Oktoba 21–27: “Ejjeļo̧k Bar Armej Rem̧ōņōņōļo̧k”

3 Nipai 27–4 Nipai

Katak ko an Jisōs Kraist ejjab bajjōk juon tōmak eaiboojoj n̄an kōļmenļo̧kjeņ kake. Rej m̧ool n̄an im̧we kōj n̄an erom̧ āinwōt E. Bok in 4 Nipai ej baj kwaļo̧k wōt elmen an gospel eo an Rilo̧mo̧o̧r maron̄ ukōt armej ro. Ļoor jerbal in karejar eo ekadu an Jisōs, bukwi iiō in aitwerōk ikōtaan riNipai ro im riLeman ro eaar jemļo̧k kitien. Ruo laļ ko kar jeļā kaki kōn jum̧ae im uteij bōro rekar erom “juon, ro nejin Kraist,” (4 Nipai 1:17), im renaaj jino bōk “men otemjej ilo ejjeļo̧k kalijekļo̧k” (4 Nipai 1:3). “Iakwe eo an Anij … eaar pād ilo būruōn armej ro,” im “teaar ejjeļo̧k bar armej rem̧ōņōņōļo̧k ilubwiljin armej ro otemjej kar ejaak jān pein Anij” (4 Nipai 1:15–16). En̄in ej wāween an katak ko an Rilo̧mo̧o̧r kar ukōt RiNipai ro im RiLeman ro. Elmen aer ukōt eok?

Ļōmnak ko n̄an Ekkatak ilo M̧weeo im ilo Kabun̄

3 Nipai 27:1–12

Kabun̄ eo an Jisōs Kraist ej etōņake Etan.

Ke rikaļoor ro an Rilo̧mo̧o̧r raar jino kajutak Kabun̄ eo An ilo aolepān āne eo, juon kajjitōk eaar walōn̄tak me, n̄an jet armej, emaron̄ in kar āinwōt juon men ejjab ļap—enaaj etan Kabun̄ eo? (lale 3 Nipai 27:1–3). Ta eo kwoj ekkatak kōn aorōk eo kōn āt in jān uwaak eo an Rilo̧mo̧o̧r ilo 3 Nipai 27:4–12?

Rilo̧mo̧o̧r eaar kwaļo̧k etan Kabun̄ eo An rainin ilo Katak im Bujen Ko 115:4. Kōļmenļo̧kjeņ kōn kajjojo naan ilo āt eo. Elmen an naan kein jipan̄ kōj jeļā wōn kōj, ta eo jej tōmake, im elmen ad aikuj kōm̧m̧an?

Bar lale Russell M. Nelson, “Jim̧we in Etan Kabun̄ in,” Liaona, Nob. 2018, 87–89; “Jesus Christ Declares the Name of His Church and His Doctrine” (video), Gospel Ļaibrāre.

3 Nipai 27:10–22

Kabun̄ eo an Jisōs Kraist ej ekkal ioon gospel eo An.

Ālkin kōmeļeļeiki bwe Kabun̄ eo An ej aikuj in “ekkaļ ioon gospel eo [An]” (3 Nipai 27:10), Rilo̧mo̧o̧r ekar kōmeļeļeiki ta gospel eo An. Elmen am̧ naaj kar kōmeļeļeik ta eo Eaar ba ilo 3 Nipai 27:13–22? Pedped ilo kōmeļeļe in, ta meļeļein n̄an Kabun̄ in—n̄an kwe—n̄an ekkal ioon gospel eo An?

Je ta eo kwoj katak. Keememej ta eo Rilo̧mo̧o̧r ekar katakin rijilōk ro An ilo 3 Nipai 27:23–26. Etke eaorōk n̄an kōjparok juon ļo̧o̧k in en̄jake ko ilo jetōb? Ta eo kwoj en̄jake ekar im̧we n̄an ļo̧o̧ke ta eo kwaar ekkatak kōn jerbal in karejar eo an Rilo̧mo̧o̧r ilo 3 Nipai?

3 Nipai 28:1–11

“Ta eo kom̧ij kōņaan?”

Ta eo kwonaaj kar ba eļan̄n̄e Rilo̧mo̧o̧r en kar kajjitōk ippam̧, āinwōt An kar kajjitōk ippān rikaļoor ro An, “Ta eo kom̧ij kōņaan jān eō?” (3 Nipai 28:1). Ļōmņak kōn kajjitōk in ilo am̧ riiti 2 Nipai 28: 1–11. Ta eo kwoj ekkatak kōn ikdeelel in bōro ko an rikaļoor ro jān uwaak ko aer n̄an kajjitōk eo An? Elmen an ikdeelel ko am̧ oktak ilo am̧ mour kake gospel in an Jisōs Kraist?

Al in jar ko ekkā aer kwaļo̧k ikdeelel ko an bōro—“More Holiness Give Me” ej juon waanjon̄ak em̧m̧an (Hymns, no. 131). Ļōmņak in pukot juon al me ej pedped ioon ikdeelel ko am̧.

3 Nipai 29–30

Bok in Mormon eo ej juon kōkkaļļe bwe jerbal eo an Anij ilo raan kein āliktata em̧ōj an kūrm̧ool.

Ļōmņak kōn kōkaļļe ko me rej kwaļo̧k n̄an eok ke enaaj wōr men eo. N̄an waanjon̄ak, elmen am̧ jeļā wōt ej itok ak jijen ko rej okoktak? Ekkar n̄an 3 Nipai 29:1–3, elmen am̧ jeļā jerbal eo an Anij n̄an aiintok armej ro An “ededeļo̧k an jino kūrm̧ool”? bar lale 3 Nipai 21:1–7). Kwomaron̄ bar keememej, ilo 3 Nipai 29:4–9, men ko me armej remaron̄ kaarmejeti rainin. Elmen an Bok in Mormon kōkajoorļo̧k tōmak eo am̧ ilo men kein?

4 Nipai 1:1–18

Ļoor katak ko an Jisōs Kraist ej tōl ļo̧k n̄an juon wōt im m̧ōņōņō.

Kwomaron̄ ke pijaikļo̧k enaaj kar kōjkan n̄an mour ilo iiō ko ālkin loļo̧k eo an Rilo̧mo̧o̧r? Ilo am̧ katak 4 Nipai 1:1–18, ļōmņak in kōlaajraki kōjeraam̧m̧an ko armej ro raar būki. Kwomaron̄ bar kōkaļļeiki ak kakeememej kāālet ko raar kōm̧m̧ani me ekar jipan̄ tōlļo̧k n̄an jeraam̧m̧an eo an mour in. Ta eo Jisōs ekar katakin er me ekar im̧we kāālet ko aer rejim̧we? Errein jet iaan waanjon̄ak ko, ak kwomaron̄ bar lo ko jet: 3 Nipai 11:28–30; 12:8–9, 21–24, 40–44; 13:19–21, 28–33; 14:12; 18:22–25.

Kōļmenļo̧kjeņ kōn ta eo kwomaron̄ kōm̧m̧ane n̄an jipan̄ baam̧le eo am̧, ward eo, ak jukjuk in pād eo mour ilo juon ippān doon eļapļo̧k im elem̧ōņōņōļo̧k. Ta eo kwomaron̄ kōm̧m̧ane n̄an anjo̧ ioon jum̧ae ko im erom̧ luukkuun “juon wōt” ajri ro jet nejin Anij? Ta katak ko an Jisōs Kraist remaron̄ jipan̄ eok kadedeļo̧k kōttōbar in?

Kabūrom̧ōjm̧ōj, Zaion eo kar kōmeļeļeiki ilo 4 Nipai ekar wōtļo̧k n̄an nana. Ilo am̧ riiti 4 Nipai 1:19–49, kappukōt piktok ko im m̧wil ko me raar kōm̧m̧an bwe en kōjem̧ļo̧k aer m̧ōņōņō im ippān doon. Ta eo jemaron̄ kōm̧m̧ane n̄an jipan̄ joļo̧k m̧wiļ ak kōm̧m̧an rot kein?

Bar lale Moses 7:18; D. Todd Christofferson, “Jukjukin pād ko Repoļōmāer,” Liaona, Nob. 2020, 32–35; Reyna I. Aburto, “With One Accord,” Liaona, May 2018, 78–80; Unin Kōnono ko an Gospel, “Belonging in the Church of Jesus Christ,” Gospel Ļaibrāre.

N̄an meļeļe ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik Ro māākjiin.

Ļōmņak ko n̄an Katakin Ajri ro

3 Nipai 27:3–8

Ij uwaan Kabun̄ eo an Jisōs Kraist.

• N̄an kwaļo̧k aorōk in etan Kabun̄ eo an Jisōs Kraist, kōnono ippān ajri ro nejum̧ kōn etāer make. Etke eaorōk āt ko etad? Innām kwomaron̄ riiti 3 Nipai 27:3 ippān doon, pukot kajjitōk ko an ro rikaļooran Jisōs. Jipan̄ ajri ro nejum̧ lo uwaak ko ilo 3 Nipai 27:5–8. Etke eaorōk etan Kabun̄ in?

• Kwomaron̄ bar jipan̄ ajri ro ļōmņake kurup ko reinjuon rej pād ie, āinwōt juon baam̧le ak juon Būraimere kūlaaj. Kajjitōk ippāer ta eo em̧m̧an ippāer n̄an pād ilo kajjojo kurup. Innām kwomaron̄ al “The Church of Jesus Christ” (Children’s Songbook, 77) ippān doon im kōnono etke kwoj kam̧m̧oolol n̄an pād ilo Kabun̄ eo an Rilo̧no̧o̧r.

3 Nipai 27:13–16

Kabun̄ eo an Jisōs Kraist ej ekkal ioon gospel eo An.

• Rilo̧mo̧o̧r eaar kōmeļeļeik gospel eo An ilo 3 Nipai 27. Kwomaron̄ kōmeļeļeik n̄an ajri ro nejum̧ bwe naan in gospel meļeļe “nuuj eo em̧m̧an.” Ta nuuj eo em̧m̧an jej loi ilo 3 Nipai 27:13–16? Kōjerbal peij in m̧akūtkūt eo an wiik in n̄an kwaļo̧k bwe Kabun̄ eo an Rilo̧mo̧o̧r ej ekkal ioon gospel eo An.

3 Nipai 27:30–31

Jemedwōj Ilan̄ ej m̧ōņōņō n̄e ro Nejin rej oktak n̄an E.

• Kwomaron̄ ikkure juon ikkure ilo ie juon armej ej kitileekek im ro jet uwaan baam̧le eo rej kajjieon̄ pukote. Emaron̄ tōlļo̧k n̄an juon ekōnono kōn m̧ōņōņō eo jej en̄jake n̄e juon eo ekar jebwābwe em̧ōj loe. Ālkin riiti 3 Nipai 27:30–31, kwomaron̄ kōnono kōn elmen jipan̄ doon pād epaake Jemedwōj Ilan̄ bwe en “ejjeļo̧k … iaer ej jebwābwe.”

4 Nipai

Ļoor Jisōs Kraist ej bōktok n̄an eō m̧ōņōņō.

• N̄an jipan̄ ajri ro nejum̧ jeļā kōn m̧ōņōņō eo an armej ro kar kōmeļeļeiki ilo 4 Nipai, kwomaron̄ kwaļo̧k n̄an er pijain armej ro rem̧ōņōņō. Innām, ilo am̧ riit ippān doon eoon 2–3 im 15–17 (ak “Jebta 48: Peace in America,” Bwebwenato ko an Bok in Mormon, 136–37), remaron̄ kalikkar pija ko ilo am̧ kwaļo̧k ta eo ilo bwebwenato eo me ej bōktok m̧ōņōņō.

• N̄an jipan̄ ajri ro kōjerbal ta eo kar kwaļo̧k ilo 4 Nipai 1:15–16, kwomaron̄ kwaļo̧k n̄an er jekjek ko ijo armej ro raar illu ippān doon. Kajjitōk ippāer n̄an ikkure kōn ta jekjek ko remaron̄ āinwōt n̄e jej “iakwe Anij” ilo būruwōd.

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjiin.

Kraist ippān RiNipai Rikaļoor ro Jilu, jān Gary L. Kapp