Illustration of Christ appearing to the Nephites [Paghulagway kang Kristo nga nagpakita sa mga Nephite], ni Andrew Bosley

Oktubre 14–20. “Kamo ang mga Anak sa Pakigsaad”

3 Nephi 20–26

Kon madungog nimo ang mga tawo nga naggamit og mga pulong sama sa balay ni Israel, bation ba nimo nga ingon og sila naghisgot mahitungod kanimo? Ang mga Nephite ug ang mga Lamanite literal nga mga kaliwat sa Israel, “usa ka sanga sa kahoy sa Israel,” ug gani mibati sila nga “nawala gikan sa iyang lawas” (Alma 26:36; tan-awa usab sa 1 Nephi 15:12). Apan gusto sa Manluluwas mahibalo sila nga wala sila mawala Kaniya. “Kamo mga sakop sa balay ni Israel,” miingon Siya, “ug kamo anaa sa pakigsaad” (3 Nephi 20:25). Mahimong magsulti Siya og susama nga butang kanimo karon, kay bisan kinsa nga nabunyagan ug naghimo og mga pakigsaad uban Kaniya maanaa usab sa balay ni Israel, “nga anaa sa pakigsaad.” Sa laing pagkasulti, kon maghisgot si Jesus kabahin sa balay ni Israel, Siya naghisgot mahitungod kanimo. Ang panudlo sa pagpanalangin sa “tanan nga mga kaliwatan sa yuta” kay alang kanimo (3 Nephi 20:27). Ang pagdapit nga “pagmata pag-usab, ug isul-ob ang imong kalig-on” kay alang kanimo (3 Nephi 20:36). Ug ang Iyang bililhong saad nga, “Ang akong pagkamabination dili mobiya gikan kaninyo, ni ang akong pakigsaad sa kalinaw isalikway,” mao ang alang kanimo (3 Nephi 22:10).

Mga Ideya alang sa Pagkat-on diha sa Panimalay ug sa Simbahan

3 Nephi 20–22

Sa ulahing mga adlaw, ang Dios mohimo og usa ka kahibulongan nga buhat.

Sa 3 Nephi 20–22, ang Manluluwas nanagna mahitungod sa kaugmaon sa Iyang katawhan sa pakigsaad (tan-awa ilabi na sa 3 Nephi 20:30–32, 39–41; 21:9–11, 22–29). Samtang basahon nimo kini nga mga bersikulo, hinumdomi kon unsay gisulti ni Presidente Russell M. Nelson: “Apil kita sa mga tawo sa pakigsaad sa Ginoo. Ang ato mao ang pribilehiyo nga personal nga makasalmot sa katumanan niini nga mga saad. Pagkanindot nga mabuhi niining panahona!” (“Ang Pagpundok sa Nagkatibulaag nga Israel,” Liahona, Nob. 2006, 79). Hain sa mga panagna ang labihan ka makahinam nganha kanimo? Unsa ang imong mahimo aron sa pagtabang nga matuman kini?

Pangita og makapadasig nga mga pulong ug mga hugpong sa mga pulong. Mahimong imong makaplagan nga ang pipila ka mga pulong ug mga hugpong sa mga pulong diha sa mga kasulatan makapadani kanimo, ingon og kini piho nga gisulat alang kanimo. Hunahunaa ang pagmarka niini diha sa imong mga kasulatan o sa pagsulat niini diha sa usa ka study journal.

3 Nephi 22; 24

Maluluy-on ang Dios sa mga tawo kinsa mobalik ngadto Kaniya.

Sa 3 Nephi 22 ug 24, ang Manluluwas og mga pulong gikan sa Isaias ug sa Malaquias nga puno sa tin-aw nga mga imahe ug mga pagtandi—mga karbon nga anaa sa kalayo, gilunsay nga pilak, kaminyoon, ang mga bentana sa langit (tan-awa ilabi na sa 3 Nephi 22:7–8, 10–17; 24:10–12, 17–18). Unsa ang gitudlo niini nga mga pagtandi diha nimo mahitungod sa relasyon sa Dios ngadto sa Iyang katawhan—ug sa Iyang relasyon kanimo? Sa unsang paagi ang mga saad niini nga mga kapitulo natuman sa imong kinabuhi o sa kinabuhi sa imong pamilya?

3 Nephi 23:6–13

Ang pagrekord sa espirituhanon nga mga kasinatian makapanalangin sa akong pamilya.

Unsa ang nagdani kanimo mahitungod sa interaksiyon sa Manluluwas uban ni Nephi diha sa 3 Nephi 23: 6–13? Kon ang Manluluwas magsusi sa mga rekord nga imong gitipigan, unsa kaha nga mga pangutana ang Iyang ipangutana kanimo? Unsa nga importante nga mga hitabo o espirituhanong mga kasinatian ang kinahanglan nimong irekord? Nganong importante man ang paghimo sa ingon? (tan-awa sa 3 Nephi 26:2).

3 Nephi 23; 26:1–12

Gusto sa Manluluwas nga siksikon nako ang mga kasulatan.

Samtang imong basahon ang 3 Nephi 20:10–12; 23; 26:1–12, pamalandongi kon unsa ang gibati sa Manluluwas mahitungod sa mga kasulatan. Unsa ang kalainan tali sa pagsiksik sa mga kasulatan ug ang yano lang nga pagbasa niini? (tan-awa sa 3 Nephi 23:1).

3 Nephi 24:7–12

Ang pagbayad sa ikapulo nag-abli sa mga bentana sa langit.

Ang katawhan sa Dios kanunayng gisugo sa pagbayad og ikapulo (tan-awa sa Genesis 14:17–20; Malaquias 3:8–11). Samtang imong tun-an ang 3 Nephi 24:7–12, hunahunaa kon nganong gihangyo sa Dios ang Iyang katawhan sa pagbayad og ikapulo. Kini nga mga pangutana makagiya sa imong pagtuon:

• Unsa ang balaod sa ikapulo? (Tan-awa sa Doktrina ug mga Pakigsaad 119. Ang “tubo” niini nga pagpadayag nangahulogan og kinitaan. Ang tanang miyembro nga adunay kinitaan kinahanglang mobayad og ikapulo.) Sa unsang paagi ang ikapulo lahi gikan sa ubang matang sa mga donasyon?

• Unsay gamitan sa ikapulo? Sa unsa nga mga paagi ikaw napanalanginan tungod ang mga miyembro sa Simbahan nagbayad og ikapulo?

• Unsa nga mga panalangin ang moabot ngadto sa mga tawo nga magsunod sa balaod sa ikapulo? (Tan-awa sa 3 Nephi 24:7–12). Makakita ka og pipila ka panalangin nga gihulagway diha sa mensahe ni Elder David A. Bednar “Ang mga Tamboanan sa Langit” (Liahona, Nob. 2013, 17–20). Piho nga pangitaa ang mga panalangin nga dili kabahin sa salapi. Sa unsa nga paagi nga nasinati nimo kini nga mga panalangin diha sa imong kinabuhi?

Mahimong ganahan nimong basahon ang Marcos 12:41–44. Unsa ang gitudlo niini nga istorya kanimo?

3 Nephi 25:5–6

Ang Ginoo mipadala ni Elijah sa pagpabalik sa akong kasingkasing ngadto sa akong mga katigulangan.

Sa atong panahon, ang atong mga kasingkasing “mobalik ngadto sa [atong]” mga amahan pinaagi sa buhat sa templo ug family history. Sa unsang paagi kini nahitabo alang kanimo? Samtang imong basahon ang 3 Nephi 25:5–6 ug Doktrina ug mga Pakigsaad 110:13–16, pamalandongi kon nganong importante kaayo kini nga bahin sa plano sa Dios.

Tan-awa usab sa “Mga Pamilya Mahimong Manag-uban sa Hangtod,” Songbook sa mga Bata, 98.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Anak

3 Nephi 23:1, 5

Makugihon ko nga makasiksik sa mga kasulatan.

• Ang mga instruksiyon sa Manluluwas diha sa 3 Nephi 23 nagpakita kon unsa ka importante ang mga kasulatan Kaniya. Aron sa pagtabang sa inyong mga anak sa pagdiskobre niini, mahimo ninyong basahon og kusog ang 3 Nephi 23:1, 5 ug hangyoon sila sa pagpaminaw alang sa usa ka pulong nga gibalik-balik og katulo. Sa unsang paagi ang pagsiksik lahi kay sa pagbasa lamang?

• Tingali ikaw ug ang inyong mga anak makasulat og usa ka paborito nga bersikulo sa kasulatan ug tagoan kini. Dayon mahimo kamong magpuli-puli sa pagpangita sa usag usa nga nakatago nga mga kasulatan, magkauban kining basahon, ug maghisgot kon nganong makahuloganon kini nga mga bersikulo.

3 Nephi 24:8–12

Ang pagbayad sa ikapulo moabli sa mga bentana sa langit.

• Tabangi ang inyong mga anak sa pagsiksik sa 3 Nephi 24:8–12 aron makapangita og mga paagi sa pagkompleto niini nga kapahayag: Kon ako mobayad og ikapulo, ang Ginoo mo-… . Mahimo usab kang mopakigbahin og kasinatian diin ikaw napanalanginan tungod kay mibayad ka og ikapulo. Kon kini makatabang, ikonsiderar ang pagsulat og pipila ka kantidad sa kwarta ug tabangi ang inyong mga anak sa pagkalkulo kon pila ang ikapulo (10 porsiyento) nga ihatag sa matag kantidad.

• Ang pahina sa kalihokan karong semanaha makatabang sa inyong mga anak nga maghisgot og pipila ka paagi nga ang Ginoo mogamit sa ikapulo aron sa pagpanalangin sa mga miyembro sa Iyang Simbahan. Tingali makadrowing sila og mga hulagway (o makapangita og mga hulagway diha sa mga magasin sa Simbahan) sa mga paagi nga ang ikapulo mopanalangin kanila.

3 Nephi 25:5–6

Gusto sa Langitnong Amahan nga makat-on ko mahitungod sa akong mga katigulangan.

• Unsaon ninyo sa pagdasig ang inyong mga anak sa pagsiksik alang sa ug pagkat-on mahitungod sa ilang mga katigulangan? Unsaon ninyo pag-awhag ang inyong mga anak sa pagpahigayon sa mga ordinansa alang sa ilang mga katigulanan sa dihang sila mas tigulang na? Ikonsiderar ang pagtabang kanila sa pagsiksik sa 3 Nephi 25:5–6 aron makakaplag og usa ka butang nga mahitabo sa ulahing mga adlaw. Ang mas manghod nga mga bata mahimong mobutang sa ilang kamot ibabaw sa ilang kasingkasing sa matag higayon nga ilang madungog ang pulong nga “kasingkasing” samtang imong basahon kini nga mga bersikulo. Mahimo usab nimong basahon ang mahitungod sa paagi nga natuman kini nga panagna diha sa Doktrina ug mga Pakigsaad 110:13–16 (tan-awa usab sa Libro sa mga Hulagway sa Ebanghelyo, nu. 95). Sultihi ang inyong mga anak kon sa unsang paagi ang imong kasingkasing nabalik ngadto sa imong mga katigulangan. Sama pananglit, mahimo kang mopakigbahin og bisan unsa nga mga kasinatian nga aduna ka sa pagkat-on mahitungod sa imong mga katigulangan ug sa pagbuhat og mga ordinansa sa templo alang kanila.

• Tabangi ang inyong mga anak sa pagtrabaho sa usa ka family tree aron mabutangan og mga ngalan sa ilang mga ginikanan ug mga apohan. Unsa nga mga istorya ang imong mapakigbahin mahitungod sa usa sa imong mga katigulangan? Pagpakita og mga litrato kon mahimo. Mahimo usab kamong manganta og dungan sa “Mga Pamilya Mahimong Manag-uban sa Hangtod” (Songbook sa mga Bata, 98) ug hisgoti ngadto sa inyong mga anak kon nganong importante ang mga pamilya sa plano sa Langitnong Amahan.

Alang sa dugang nga mga ideya, tan-awa ang isyu karong bulana sa Higala nga magasin.

Bring Forth the Record [Ipagula ang Rekord], ni Gary L. Kapp.