Pija in an Kraist waļokļo̧k n̄an riNipai ro, jān Andrew Bosley

Oktoba 14–20: “Kom̧ij Ro Nejin Bujen eo”

3 Nipai 20–26

N̄e kwoj ron̄ an armej kōjerbal naan ko āinwōt im̧ōn Israel, kwoj ke en̄jake āinwōt rej kōnono kōn kwe? RiNipai ro im riLeman ro raar jen bwijin Israel, “juon raan wōjke in Israel, im eaar jebwābwe jān kāān” (Alma 26:36; bar lale 1 Nipai 15:12). Ak Rilo̧mo̧o̧r eaar kōņaan bwe ren jeļā ke raar jab jebwābwe ilo E. “Kom̧ij jān m̧weo im̧ōn Israel,” Eaar ba, “im kom̧ij jān bujen eo” (3 Nipai 20:25). Emaron̄ in kar ba juon men ainļo̧k wōt n̄an kwe rainin, n̄an juon eo me eaar peptaij im ej kōm̧m̧ani bujen ko Ippān ej barāinwōt jān im̧ōn Israel, “jān bujen eo.” Ilo naan ko jet, ke Jisōs ej kōnono kōn im̧ōn Israel, Ej kōnono kōn kwe. Naan in kōmeļeļe eo n̄an kōjeraam̧m̧an “aolep nukwin ko an laļ” ej kōn kwe (3 Nipai 20:27). Kūr eo n̄an “bar ruj, im kōņak am̧ kajoor” ej kōn kwe (3 Nipai 20:36). Im kallim̧ur eo An eaiboojoj, “Aō jouj naaj jab ilo̧k jān eok, im jab naaj kōm̧akūt bujen aenōm̧m̧an eo Aō,” ej kōn kwe (3 Nipai 22:10).

Ļōmnak ko n̄an Ekkatak ilo M̧weeo im ilo Kabun̄

3 Nipai 20–22

Ilo raan kein āliktata, Anij enaaj kōm̧m̧ane juon jerbal ekabwilōn̄lōn̄.

Ilo 3 Nipai 20–22, Rilo̧mo̧o̧r ekar kanaan kōn jekļaj in armej in bujen ko An 3 Nipai 20:30–32, 39–41; 21:9–11, 22–29). Ilo am̧ riiti eoon kein, keememej ta eo Būreejtōn Russell M. Nelson ekar ba: “Jej ilubwiljin armej in bujen ro an Irooj. Ewōr ad iien em̧m̧an n̄an bōk koņaad ilo ad make kakūrm̧ool kallim̧ur kein. Ej juon tōre ekaitoktok limo n̄an mour ie!” Aiintok Ejeplōklōk eo an Israel,” Liaona, Nob. 2006, 79–82 Ewi wōt iaan kanaan kein eļaptata an kaitoktok limo n̄an kwe? Ta eo kwomaron̄ kōm̧m̧ane n̄an jipan̄ er kakūrm̧ooli?

Kappukōt naan ko im eoon ko reim̧we. Kwomaron̄ lo bwe jet naan ko im eoon ko ilo jeje ko rekwojarjar rej im̧we eok, eļan̄n̄e n̄e rekar jei n̄an kaiookwaj eok eļap tata. Ļōmņak in kōkaļļeiki eoon kein ilo jeje ko rekwojarjar me am̧ make ak jei ilo jōnōļ in ekkatak eo am̧.

3 Nipai 22;24

Anij ej tūriamo̧ kake ro rej ro̧o̧lļo̧k n̄an E.

Ilo 3 Nipai 22 im 24, Rilo̧mo̧o̧r ej kouti naan ko jān Aiseia im Malakai me robrak kōn okoktak in annan̄ ko—ubaaj ilo kijeek eo, silver eo erreeo, m̧are, wuntō ko ilan̄ (lale eļaptata 3 Nipai 22:7–8, 10–17; 24:10–12, 17–18). Ta eo oktak kein rej katakin eok kōn jemdo̧o̧n eo an Anij ippān armej ro An—im jemdo̧o̧n eo An ippam̧? Elmen an kallim̧ur ko ilo jebta kein kar kūrm̧ool ilo mour eo am̧ ak mour eo an baam̧le eo am̧?

Bar lale “The Refiner’s Fire” (video), Gospel Ļāibrāre.

3 Nipai 23:6–13

Je jetōbin en̄jake ko remaron̄ kōjeraam̧m̧an baam̧le eo aō.

Ta eo ej im̧we eok kōn iaio̧ eo an Rilo̧mo̧o̧r ippān Nipai ilo 3 Nipai 23:6–13? Eļan̄n̄e Rilo̧mo̧o̧r eo en kar tōn etale ļo̧o̧k ko kwaar kōm̧m̧ani, ta kajjitōk ko En kar kajjitōk ippam̧? Ta men ko raorōk ak jetōbin en̄jake ko kwon kar ļo̧o̧ki? Etke eaorōk n̄an kōm̧m̧ane? (lale 3 Nipai 26:2).

3 Nipai 23; 26:1–12

Rilo̧mo̧o̧r eo ekōņaan bwe jen pukot jeje ko rekwojarjar.

Ilo am̧ riiti 3 Nipai 20:10–12; 23; 26:1–12, kōļmenļo̧kjeņ elmen an Rilo̧mo̧o̧r en̄jake kōn jeje ko rekwojarjar. Ta oktak eo ikōtaan kappukot jeje ko rekwojarjar im baj riiti wōt? (lale 3 Nipai 23:1).

3 Nipai 24:7–12

Kōļļā juon m̧ōttan jon̄oul ej kōppeļļo̧k wintō ko ilan̄.

Armej ro an Anij raar aolep iien kean̄ n̄an kōļļā juon m̧ōttan jon̄oul (lale Jenesis 14:17–20; Malakai 3:8–11). Ilo am̧ ekatak 3 Nipai 24:7–12, ļōmņak etke Anij ej kajjitōk ippān armej ro An n̄an kōļļā juon m̧ōttan jon̄oul. Kajjitōk kein remaron̄ tōl am̧ ekkatak.

• Ta eo kien juon m̧ōttan jon̄oul? (Lale Katak im Bujen ko 119. “Ļapļo̧k” ilo revelesōn in ej meļeļein kōļļā. Aolep membōr ro me rej kōļļā raikuj kōļļā juon m̧ōttan jon̄oul. Elmen an juon m̧ōttan jon̄oul oktak jān menin jortak ko jet?

• Ta eo juon m̧ōttan jon̄oul ej jerbal n̄ane? Kwomaron̄ lo m̧ōttan kōmeļeļe ko ilo Unin Kōnono ko an Gospel, “Juon M̧ōttan Jon̄oul” (Gospel Ļaibrāre). Ilo wāween rot kwoj jeraam̧m̧an kōn an membōr ro an Kabun̄ in kōļļā juon m̧ōttan jon̄oul?

• Ta kōjeraam̧m̧an ko rej itok n̄an armej ro rej mour kake kien juon m̧ōttan jon̄oul? (Lale 3 Nipai 24:7–12). Kwomaron̄ lo jet iaan kōmeļeļe ko an Elder David A. Bednar “The Windows of Heaven” (Liaona, No̧b. 2013, 17–20). Lale, eļaptata, kōn kōjeraam̧m̧an ko me rejjab ekkar ilo jāān. Elmen am̧ lo kōjeraam̧m̧an kein ilo mour eo am̧?

Kwomaron̄ bar lale pija eo “Jesus Teaches about the Widow’s Mite” (Gospel Library), ak riiti Mark 12:41–44. Ta eo bwebwenato in ej katakin eok?

3 Nipai 25:5–6

Irooj eaar jilkinļo̧k Ilaisa n̄an ukōt būruwō n̄an ro jibū im jim̧m̧aō.

Ilo tōre in ad, būrūwōd rej “oktaļo̧k n̄an [ro] jemād” ilo tampeļ im jerbal in menmenbwij. Elmen an kar waļo̧k menin n̄an eok? Ilo am̧ riiti 3 Nipai 25:5–6 im Katak im Bujen Ko 110:13–16, kōļmenļo̧kjeņ etke ej juon men eaorōk ilo karōk eo an Anij.

Bar lale “Families Can Be Together Forever,” Children’s Songbook, 188.

N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik Ro māākjiin.

Ļōmņak ko n̄an Katakin Ajri ro

3 Nipai 23:1, 5

Imaron̄ tiljek ilo pukot jeje ko rekwojarjar.

• Rilo̧mo̧o̧r eaar kōmeļeļiki ilo 3 Nipai 23 kwaļo̧k aorōk eo an jeje ko rekwojarjar n̄an E. N̄an jipan̄ ajri ro lo menin, kwomaron̄ riiti 3 Nipai 23:1, 5 ilo eļaaj im kajjitōk ippāer n̄an ron̄jake naan eo ej waļo̧k jilu alen. Ewi wāween an kappukot oktak jān baj riit?

• Bōlen kwe im ajri ro nejum̧ maron̄ je juon eoon em̧m̧an jen jeje ko rekwojarjar im ņooje. Innām kom̧ maron̄ bōk kuņaan doon pukote eoon ko kar ņooji, riiti ippān doon, im kōnono etke ewōr tokjen eoon kein.

3 Nipai 24:8–12

Kōļļā juon m̧ōttan jon̄oul ej kōppeļļo̧k wintō ko ilan̄.

• Jipan̄ ajri ro nejum̧ lale 3 Nipai 24:8–12 n̄an lale wāween ko n̄an kadedeļo̧k jentōj in: N̄e ij kōļļā juon m̧ōttan jon̄oul, Irooj enaaj … . Kwomaron̄ kwaļo̧k juon en̄jake eo me kwaar jeraam̧m̧an kōn am̧ kōļļā juon m̧ōttan jon̄oul. N̄e enaaj lukkuun jipan̄, ļōmņak in je jon̄an jāān ko im jipan̄ ajri ro nejum̧ bwine ewi jon̄an juon m̧ōttan jon̄oul eo (10 bōjāān) n̄an leļo̧k jen jon̄an jāān eo.

• Peij in m̧akūtkūt eo an wiik in emaron̄ jipan̄ ajri ro nejum̧ kōnono kōn wāween ko Irooj ej kōjerbal juon m̧ōttan jon̄oul eo n̄an kōjeraam̧m̧an membōr ro ilo Kabun̄ in An. Bōlen remaron̄ jin̄aik pija ko (ak pukot pija ko ilo māākjin ko an Kabun̄ in) kōn wāween an juon m̧ōttan jon̄oul ko kōjeraam̧m̧an er.

3 Nipai 25:5–6

Jemedwōj Ilan̄ ekōņaan bwe in katak kōn ro jibu im jim̧m̧aō.

• Elmen am̧ naaj im̧we ajri ro nejum̧ n̄an lale im katak kōn ro jibwier im jim̧m̧aer? Elmen am̧ maron̄ rōjan̄ ajri ro nejum̧ n̄an kōm̧m̧ani kain̄i ko n̄an ro jibwier im jim̧m̧aer n̄e renaaj rūttoļo̧k? Ļōmņak in jipan̄ er lale 3 Nipai 25:5–6 n̄an lale jet men me enaaj kar waļo̧k ilo raan ko āliktata. Ajri ro reddik remaron̄ likūt peier ilo menono eo aer aolep iien rej ron̄ naan eo “bōro” ilo am̧ riiti eoon kein. Kwomaron̄ bar riiti elmen an kanaan in kar kūrm̧ool ilo Katak im Bujen Ko 110:13–16 (bar lale Bok in Gospel Pija, no. 95). Ba n̄an ajri ro nejum̧ elmen an būruwōm̧ kar oktakļo̧k n̄an ro jibum̧ im jim̧m̧am̧. N̄an waanjon̄ak, kwomaron̄ kwaļo̧k jabdewōt en̄jake ko kwaar jeļā kōņ ro jibum̧ im jim̧m̧am̧ n̄an kōm̧m̧ani kain̄i ko an tampeļ n̄an er.

• Jipan̄ ajri ro nejūm̧ kanne peba in menmenbwij an baam̧le kōn etan ro jineer im jemeer im jibwieer im jim̧m̧aer. Ta bwebwenato ko kwomaron̄ kwaļo̧ki kōn juon iaan ro jibum̧ im jim̧m̧am̧? Kwaļo̧k pijaj ko n̄e ekkar. “Families Can Be Together Forever” (Children’s Songbook, 188) im kōnono ippān ajri ro nejum̧ etke baam̧le ko raorōk ilo karōk eo an Jemedwōj Ilan̄.

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjiin.

Bōk M̧aantak Ļo̧o̧k e, jān Gary L. Kapp