Erreo kōn Ukweļo̧k
Kōn Karōk eo an Anij im Pinmuur eo an Jisōs Kraist, jemaron̄ erreo jān jerbal in ukweļo̧k.
Ilo mour in jej mour ium̧win kien ko an armej im kien ko an Anij. Ewōr aō imenene ejeja ikkijeen ekajet nana in m̧wil ko reļļap ium̧in kien kein jim̧or—jinoin āinwōt juon riekajet ilo Supreme Court eo ilo Utah im kiiō āinwōt juon membōr ilo Būreejtōnji eo Kein Kajuon ilo Kabun̄ in. Oktak eo ikar iminene kake ikōtaan kien ko an armej im kien ko an Anij em̧ōj an kōļapļo̧k kam̧m̧oolol eo aō kōn m̧ool im kajoor eo an Pinmuur eo an Jisōs Kraist. Ium̧win kien ko an armej, juon armej eo em̧ōj ņa ruōn kōn jorrāān ko reļļap emaron̄ kalbuuj n̄an mej ilo jikin kalbuuj ilo ejjeļo̧k kōjatdikdik n̄an diwōj. Ak menin eoktak ium̧win karōk in tūriam̧o̧ eo an Jemedwōj Ilan̄ eo ej iakwe kōj. Em̧ōj aō kar kam̧ool e bwe ejja jerawiwi kein reļļap remaron̄ bōk jeorļo̧k in bōd ilo mour in kōn pinmuur eo an ad Rilo̧mo̧o̧r kōn jerawiwi ko an “aolep ro ewōr aer bōro erup im jetōb ettā” (2 Nipai 2:7). Kraist ej lo̧mo̧o̧ren kōj, im Pinmuur eo an em̧ool.
Tūriam̧o̧ in iakwe eo an Rilo̧mo̧o̧r ej waļo̧k ilo al in em̧m̧an me kuwaer eo ekar al kake.
Itok n̄an Jisōs; E enaaj eo̧ron̄ eok,
Jān maroklep ijo kwaar jōbwābwe ie,
An iakwe enaaj pukōt eok im tōl eok
Jān bon̄ emarok n̄an raan.1
Katok in Pinmuur eo an Jisōs Kraist ej kōppelļo̧k kōjem̧ eo n̄an “aolep armej bwe ren [maron̄] ukweļo̧k im itok n̄an E” (Katak im Bujen Ko 18:11; bar lale Mark 3:28; 1 Nipai 10:18; Alma 34:8, 16). Bok in Alma ej kwaļo̧k kōn ukweļo̧k im jeorļo̧k bōd jekdo̧o̧n ro rekar nana im kōto̧o̧rļo̧k bōtōktōkin armej (lale Alma 25:16; 27:27, 30). Ennaan eo aō rainin ej juon kōjatdikdik n̄an kōj aolep, ekoba ro rekar jako etaer jān Kabun̄ in ilo aer bukweļo̧k er ak joļo̧k etaer. Kōj aolep jej rijerawiwi ro me remaron̄ erreo kōn ukweļo̧k. “N̄an ukweļo̧k jān jerawiwi ejjab pidodo,” Elder Russell M. Nelson ekar katakin ilo juon kweilo̧k eļap emootļo̧k. “Ak nōbar eo ej aorōk in kijejeto.”2
I. Ukweļo̧k
Ukweļo̧k ej jino ippān Rilo̧mo̧o̧r, im ej juon lan̄lōn̄, ejjab juon ban. Ilo Tijem̧ba eo ļo̧k ilo iien Kūrijm̧ōj Nokon eo, Būreejtōn Nelson ekar katakin: “M̧ool in ukweļo̧k ejjab juon m̧akūtkūt. Ej juon iien em̧m̧an ejāmin jem̧ļo̧k. Ej pedped in katak n̄an eddōkļo̧k im bōk aenōm̧m̧an ilo kōļmenļo̧kjeņ, kaenōm̧m̧an, im lan̄lōn̄.”3
Jet iaan katak ko rem̧m̧an tata kōn ukweļo̧k rej pād ilo katak ko an Alma ilo Bok in Mormon n̄an membōr ro ilo Kabun̄ in me ekar kōmeļeļeik tokālik āinwōt aer pād ilo juon jikin “jab tōmak,” “utiej ilo … juwa ,” likūt būruweer “ioon m̧weie ko im men ko rewaan an laļ in” (Alma 7:6). Kajjojo membōr ilo Kabūn in me em̧ōj an bar jepļaaktok eļap men ko jemaron̄ ekkatak kaki jān katak ko reim̧we an Alma.
Jej jino kōn tōmak ilo Jisōs Kraist, kōnke “ej E eo ej itok n̄an bōkļo̧k jero̧wiwi ko an laļ” (Alma 5:48). Jej aikuj ukweļo̧k kōnke, āinwōt Alma ekar katakin, “ijello̧kun wōt n̄e kom̧ij ukeļo̧k kom̧ij maron̄ jolōte aelōn̄ in lan̄” (Alma 5:51). Ukweļo̧k ej juon m̧ōttan eo eaorōk ilo karōk eo an Anij. Kōnke aolep renaaj kar jerawiwi ilo ad idajon̄jon̄e mour in im naaj kar joļo̧k er jān im̧aan mejān Anij, armej rejamin “mour” ilo ejjeļo̧k ukweļo̧k (Alma 5:31; bar lale Hilamōn 12:22).
Menin em̧ōj kar katakin kake jān jinoin. Irooj ekar kakien Adam, “Katakin e n̄an ro nejim, bwe aolep armej raņ, ijoko jabdewōt, reaikuj ukeļo̧k, ak reban maron̄ ilo jabdewōt wāween jolōte aelōn̄ in Anij, bwe ejjeļo̧k men ettoon emaron̄ jokwe ijo, ak jokwe ilo im̧aan Mejān” (Moses 6:57). Jej aikuj ukweļo̧k jān aolep jerawiwi ko ad—aolep kōm̧m̧an ak jab kōm̧m̧an ko ad rej jum̧ae kien ko an Anij. Ejjeļo̧k juon ej jo̧o̧r jān ukweļo̧k. Inne jota Būreejtōn Nelson ekar rōjan̄ kōj, “Em̧m̧aan raņ, jej aolep aikuj ukweļo̧k.”4
N̄an erreo kōn ukweļo̧k, jej joļo̧k jerawiwi ko ad im kwaļo̧ki n̄an Irooj im n̄an ekajet eo An ilo mour in ijo emenin aikuj ie (lale Katak im Bujen Ko 58:43). Alma ekar barāinwōt katakin bwe jej aikuj “bōktok jerbal ko in jim̧we” (Alma 5:35). Aolep men kein rej mōttan ļo̧k kūr in ekutkut an waļo̧k ilo jeje ko rekwojarjar n̄an itok n̄an Kraist.
Jej aikuj bōk kwojkwoj eo kajjojo Jabōt. Ilo kain̄i in jej kōm̧m̧an bujen ko im bōk kōjeraam̧m̧an ko me rej jipan̄ kōj eļļā ioon aolep kōm̧m̧an im ikdeelel ko me rej bōbrae kōj jān ad wanōk me Rilo̧mo̧o̧r ej kūr kōj n̄an tōpare (lale Matu 5:48; 3 Nipai 12:48). Ilo ad “kaarmejjete [kōj] make jān aolep men ko rejjab em̧m̧an, im iakwe Anij kōn aolep [ad] maron̄, ļōmņak im kajoor,” innem jemaron̄ “weeppān ilo Kraist” im “kokwōjarjar” kōn to̧o̧rļo̧k in bōtōktōkin n̄an “kwōjarjar, ejjeļo̧k libbijinjin” (Moronai 10:32–33). Juon kōjeraam̧m̧an em̧m̧an! Juon menin bwilon̄, ekabwilōn̄lōn̄! Juon kōjeraam̧m̧an!
II. Eddoik Bōd ko im Ekajet ko an Mour in
Juon iaan unin karōk eo an Anij n̄an idajon̄jon̄e mour in ej n̄an “mālejjon̄e” kōj “n̄an lale eļan̄n̄e [jenaaj] kōm̧m̧ani aolep men ko jabdewōt Irooj [ad] Anij enaaj jiron̄ [kōj]” (Ebream 3:25). M̧ōttanļo̧k karōk in, ej ad eddo n̄an Anij im n̄an ro Karejaran, im aolep eddo in bōd ko ekoba jim̧or ekajet ko an mour in im ekajet ko rekwojarjar.
Ilo Kabun̄ eo an Irooj, ekajet ko an mour in n̄an membōr ro ak ro me rejjab membōr ej eddo ko an ritōl ro me rej kappukot tōl eo ekwojarjar. Ej aer eddo n̄an ekajet armej ro me rej kappukot n̄an itok n̄an Kraist n̄an bōk kajoor in Pinmuur eo An ilo iaļan bujen eo n̄an mour indeeo. Ekajet ko an mour in rej kwaļo̧k elan̄n̄e juon armej ej pojak n̄an peptaij. Armej in erreo ke n̄an bōk juon mālim n̄an delo̧n̄e tampeļ eo? Em̧ōj ke an armej in me em̧ōj joļo̧k etan jān rekoot ko an Kabun̄ in ukweļo̧k n̄an jon̄an eo emenin aikuj kōn Pinmuur eo an Jisōs Kraist n̄an bar kadelo̧n̄e kōn peptaij?
N̄e juon riekajet ilo mour in kūr jān Anij n̄an kōmālim juon armej n̄an wōnm̧aanļo̧k wōt, āinwōt kōn maron̄ ko n̄an delo̧n̄e tampeļ, ejjab meļeļein bwe armej in elukkuun wānōk, im ejjab jeorļo̧k jabdewōt jerawiwi. Elder Spencer W. Kimball ekar katakin bwe ālkin mour in “joļo̧k kaje ko” armej eo “ej aikuj bar kappukot im kam̧ool jān Anij ilan̄ juon ukweļo̧k eo em̧ool, im emaron̄ jolok ruōn.”5 Im eļan̄n̄e kōm̧m̧an ko ad renana im ikdeleel rej pād wōt ilo aer jan̄in ukweļo̧k m̧ae iien Ekajet eo Āliktata, armej eo ekar jab ukweļo̧k enaaj pād wōt ilo an ettoon. Eddoik bōd eo āliktata, ekoba karreo eo eļap an ukweļo̧k, ej ikōtaan kōj kajjojo im Anij.
III. Jerkakpeje im Ekajet eo Āliktata
Ekajet eo eļap im ekkā kōmeļeļeiki ilo jeje ko rekwojarjar ej Ekajet eo Āliktata ālkin Jerkakpeje (lale 2 Nipai 9:15). Elōn̄ eoon ko rej kwaļo̧k bwe “jenaaj jutak im̧aan tūroon in ekajet an Kraist” (Rome 14:10; bar lale 2 Nipai 9:15; Mosaia 27:31) “ekajet ekkar n̄an kōm̧m̧an ko kar kōm̧m̧ani ilo ānbwinnin kanniōk” (Alma 5:15; bar lale-+9 Revelesōn 20:12; Alma 41:3;9 3 Nipai 26:4). Naaj ekajet kōj aolep “ekkar n̄an jerbal ko aer” (3 Nipai 27:15) im “ekkar n̄an ikdeelel [ko] an burueer” (Katak im Bujen Ko; bar lale Alma 41:6).
Unin Ekajet in Āliktata ej n̄an ļōme eļan̄n̄e em̧ōj ad tōpare ta eo Alma ekar kōmeļeļeiki āinwōt juon “oktak in ekajoor ilo būruōmi” (lale Alma 5:14, 26), ijo jej erom armej ro rekāāl, ilo aer “jab bar itok wōt in kōm̧m̧an nana, ak n̄an kōm̧m̧an em̧m̧an wōt” (Mosaia 5:2). Riekajet eo ej ad Rilo̧mo̧o̧r, Jisōs Kraist (lale Jon 5:22; 2 Nipai 9:41). Ālkin jerkakpeje eo An jenaaj aolep kwaļo̧k m̧ool “bwe ekajet ko An rejim̧we” (Mosaia 16:1; bar lale 27:31; Alma 12:15), kōnke An kajoorpōtata (lale 2 Nipai 9:15, 20) em̧ōj leļo̧k n̄an E juon jeļāļo̧kjeņ ewāppen kōn aolep ad kōm̧m̧an im ikdeelel, jim̧or ro rejim̧we ak ro rekar ukweļo̧k ak ro me rekar jab ukweļo̧k ak rekar jab oktak.
Jeje ko rekwojajar rej kōmeļeļeiki wāween Ekajet in Āliktata. Alma ej katakin kōj bwe jim̧we eo an Anij ej menin aikuj bwe ilo jerkakpeje eo “aolep men kein ren bar jepļaak n̄an jekjek ko aer reweeppān” (Alma 41:2). Meļeļein bwe “eļan̄n̄e jerbal ko aer raar em̧m̧an ilo mour in, im ikdeelel ko an būrueer raar em̧m̧an, … ilo raan eo āliktata [renaaj] bar jepļaak n̄an men eo em̧m̧an” (Alma 41:3). Ej āinļo̧k wōt, “eļan̄n̄e jerbal ko aer [ak ikdeelel ko aer] rej nana naaj bar jepļaakļo̧k n̄an er kōn nana” (Alma 41:4–5; bar lale Hilamōn 14:31). Ej āinļo̧k wōt, rikanaan Jekab ekar katakin bwe ilo Ekajet eo Āliktata “ro rem̧m̧an renaaj em̧m̧an wōt, im ro rettoon renaaj ettoon wōt” (2 Nipai 9:16; bar lale Mormon 9:14; 1 Nipai 15:33). Wāween eo in kar kōjerbale m̧okta jān an kar Moronai kar ņa etan “jikin ekajet ejouj an Jeova Eļap, Rikajet Indeeo an jim̧or ro remour im ro remej” (Moronai 10:34; bar lale 3 Nipai 27:16).
N̄an kam̧ool bwe jenaaj erreo im̧aan mejān Anij, jej aikuj ukweļo̧k m̧okta jān Ekajet eo Āliktata (lale Mormon 3:22). Āinwōt an Alma ba kōn ļaddik eo nejin ejerawiwi, jejjab maron̄ ņooj jerawiwi ko im̧aan mejān Anij, “im eļan̄n̄e kwōj jab ukeļo̧k renaaj jutak āinwōt juon kam̧ool ņae eok ilo raan eo āliktata” (Alma 39:8; eoon in eaorōk kar kobaiktok). Pinmuur eo an Jisōs Kraist ej letok n̄an kōj wāween eo wōt n̄an tōpar karreo eo emenin aikuj kōn ukweļo̧k, im mour in ej iien n̄an kōm̧m̧ane menin. Men̄e em̧ōj katakin kōj bwe jet ukweļo̧k remaron̄ kōm̧m̧an ilo laļ eo an jetōb (lale Katak im Bujen Ko 138:31, 33, 58), ejjab lukkuun alikkar menin. Elder Melvin J. Ballard ekar katakin: “Epidodoļo̧k n̄an eļļā im jerbal n̄an Irooj jim̧or ilo kanniōk im jetōb ko me rej ippān doon im erom̧ juon wōt. En̄in ej iien eo me armej epidodo aer po im deel. … Mour in ej iien n̄an ukweļo̧k.”6
N̄e jej ukweļo̧k, jej bōk kam̧ool eo an Irooj bwe jerawiwi ko ad, ekoba kōm̧m̧an im ikdeelel ko, renaaj erreo im ekajet eo āliktata me eobrak kōn tūriam̧o̧ naaj “jab bar keememeji” (Katak im Bujen Ko 58:42; bar lale Aiseia 1:18; Jeremia 31:34; Hibru 8:12; Alma 41:6; Hilamōn 14:18–19). Erreo jān Ukweļo̧k, jej karbab n̄an bōk mour indeeo, eo me Kiin̄ Benjamin ekar kōmeļeļeiki āinwōt “jokwe ippān Anij ilo wāween m̧ōņōņō eo ejjeļo̧k jem̧ļo̧kin” (Mosaia 2:41; bar lale Katak im Bujen Ko 14:7).
Bar m̧ōttanļo̧k “karōk in jepļaaktok” eo an Anij (Alma 41:2), Jerkakpeje eo enaaj bar kōjepļaaktok “aolep men kein … n̄an jekjek im ļamļam eo eweeppān aer” (Alma 40:23). Menin ekoba wāppen ko an aolep likjab ko ad ilo mour in kanniōk ak jab wānōk ko jej jelm̧ae ilo mour in, ekoba ilo iien ļotak ak kōn jorrāān ak nan̄inmej.
Jepļaaktok in ej ke kōwāppen kōj jān aolepān ad ikdeelel rejakwojarjar ak an̄n̄ūr ko jekar jab anjo̧ jāni? Menin ejjab maron̄. Em̧ōj katakin kōj bwe naaj ekajet kōj kōn ikdeelel ko ad barāinwōt kōm̧m̧an ko ad (lale Alma 41:5; Katak im Bujen Ko 137:9) im bwe jekdo̧o̧n ad ļōmņak naaj kajeik kōj (lale Alma 12:14). Jejjab aikuj “aepedped kōn raan in ukeļo̧k eo [ad] ” m̧ae mej, Amulek ekar katakin (Alma 34:33), kōnke ejja jetōb eo wōt an ānbwinnid ilo mour in—men̄e an Irooj ak an devil—“enaaj wōr an kajoor n̄an bōk [ānbwinnid] ilo laļ eo ejjeļo̧k jemļo̧kin” (Alma 34:34). Ad Rilo̧mo̧o̧r ewōr an kajoor im ej jutak im pojak iien otemjej n̄an karreoik kōj jān nana. Kiiō ej iien n̄an kappukot jipan̄ eo An n̄an ukweļo̧k jān nana ak ikdeleel ko im ļōmņak ko rejjakkar bwe ren erreo im pojak n̄an jutak im̧aan mejān Anij ilo Ekajet.
IV. Pein Tūriam̧o Ko
Jepooļ kōn karōk eo an Anij im aolepān kien ko An ej iakwe eo An n̄an kōj kajojjo, eo me “elukkuun ļap kōttōpare jān men ko otemjej … mennin kam̧ōņōņō tata n̄an jetōb” (1 Nipai 11:22–23). Rikanaan Aiseia ekar kam̧ool bwe jekdo̧o̧n rinana me n̄e rej “jepļaak n̄an Irooj … enaaj tūriam̧o kake … [im] wūjlep in joļo̧k bōd ” (Aiseia 55:7). Alma ekar katakin, “Lo, E ej jilkintok juon karuwainene n̄an aolep armej, bwe pein tūriam̧o kake rej erļo̧k n̄an er” (Alma 5:33; bar lale 2 Nipai 26:25–33). Irooj eo emōj an jerkakpeje ekar ba n̄an riNipai ro, “Lo, pein tūriam̧o eo Aō ej erļo̧k waj n̄an kom̧, im jabdewōt eo enaaj itok, e Inaaj bōk” (3 Nipai 9:14). Jān men kein im elōn̄ katak ko jet jān jeje ko rekwojarjar, jejjeļā bwe Rilo̧mo̧o̧r eo ej iakwe ej erļo̧ke pein n̄an bōk aolep em̧m̧aan im kōrā ro ilo juon jekjek in iakwe eo me E ekar kapilōk kōj kake n̄an m̧ōņōņō kōn kōjeraam̧m̧an ko reļļap repojak ippān Anij n̄an ajri ro Nejin.7
Kōnke karōk eo an Anij im Pinmuur eo an Jisōs Kraist, Ij kam̧ool kōn juon “kōjatdikdik emeram” bwe Anij ej iakwe kōj im jemaron̄ erreo kōn jerbal in ukweļo̧k. Em̧ōj kallim̧ur kōj bwe “n̄e [jenaaj] bun̄ m̧aanļo̧k, kwojkwoj ioon naan an Kraist, im niknik n̄an jem̧ļo̧kin, lo, āindein Jemān ej ba: Kom̧ naaj bōk mour indeeo” (2 Nipai 31:20). Jen aolep kōm̧m̧an āindein, Ij akweļap im jar ilo etan Jisōs Kraist, amen.