Oktak eo Em̧wilaļ im Aitok Kitien n̄an Jemedwōj Ilan̄ im Irooj Jisōs Kraist.
Jibadbad eo ad ej n̄an kajukkun wōt juon en̄jake ko an Kabun̄ im m̧weo ilo juon wāween me enaaj kanooj kōļapļo̧k tōmak im men ilo jetōb im kam̧wilaļļo̧k oktak eo.
Āinwōt Būreejtōn Russell M. Nelson kar aiboojoj im kajoor an kar ba, ritōl ro an Kabun̄ in rekar jerbal ilo juon tōre aitok kōn “karōk in rejtak an pedped ilo m̧weo im Kabun̄ n̄an ekkatak katak eo, kōkajoorļo̧k tōmak, im kōkōm̧anm̧anļo̧k eļapļo̧k kabun̄-jar an juon make.” Innām Būreejtōn Nelson eaar kōjjeļļā kōn kakobaba eo n̄an bōk “juon jokkun wōt juon im ekāāl ikōtaan katakin gospel eo ilo m̧weo im ilo Kabun̄ eo.”1
N̄an kadedeļo̧k jibadbad kein—kar kōmeļeļeik jān im ium̧win tōl eo an Būreejtōn Russell M. Nelson im ļoor jokālet eo an Ko̧o̧njeļ eo an Būreejtōnji eo Kein Kajuon im Doulul eo an Jon̄oulruo Rijilōk ro—jikejuuļ in kweilo̧k ilo Jabōt renaaj aikuj oktak ilo wāween kein, jino jān Jānwōde in 2019.
Jikejuuļ in Kweilo̧k eo ilo Jabōt
Kweilo̧k ko an Jabōt an Kabun̄ renaaj koba in 60-minit kweilo̧k in kwojkwoj eo kajjojo Jabōt, pedped ioon Rilo̧mo̧or eo, kain̄i eo an kwojkwoj eo, ennaan ko ilo jetōb. Ālkin iien em̧m̧akūtļo̧k n̄an kūlaaj ko, ro uwaan Kabun̄ in renaaj pād ilo 50-minit kūlaaj me enaaj okoktak kajjojo Jabōt:
-
Jabōt Jikuuļ enaaj kōm̧m̧an ilo Jabōt juon im jilu ilo juon allōn̄.
-
Doulul ko an Priesthood, Doulul eo an Kōrā ro, im kweilo̧k ko an Doulul eo an Jiron̄ ro enaaj kōm̧m̧an ilo Jabōt ruo im emān.
-
Kweilo̧k ko ilo Jabōt ļalem renaaj ium̧win tōl eo an bisop eo.
Būraimere eo enaaj kōm̧m̧an kajjojo wiik ilo ejja 50-minit iien eo im enaaj kōjjem̧ļo̧k kōn iien al im kūlaaj ko.
Ikkijien jikejuuļ in kweilo̧k ilo Jabōt, ritōl ro eto aer jerbal an Kabun̄ in raar jeļā ium̧win elōn̄ iiō ko bwe n̄an jet iaan membōr ro ad raorōk, jikejuuļ eo kōn jilu awa ilo Jabōt ilo m̧ōn jar eo emaron̄ in pen. Menin em̧ool eļaptata n̄an m̧am̧a im baba ro ippān ajri ro reddik, ajri in Būraimere ro, membōr ro rōrūtto, rioktak ro rekāāl, im ro jet.2
Bōtaab ekanooj in ļapļo̧k jān oktak in jān kōkaduukļo̧k jikejuuļ eo an im̧ōn jar ko ilo Jabōt. Būreejtōn Nelson eaar kile kōn kam̧m̧oolol ewi jon̄ak eo em̧ōj kar kadedeļo̧k āinwōt juon tōprak in tiljek eo ami n̄an kajjitōk ko im̧aanļo̧k. E, im aolepān ritōl ro an Kabun̄ in, ikdeelel n̄an bōktok eļapļo̧k lan̄lōn̄ an gospel eo—n̄an ro jinen im jemen, ajri ro, jodikdik ro, ro ejjeļo̧k karejaer, rūtto ro, rioktak ro rekāāl, im armej ro mijenede ro rej katakin—kōn kijejeto in rie eo ejokkun wōt juon an pedped ilo m̧weo im rie an Kabun̄ eo. Jibadbad ko im kōjeraam̧m̧an ko rej pād ilo oktak in im oktak ko jet im̧aanļo̧k ekoba kein rej ellaajrak:
-
Kam̧wilaļļok oktakļo̧k eo n̄an Jemedwōj Ilan̄ im Irooj Jisōs Kraist im kōkajoorļo̧k tōmak ilo Er.
-
Kōkajoorļo̧k kajjojo armej im baam̧ļe ko kōn laajrak in kein katakin eo rie an pedped ilo m̧weo, Kabun̄ eo me ej kōketak n̄an mour lan̄lōn̄ kōn gospel eo.
-
Kautiej raan in Jabōt, kōn juon ellowetak ilo kain̄i eo an kwojkwoj eo.
-
Jipan̄ aolep ajri ro nejin Jemedwōj Ilan̄ ilo jim̧or turejet ko an rōn̄ōl eo kōn jerbal in mijenede im bōk kain̄i ko im bujen ko im kōjeraam̧m̧an ko an tampeļ eo.
Pedped ilo M̧weo, Rie Jān Kabun̄ Ekkatak Gospel eo
Jikejuuļ an Jabōt in ej letok eļapļo̧k iien n̄an juon nokon in jota im n̄an ekkatak gospel eo ilo m̧weo ilo Jabōt ak ilo iien ko jet āinwōt an kajjojo armej im baam̧le ko maron̄ kālet. Juon m̧akūtkūt in jota an baam̧ļe maron̄ kōm̧m̧an ilo Jabōt ak ilo iien ko jet. Kōn un in, ritōl ro rej aikuj wōnm̧aanļo̧k wōt n̄an dāpij wōt an ejjeļo̧k jabdewōt kweilo̧k im m̧akūtkūt ko ilo jo̧teen M̧ande ko. Ijowōt ke, iien eo joļo̧k ilo joteen nokon, ekkatak gospel eo, im m̧akūtkūt ko n̄an kajjojo armej im baam̧ļe ko remaron̄ in jikejuuļ ekkar n̄an jekjek ko aer kajjojo.
Ekkatak gospel eo an baam̧le im kajjojo ilo m̧weo enaaj kanooj ļap an kōkōm̧anm̧anļo̧k an kajokkun wōt juon ippān laajrak in kein katakin eo im eo ekāāl Itok, Ļoor Eō kein jipan̄ eo N̄an Kajjojo Armej im Baam̧le ko me ej ekkejel ippān ta eo ej katakin ilo Jabōt Jikuuļ im Būraimere.3 Ilo Jānwōde, jodikdik ro an Kabun̄ in im Jabōt Jikuuļ eo an rūtto im kūlaaj ko an Būraimere renaaj ekkatak kōn Kallim̧ur Ekāāl. Kein ekkatak eo ilo m̧weo ekāāl Itok, Ļoor Eō kein jipan̄ eo n̄an kajjojo armej im baam̧le ko—ebarāinwōt kōbare Kallim̧ur Ekāāl—ej ejaak n̄an jipan̄ membōr ro katak gospel eo ilo m̧weo. Ej kōmeļeļeki: “Kein jipan̄ in ej n̄an aolep kajjojo armej im baam̧ļe ilo Kabun̄ in. Kar kōm̧m̧ane n̄an jipan̄ [kōj kajejejtļo̧k] ad ekkatak gospel eo—men̄e kōn [kōj] make ak ippān baam̧ļe eo [ad]. … Kōllaajrak ko ilo kein jipan̄ in [ekāāl] rej ellaajrak ekkar n̄an juon jikejuuļ … wiik otemjej.”4
Katak ko an Itok, Ļoor Eō eo ekāal an Būraimere kar katakin ilo m̧ōn jar eo enaaj anōk wōt ejja jikejuuļ eo wōt wiik otemjej. Kūlaaj ko an Jabōt Jikuuļ an rūtto im jodikdik ro ilo Jabōt juon im jilu renaaj kōm̧m̧ani bwe renaaj rie kein jipan̄ eo ekāāl an m̧weo an Itok, Ļoor Eō. Ilo Jabōt ruo im emen, rūtto ro ilo priesthood im Doulul eo an Kōrā ro renaaj wōnm̧aanļo̧k wōt n̄an ekkatak katak ko an Ritōl ro an Kabun̄, kōn kōmejaja eo ilo ennaan ko rekāal an rikanaan ro raan kein.5 Jiron̄ ro im likao ro ilo Priesthood eo an Arōn renaaj ekkatak unin kōnono ko an gospel eo ilo Jabōt kein.
Kein jipan̄ in ekāāl an ekkatak ilo m̧weo ej letok “Ļōmņak ko n̄an Ekkatak Jeje Ko Rekwojarjar an Baam̧le im Nokon in Jota an Baam̧le.”6 Laajrak ko n̄an kajjojo wiik epād ie ļōmņak ko rejipan̄ an ekkatak im m̧akūtkūt ko n̄an kajjojo armej im baam̧ļe ko. Itok, Ļoor Eō kein jipan̄ eo n̄an kajjojo armej im baam̧le ko ebarāinwōt lōn̄ pija ko me renaaj jipan̄ kōkōm̧anm̧anļo̧k ekkatak eo an kajjojo armej im baam̧ļe, eļaptata n̄an ajri ro.7 Kein jipan̄ in ekāāl enaaj leļo̧k n̄an kajjojo em̧ ilo Tijem̧ba in iiō in.
Būreejtōn Nelson, jān ennaan eo an im̧aan tata n̄an ro uwaan Kabun̄ in ilo Jānwōde eo, eaar kōketak kōj n̄an m̧aanjappopo n̄an Itok eo Kein Karuo an Jisōs Kraist kōn etetal ilo iaļ in bujen eo.8
Jekjek ko an laļ in eļapļo̧k an menin aikuj juon oktak eo em̧wilaļļo̧k an kajjojo armej n̄an im kōkajoorļo̧k tōm̧ak ilo Jemedwōj Ilan̄ im Jisōs Kraist im An Pinmuur. Irooj eaar kōpooj kōj, ļain ioon ļain, n̄an iien ko renana me jej kiiō jelm̧ai. Ilo iiō ko jem̧aanļo̧k, Irooj eaar tōl kōj n̄an ņa mejļan n̄urbōktak ko eļaptata, ekoba men kein:
-
Kautiej raan in Jabōt im kain̄i eo ekwojarjar an kwojkwoj eo em̧ōj bar juon alen kōmejajaik ilo iiō ko jilu rej jem̧ļo̧kļo̧k.
-
Ium̧win tōl an bisop eo, kōkajoorļo̧k doulul ko an elder ro im Doulul ko an Kōrā ro rej pedped ioon jibadbad eo im eddo ko rekwojarjar kar jitōn̄i jān Kabun̄ in9 im jipan̄ ro uwaan kōm̧m̧ani im kōjparok bujen ko rekowjarjar.
-
Jerbal in karejar ilo juon wāween eutiejļo̧k im ekwojarjarļo̧k ekar juon okoktak elem̧ōņōņōn.
-
Kalimjōk wōt unin jibadbad ko ad jān jino in, bujen ko an tampeļ im jerbal in jipan̄ an menmenbwij an baam̧ļe rej erom m̧ōttan jibadbad eo an iaļ in bujen eo.
Oktak eo kar kōjeļļā kake kiiō jibbon̄ ej bar juon waanjon̄ak kōn unin tōl eo n̄an apan̄ ko an tōre in ad.
Kein katakin eo iminene kake an Kabun̄ in eaar kōmejajaik en̄jake eo an Jabōt ilo Kabun̄ in. Jejeļā bwe n̄e em̧m̧anļo̧k ad katakin im an ļapļo̧k an ro uwaan kūlaaj eo pojak ilo jetōb, ewōr juon ad en̄jake em̧m̧anļo̧k ilo Jabōt ilo Kabun̄ in. Emakijkijļo̧k ad jeraam̧m̧an jon̄an Jetōb eo ej kōļapļo̧k im kōkajoorļo̧k oktak eo ilo ļamļam eo an Kabun̄ in.
Laajrak in kein katakin eo ekāāl an pedped an m̧weo im rie jān Kabun̄ ej aikuj kajoorļo̧k an kareel kautiej kabun̄ an baam̧ļe im m̧wil im m̧anti kautiej kabun̄ an juon make im m̧wil. Jejeļā im̧we eo ilo jetōb im oktak eo em̧wilaļ im aitok kitien me maron̄ bōke ilo ļamļam eo an m̧ōko. Iiō ko ļo̧k, juon ekkatak eaar ejaak bwe n̄an aolep likao im jiron̄ ro kareel eo an Jetōb Kwojarjar ekanooj emakijkij an pād ilo ekkatak jeje ko rekwojarjar an kajjojo armej im jar ilo m̧ōko. Jibadbad eo an ej n̄an kajokkuun wōt juon en̄jake ko ilo Kabun̄ in im m̧weo ilo juon wāween me enaaj kanooj kōļapļo̧k tōmak im ilo jetōb im kam̧wilaļļo̧k oktak eo n̄an Jemedwōj Ilan̄ im Irooj Jisōs Kraist.
M̧ōttan rie ilo jibadbad an m̧weo, Kabun̄ in kōn oktak in, ewōr okoktak n̄an kajjojo armej im baam̧ļe n̄an jokālōt ilo jar ekōjkan im n̄aat eo naaj kōjerbale. N̄an waanjon̄ak, ilo an menin naaj kanooj kōjeraam̧m̧an aolep baam̧ļe ko, pedped ioon aikuj ko ijo jokwe ie, enaaj kanooj jejjet n̄an rūm̧m̧an ded ro, rūtto ro ejjeļo̧k rejtaer, m̧am̧a im baba ro ejjeļo̧k rejtaer, baam̧ļe ko ejjab aolep rej membōr, membōr ro rekāāl,10 im ro jet n̄an koba ilo kumi ko itulikin juon iien kabun̄-jar ilo Jabōt n̄an lemōņōņō kōn jekjek eo ejejet n̄an gospel eo im kōkajoorļo̧k jān ekkatak ippān doon kōn kein jipan̄ rie an jibadbad an m̧weo im Kabun̄ in. Menin enaaj kadedeļo̧k ilo jekjek eo ekkā kōm̧m̧ane jān ro me rekanooj kōņaan.
Ilo elōn̄ m̧ōttan ko an laļ in, armej rej kālet n̄an pād wōt ilo im̧ōn jar eo ālkin iien jar ko jikejuuļi ilo Jabōt n̄an lem̧ōņōņō kōn kōtaan ippān doon ko. Ejjelo̧k ilo kōjeļļa in kōn oktak eo me enaaj kar kakkure iminene in em̧m̧an im ekōjeraam̧m̧an ilo jabdwōt jekjek.
N̄an jipan̄ membōr ro pojak n̄an Jabōt, jet ward em̧ōj kadede aer jilkinļo̧k juon meļeļe ilo email, jeje lo taļboon, ak ennaan ilo social media ilo lukōn wiik eo. Kōnke kōn oktak in, kōmij lukkuun rie kain letok letak meļeļe jab in. Kūr kein renaaj kakeememej membōr ro kōn kweilo̧k eo ilo Jabōt jikejuuļi n̄an wiik jab eo, ekoba unin kōnono ko an katak eo an kūlaaj enaaj kōm̧m̧an, im rie eo an ekōnono an gospel eo ilo m̧weo ej wōnm̧aanļo̧k wōt. Ilo kakobab, kweilo̧k ko an rūtto ilo Jabōt renaaj barāinwōt letok meļeļe eo n̄an kakkeijel ekkatak eo ilo m̧ōn jar eo im m̧weo kajjojo wiik.
Kweilo̧k in kwojkwoj eo im iien kūlaaj eo enaaj aikuj eļap kōļmenļo̧kjeņ n̄an kanooj lale bwe kōttōbar ko ilo jetōb rej kōmejajaik ioon jerbal ko an opiij. N̄an waanjon̄ak, kōjjeļļā ko remaron̄ n̄an eļap tata kadedeļo̧k ilo lukōn wiik kūr eo ak ilo būrookraam̧ eo būrini. Ilo an kweilo̧k in kwojkwoj eo aikuj in wōr jar in kōpeļļo̧k im ikkilōk, kweilo̧k eo kein karuo aikuj in wōt n̄an kōm̧m̧an jar in ikkilōk.11
Āinwōt kar ba im̧aanļo̧k, jikejuuļ eo ekāāl an Jabōt ejjamin naaj ijjino m̧ae Jānwōde in 2019. Ewōr jet un ko n̄an menin: Ko ruo raorōk tata rej, m̧oktata, n̄an an wōr iien n̄an litok litak, Itok Ļoor Eō kein jipan̄ eo n̄an kajjojo armej im baam̧le ko im, ruo, n̄an kōtļo̧k iien n̄an stake būreejtōn ro im bisop ro n̄an karōk jikejuuļ in kweilo̧k ko kōn menin kōttōbar eo an lōn̄lōn̄ ward ko rej jar jibbon̄ tata ilo raan eo.
Āinwōt an ritōl ro kar pukōt revelesōn, unin tōl eo kar bōk ilo jet iiō ko remootļo̧k ej n̄an kōkajoorļo̧k kweilo̧k in kwojkwoj eo, kautiej raan in Jabōt, im kōketak im jipan̄ ro jinen im jemen im kajjojo armej n̄an kōm̧m̧ani m̧ōko im̧weer juon kein jipan̄ kōkajoorļo̧k ilo jetōb im kōļapļo̧k tōmak—juon jikin lan̄lōn̄ im m̧ōņōņō.
Kōjeraam̧m̧an ko Rejej Uwaer
Ta meļeļe in oktak kein n̄an ro uwaan Kabun̄ eo an Jisōs Kraist im Armej ro Rekwojarjar ilo Raan-ko Āliktata? Kōmij lōke bwe membōr ro renaaj jeraam̧m̧an ilo wāween ko rein juon. Jabōt emaron̄ juon raan in katak gospel eo im katakin ilo m̧ōn jar eo im ilo m̧weo. Ilo an kajjojo armej im baam̧le ko bōk kuņaer ilo ko̧o̧njeļ ko an baam̧le, menmenbwij an baam̧ļe, jerbal in karejar, jerbal in jipan̄, kabun̄-jar an juon make, im iien elem̧ōņōņō an baam̧le, raan in Jabōt enaaj ilo m̧ool erom laudin̄din̄.
Juon baam̧ļe jān Brazil rej membōr in juon stake ijo jikin eo ekāāl an Itok, Ļoor Eō kein jipan̄ eo kar idajon̄jon̄e. Eo jemen, Fernando, juon ekar jerbal in mijenede eo, ippān lio pāleen, Nancy, rej jinen im jemen emen ajri ro reddik, kar kwaļo̧k: “Ke Itok, Ļoor Eō būrookraam̧ eo eaar kwaļo̧ke ilo stake eo am, iaar kanooj m̧ōņōņō, im iaar ļōmņak kōn ‘wāween eo me kōmij ekkatak jeje ko rekwojarjar lo m̧weo enaaj oktak.’ Eaar lukkuun in waļo̧k ilo m̧weo im̧ō, im āinwōt juon ritōl an Kabun̄ iaar lo bwe eaar waļo̧k ilo im̧ōko jet. … Eaar jipan̄ kōm lukkuun ekōnono kōn jeje ko rekwojarjar ilo m̧weo im̧ōm. Lio pāleō im n̄a ewōr juon meļeļe em̧wilaļ kōn unin kōnono eo kar ekkatak kake. … Eaar jipan̄ kōm … kōļapļo̧k jeļāļo̧kjeņ eo am kōn gospel eo im kōļapļo̧k am tōmak im naan in kam̧ool. … Ij kwaļo̧k aō naan in kam̧ool …bwe ijeļā eaar im̧we jān Irooj bwe jokkuun wōt juon im jejjet ekkatak kōn pedped in katak ko im katak ko rej pād ilo jeje ko rekwojarjar ren bōktok eļapļo̧k tōmak, naan in kam̧ool, im meram n̄an baam̧ļe ko … ilo juon laļ ejakoļo̧k kōn nana.”12
Ilo stake eo idajon̄jon̄ in eaar kōm̧m̧an ilo irejet in laļ in, eaar wōr juon uwaak em̧m̧an n̄an Itok, Ļoor Eō kein jipan̄ in ekāāl an m̧weo. Elōn̄ raar riboot bwe raar eddōkļo̧k jān riiti jeje ko rekwojarjar n̄an lukkuun ekkatak jeje ko rekwojarjar. Eaar barāinwōt ekka kar en̄jake en̄jake eo ekar n̄an kōkajoorļo̧k tōmak im eaar wōr juon kilaan eaiboojoj ilo ward eo.13
Oktak eo Em̧wilaļ im Aitok Kitien
Kōttōbar eo an oktak kein ej n̄an bōk juon oktak eo em̧wilaļ im aitok kitien an rūtto ro im diktak in epepen eo. Peij eo kein kajuon an kein jipan̄ eo an kajjojo armej im baam̧ļe ej kwaļok: “Un leplep eo an aolep katak gospel eo im katakin ej n̄an kam̧wilaļļo̧k oktak eo ad im jipan̄ eromļok āinwōt Jisōs Kraist. … Menin ej meļeļe in pedped ioon Kraist n̄an ukōt būruwōd.”14 Menin ej jipan̄ jān pukōtļo̧k “eļapļo̧k jān juon kūlaaj ruum̧ im kareel ikdeelel ko im m̧weo. Ej aikuji jab m̧ūjkōk eo, kijejeto ko aolep raan n̄an meļeļe im mour kōn gospel eo. Oktak eo em̧ool ej aikuji kareel eo an Jetōb Kwojarjar.”15
Kōttōbar eo eaorōk tata im kōjeraam̧m̧an eo āliktata an oktak eo em̧wilaļ im aitok kitien ej erro n̄an bōk bujen ko im kain̄i ko an iaļ in bujen eo.16
Kōmij lōke kom̧ n̄an kapilōk ippān doon im n̄an kappukōt revelesōn n̄an kōjerbal otak kein—ilo jab kappukōt ennaan eo ak kajieon̄ kakien ta eo kajjojo armej im baam̧le ko. Kakobaba in meļeļe ko renaaj kwaļo̧k ilo kein leto letak meļeļe ko, ekoba leta eo an Būreejtōnji eo Kein Kajuon im epād ilowaan.
Ij kam̧ool n̄an kom̧ bwe ilo ekōnono ko an Ko̧o̧njeļ eo an Būreejtōnji eo Kein Kajuon im Doulul eo an Jon̄oulruo Rijilōk ro ilo tampeļ, im ālkin an rikanaan eo ad ejitōn bōro akweļap ippān Irooj kōn revelesōn n̄an jino kōm̧m̧ane oktak kein, juon kapene ekajoor kar bōke jān aolep. Russell M. Nelson ej Būreejtōn im rikanaan eo ad ejitōn bōro. Kōjeļļā ko raar kōm̧m̧an rainin renaaj tōprak in ilo kōjeraam̧m̧an ko reļļap n̄an ro me rej kōn laudin̄dik nōbar okta ko im kappuōt tōl eo an Jetōb Kwojarjar. Jenaaj erom epaakeļo̧k Jemedwōj Ilan̄ im ad Irooj im Rilo̧mo̧o̧r, Jisōs Kraist, ij lukkuun juon rikam̧ool. Ilo etan Jisōs Kraist, amen.