Kajjieon̄, Kajjieon̄, Kajjieon̄
Rilo̧mo̧o̧r ej likūti Etan ilo būruwōmi. Im kom̧ij en̄jake iakwe eo erreeo an Kraist n̄an ro jet im kom̧ make.
Ro jeiū im jatū rejitōn bōro, ij m̧ōņōņō kōn iien in em̧m̧an n̄an kōnono n̄an kom̧. Kweilo̧k in ekōkbōkakkak im eļōn̄aj eō. Al eo kar al kake im naan ko kar kōnono kaki raar un̄n̄ur būruwōd jān Jetōb Kwojarjar eo. Ij jar bwe ta eo inaaj ba enaaj im̧we eok kōn ejja Jetōb in.
Elōn̄ iiō ko remootļo̧k, iaar rikakpilōklōk eo kein kajuon n̄an juon district būreejtōn ilo turilikin Amedka. Elōn̄ ļo̧k jān juon alen, ilo am̧ro ettōrļo̧k n̄an branch ko reddik ilo district eo ammim, eaar ba n̄an n̄a, “Hal, n̄e kwonaaj ioon juon armej kōm̧m̧an n̄an er āinwōt n̄e relukkuun in en̄taan kwonaaj lukkuun in jim̧we.” Eaar jab m̧ool wōt, ak iaar katak aolepān iiō ko m̧aanļo̧k bwe eaar lukkuun dik ettā eo an. Rainin ikōņaan rōjan̄ kom̧ kōn inepata ko kom̧ij iooni.
Mour wabanban in ad kar ejaak jen juon Anij eo ej iakwe n̄an mālejjon̄e im un n̄an eddōkļo̧k eo ad kajjojo. Kom̧ij keememej naan ko an Anij kōn ro Nejin ilo Kōm̧anm̧an eo an laļ in: “Im jenaaj mālejjon̄e er kake, n̄an lale eļan̄n̄e renaaj kōm̧m̧ani aolep men ko jabdewōt Irooj aer Anij enaaj jiron̄ er.”1
Jān kar jinoin, mālejjon̄ kein raar jab pidodo. Jej ioon apan̄ ko me rej itok jān ad bōk ānbwin kanniōk in. Kōj kajjojo jej mour ilo juon laļ eo ijo Setan ej tariņaeik ņae m̧ool eo im ņae lem̧ōņōņō eo ad ekajoorļo̧k. Laļ in im mour eo am̧ emaron̄ in ļapļo̧k an kapokpok ilo am lale.
Bōklekōt eo aō ej en̄in: Anij ej iakwe eo eaar kōm̧m̧an bwe mālejjon̄e kein n̄an kom̧ kar bar ejaak wāween ekkar n̄an deblo̧keļo̧ki. Bwe kōn an Anij iakwe laļ Ekar jilkintok Juon Wōt Nejin Emake Wōt n̄an jipan̄ kōj.2 Nejin, Jisōs Kraist, ekar leļo̧k mour eo An kōn kōj. Jisōs Kraist eaar en̄taan ilo Gethsemane im ioon dōbwāāl kōn aolep jerawiwi ko ad. Eaar diplo̧kki aolep en̄taan ko, metak ko, im waļo̧kin jerawiwi ko ad bwe En maron̄ kaenōm̧m̧an im kōkajoor kōj ilo aolep mālejjon̄ ko an mour in.3
Kom̧ij keememej bwe Irooj eaar ba n̄an ro Rikarejeraņ:
“Im Jema im N̄a kōmij juon. N̄aij ilo Jema im Jema ilo N̄a; im toon wōt ami kar bōk Eō, kom̧ij ilo N̄a im N̄aij ilo kom̧.
“Kōn menin, N̄a ij pād ilubwiljimi, im N̄a ij seperd eo em̧m̧an, im Ejm̧aan an Israel. Eo ej ekkal ioon ejm̧aan in ejamin wōtlo̧k.”4
Rikanaan eo ad, Būreejtōn Russell M. Nelson, eaar bar letok ejja bōklekōt in. Ijoke, eaar kōmeļeļeik juon wāween jemaron̄ ekkal ioon ejm̧aan eo im likūt etan Irooj ilo būruwōd bwe en tōl kōj ilo apan̄ ko ad.
Eaar ba: “Kom̧ eo kom̧ij būrom̧ōj, keememej, mour in ejjab pidodo. Apan̄ ko reakuj ineek im inepata ko naaj eļļā jeni ilo iaļ eo. Ilo am̧ keememej bwe ‘ippān Anij ejjeļo̧k men epen’ (Luk 1:37), jeļā bwe Ej Jemōmi. Kwoj juon ļaddik im jiron̄ kar kōm̧anm̧an ilo nememein wōt E, jolete kōn erreeo eo am̧ n̄an bōk revelesōn n̄an jipan̄ kijejeto ko am̧ wānōk. Kwoj maron̄ bōk ioom̧ etan Irooj ekwojarjar. Kwoj karbab n̄an kōnono ilo etan Anij ekwojarjar (lale K&B 1:20).”5
Naan ko an Būreejtōn Nelson rej kakeememej kōj kōn kallim̧ur eo loe ilo jar in kwojkwoj eo, juon kallim̧ur Jemedwōj Ilan̄ ej kakūrm̧ool ilo ad kōm̧m̧ane ta eo jej kallim̧ur kake.
Ron̄jake naan kein: “O Anij, Jemām Indeeo, kōmij kajjitōk Ippam̧ ilo etan Nejūm̧, Jisōs Kraist, n̄an kōjeraam̧m̧an im kokwōjarjar pilawā in n̄an jetōb ko an ro otemjej rej bōk m̧ōttan, bwe ren maron̄ m̧ōn̄ā ilo aer ememej ānbwinnin Nejūm̧, im kam̧ool n̄an Kwe, O Anij, Jemām Indeeo, bwe rem̧ōņōņō in bōk ioer etan Nejūm̧, im keememej E iien otemjej, im kōjparok kien ko An ko Eaar liļo̧k n̄an er; bwe Jetōb eo An en maron̄ pād ippāer iien otemjej. Amen.”6
Iien otemjej jej ba amen n̄e jar in ej kōm̧m̧an ilo etad, jej kallim̧ur n̄an bōk m̧ōttan pilawā, eo ilo ad m̧ōņōņō in bōk iood et eo ekwojarjar etan Jisōs Kraist, keememej E iien otemjej, im kōjparok kien ko An. Eļan̄n̄e jenaaj kōm̧m̧an āindein, jej kallim̧ur bwe Jetōb eo An en maron̄ pād ippād iien otemjej. Kōn kallim̧ur kein, Rilo̧mo̧o̧r ej ejm̧aan eo jej aikuj jutak ilo ejjeļo̧k mijak jen jabdewōt ļan̄ jej iooni.
Ilo aō kar kōļmenļo̧kjeņ kōn bujen in naan ko im kōjeraam̧m̧an ko kar kallim̧ur kaki, iaar kōļmenļo̧kjeņ kōn ta meļeļein n̄an bōk iood etan Jisōs Kraist.
Būreejtōn Dallin H. Oaks eaar ba: “Eaorōk bwe n̄e jej bōk m̧ōttan kwojkwoj eo jejjab kam̧ool bwe jej bōk iood etan Jisōs Kraist. Jej kam̧ool bwe jej m̧ōņōņō n̄an kōm̧m̧ane. (Lale K&B 20:77.) Mool eo in bwe jej kam̧ool n̄an kōņaan in ļōmņak ko ad me jet men remaron̄ in waļo̧k m̧okta jen an lukkuun bōk jikin bwe āt in ekwojarjar eaorōk en pād iood.”7
Ennaan eo in bwe jej “m̧ōņōņō in bōk [iood]” Etan ej jiron̄ kōj bwe ilo ad m̧okta bōk Etan Rilo̧mo̧o̧r ilo iien eo jaar peptaij, bōk Etan ejjab dedeļo̧k ilo iien petaij. Jej aikuj wōnm̧aanļo̧k n̄an bōk Etan ilo aolepān mour ko ad, ekoba n̄e jej kōkāāl bujen ko ilo tebōļ in kwojkwoj eo im kōm̧m̧ani bujen ko ilo tampeļ ko an Irooj rekwojarjar.
Kōn menin ruo kajjitōk ko raorōk n̄an kōj kajjojo n̄an erom̧ “Ta eo imaron̄ in kōm̧m̧an n̄an bōk Etan ioō?” im “Elmen aō jeļā ke ij eddōkļo̧k?”
Ennaan eo an Būreejtōn Nelson ekwaļo̧k juon uwaak eo ejipan̄. Eaar ba jej maron̄ bōk etan Rilo̧mo̧o̧r iood im bwe jej maron̄ kōnono kōn E. N̄e jej kōnono kōn E, jej jerbal n̄an E. “Bwe ekōjkan an juon armej jeļā karo eo eaar jab jerbal n̄an e, ak eo ej juon ruwamāejet n̄an e, im ej ettoļo̧k jān ļōmņak ko im jibadbad ko an būruōn?”8
Kōnono kōn E ebōk juon jar in tōmak. Ebōk jar emakijkij n̄an Jemedwōj Ilan̄ n̄an jeļā naan ko jej maron̄ kōnono n̄an jipan̄ Rilo̧mo̧o̧r ilo jerbal in An. Jej aikuj karbab n̄an kallim̧ūr eo: “Mekarta jān ainikiō make ak jān ainikien ro rikarejera, ej āinwōt juon.”9
Aaet ebōk eļapļo̧k jān kōnono n̄an E n̄an bōk Etan iood. Ewōr en̄jake ko ilo būruwōd jej aikuj būki n̄an ad karbab āinwōt ro rikarejeraņ.
Rikanaan Mormon eaar kōmeļeļeik en̄jake ko me rekarbab kōj im rekōm̧m̧an ad maron̄ bōk iood Etan. En̄jake kein ekoba tōmak, kōjatdikdik, iakwe em̧ool, eo ej iakwe eo erreeo an Kraist.
Mormon eaar kōmeļeļeiki:
“Bwe ij kōjjem̧ļo̧k bwe ewōr ami tōmak ilo Kraist kōnke ami ettā; bwe eļan̄n̄e kom̧ ar jab tōmak ilo E innām kom̧ij jab ekkar n̄an bōnbōn ilubwiljin armej in kabun̄ eo An.
“Im bar juon alen, ro jeiū im jatū rejitōnbōro, ikōņaan kōnono n̄an kom̧ kōn kōjatdikdik. Ekōjkan ami naaj tōpar tōmak, ijello̧kun n̄e naaj ejjeļo̧k ami kōjatdikdik?
“Im ta eo kom̧ naaj kōjatdikdik kake? Lo ij ba n̄an kom̧ bwe kom̧ naaj kōjatdikdik kōn pinmuur eo an Kraist im kajoor in An jerkakpeje, n̄an naaj jerkak n̄an mour indeeo, im men in kōnke ami tōmak ilo E ekkar n̄an kallim̧ur eo.
“Kōn menin, eļan̄n̄e armej ewōr an tōmak eaikuj wōr an kōjatdikdik; bwe n̄e ejjeļo̧k tōmak e jamin wōr jabdewōt kōjatdikdik.
“Im bar juon alen, lo ij ba n̄an kom̧ bwe e ej jab maron̄ wōr an tōmak im kōjatdikdik, ijello̧kun n̄e enaaj ineem̧m̧an, im ettā būruōn.
“Kōn menin, an tōmak im kōjatdikdik e waan, bwe ejjeļo̧k bōk e im̧aan Anij, ijello̧kun riineem̧m̧an im ettā ilo bōro; im eļan̄n̄e armej eo ej ineem̧m̧an im ettā ilo bōro, im kwaļo̧k būruōn jān kajoor eo an Jetōb Kwōjarjar bwe Jisōs ej Kraist eo, eaikuj wōr an iakwe-em̧ool; bwe eļan̄n̄e ejjeļo̧k an iakwe-em̧ool e ejjeļo̧k tokjān; kōn menin eaikuj wōr an iakwe-em̧ool.”
Ālkin kōmeļeļeik iakwe-em̧ool, Mormon eaar etal wōt im ba:
“A iakwe-em̧ool ej iakwe eo erreo an Kraist, im e kijejeto indeeo, im jabdewōt eo lo e ippān ilo raan eo āliktata, enaaj em̧m̧an ippān.
“Kōn menin, ro jeiū im jatū rejitōnbōro, kom̧in jar n̄an Jemād kōn aolep kajoor in bōro, bwe kom̧in maron̄ obrak kōn iakwe eo An, eo Eaar leļo̧k ioon aolep ro rej rikaļoor ro an rem̧ool an Nejin, Jisōs Kraist; bwe kom̧in maron̄ erom m̧aan ro nejin Anij; bwe n̄e Enaaj waļo̧k jenaaj āinwōt E, bwe jenaaj lo E ilo lukkuun nememen; bwe jen maron̄ bōk kōjatdikdik in; bwe jān maron̄ karreo em̧ool āinwōt E erreo. Amen.”10
Naan in kam̧ool eo aō ej bwe Rilo̧mo̧o̧r ej likūti Etan ilo būruwōmi. N̄an elōn̄ iaami, ami tōmak ilo E eļapļo̧k. Kwoj en̄jake eļap kōjatdikdik im kōjatdrikdrik. Im kom̧ij en̄jake iakwe eo erreeo an Kraist n̄an ro jet im n̄an kom̧ make.
Ij loe ippān mijenede ro rej jerbal aolepān laļ in. Ij loe ippān membōr ro rej kōnono n̄an ro m̧ōttaer im baam̧le ko aer kōn Kabun̄ eo an Jisōs Kraist im Armej ro Rekwojarjar ilo Raan-ko Āliktata. Em̧m̧aan ro, kōrā ro, rūm̧m̧an ded ro, im aaet ajri ro rej jerbal in karejar ilo iakwe n̄an Rilo̧mo̧o̧r im ro ritūrieer.
Ilo jinoin juon riboot in jorrāān ko ipeļaakin laļ in, membōr ro rej kōm̧m̧ani pepe ko n̄an etal im lo̧mo̧o̧reņ, jet iien ilo lom̧alo̧, ilo aer jab kajjitōk. Jet iien epen n̄an aer kōttar m̧ae iien jikin eo emaron̄ in lo er.
Ij kile bwe jet iami rainin remaron̄ en̄jake bwe ami tōmak im kōjatdikdik em̧ōj aer pinjak kōn obrak in inepata ko ami. Im komaron̄ kōņaan en̄jake iakwe.
Ro jeiū im jatū, iien ko an Irooj repaake eok n̄an en̄jake im n̄an kwaļo̧k iakwe eo An. Komaron̄ jar kōn lōke Irooj n̄an tōl ļo̧k eok n̄an iakwe ro jet kōn E. Ej uwaaki jar ko an ro rettā āinwōt kwe. Kwonaaj en̄jake iakwe eo an Anij n̄an eok im n̄an armej eo kwoj jerbal n̄an E. Ilo am̧ jipan̄ ajri ro nejin Anij kōn inepata ko aer, inepata ko am̧ make renaaj mera ļo̧k. Am̧ tōmak im am̧ kōjatdikdik enaaj kajoorļo̧k.
Ij juon rikam̧ool an m̧ool in. Enan̄in aolep iien, kōrā eo ippa ej kōnono kōn Irooj im jerbal n̄an armej ro An. Āinwōt aō kar ba m̧oktaļo̧k, juon iaan bisop ro am̧ eaar ba n̄an n̄a: “Ij ļo̧kjeņ aō. Iien otemjej ij ron̄ kōn armej eo ilo ward eo epād ilo inepata, iaar m̧ōkaj in jipan̄. Aaet ilo tōre eo ij tōpar ļo̧k, kōrā eo ippam̧ em̧ōj an pād ijo kadede.” Menin eaar m̧ool ilo aolepān ijoko kōm̧ eaar jokwe ie enan̄in 56 iiō ko.
Kiiō emaron̄ in kōnono wōt jejjo naan ilo juon raan. Kar lotok e jān armej ro eaar iakwe er ilo Irooj. Kajjojo bon̄ im jibbon̄ ij al im jar ippān. Ij aikuj in kōm̧m̧ane jar im al eo. Jet iien imaron̄ lo an lon̄iin ba naan ko ilo bok in al eo. Ej ba al ko al in ajri. En̄jake eo em̧m̧an tata ippān ej ilo an kar kakkilōklōk e al eo “I’m Trying to Be like Jesus.”11
Raan eo juon, ālkin an al naan ko ilo korōj eo: “Love one another as Jesus loves you. Try to show kindness in all that you do,” eaar jidik wōt an ba, ak ealikkar, “Kajjieon̄, kajjieon̄, kajjieon̄.” Ij ļōmņak bwe enaaj loe, n̄e enaaj lo E, bwe ad Rilo̧mo̧o̧r kar likūt Etan ekwojarjar ilo būruwōn im bwe eaar erom̧ āinwōt E. Ej jipan̄ e ilo inepata ko an kiiō, āinwōt An naaj bar jipan̄ eok.
Ij kwaļo̧k n̄an kom̧ aō kam̧ool bwe Rilo̧mo̧o̧r ejeļā im iakwe eok. Ejeļā etam̧ āinwōt am̧ jeļā Etan. Ejeļā inepata ko am̧. Eaar iooni. Kōn Pinmuur eo An, Eaar anjo̧ jen laļin. Kōn am̧ kōnaan n̄an bōk Etan ioom̧ , konaaj kotak eddodo ko an elōn̄ ro jet. Kwonaaj loe ilo tōre in bwe kwojeļā ļo̧k kajjien Rilo̧mo̧o̧r im bwe kwoj iakwe E eļapļo̧k. Etan enaaj pād ilo būruwōm̧ im naaj tōt ilo ememļo̧kjeņ eo am̧. Ej kōn āt eo kwonaaj en̄inn̄ini. N̄aij kam̧ool, kōn kam̧m̧oolol kōn jouj eo An n̄an n̄a, n̄an ro rejitenbōro, im n̄an kom̧, ilo etan Jisōs Kraist, amen.