Juon Wōt ilo Kraist
Ro m̧ōtta rejitenbōro ilo jerbal in an Irooj, Ij tōmak jemaron̄ kōm̧m̧an em̧m̧anļo̧k im jej aikuj kōm̧m̧an em̧m̧anļo̧k n̄an karuwaineneik ro rekāāl tok n̄an Kabun̄ in.
Iakwe in rālep, ro jeiū im jatū. Ilo ad ba ilo kajin Brazilian Poruguese, “Boa tarde!” Ij en̄jake jeraam̧m̧an n̄an kuk ippān doon ilo kweilo̧k in eļap em̧m̧an an Kabun̄ eo an Jisōs Kraist im Armej ro Rekwojarjar ilo Raan-ko Āliktata ium̧win tōl eo an rikanaan eo ejitōnbōro, Būreejtōn Russell M. Nelson. Ij kautiej kōn iien in em̧m̧an n̄an kōj kajjojo n̄an ron̄jake ainikien Irooj jān rikarejar ro An ioon laļ in ilo raan kein ālikata jej mour ie.
Ijo jikū ilo Brazil elukkuun m̧weie kōn menin jeraam̧m̧an ko. Juon iaer ej Amazon River eo ebun̄bun̄, juon iaan reba ko reļļabtata im aetoktata ilo laļ in. Eaar ejaak jen ruo reba ko rejeno̧ļo̧k jān doon, Solimões im Negro. Ekabwilōn̄lōn̄, rej jim̧or ettōr ippān doon ilo juon m̧ail m̧okta jen an dān ko m̧urm̧ur, kōn an reba kein lukkuun oktak jān doon, kōn m̧ōkajin, kōn jekjekkin, im oktakier. Ālkin jet m̧ail, dān ko rej m̧urm̧ur ippān doon, erom̧ juon reba eoktak jān m̧ōttan ko an make. Ālkin wōt an m̧ōttan kein ippān doon, Amazon River eo elukkuun kajoor an oktak n̄e iokļo̧k Atlantic Ocean, ej kōro̧o̧lļo̧k dānnin jo̧o̧ļ bwe dān eo erreeo en maron̄ pād wōt ilo m̧ail eo ilo lo̧jet.
Ilo ejja wāween in an Solimões im Negro Rivers ettōr ippān doon n̄an kōm̧m̧an eļap oktak ilo Amazon River, ro nejin Anij rej kuk ippān doon ilo Kabun̄ eo an Jisōs Kraist em̧ōj an jepļaaktok jān m̧wiļ ko reoktak, imminene ko, im m̧anit ko, ejaake jukjukin pād eo em̧m̧an an Ro Rekwojarjar ilo Kraist. Ilo m̧ool, ilo ad peran, jipan̄, im iakwe doon, jej juon wōt n̄an ejaake juon jem̧doon eo ekajoor kōn em̧m̧an ilo laļin. Āinwōt rikaļoor ro an Jisōs Kraist, ettōr ippān doon ilo reba in kōn em̧m̧an, jenaaj maron̄ in leļo̧k “dān erreeo” an gospel in n̄an laļ in.
Irooj eaar im̧we rikanaan ro An n̄an katakin kōj elmen ad maron̄ jipan̄ im iakwe doon bwe jen maron̄ in juon wōt ilo tōmak im̧ jibadbad n̄an ļoor Jisōs Kraist. Paul, Rijjilōk eo ilo Kallim̧ur Ekāāl, kar katakin ro “raar peptaij ilo Kraist raar likūt Kraist … : bwe kom̧ij aolep juon wōt ilo Kraist.”1
Ke jaar kallim̧ur ilo iien peptaij eo n̄an ļoor Rilo̧mo̧o̧r eo, jej kam̧ool im̧aan Jemād bwe jenaaj bōk iood etan Kraist.2 Ilo ad kajjieon̄ in bōk paoktok ko An rekwojarjar ilo mour ko ad, jej lukkuun oktak jen kar m̧okta, kōn Pinmuur eo an Kraist Irooj, innam ad iakwe n̄an aolep armej enaaj ļapļo̧k.3 Jej en̄jake juon n̄ūrbōktak eo eļap kōn em̧m̧an im m̧ōņōņō eo an aolep. Jej kalimjōk doon āinwōt ro jeim̧ jati, āinwōt ro nejin Anij ilo kwojarjar, m̧wiļ, im aorōk. Jej kōņaan kea kōn doon im ineek eddo ko an doon.4
En̄in ta eo Paul eaar kōmeļeļeiki āinwōt iakwe-em̧ool.5 Mormon, juon rikanaan ilo Bok in Mormon, eaar kōmeļeļeik āinwōt “iakwe eo erreeo an Kraist,”6 eo ej make wōt em̧man, jejjet, im iakwe eo ekajoor. Rikanaan eo ad kiiō, Būreejtōn Russell M. Nelson, jet iien rem̧ootļo̧k eaar kōmeļeļeiki juon waļo̧k an iakwe in erreeo an Kraist āinwōt jerbal in karejar, eo eļapļo̧k n̄an mije im em̧akūt eo ekwojarjar ļo̧k n̄an iakwe im kea kōn doon āinwōt an kar Rilo̧mo̧o̧r.7
Jen kōļmenļo̧kjeņ kōn katak in kōn iakwe im kea, āinwōt an kar Rilo̧mo̧o̧r kōm̧m̧ane, kōn peran, jipan̄, im rie ro rejkab oktak im ro rej jino kwaļo̧k aer kōņaan kobatok ilo iien ad Kabun̄jar.
N̄e rein rekāāl rej etal jen laļ in im kautieje gospel in an Jisōs Kraist, kobatok ilo Kabun̄ in An, rej erom̧ ro Rikaļooraņ, bar ļotak kōn E.8 Rej likūt juon laļ eo raar lukkuun jeļā kake n̄an kālet im ļoor Jisōs Kraist, kōn juon jibadbad eļap kōn bōro, kobatok n̄an juon “reba” kāāl āinwōt Amazon River eļap—juon reba eo eobrak kōn em̧m̧an otemjeļo̧k im jim̧we me ej ettōr m̧aanļo̧k n̄an im̧aan mejān Anij. Rijilōk Paul eaar kōmeļeļeiki āinwōt “juon epepen em̧ōj kāālōte, ri aelōn̄ re kwōjarjar, armej ro an Anij.”9 Ilo an rein m̧ōttad rekāāl deļo̧n̄tok ilo reba in ekāāl, remaron̄ en̄jake jidik jabwābwe ilo jinoin. Rein m̧ōttad rekāāl rej lo er make āinwōt m̧urm̧ur ilo juon reba kōn oktak ko rejjejet, mejatotoiōr, im oktakier—ilo juon reba kōn m̧wiļ ko aer make, iien jar, m̧anit, im ilo naan. Mour eo aer ekāāl ilo Kraist emaron̄ in ajebjeb n̄an er. Ļōmņak jidik kōn aer maron̄ en̄jake ke raar ron̄ jinoin naan kein āinwōt “FHE,” “BYC”, “Jabōt in jitlo̧k,” “peptaij kōn ro remej,” “kobain bok ko jilu,” im ko jet.
Epidodo n̄an loe unin aer maron̄ en̄jake aer jab iaiio. Ilo kain jekjek kein, remaron̄ kajjitōk ippāer make, “Ewōr ke jikū ijin? Ij ke uwaan Kabun̄ eo an Jisōs Kraist im Armej ro Rekwojarjar ilo Raan-ko Āliktata? Kabun̄ ej ke aikuji eō? Inaaj ke lo ro m̧ōtta rekāāl rem̧ōņōņō in jipan̄ im rie eō?
Ro jeiū im jatū rejitōnbōro, ilo tōre kein, ro eoktak ijo̧ko̧ reppād ie ilo iaļ an juon rikaļooraņ eaikuj in erļo̧ke pein n̄an m̧ōttāik ro m̧ōttad rekāāl, bōk er ijo rej pād ie, im jipan̄, iakwe, im kobaiktok er n̄an mour ko ad. Rein aolep m̧ōttad rekāāl rej likao im jiron̄ ro nejin Anij raorōk.10 Jejjab maron̄ luuji juon iaer kōnke, āinwōt Amazon River eo ej pedped wōt ilo an dān ko toorļo̧k, jej aikuji er toon wōt aer aikuji kōj n̄an erom̧ juon kajoor ekajoor kōn em̧m̧an ilo laļ in.
Anij eaar leļo̧k taļōn ko an ro m̧ōttad rekāāl, kam̧ōņōņō, im em̧m̧an ilo er. Aer itok limo kōn gospel in emaron̄ in kapopo, kōn menin ejipan̄ kōj kōkajoorļo̧k naan in kam̧ool ko ad make. Rej barāinwōt bōktok errem̧aanļo̧k n̄an ad meļeļe mour in im gospel in.
Kar katakin kōj kilen ad maron̄ jipan̄ ro m̧ōttad rekāāl n̄an en̄jake ruwainene im iakwe ilo Kabun̄ eo an Jisōs Kraist em̧ōj an kar jepļaaktok. Rej aikuji jilu men ko bwe ren pen wōt im tiljek ilo aolepān mour ko aer:
Juon, rej aikuji ro jeier im jatier ilo Kabun̄ in ro rej lukkuun m̧ōņōņō kōn er, ro m̧ōttaer me rem̧ool im jouj me remaron̄ oktak ļo̧k n̄an er, ro renaaj etetal ippāer, im ro renaaj uwaaki kajjitōk ko aer. Āinwōt membōr ro, jej aikuj iien otemjej mije im reilo̧k n̄an mej ko rekāāl n̄e jej kobaļo̧k ilo m̧akūtkūt im kweilo̧k ko an Kabun̄ in, jekdo̧o̧n eddo rōt, jerbal, ak n̄ūrbōktak ko ewōr ippād. Jemaron̄ kōm̧m̧ani men ko reddik n̄an kōm̧m̧an bwe ro m̧ōttad rekāāl ren en̄jake iakwe eo an Rilo̧mo̧o̧r ilo Kabun̄ in An, āinwōt leļo̧k karuwainene, ettōn̄dikdik, jijet ippān doon ilo ad im kabun̄jar ippān doon, im kwaļo̧k kajjier n̄an membōr ro jet, im ko jet. Ilo ad kōpeļļo̧k būruwōd n̄an ro m̧ōttad rekāāl ilo wāween kein, jej jerbal kōn jetōbin jerbal in karejar. Ilo ad jerbal in karejar n̄an er āinwōr kar Rilo̧mo̧o̧r eo, reban en̄jake āinwōt “ruwamājet ilo kōjem ko ad.” Renaaj en̄jake āinwōt n̄e rekkar n̄an m̧ōttāik ro rekāāl, im men eo eaorōktata, renaaj en̄jake iakwe eo an Rilo̧mo̧o̧r kōn kea eo ad.
Ruo, ro rekāāl rej aikuj juon eddo—juon jerbal n̄an jerbal n̄an ro jet. Jerbal n̄an ro jet ej juon iaan em̧m̧akūt ko reļļap ilo Kabun̄ eo an Jisōs Kraist im Armej ro Rekkwojarjar ilo Raan-ko Āliktata. Ej juon jerbal emaro̧n̄ kōkajoorļo̧k tōmak ko ad. Kajjojo ro rekāāl rej aikuji jerbal in. Ilo an bisop eo im ward ko̧o̧njeļ eo eddo n̄an leļo̧k kūr ko ālkin wōt aer kar peptaij, ejjeļo̧k men ej bōbrae kōj, āinwōt membōr ro, n̄an karuwaineneik ro m̧ōttad rekāāl n̄an jipan̄ kōj jerbal n̄an doon ak ilo būroojāāk in jerbal in jipan̄ ko.
Jilu, ro m̧ōttad rekāāl reaikuj “naajdik jen naan eo em̧m̧an an Anij.”11 Jemaron̄ jipan̄ er n̄an iakwe im jino jeļā kōn jeje ko rekwojarjar ilo ad riit im kōnono kōn katak ko ippāer, leļo̧k bwebwenato ko im kōmeļeļeik naan ko reppen. Jemaron̄ bar katakin er kilen bōk tōl eo an juon make kōn emakijkij ekkatak jeje ko rekwojarjar. Ilo kakkobaba, jemaron̄ pukotļo̧k ro m̧ōttad rekāāl ilo m̧oko m̧weier im karuwaineneik er n̄an m̧oko m̧ōd ijjelo̧kin iien kweilo̧k ko an Kabun̄ im m̧akūtkūt ko, jipan̄ er deļo̧n̄e reba eo eļap an ro Rekwojarjar.
Kile oktak im apan̄ ko an ro m̧ōttad rekāāl ejino oktak ilo baam̧le eo an Anij, āinwōt ro jeid im jatid, jemaron̄ kwaļo̧k kilen ad anjo̧ ilo ejja apan̄ ko ilo mour ko ad. Menin enaaj jipan̄ er jeļā bwe rejjab make iaer im bwe Anij enaaj kōjeraam̧m̧an er ilo aer kōjerbal tōmak ilo kallim̧ur ko An.12
N̄e Solimões im Negro River ko rej m̧urm̧ur ippān doon, Amazon River eo ej jino ļap im kajoor. Ilo ejjab jekjek in wōt, n̄e jej im ro m̧ōttad rekāāl rej lukkuun kobaik doon, Kabun̄ eo an Jisōs Kraist em̧ōj an kar jepļaaktok ej jino kajoor im pen. Kōrā eo ippa, Rosana, im n̄a kom̧ro ej lukkuun m̧ōņōņō kōn aolep ro raar jipan̄ kōm̧ m̧urm̧ur ilo reba in ekāāl elōn̄ iiō ko rem̧ootļo̧k, n̄e jej kautieje gospel eo an Jisōs Kraist ilo laļ eo ad ilo Brazil. Ilo aolepān iiō ko, armej rein rem̧m̧an raar lukkuun jerbal in karejar em̧ool n̄an kōm̧ im kar jipan̄ kōm̧ n̄an ettōr wōt ilo jim̧we. Jej lukkuun kam̧oolol er.
Rikanaan ro ilo Western Hemisphere raar jeļā kilen dāpij ro m̧ōttad rekāāl ettōr ippān doon ilo tiljek n̄an reba in ekāāl an em̧m̧an n̄an mour indeeo. N̄an waanjon̄ok, āinwōt loi ilo tōre in ad im jeļā bwe jenaaj ioon apan̄ ko,13 Moronai eaar kobaik jet bun̄tōn ne ko raorōk ilo jeje ko an ilo Bok in Mormon:
“Im ālikin kar bōk er n̄an peptaij, im kar jerbale ioer im karreoik er jān kajoor eo an Jetōb Kwōjarjar, rekar bōnbōn ilubwiljin armej ro an kabun̄ eo an Kraist; im etaer kar būki, bwe ren maron̄ keememej im naajdik er jān em̧m̧an eo an naan in Anij, n̄an kōjparok er ilo wāween ejim̧we, n̄an kōjparok er iien otemjej n̄an ekkōl im jar, atartar make ioon em̧m̧an ko an Kraist, eo ej rijeje im rikadedeļo̧k an tōmak eo aer.
“Im kabun̄ eo eaar kwelo̧k emmakijkij, n̄an jitlo̧k im n̄an jar, im n̄an kōnono ippān doon kōn em̧m̧anļo̧k eo an jetōb ko aer.”14
Ro m̧ōtta rejitōnbōro ilo jerbal in an Irooj, ij tōmak jemaron̄ kōm̧m̧an em̧m̧anļo̧k im jej aikuj kōm̧m̧an em̧m̧anļo̧k n̄an karuwaineneik ro rekāāl tok n̄an Kabun̄ in. Ij karuwaineneik kom̧ n̄an ļōmņake ta eo jemaron̄ kōm̧m̧ane n̄an erļo̧k ke eļapļo̧k, bōke, n̄an jipan̄ er, jino jān Jabōt in tok juon. Lukkuun lale bwe jerbal ko am̧ ilo Kabun̄ in ren jab pinej am̧ karuwaineneik ro rekāāl n̄an kweilo̧k im m̧akūtkūt ko an Kabun̄ in. Ilōn̄in aolep men otemjej, jetōb kein raorōk im̧aan mejān Anij im relukkuun aorōk jen būrookram̧ im m̧akūtkūt ko. Ilo ad jerbal in karejar ippān ro m̧ōttad rekāāl kōn aolepān būruwōd kōn iakwe erreeo āinwōt an kar Rilo̧mo̧o̧r kōm̧m̧ane, Ij kallim̧uri kom̧, ilo Etan, bwe Enaaj jipan̄ kōj ilo kijeje ko ad. N̄e jej tiljek āinwōt rijerbal in karejar ro, āinwōt kar Rilo̧mo̧o̧r, ro m̧ōttad rekāāl renaaj bōk jipan̄ eo rej aikuji n̄an pen wōt, kajoor, im niknik n̄an jemļo̧kin. Renaaj kobatok ippād ilo ad erom̧ armej ro rekajoor an Anij im naaj jipan̄ kōj bōktok dān erreeo n̄an juon laļ in eaanjiwiwi ilo aikuj kōn kōjeraam̧m̧an ko an gospel eo an Jisōs Kraist. Ajri rein nejin Anij renaaj en̄jaake āinwōt “rejjab bar rūwamājet ak ritoiak, ak juon wōt ippān ro rekwojarjar.”15 Ij kallim̧uri kom̧ bwe naaj kile an Rilo̧mo̧o̧r, Jisōs Kraist, pād ilo Kabun̄ eo An make. Renaaj diwōj deļo̧n̄ ippād āinwōt juon reba in to̧l kōn em̧m̧an eo an eļap m̧ae renaaj bōk kōn pein an ad Irooj Jisōs Kraist, im renaaj ron̄ an Jemād ba, “Kom̧ naaj bōk mour indeeo.”16
Ij karuwaineneik kom̧ n̄an pukot jipan̄ an Irooj n̄an iakwe ro jet āinwōt An kar iakwe eok. Jen ļoor kapilōk eo an Moromon ekar letok: “Kōn menin, ro jeiū im jatū rejitōnbōro [im kōrā ro jeiū im jatū], kom̧in jar n̄an Jemād kōn aolep kajoor in bōro, bwe kom̧in maron̄ obrak kōn iakwe eo An, eo Eaar leļo̧k ioon aolep ro rej rikaļoor ro an rem̧ool an Nejin, Jisōs Kraist.”17 Kōn m̧ool kein, ij lukkuun kam̧ool im kōm̧m̧ane āindein ilo etan Jisōs Kraist, amen.