No mangngegyo dagiti tao nga agusar kadagiti termino a kas iti balay ti Israel, mariknayo kadi a sarsaritaenda ti maipapan kadakayo? Dagiti Nephite ken Lamanite ti talaga nga an-annabo ti Israel, “sanga ti kayo ti Israel,” ngem nariknada a “napukaw iti bagina” (Alma 26:36; kitaen met iti 1 Nephi 15:12). Ngem tinarigagayan ti Mangisalakan a maammuanda a saanda a napukaw Kenkuana. “Addakayo iti balay ti Israel,” kinunana, “ket addakayo iti katulagan” (3 Nephi 20:25). Mabalin nga isaona kenka ti maysa a banag ita nga aldaw, para iti siasino man a nabuniagan ken nagaramid kadagiti katulagan Kenkuana ket adda met iti balay ti Israel, “iti katulagan.” Iti sabali a balikas, no agsao ni Jesus maipapan iti balay ti Israel, agsasao iti maipapan kenka. Ti pangiturong a mangbendision “ti amin nga agkakabagyan iti daga” ket para kenka (3 Nephi 20:27). Ti awis nga “agriingka manen, ket urnongem ti pigsam” ket para kenka (3 Nephi 20:36). Ket ti nakapatpateg a karina, “Ti kinamanagayatko saanto a mapukaw kenka, ket di met maikkat ti katulagak iti kinatalna,” ket para kenka (3 Nephi 22:10).
Dagiti Kapanunotan iti Panagsursuro iti Pagtaengan ken iti Simbaan
Kadagiti ud-udina nga aldaw, agaramidto ti Dios iti nakaskasdaaw nga aramid.
Iti 3 Nephi 20–22, impadto ti Mangisalakan maipapan iti masakbayan dagiti natulagan a tattaona (kitaen, nangnangruna, iti 3 Nephi 20:30–32, 39–41; 21:9–11, 22–29). Bayat ti panangbasayo kadagitoy a bersikulo, laglagipen no ania ti kinuna ni Presidente Russell M. Nelson: “Datayo dagiti natulagan a tattao ti Apo. Karbengantayo ti makiraman a personal iti pannakaipatungpal dagitoy a kari. Anian a naragsak a panawen nga agbiag!” (“The Gathering of Scattered Israel,” Liahona, Nob. 2006, 79). Ania kadagitoy a padto ti naipangpangruna a makaparagsak kadakayo? Ania ti maaramidyo tapno matulongan a maipatungpal dagitoy?
Sapulenyo dagiti makaparegta a balikas ken ragup ti balikas. Mabalin a makakitakayo iti sumagmamano a balikas ken ragup ti balikas kadagiti nasantuan a kasuratan a makaawis iti riknayo, a kasla naipangpangruna a naisurat dagitoy a para kadakayo. Ibilangyo ti panangmarka kadagitoy kadagiti nasantuan a kasuratan wenno panangisurat kadagitoy iti study journalyo.
Iti 3 Nephi 22 ken 24, inadaw ti Mangisalakan dagiti balikas manipud kada Isaias ken Malakias a napnuan kadagiti nalawag a ladawan ken panagidasig—dagiti uring iti apuy, napatarnaw a pirak, panagasawa, dagiti tawa ti langit (kitaen nangnangruna iti 3 Nephi 22:7–8, 10–17; 24:10–12, 17–18). Ania ti isuro kadakayo dagitoy a panangidilig maipapan iti relasion ti Dios kadagiti taona—ken ti relasionna kadakayo? Kasano a naipatungpal dagiti kari kadagitoy a kapitulo iti biagyo wenno iti biag ti pamiliayo?
Ti panangisurat kadagiti naespirituan a padas ket mabalin a mangbendision iti pamiliak.
Ania ti mangpasiddaaw kadakayo maipapan iti pannakilangen ti Mangisalakan ken ni Nephi iti 3 Nephi 23:6–13? No nasken nga amirisen ti Mangisalakan dagiti kasuratan nga indulinyo, ania dagiti saludsod a mabalinna a damagen kadakayo? Ania dagiti napateg a pasamak wenno naespirituan a padas a nasken nga isuratyo? Apay a napateg nga aramiden daytoy? (kitaen iti 3 Nephi 26:2).
Tarigagayan ti Mangisalakan a sukisokek dagiti nasantuan a kasuratan.
Bayat ti panangbasayo iti 3 Nephi 20:10–12; 23; 26:1–12, utobenyo no kasano ti rikna ti Mangisalakan maipapan kadagiti nasantuan a kasuratan. Ania ti pagdumaan ti panangsukisok kadagiti nasantuan a kasuratan ken panagbasa laeng kadagitoy? (kitaen iti 3 Nephi 23:1).
Ti panagbayad iti apagkapullo ti manglukat kadagiti tawa ti langit.
Kanayon a nabilin dagiti tao ti Dios nga agbayad iti apagkapullo (kitaen iti Genesis 14:17–20; Malakias 3:8–11). Bayat ti panagadalyo iti 3 Nephi 24:7–12, panunoten no apay nga idawat ti Dios kadagiti taona nga agbayadda iti apagkapullo. Dagitoy a saludsod ti mabalin a mangiwanwan iti panagadalyo:
Ania ti linteg ti apagkapullo? (Kitaen iti Doktrina ken Katulagan 119. Ti “interes” iti daytoy a paltiing ket kayatna a sawen ti matgedan. Amin a miembro nga addaan iti matgedan ket rumbeng nga agbayad iti apagkapullo.) Kasano a naiduma ti apagkapullo kadagiti dadduma pay a kita ti donasion?
Ania ti pangusaran iti apagkapullo? Masarakanyo ti partial list iti Gospel Topics, “Tithing” (Gospel Library). Iti ania a wagwagas a naparaburankayo gapu ta agbaybayad iti apagkapullo dagiti miembro ti Simbaan?
Ania dagiti bendision nga umay kadagiti tao nga agbibiag iti linteg ti apagkapullo? (Kitaen iti 3 Nephi 24:7–12). Masarakan ti sumagmamano a nailadawan iti mensahe ni Elder David A. Bednar “The Windows of Heaven” (Liahona, Nob. 2013, 17–20). Sapulenyo, nangnangruna, dagiti bendision a saan a nasken a kuarta. Kasano a nasaksianyon dagitoy a bendision iti biagyo?
Mabalin a kayatyo pay a buyaen ti video a “Jesus Teaches about the Widow’s Mite” (Gospel Library) wenno basaenyo ti Marcos 12:41–44. Ania ti isuro daytoy nga estoria kadakayo?
Imbaon ti Apo ni Elias a mangisubli iti pusok kadagiti kapuonak.
Iti aldawtayo, maisubli iti puspusotayo kadagiti amma[tayo] babaen iti aramid iti templo ken family history. Kasano a napasamak daytoy para kadakayo? Bayat ti panangbasayo iti 3 Nephi 25:5–6 ken Doktrina ken Katulagan 110:13–16, utobenyo no apay a napateg unay daytoy a paset ti plano ti Dios.
Kitaen met iti “Families Can Be Together Forever,” Children’s Songbook, 188.
Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.
Dagiti Kapanunotan para iti Panangisuro kadagiti Ubbing
Sipapasnek a masukisokko dagiti nasantuan a kasuratan.
Ipakita dagiti pangiturong ti Mangisalakan iti 3 Nephi 23 no kasano ti kinapateg dagiti nasantuan a kasuratan Kenkuana. Tapno matulonganyo dagiti annakyo a mangtakuat iti daytoy, mabalinyo a basaen ti 3 Nephi 23:1, 5 iti napigsa ken idawatyo kadakuada a dumngeg iti maysa a balikas a maulit iti mamitlo. Kasano a maigiddiat ti panagsukisok iti panagbasa laeng?
Nalabit mabalinyo ken dagiti annakyo ti mangisurat iti paboritoyo a bersikulo ti nasantuan a kasuratan ket ilemmengyo daytoy. Kalpasanna, mabalinyo ti agsisinnublat a mangbirok kadagiti nailemmeng a nasantuan a kasuratan ti tunggal maysa, aggigiddan a basaen dagitoy, ken pagsaritaan no apay a napateg dagitoy a bersikulo.
Ti panagbayad iti apagkapullo ti manglukat kadagiti tawa ti langit.
Tulonganyo dagiti annakyo a mangsukisok iti 3 Nephi 24:8–12 nga agsapul kadagiti wagas tapno makompleto daytoy a binatog: No agbayadak iti apagkapullo, ti Apo … . Ibinglayyo pay ti maysa a padas a nakabendisionanyo gapu ta nagbayadkayo iti apagkapullo. No makatulong daytoy, ibilang ti panangisurat iti sumagmamano a dagup ti kuarta ken panangtulong kadagiti annakyo a mangpattapatta no mano ti apagkapullo (10 porsiento) a nasken nga itedtayo iti tunggal dagup.
Ti panid ti aktibidad iti daytoy a lawas makatulong kadagiti annakyo nga agsarita maipapan iti sumagmamano kadagiti wagas nga usaren ti Apo ti apagkapullo a mangbendision kadagiti miembro ti Simbaanna. Nalabit a mabalinda ti mangidrowing kadagiti ladawan (wenno mangsarak kadagiti ladawan iti magasin ti Simbaan) kadagiti wagas a pakabendisionan ti apagkapullo kadakuada.
Kayat ti Nailangitan nga Ama a masursurok maipapan kadagiti kapuonak.
Kasano a maparegtayonto dagiti annakyo nga agsukisok ken agsursuro maipapan kadagiti kapuonanda? Kasano a maparegtayo dagiti annakyo a mangannong kadagiti ordinansa para kadagiti kapuonanda inton natataengandan? Ibilangmo ti panangtulong kadakuada nga agsukisok iti 3 Nephi 25:5–6 tapno mangsapul iti maysa a banag a mapasamakto kadagiti ud-udina nga aldaw. Mabalin nga ikabil dagiti in-inaudi nga ubbing ti imada iti pusoda tunggal mangngegda ti balikas a “puso” bayat ti panangbasayo kadagitoy a bersikulo. Mabalinyo pay a basaen maipapan no kasano a naipatungpalen daytoy a padto iti Doktrina ken Katulagan 110:13–16 (kitaen met iti Libro ti Arte ti Ebanghelio, num. 95). Isaritayo kadagiti annakyo maipapan iti no kasano a naisubli dagiti pusoyo kadagiti kapuonanyo. Kas pagarigan, mabalinyo nga ibinglay ti ania man a padpadas a napasaranyo a nasursuruan maipapan kadagiti kapuonanyo ken panagaramid kadagiti ordinansa iti templo para kadakuada.
Tulonganyo dagiti annakyo a mangpunno iti maysa a family tree nga addaan kadagiti nagan dagiti nagannak ken lelong ken lelangda. Ania dagiti estoria a mabalinyo nga ibinglay maipapan iti maysa kadagiti kapuonanyo? Mangipakita kadagiti ladawan no mabalin. Mabalinyo pay ti aggigiddan a mangkansion iti “Families Can Be Together Forever” (Children’s Songbook, 188) ken makisarita kadagiti annakyo maipapan no apay a napateg dagiti pamilia iti plano ti Nailangitan nga Ama.
Para iti ad-adu pay a kapanunotan, kitaen iti isyu ti magasin a Friend iti daytoy a bulan.
Ladawan
Ni Jesus a mangibasbasa kadagiti kasuratan dagiti Nephite ken ni Nephi