2010–2019
Bōk Iood Make Etan Jisōs Kraist
Oktoba 2018
10:25

Bōk Iood Make Etan Jisōs Kraist

Jān Elder Robert C. Gay

Jān Būreejtōnji eo an Jiljilimjuonn̄oul

Kōm̧m̧an bwe jān tiljek wōt ilo bōk iood make etan Jisōs Kraist—kōn lo āinwōt An loe, kōn jerbal āinwōt An kar jerbal, im kōn lōke bwe An jouj ebwe.

Ro jeiū im jatū, ejjab etto, ke iaar kejōkļo̧kjeņ kōn kean̄ eo an Būreejtōn Russsell M. Nelson n̄an kūr Kabun̄ in kōn āt eo kar kwaļo̧ke, iaar elōkļo̧k n̄an jeje ko ijo Rilo̧mo̧o̧r eo eaar katakin Rinipai ro kōn etan Kabun̄ eo.1 Ke iaar riiti naan ko an Rilo̧mo̧o̧r eo, eaar āinwōt eļap meļeļe in n̄an n̄a kōn ekōjkan An barāinwōt kar jiron̄ armej ro bwe “kom̧ij aikuj bōk ioomi etan Kraist.”2 Menin ekōm̧m̧an bwe in kalimjōk eō make im kajjitōk, “Ij ke bōk ioō make etan Rilo̧mo̧o̧r āinwōt n̄e Enaaj kar kōm̧m̧ane āindein?”3 Rainin ikōņaan kwaļo̧k jet en̄jake ko iaar būki n̄an uwaake kajjitōk eo aō.

M̧oktata, n̄an bōk iood make etan Kraist ej meļeļe in jen tiljek kajjieon̄ n̄an kalimjōke āinwōt an Anij kalimjōke.4 Ekōjkan an Anij kalimjōke? Josep Smith eaar ba, “Ilo an juon m̧ōttan in armej ekajet im liaakeļo̧k ro jet ilo ejjeļo̧k tūruam̧o, eo Jemen Eļap an laļ in ej kalimjōk aolepān baam̧le eo an armej kōn kea eo an juon jemen im iakwe an juon jemen ak jinen” bwe “An iakwe [ej] em̧wilaļ.”5

Jet iiō ko remootļo̧k lio jeiū erūtto eaar mej. Mour eo an eaar pen. Eaar kakkōt ippān gospel eo im ejjan̄in kar lukkuun niknik. Ļeo pāleen eaar kakkure m̧are eo aerro im ilo̧k jān e ippān emen ajri ro reddik n̄an lale er. Ilo joteen eo eaar jako, ilo juon ruum̧ eo ippān ajri ro nejin rej pād, iaar leļo̧k n̄an e juon kōjeraam̧m̧an n̄an an bar jepļaak ilo aenōm̧m̧an n̄an kapijuknen. Ilo iien eo ekar kanooj emakijkij aō kōmeļeļeik mour eo an lio jeiū kōn ļōmņak wōt kōn mālijjon̄ ko an im an jab kar niknik. Ke iaar likūt peiū ioon bōran joteen jab eo, iaar bōk juon kauwe eļap jān Jetōb eo. Kar kalikkar n̄an n̄a kōn em̧m̧an eo an im kar kōm̧m̧an bwe in kalimjōke e āinwōt an Anij kar kalimjōke—ejjab āinwōt juon eo eaar kakkōt ippān gospel eo im mour ak āinwōt juon eo eaar aikuj ņa mejļan men ko reppen eaar ejjeļo̧k ippa. Iaar kalimjōke āinwōt juon m̧am̧a eo ekabwilōn̄lōn̄ eo, kōjekdo̧o̧n kapan̄pan̄ ko reļļap, eaar lale ajri ro emān raiboojoj, kabwilōn̄lōn̄. Iaar kalimjōke āinwōt juon m̧ōttan eo jinōm eo eaar bōk iien n̄an lale im erom̧ juon m̧ōttan ālkin an kar eo jemām mej.

Ilo joteen eo āliktata ippān lio jeiū, ij tōmak Anij eaar kajjitōk ippa, “Kwoj ke lale ke aolep ro ipeļaakūm̧ ej juon armej kwojarjar?”

Brigham Young ekar katakin:

“Ikōņaan katakin Armej ro Rekwojarjar … n̄an meļeļe em̧m̧aan im kōrā ro āinwōt aer im jab meļeļe er āinwōt kwe.”6

“Ej emakijkij n̄an kōnono kōn—‘Kōn juon armej eaar kōm̧m̧an bōd, im ejjab maron̄ erom juon Armej ekwojarjar.’ … Jej ron̄ an juon kanejnej im riab … [ak] kakkure Jabōt. … Jab ekajete kain armej eo, kōnke kwojjab jeļā karōk eo ewōr ippān Irooj n̄an er … [Ijello̧kin,] kijenmej ippāer.”7

Ewōr ke iaami emaron̄ pijaikļo̧k an ad Rilo̧mo̧o̧r eo kōtļo̧k bwe kom̧ im eddo ko ami ren etal ilo An jab kile? Rilo̧mo̧o̧r eo eaar kalimjōk Risamaria eo, riļōn̄ eo, rikoļāāk eowōj eo, rileba eo, rinan̄imej eo ilo kōmālij, im rijerawiwi eo kōn juon wōt meļeļe. Aolep raar ajri ro nejin Jemen. Aolep raar maron̄ lo̧mo̧o̧r.

Komaron̄ ke pijaik An oktakļo̧k jān bar juon armej kōn pere kōn jikier ilo aelōn̄ in kiin̄ eo an Anij ak jān juon armej eo ekar jorrāān ilo jabdewōt jekjek?8 Ij jab maron̄. Ilo meļeļe eo an Kraist, kajjojo jetōb eļap an aorōk. Ejjeļo̧k juon ekar ekkapit n̄an an likjab. Mour indeeo emaron̄ n̄an aolep.9

Jān kauwe eo an Jetōb ilo turin jikin kiki eo an lio jeiū, iaar katak juon katak eaorōk: n̄e jej ļōmņak kōn ro jet ilo ejja wāween eo Irooj ej ļōmņak kake er, jenaaj kōttōprak ruo kōttōpar ko—pinmuur an ro jej ioon er im pinmuur ad make.

Ruo, n̄an bōk iood make etan Kraist, jejjab aikuj kalimjōke wōt āinwōt an Anij kalimjōke, ak jej aikuj kōm̧m̧ane jerbal eo An im jerbal āinwōt An kar jerbal. Jej mour kōn ruo kien ko reļļap, ajeļo̧k n̄an ankilaan Anij, aiintok Israel, im kōm̧m̧an bwe ad meram “en romaak im̧aan mejān armej.”10 Jej bōk im mour kōn bujen ko im kain̄i ko an Kabun̄ eo An kar kōjepļaaktok.11 Ilo ad kōm̧m̧ane menin, Anij ej letok n̄an kōj kajoor n̄an kōjeraam̧m̧an kōj make, baam̧le ko ad, im mour ko an ro jet.12 Kajjitikin eok make, “Ewōr en ke ijeļā kajien me ejjab aikuji kajoor ko an lan̄ ilo mour ko aer?”

Anij enaaj jerbali menin bwilōn̄ ko ilubwilijid ilo ad kokwojarjar kōj make.13 Jej kokwojarjar kōj make jān karreoik būruwōd.14 Jej karreoik būruwōd ilo ad ron̄jake E,15 ukweļo̧k jān jerawiwi ko ad,16 erom rioktak,17 im iakwe āinwōt An iakwe.18 Rilo̧mo̧o̧r eo eaar kajjitōk ippād, “Bwe kom̧ij yokwe ro rej yokwe kom̧, ta jinōkjeej n̄an kom̧?”19

Ejjab etto iaar katak kōn juon en̄ajke ilo mour eo an Elder James E. Talmage em eaar kōm̧m̧an bwe in bōjrak im ļōmņak kōn ekōjkan aō iakwe im jerbal n̄an ro ipeļaakū. Āinwōt juon professor edik, m̧okta jān an erom juon Rijilōk, ilo iien eo eļap tata an nan̄inmej in pidodo ilo 1892 eo, Elder Talmage eaar lo juon baam̧le an ruwaimejet ro, rejjab uwaan Kabun̄ in, ro raar jokwe epaake e im raar en̄taan jān nan̄inmej eo. Ejjeļo̧k juon eaar kōņaan kōnan̄inmej er jān deļo̧n̄e m̧weo eaar ļanootot ilo nan̄inmej eo. Elder Talmage, mekarta, kar m̧ōkaj an ilo̧k n̄an m̧weo. Eaar lo emān ajri ro: juon ruo-im-juon-jimettan-iiō rūtton kar mej ioon jikin babu eo, juon ļalem-iiō-rūtton im jon̄oul-iiō-rūtton ilo eļap metak, im juon jōn̄ouljilu-iiō rūtton em̧ōjņo̧ļo̧k. Ro jinier im jemeer raar en̄taan kōn būrom̧ōj im kanooj m̧ōk.

Elder Talmage eaar lolorjake eo emej im eo emour, būruum̧i ruum̧ ko, kadiwōj nuknuk ko retton, im tūli rāāk ko retton rekalbubu kōn nan̄inmej eo. Eaar jerbal aolepān raan eo innām ro̧o̧l jibbon̄ōn eo juon. Eo jon̄oul-iiō-rūtton eaar mej ilo bon̄ōn eo. Eaar kotak im jibwe eo ļalem-iiō-rūtton. Lio eaar pokpok būtōktōk iuwur aolepān turin mejān im nuknuk ko. Eaar je: “Iaar jab maron̄ doorļo̧k jān eō,” im eaar jibwe m̧ae iien eo eaar mej ilo pein. Eaar jipan̄ kalbwin ajri ro jilu aolep im kar kōm̧m̧an karōk n̄an m̧ōn̄ā im nuknuk erreo n̄an baam̧le eo ekar būrom̧ōj. Ke eaar ro̧o̧l n̄an m̧weo, Būratōr Talmage eaar julo̧k nuknuk ko an, tutu kōn zinc solution, kōttoļo̧k e make jān baam̧le eo an, im en̄taan jidik kōn an nan̄inmej eo pād ippān.20

Ekanooj lōn̄ mour ko ipeļaakid rej pād ilo kauwōtata. Armej ro rekwojarjar rej bōk etan Rilo̧mo̧o̧r eo ioer make kōn erom ekwojarjar im jerbal in karejar n̄an aolep jekdo̧o̧n wōn er—mour ko rej lo̧mo̧o̧r ilo ad kōm̧m̧ane āindein.21

Āliktata, ij tōmak bwe n̄an bōk iood make Etan, jej aikuj lōke E. Ilo juon kweilo̧k iaar pād ie juon Jabōt, juon jiron̄ eaar kajjitōk juon men āinwōt in: “Ļaddik eo jera im n̄a ejkab jako am̧ro jerā, im eaar kālet n̄an em̧m̧akūt jān Kabun̄ in. Ej jiron̄ eō eļapļo̧k an m̧ōņōņō jān kar m̧okta. Ekōjkan an menin maron̄?”

Rilo̧mo̧o̧r eo eaar uwaak ke kajjitōk in ke Eaar ba n̄an Rinipai ro, “A eļan̄n̄e [mour eo ami] e jab ekkal ioon gospel eo Aō, im ej ekkal ioon jerbal ko an armej, ak ioon jerbal ko an devil, em̧ool Ij ba n̄an kom̧ [kom̧ naaj] ewōr [ami] lan̄lōn̄ ilo jerbal ko an jidik wōt iien, im ejjab etto jem̧ļo̧k eo ej itok.”22 Ejjeļo̧k lan̄lōn̄ ej pād n̄an jem̧ļo̧kin itulikin gospel eo an Jisōs Kraist.

Ilo kweilo̧k eo, mekarta, iaar ļōmņak kōn elōn̄ armej ro rem̧m̧an ijeļā ro rej kakkōt ippān eddo ko reļļap im kien ko me relukkuun in pen n̄an er. Iaar kajjitikin eō make, “Bar ta Rilo̧mo̧o̧r eo emaron̄ in kar ba n̄an er?”23 Ij tōmak E emaron̄ kar kajjitōk, “Kom̧ij ke lōke eō?”24 N̄an kōrā eo ewōr an nan̄inmej ikkijien būtōktōk, Eaar ba, “Am̧ tōmak ear kemour eok; kwōn ilo̧k ilo aenōm̧m̧an.”25

Juon iaan eoon ko rem̧m̧an tata ippa ej Jon 4:4, eo jej riit, “Im em̧m̧an en deblo̧k Sameria.”.”

Etke ij iakwe eoon jab in? Kōnke Jisōs eaar jab aikuj in etal n̄an Sameria. Riju ro ilo tōre eo An raar dike Risameria ro im kar itok itak ilo iaļ ko ipeļaakin Sameria. Bōtaab Jisōs eaar kālet n̄an ilo̧k n̄an ijo n̄an kwaļo̧k n̄an aolepān laļ in ej kab kein kajuon bwe Eaar Messaia eo kar kallim̧ur kake. Kōn ennaan in, Eaar kālet ejjab wōt juon kumi enana ak barāinwōt juon kōrā—ejjab jabdewōt kōrā ak juon kōrā ej mour kōn jerawiwi—juon eo eaar ļōmņak ilo tōre eo eaar jaorōk iaan jaorōk tata ro. Ij tōmak Jisōs eaar kōm̧m̧an menin bwe kajjojo iaad en maron̄ iien otemjej meļeļe bwe An iakwe eļapļo̧k jān mijak ko ad, an̄urlep ko ad, pere ko ad, kapo ko ad, jerawiwi ko ad, baam̧le ko ad rerup, būrom̧ōj im inepata ko ad, an ejjeļo̧k im̧ōd, ad kōņaan ippān juon eo āinwōt kōj, nan̄inmej ko ad eto aer pād, nan̄inmej eo ad eto an jako, jeram̧ōl eo ad, ad kakkure, ad ebweer, im ad ajimakeke.26 Ekōņaan bwe aolep ren jeļā ejjeļo̧k jabdewōt im ejjeļo̧k juon men Ejjab maron̄ kemouri im kadiwōjļo̧k n̄an leļo̧k lan̄lōn̄ eo ejjeļo̧k jem̧ļo̧kin.27

An jouj eļap.28 Eaar wanlaļļo̧k ilaļ in men ko otemjej. Kajoor in Pinmuur eo An ej kajoor eo n̄an anjo̧ ioon jabdewōt eddo ilo mour ko ad.29 Ennaan eo n̄an kōrā eo ilo aibōj laļ eo ej bwe Ejeļā jekjek ko ad ilo mour30 im bwe jemaron̄ iien otemjej etetal Ippān jekdo̧o̧n ia eo jej jutak ie. N̄an lio im n̄an kajjojo iaad, Ej ba, “A jabdewōt eo ej idaak dān eo I naaj leļok n̄an e, e jāmin bar maro indeeo; a dān eo, [naaj bōk] aebōj ilo e im naaj to̧o̧rtok n̄an mour indeeo.”31

Ilo jabdewōt itok itak ko an mour, etke kom̧ij oktakļo̧k jān juon wōt Rilo̧mo̧or eo ewōr aolep kajoor n̄an kemour im lo̧mo̧o̧ren kom̧? Jekdo̧o̧n ta wōņāān eo kom̧ij aikuj kōļļāik n̄an lōke E ej wōr tokjān kōļļāiki. Ro jeiū im jatū, jān kālet n̄an kōļapļo̧k ad tōmak ilo Jemedwōj Ilan̄ im ad Rilo̧mo̧o̧r, Jisōs Kraist.

Jān ijo em̧wilaļ tata an jetōb eo aō, ij kwaļo̧k kam̧ool bwe Kabun̄ eo an Jisōs Kraist im Armej ro Rekwōjarjar ilo Raan-ko Āliktata ej Kabun̄ eo an Rilo̧mo̧o̧r eo, tōl jān Kraist eo emour kōn juon rikanaan em̧ool. Ej aō jar bwe jenaaj tiljek ilo bōk iood make etan Jisōs Kraist—kōn kalimjōke āinwōt An kalimjōke, kōn jerbal āinwōt An kar jerbal, im kōn lōke bwe An jouj eļap n̄an bōkļo̧k kōj n̄an kapijuknen eo im n̄an lan̄lōn̄ indeeo. Ilo etan Jisōs Kraist, amen.

Kakeememej ko

  1. Lale 3 Nipai 27:3–8.

  2. Lale 3 Nipai 27:5–6; lale bae Katak im Bujen ko 20:77 im bujen eo an kwojkwoj.

  3. Lale Dallin H. Oaks, His Holy Name (1998) kōn juon likio in ekōnono kōn bōk iood make im erom juon rikam̧ool kōn etan Jisōs Kraist.

  4. Lale Mosaia 5:2–3. M̧ōttan eo an oktak in bōro eo ekajoor ilubwilijin armej ro an Kiin̄ Benjamin eo ekar bōk ioer make etan Kraist eaar bwe māj ko mejeer raar peļļo̧k n̄an “erreilo̧k ko reļļap.” Ro rej delo̧n̄e aiboojoj in aļ rej ro kajjojo ro rej “lo āinwōt rekar loe” (Katak im Bujen ko 76:94

  5. Teachings of Presidents of the Church: Joseph Smith 2007), 39.

  6. Brigham Young, in Journal of Discourses,19:41.

  7. Discourses of Brigham Young, sel. John A. Widtsoe (1954), 278.

  8. Lale 3 Nipai 17:7.

  9. Lae Jon 3:14–17; Jerbal 10:34; 1 Nipai 17:35; 2 Nipa 26:33; Katak im Bujen ko 50:41–42; Moses 1:39. Elder D. Todd Christofferson eaar barāinwōt katakin: “Kōn lōke kōmij kam̧ool bwe Pinmuur eo an Jisōs Kraist ej kōtmene im, ilo jem̧ļo̧k in, jenaaj ņa wōņāān aolep karmejete im jerwaan n̄an ro me rej oktakļo̧k n̄an E. Ejjeļo̧k juon ej jitōn̄e n̄an bōk edikļo̧k jān aolep men Jemen ewōr ippān n̄an ro Nejin.” (“Etke Jej M̧are, Etke Jej Baam̧leLiahona,Māe 2015, 52).

  10. Lale Matu 5:14–16; 22:35–40; Mosaia 3:19; Katak im Bujen ko 50:13–14; 133:5; barāinwōt lale Russell M. Nelson, “The Gathering of Scattered Israel,” Liahona, Nov. 2006, 79–81.

  11. Lale Livitikōs 18:4; 2 Nipai 31:5–12; Katak im Bujen ko 1:12–16; 136:4; Laajrak in Tōmak ko 1:3–4.

  12. Lale Katak im Bujen ko 84:20–21; 110:9.

  13. Lale Joshua 3:5; Katak im Bujen ko 43:16; lale barāinwōt Jon 17:19. Rilo̧mo̧o̧r eo eaar karmejeteik E make n̄an bōk kajoor eo n̄an kōjeraam̧m̧an kōj.

  14. Lale Hilamōn 3:35; Katak im Bujen ko 12:6–9; 88:74.

  15. Lale Josep Smith—Bwebwenato 1:17, kappe eo m̧oktata kar leļo̧k jān Anij ilo visōn in n̄an Rikanaan Josep Smith; lale barāinwōt 2 Nipai 9:29; 3 Nipai 28:34.

  16. Lale Mark 1:15; Jerbal 3:19; Alma 5:33; 42:23; Katak im Bujen 19:4–20. Barāinwōt kejōkļo̧kjeņ kōn jekjek kein ruo kōn jerawiwi. M̧oktata, Hugh Nibley ej je: “Jerawiwi ewaan. Ej kōm̧m̧ane juon men n̄e kwoj aikuj kōm̧m̧ane bar juon men im men ko rem̧m̧anļo̧k me ewōr am̧ maron̄” (Approaching Zion, ed. Don E. Norton [1989], 66). Mother of John Wesley, Susanna Wesley, kar jeje n̄an ļeo nejin: “Bōk kakien in. Jekdo̧o̧n ta eo ej kōm̧ōjņo̧ik jibadbad eo an, ej kakkure lur in ļōmņak jim̧we, katinaad kōļmenļo̧kjeņ eo am̧ kōn Anij, ak bōkļo̧k kōņaan eo am̧ jān men ko ilo jetōb; … jekdo̧o̧n ta ļapļo̧k eo … māļim eo an ānbwinūm̧ ioon ļōmņak eo am̧, bwe men eo ej jerawiwi n̄an eok, jekdo̧o̧ņ ta jeļo̧k ruwe eo emaron̄ in ilo e make” (Susanna Wesley: The Complete Writings, ed. Charles Wallace Jr. [1997], 109).

  17. Lale Luk 22:32; 3 Nipai 9:11, 20.

  18. Lale Jon 13:2–15, 34. Ilo raan eo m̧okta jān Pinmuur eo An, Rilo̧mo̧o̧r eo eaar kwaļ neen juon iaan ro eaar liakeļo̧k E, an bar j uon eo eaar kowaan E, im kōn ro jet raar kiki ilo awa eo Eaar aikuj tata. Innām Eaar katakin, “Kien ekāāl Ij lewōj n̄an kom̧, Bwe kom̧win yokwe doon āinwōt Iar yokwe kom̧.”

  19. Matu 5:46.

  20. Lale John R. Talmage, T he Talmage Story: Life of James E. Talmage—Educator, Scientist, Apostle (1972), 112–14.

  21. Lale Alma 10:22–23; 62:40.

  22. 3 Nipai 27:11.

  23. Ilo Matu 11:28, –30Irooj ej ba: “Kom̧win itok n̄an Ippa, kom̧ otemjej rej jerbal im ban, im Inaaj kakkijeik kom̧. … “Bwe aō ine ej em̧m̧an, im men eo Ij ineke e m̧ōrā.” Barāinwōt ļōmņak kōn 2 Korint 12:7–9: Paul ej kōmeļeļeik en̄taan in elukkuun in kajoor “kalōklōk ilo kanniōk,” eo Ekar jar kake bwe en jako. Kraist eaar ba n̄an e, “Aō jouj e bwe n̄an eok: bwe aō kajoor e weeppānļo̧k ilo m̧ōjņo̧.” Lale barāinwōt Ether 12:27.

  24. Lale Mosaia 7:33; 29:20; Hilamōn12:1; Katak im Bujen ko 124:87.

  25. Lale Luk 8:43–48; Mark 5:25–34. Kōrā eo kōn nan̄inmej ikkijien būtōktōk eaar pād ilo aikuj eļap im maat an maron̄. Liin eaar en̄taan ium̧win 12 iiō ko, kar joļo̧k aolepān an jāān n̄an taktō ro, im kar naanļo̧k wōt. Kadiwōjļo̧k e jān armej ro im baam̧ļe eo an, liin eaar jōk ilo e n̄an pukōt iaļan ibulōn jarlepju eo eļap im ekairirļo̧k n̄an Rilo̧mo̧or eo. Liin eaar lukkuun lōke im tōmak ilo Rilo̧mo̧o̧r eo, im Eaar en̄jake an lio un̄uri ilo tōrere in nuknuk eo An. Jān tōmak eo E em̧ōkaj im kar kanooj kōmour lio. Innām Eaar kūr lio “nejū kōrā.” Liin kar jako aer m̧akoko in jibwe bōtaat juon uwan baam̧ļe eo an Anij. Kōmour eo an eaar ilo kanniōk, ikitōltōl, en̄jake, im ilo jetōb. Apan̄ ko remaron̄ in kar aitokļo̧k n̄an iiō ko ak toon wōt an mour, bōtaat An kallim̧ur in kemour ej m̧ool im jejjet.

  26. Lale Luk 4:21; Jon 4:6–26. Luk, ejjab Jonn, ej ļo̧o̧ke bwe ilo jino tata jerbal in karejar eo an Jisōs, Eaar ilo̧k n̄an jikin kweilo̧k eo An make ilo Nazareth, riiti jon eoon jān an Aiseia Kanaan kōn Messia eo, innām kar kean̄, “Rainin naan ilo jeje in e jejjet ilo lo̧jiln̄ōmi.” En̄in ej ļo̧o̧k eo im̧aan tata Rilo̧mo̧o̧r eo ej kōnono kōn E make āinwōt Messia eo. Mekarta, ilo aibōj laļ eo an Jekab, Jon ej ļo̧o̧ke iien eo m̧oktata me Jisōs ej kean̄ kōn An Messia ilo juon jikin epeļļo̧k. Ilo jekjek in, jān iien eo Risameria ro kar ba rejab Riju, Jisōs eaar barāinwōt katakin bwe gospel eo An eaar n̄an aolep, jim̧or Riju im Rigentile. Kean̄ in ej waļok ilo “awa jiljin,” ak ilo raelep, ke laļ ej bōk tarlep in meram eo jān aļ. Aibōj laļ eo an Jekab ebarāinwōt pād ilo kom̧laļ eo epaake lukkuun jikin eo ijo Riisreal ro etto raar kōm̧m̧ane bujen ippān Irooj ālkin deļo̧n̄e ānen kallim̧ur eo. Ekaitoktok limo, ilo turājet eo juon in kom̧laļ eo ej juon toļ em̧ōrā im ilo turājet eo juon ej juon toļ elutōkļo̧k kōn dāin letok mour.

  27. Elder Neal A. Maxwell eaar katakin: “N̄e pād ilo jekjek ko reppen jej ļōmņak eļan̄n̄e ebar wōt ilo kōj n̄an leļo̧k, jemaron̄ aenōm̧m̧an n̄an jeļā bwe Anij, eo ejeļā maron̄ ko ad ilo weppān, kar likūt kōj ijin n̄an jeraam̧m̧an. Ejjeļo̧k juon kar ekkapit n̄an likjab ak n̄an erom̧ nana. … N̄e jej en̄jake tōr jān jon̄an, jān keememej kallim̧ur eo bwe Anij ejjamin naaj letok n̄an kōj eļap jān jon̄an” (“Meeting the Challenges of Today” [Brigham Young University devotional, Oct. 10, 1978], 9, speeches.byu.edu).

  28. Būreejtōn Russell M. Nelson eaark katakin:

    “Ilo raan ko rej itok, kom̧ naaj kwaļo̧k kom̧ make im̧aan Rilo̧mo̧or eo. Kom̧ naaj tōr jān jon̄an n̄an jon̄an eo kōmejaaļaļ ko n̄an pād ilo im̧aan Mejān ekwojarjar. Kom̧ naaj kakkōt n̄an lo naan ko n̄an kam̧m̧oolol E kōn kōļļāik jerawiwi ko ami, kōn jeorļo̧k ami bōd kōn jabdewōt jab jouj n̄an ro jet, kōn kemour kom̧ jān jorrāān ko im kalijōkļo̧k ko an mour in.

    “Kom̧ naaj kam̧m̧oolol E kōn kōkajoorļo̧k kom̧ n̄an kōm̧m̧ani men ko reppen, kōn ukōt m̧ōjņo̧ ko ami n̄an kajoor ko, im kōn kōm̧m̧an bwe en pidodo n̄an kom̧ n̄an mour Ippān im baam̧le eo ami indeeo. Paotok eo An, Pinmuur eo An, im m̧wil ko An renaaj erom epaak im lukkuun n̄an kom̧” (“Prophets, Leadership, and Divine Lawworldwide devotional for young adults, Jan. 8, 2017], broadcasts.lds.org).

  29. Lale Aiseia 53:3–5; Alma 7:11–13; Katak im Bujen ko 122:5–9.

  30. Lale Josep Smith—Bwebwenato 1:17; Elaine S. Dalton, “He Knows You by Name,” Liahona, Māe 2005, 109–11.

  31. Jon 4:14.