im jatū rejitōnbōro, ilo an epaak an jem̧ļo̧k kweilo̧k in eļap, Ij leļo̧k aō kam̧m̧oolol Jemedwōj Ilan̄ kōn kapilōk, m̧ool ko, im revelesōn ko kar kōnono kaki ilo lokatok in ilo raan ko ruo rem̧ootļo̧k. Em̧ōj katakin kōj jān ro karejaran Anij n̄an kōnono kōn naan ko An rekwojarjar. Irooj ekar kakeememej kōj ilo revelesōn ko ilo raan ko āliktata, “Mekarta jān Ainikiō make ak … jān ainikien ro rikarejera, ej āinwōt juon.”1
Kalimjōkwaj jarlepju in armej ro Rekwojarjar im pijaikļo̧k membōr ro rej alooje kweilo̧k in eļap ipeļaakin laļ in, ij ļōmņak kōn ippān doon eo ilo Bok in Mormon ke Jisōs Kraist ekar waļo̧k n̄an RiNipai ro ālkin An Debwāāl. Ekar katakin er gospel eo innem kapilōk er, “Kom̧in ilo̧k n̄an m̧ōko im̧ōmi, im kōļmānļo̧kijeņ kōn men kein ko Iaar ba, im kajjitōk ippān Jemān, ilo Eta, bwe kom̧in maron̄ meļeļe.”2
“Ilo̧k n̄an m̧ōko im̧ōmi, im kōļmānļo̧kijeņ” ej bun̄tōn eo juon n̄an bōk naan ko an rikanaan eo im ritōl ro an Kabun̄ in ilo iien in ekwojarjar. M̧ōko me rej pedped ioon Kraist rej jikin koņe n̄an aelōn̄ in kiin̄ an Anij ioon laļ in ilo juon raan n̄e, āinwōt kar kanaan kake, devil eo ej “kajoor ibūruōn ro nejin armej, im kōketak er n̄an illu ņae men eo em̧m̧an.”3
Armej rekar kalōk jikin koņe ko ilo aolepān bwebwenatoon laļ in n̄an kōtoļo̧k rinana ro. Ekkā jikin koņe kein ekoba juon tawōr ijo riwaj—āinwōt rikanaan ro—rekar kakkōl kōn kein kaamijak ko im kakkure ko rej itok.
Etto ilo Utah iien ko an painieer ro, jim̧m̧aan jema Thomas Rasband im baam̧le eo an rekar jet iaan ro jinoin tata n̄an delo̧n̄e Heber Valley ilo toļ ko raibojooj etan Wasatch ilo Utah.
Ilo 1859, Thomas ekar jipan̄ kalōk jikin in Heber fort, kar kalōke n̄an aer likōpejn̄ak. Ekar juon ekkal eļam waan jān alal in wōjke in kottōn, karōki turin doon, ejaake pelaakin jikin in. Em̧ jidik ko kōm̧m̧an jān alal in wōjke rekar ekkal ilowaan jikin koņe in ilo tōrerein juon wōt oror. Jekjek in ekar leļok jim̧or kōjparok im oņaake n̄an baam̧le ko an painieer ro ke rekar ejaake baam̧le ko aer im kar kabun̄jar n̄an Irooj.
Em̧ool ej āindein ippād. M̧ōko imōd rej jikin kone ņae nana ko an laļ in. Ilo m̧ōko mōd jej itok n̄an Kraist ilo ad ekkatak n̄an ļoor kien ko An, ilo ad ekkatak jān jeje ko rekwojarjar im jar ippān doon, im ilo ad jipan̄ doon pād wōt ilo iaļan Bujen in. Katak in ekāāl me ej kaorōk ekkatak ko an juon make im baam̧le eo ilo m̧ōko jān curriculum eo etan Itok, Ļoor Eō kar ļome “n̄an kapenļo̧k wāween ad kar oktak im jipan̄ kōj erom̧ eļap āinwōt Jisōs Kraist.”4 N̄e jej kōm̧m̧an menin, jenaaj erom̧ ta eo Paul ekar ņa etan “men in kōm̧anm̧an [ko] rekāāl”5 kōn buruōd im jetōb ko ad rej juon wōt ippān Anij. Jej aikuj kajoor in n̄an jelm̧ae im anjo̧ jān kakkure ko an eo rikapo eo.
N̄e jej mour kōn wūjlepļo̧k eo me ej itok jān tōmak ilo Jisōs Kraist, jenaaj en̄jake aenōm̧m̧an an Jetōb Kwojarjar, eo ej tōl kōj n̄an m̧ool, im̧we kōj n̄an mour erreo n̄an kōjeraam̧m̧an ko an Irooj, im kwaļo̧k kam̧ool bwe Anij ej mour im ej iakwe kōj. Aolep men kein repād ilowaan jikin koņe ilo m̧ōko imōd. Ak keememej, m̧ōko imōd relukkuun kajoor wōt āinwōt kajoor ilo jetōb an kajjojo iaad ilowaan m̧ōko.
Būreejtōn Russell M. Nelson ekar katakin, “Ilo raan ko rej itok, enaaj maron̄ pen n̄an jo̧o̧r ilo jetōb ilo ad jab tōl, jineet, kaenōm̧m̧an, im bōk kareel eo an Jetōb Kwojarjar.”6 Āinwōt an rikanaan eo emour, rilolo, im ribōk revelesōn ilo raan kein, riwaj tawōr eo ilo jikin koņe eo ad, Kabun̄ eo an Jisōs Kraist im Armej ro Rekwojarjar ilo Raan Kein Āliktata, ej lo kōttōbar ko an rikōjdat eo.
Ro jeiū im jatū, jej pād ilo juon tariņae ņae Setan kōn jetōb ko an armej ro. Pata in ekar baj jino wōt ilo mour eo m̧okta. Setan im juon m̧ōttan jilu in ajri ro nejin Jemed Ilan̄ rekar makoko kōn kallim̧ur ko An kōn mour eo eutiejtata. Jān iien eo, rijipan̄ ro an rikapo eo eto aer ire ippān jetōb ko rem̧m̧an ro me rej kāālet karōk eo an Anij.
Setan ejeļā eban kajedeed nana n̄an indeeo im bwe ejabwe iien n̄an an kōm̧m̧ani men kein. Men̄e elukkun riab im m̧oņ, ejamin wiin. Ijoke, ej wōnm̧aanļo̧k wōt im kapoiki kōj n̄an jum̧ae karōk eo an Jemedwōj Ilan̄.
N̄an ad likōpejn̄ak, jej aikuj kalōk juon jikin koņe im likapejn̄ak n̄an jetōb ko ad, juon jikin koņe me jāmin deļo̧n̄e jān eo enana.
Setan ej juon jedpānit ittino, ajādikdik ilo kōļmenļo̧kjeņ im buruōd n̄e jej kōmōjņoik jāliktak ko ad, en̄jake inepata, ak ejjeļo̧k kōjatdikdik. Ej kapoiki kōj kōn riab, juon kallim̧ur n̄an kōmera, kaeņōm̧m̧an, ak juon kam̧ōņōņō an jidik wōt iien. Ej jojomar utiej bōro, lej, riab, būromōj, im m̧ōm̧ an kanniōk im ilo iien ko jemaron̄ “eļļā jān en̄jake.”7 Jetōb emaron̄ em̧m̧akūt jān kōj. “Im āindein devil enaaj m̧oņe jetōb ko aer, im tōlļo̧k er im anneer n̄an hell.”8
Ilo oktakin, ekkā ad en̄jake Jetōb eļap an kajoor n̄e jej al in nōbar n̄an Anij kōn naan ko āinwōt men kein:
Anij ej juon jikin koņe ekajoor,
Juon tawōr ekajoor ejamin bar wōtlo̧k.
Anij ej jipan̄ kōj ilo wāween eo ekajoor.
Ekar jipan̄ kōj anjo̧ jān melejon̄ ko an mour in.9
N̄e jej kalōk juon jikin koņe an kajoor in jetōb, jemaron̄ jutoļo̧k kapo ko an rikapo eo, lukkuun m̧akoko kake, im en̄jake aeņōm̧m̧an an Jetōb eo. Jemaron̄ ļoor waanjon̄ak eo an ad Irooj im Rilo̧mo̧o̧r, Eo, me ke kar kapoiki ilo āne jam̧adān, ekar ba, “Kwōn ilo̧k ilikiō, Setan.”10 Kōj kajjojo jej aikuj ekkatak jān imenene ko an mour kōn wāween kōm̧m̧an menin.
Kōn unleplep in ekwojarjar ealikkar ilo kōmeļeļeiki ilo Bok in Mormon ke Kapen Moronai ekar kōpooj ri Nipai n̄an jeļm̧ae kakkure jān juon kurup in ri Amlijai ro me re riab, rikatoorļo̧k bōtōktōkin armej, rikōņaan bōk kajoor. Moronai ekar kalōk jikin koņe n̄an kōjparok ri Nipai ro “bwe ren maron̄ mour n̄an Irooj aer Anij, im bwe ren maron̄ dāpij ta eo kar ņa etaer jān rikōjdat ro aer em̧m̧akūt an riKristian.”11 Moronai “ekar pen ilo tōmak ilo Kraist”12 im ekar tiljek “ilo kōjparok kien ko an Anij …im anjo̧ jān jerawiwi.”13
Ke riLaman ro rej itok n̄an tariņae, rekar mijak kōn kōpopo ko an riNipai ro, im rekar luuj. RiNipai ro rekar kam̧m̧oolol “Irooj aer Anij, kōnke An kajoor emake wōt ilo lo̧mo̧o̧ren er jān pein rikōjdat ro aer.”14 Rekar kalōk jikin koņe ko n̄an likapejn̄ak inabōj, im rekar kalōk tōmak ilo Irooj Jisōs Kraist ilo lowa—m̧wilal ilo jetōb ko aer.
Ta jet iaan wāween ko jemaron̄ kalipejn̄ak e kōj make ilo iien ko renana, bwe jen maron̄ erom̧ “kein jerbal ko ilo pein Anij n̄an bōktok n̄an likiio jerbal in eļap”?15 Jen riit jeje ko rekwojarjar.
Jej pokake. Irooj ekar kakien Jemed Liai n̄an jilkinļo̧k ļaddik ro nejin bwe ren ro̧o̧l n̄an Jerusalem n̄an “pukoti ļo̧o̧k ko, im būktok n̄an āne jem̧aden in.”16 Liai ekar jab kajjitōk, ekar jab bwilōn̄ etke ak ewi wāween. Barāinwōt kar Nipai, eo ekar uwaak, “Inaaj ilo̧k im kōm̧m̧ani men ko Irooj eaar kean̄.”17
Jej ke kōm̧m̧an kōn m̧ōņōņō in pokake āinwōt Nipai? Ak eļapļo̧k ke ad kōņaan kajjitōk kōn kien ko an Anij āinwōt būratōr ro an Nipai, ro me ejjeļo̧k aer tōmak āliktata rekar elļo̧k jān Irooj? Pokake, ej kōm̧m̧an kōn “ekwōjarjar in bōro,”18 ej ta eo Irooj ej kajjitōk bwe jen kōm̧m̧ane.
Jej lōke Irooj, eo ekar ba n̄an Joshua ke ekar kōpopo n̄an tōl ri Israel ro n̄an āneen kallim̧ur, “Kwōn kajoor im kanooj peran. Kwōn jab mijak, im jab lōļn̄o̧n̄: bwe Irooj am̧ Anij ej ippam̧, ijo ko jabdewōt kwōj ilo̧k ieļo̧k.”19 Joshua ekar lōke naan ko im kar kapilōk armej ro, “Kom̧win kokwōjarjar kom̧, bwe ilju Irooj enaaj kōm̧m̧an men in bwilōn̄ ko ippemi.”20 Irooj ekar kōjepeļo̧k dān ko an Jordan, im riIsrael ro’ ekar jem̧ļo̧k 40 iiō in aer ito itak ilo āne jam̧adān.
Jej jutak kōn m̧ool, āinwōt kar rikanaan Abinedai ilo Bok in Mormon. Kar kalbuuj, bōktok n̄an im̧aan Kiin̄ Noa im pris ro renana an, Abinedai ekar katakin Kien ko Jon̄oul im ekar kwaļo̧k naan ilo kajoor bwe Kraist enaaj “wanlaļtak ilubwiljin ro nejin armej, im … lo̧mo̧o̧ren armej ro An.”21 Innem, kōn tōmak em̧ūlaļ ilo e, ekar kwaļo̧k, “O Anij, kwōn bōk aō jetōb,”22 im Abinedai “kar mej jān kijeek.”23
Jej kōm̧m̧an im kōkāāl Bujen ko ad ilo ad bōk m̧ōttan kwojkwoj im ilo ad kabun̄ jar ilo tampeļ. Kwojkwoj eo ej men eo aorōk tata ilo kabun̄jar ko ad ilo Jabōt, ijo jej bōk kallim̧ur ko “bwe Jetōb eo An en maron̄ pād [ippād] iien otemjej.”24 Kōn kain̄i in ekwojarjar jej kallim̧ur n̄an bōk iood etan Jisōs Kraist, n̄an ļoor E, im n̄an kōm̧m̧ani eddo ko ad ilo jerbal in ekwojarjar āinwōt An kar kōm̧m̧ane. Ilo tampeļ, jemaron̄ “likūtļo̧k men ko an laļ”25 im en̄jake pād eo an Irooj im aeņōm̧m̧an eo An eļap jān jon̄an.” Jemaron̄ mije ro jibūd etto, baam̧le ko ad, im mour indeeo ilo im̧aan mejen Jemed Ilan̄. Unin an Būreejtōn Nelson kar ba raan ko ļo̧k ilo Rome: “Em̧m̧an eo me enaaj itok jān tampeļ in ej juon men eļap ban maron̄ kōmeļeļeiki.”26
Jej aikuj m̧ool ilo aolep men ko jej kōm̧m̧ani. Jej aikuj ejaak jeļā ikkijeen em̧m̧an im nana im kajim̧weik kōj make bwe jen jab wōnm̧aanļo̧k im ļōmnņak ewi wōt jim̧we im bōd eo. Jej aikuj pen ilo ad tōmak naan ko an Piter, rikaļoor eo ilo Kabun̄ in etto, eo kar kakkōl e, “Kom̧win jatōr, kom̧win ekil. Rikōjdate kom̧, tepiļ eo, āinwōt ļaiōn e rorror, ej etetal wōt im pukot eo ej maron̄ in kan̄i.”27
Ilo ad tiljek in kōkajoorļo̧k jikin koņe ko ad, jej erom̧ āinwōt Jisōs Kraist, āinwōt rikaļoor ro An rem̧ool, kōn aolepān ad ilo kōjparok eo An.
Naan in kam̧ool eo am̧ kōn Jisōs Kraist ej juon am̧ jikin koņe make, kōjparok an mour in jetōb eo am̧. Ke jim̧m̧an jema im painier ro m̧ōttan rekar kalōk Heber fort, rekar likūt juon ra kileplep ilo juon iien m̧ae jikin in fort ekar “kalōk otemjej em̧m̧an”28 im rekar kōjparoki.” Ejja āinwōt naan in kam̧ool ko ad. Kōj kajjojo jej bōk juon kam̧ool jān Jetōb Kwojarjar āinwōt An kōnono n̄an jetōb ko ad make, ej katakin “m̧ool ilowaan armej.”29 N̄e jej mour kōn gospel eo an Jisōs Kraist, n̄e jej kōjerbal Pinmuur eo an Rilo̧mo̧o̧r im bun̄ m̧aanļo̧k kōn tōmak, ejjelok mijak, jej bōk kajoor ņae kōttōbalbal ko an rikapo eo. Naan in kam̧ool ko ad rej kepaakļo̧k kōj n̄an lan̄, im jejeram̧m̧an kōn “m̧ool eo an men ko otemjeļo̧k.”30 Im, āinwōt an kar paineer ro likōpejn̄ak kōn juon jikin koņe, jej bōk kōjparok em̧ōj jepooļ kōj kake ilo pein iakwe eo An.
Rikanaan Ether ekar katakin, “Kōn menin, jabdewōt eo ej lōke Anij emaron̄ kōjatdikdik ilo m̧ool kōn laļ eo em̧m̧anļo̧k, aaet, em̧ool jikin eo ianbwijmaron̄ in pein Anij, kōjatdikdik eo ej itok jān tōmak, kōm̧m̧an juon emjak n̄an jetōb ko an armej, eo en kar kōm̧m̧an bwe ren pen im dim, iien otemjej pād wōt ilo jerbal ko rem̧m̧an, in kar tōl n̄an kaiboojoj Anij.”31
Ro jeiū im jatū, ij likūt aō kōjeram̧m̧an n̄an wōnm̧aanļo̧k wōt kōn lōke ilo Irooj im ilo gospel eo An. Jerbal in karejar n̄an ro rej m̧ōjņo, im kōn kajoor an Jetōb ilo kwe, karo̧o̧l tok er ilo iakwe n̄an jikin koņe im likōpejn̄ak an mour in jetōb ko. Kappukot “n̄an erom āinwōt Jisōs”32 ilo aolep men ko kwoj kōm̧m̧ani; jutoļo̧k nana im kapo ko; ukweļo̧k, āinwōt kar kōmeļeļeik kōj inne jān rikanaan eo ad ejitōnbōro; kwon m̧ool ilo bōro; wānōk im erreo; kwaļo̧k tūriam̧o̧ im iakwe em̧ool; im iakwe Irooj am̧ Anij kōn wūjlepļo̧k an juon rikaļoor em̧ool.”
Naan in kam̧ool ko ad kōn gospel eo an Jisōs Kraist, m̧ōko m̧ōd, baam̧le ko ad, im āinwōt membōr ro ilo Kabun̄ eo an Jisōs Kraist im Armej ro Rekwojarjar ilo Raan Kein Āliktata enaaj erom̧ juon ad make jikin koņe n̄an likōpejn̄ak jepooļ e kōj im kōbar kōj jān kajoor eo an eo enana. Kōn men in ij kam̧ool ilo etan ad Irooj im Rilo̧mo̧o̧r, em̧ool Jisōs Kraist, amen.