eb’ laj k’amonel jukub’ reheb’ laj Jaredita sa’ xb’een li palaw

Laa’in texintaqsi chaq wi’chik sa’ xchamal li palaw, xb’aan laj Jonathan Arthur Clarke

18–24 noviembre: “Re naq taaruuq taak’ehe’q xraqik li maa’usilal”

Eter 6–11

K’iila cient chihab’ chirix lix sachlijikeb’ laj Jaredita, eb’ laj Nefita ke’xtaw li po’lem kab’l re li najteril tenamit a’an. Sa’ xyanqeb’ li po’lem kab’l ke’xtaw jun tz’iib’anb’il esil—eb’ li perel ch’iich’ “tz’aqal oor okenaq” li “nujenaqeb’ rik’in tz’iib’,” ut eb’ laj Nefita “keʼraj chi numtajenaq” chirilb’al ru (Mosiah 8:9; 28:12). Wan aawik’in anajwan jun xk’osb’al ru li tz’iib’anb’il esil a’in, ut a’an lix hu laj Eter nayeeman re. Naq eb’ laj Nefita ke’ril li esil, “keʼnujak rikʼin rahil chʼoolejil” naq ke’tzolok chirix xt’anikeb’ laj Jaredita. “Aʼbʼanan kixkʼe naabʼal li naʼlebʼ rehebʼ, li keʼsahoʼ wiʼ xchʼool” (Mosiah 28:18). Laa’at ajwi’ maare taaraho’q aach’ool rik’in li wan sa’ li hu a’in. A’ut, naru ajwi’ taasaho’q aach’ool rik’in li maatan a’in re nawom. Jo’ kixtz’iib’a laj Moroni, “aʼan xchaabʼilal xnaʼlebʼ li Dios naq li kʼaʼaq re ru aʼin taakʼuteʼq cheru … re naq taaruuq taakʼeheʼq xraqik li maaʼusilal, ut re naq taaruuq taachalq xqʼehil naq laj Satanas maakʼaʼaq chik xwankil saʼ xbʼeen xchʼoolebʼ li ralal xkʼajolebʼ li winq” (Eter 8:23, 26).

Li na’leb’ re tzolok sa’ li ochoch ut sa’ li iglees

Eter 6:1–12

Li Qaawa’ tixk’am inb’e chiru lin b’eenik sa’ ruchich’och’.

Naru nakak’ul laa musiq’ejil na’leb’ wi taajuntaq’eeta lix xikikeb’ laj Jaredita chiru li palaw rik’in laa numik chiru laa yu’am. Qayehaq, k’a’ru xk’e li Qaawa’ li naxkutanob’resi laa b’e jo’ chanchaneb’ li pek sa’eb’ lix k’amonel jukub’ laj Jaredita? K’a’ru neke’reetaliheb’ li k’amonel jukub’, malaj li iq’ li “na’apunk sa’ xjayal li yeechi’inb’il ch’och’”? (Eter 6:8). K’a’ru nakatzol rik’in li ke’xb’aanu laj Jaredita rub’elaj, sa’, ut chirix xraqik lix xikikeb’? Chan ru yoo li Qaawa’ chab’eresinkil sa’ xjayal laa yeechi’inb’il ch’och’?

“Bʼichank re xnimankil ru li Qaawaʼ.” Eb’ laj Jaredita ke’xk’ut lix b’antioxihomeb’ ut lix rahomeb’ choq’ re li Dios rik’in li b’ichank ut li nimank-u (chi’ilmanq Eter 6:9). Naru nakasik’ roksinkil li son ut li ch’olob’ank chi anchal ch’oolej re xnimankil ru li Dios sa’ li ochoch ut sa’ li iglees. Qayehaq, naru nakab’icha jun li b’ich re nimank-u, maare “Li Qawaa’ chiqanima” (Eb’ li B’ich, 38), naq yooqat chirilb’al Eter 6:1–12.

jun junkab’al aj Jaredita sa’ lix k’amonel jukub’

K’uula’al sa’ li jukub’, xb’aan laj Kendal Ray Johnson

Eter 6:5–18, 30; 9:28–35; 10:1–2

“Bʼeek chi tuulan chiru li Qaawaʼ.”

Us ta chanchan naq sa’ li resilaleb’ laj Jaredita nanumta li q’etq’etil ut li maa’usilal, wan ajwi’ reetalil li tuulanil ch’oolej sa’eb’ li ch’ol a’in—q’axal wi’chik sa’ Eter 6:5–18, 30; 9:28–35; ut 10:1–2. Wi nakak’oxlaheb’ li patz’om a’in, naru nakataw aana’leb’ rik’ineb’ li raqal a’in: K’a’ut naq eb’ laj Jaredita ke’xtuulanob’resi rib’ sa’eb’ li hoonal a’in? Chan ru naq ke’xk’ut xtuulanileb’? Chan ru naq li Dios kirosob’tesiheb’ xb’aan a’an? K’oxla li naru nakab’aanu re “b’eek chi tuulan chiru li Qaawa’” rik’in x’anchalil aach’ool (Eter 6:17) ruuchil xtuulanob’resinkil aawib’ chi minb’il aawu (chi’ilmanq Mosiah 4:11–12; Alma 32:14–18).

Chi’ilmanq ajwi’ Dale G. Renlund, “Xb’aanunkil li tiik ru, xraab’aal li uxtaan, b’eek chi tuulan rik’in li Dios,” Jolomil ch’utub’aj-ib’ re octubre 2020.

Eter 7–11

reetalil li seminario

Naru ninjolomin jo’ chanru li Kristo.

Eb’ li ch’ol 7–11 re lix hu laj Eter neke’xye resil numenaq 28 tasal tenamit. Us ta ink’a’ naru nayeeman resil chixjunil li kik’ulman sa’eb’ li kok’ ch’ol a’an, nak’utb’esiman chi saqen ru jun eetalil chirix li jolomink sa’ tiikilal ut li jolomink sa’ maa’usilal. K’a’ru nakatzol chirix li jolomink—li ink’a’ us jo’ ajwi’ li us—rik’in li ke’xb’aanu li rey a’in?

• Orihah—Eter 6:30; 7:1

• Xuul—Eter 7:23–27

• Jared—Eter 8:1–7, 11–15

• Emer ut Koriantum—Eter 9:21–23

• Het—Eter 9:26–30

• Xez—Eter 10:1–2

• Riplakix—Eter 10:5–8

• Morianton—Eter 10:9–11

• Lib—Eter 10:19–28

• Etem—Eter 11:11–13

• Jesukristo—Mateo 18:1–4; 20:20–28; 23:11

Li Elder Dieter F. Uchtdorf kixk’e li chaab’il na’leb’ chirix li jolomink sa’ “Li ani nim xwankil sa’ eeyanq” (Jolomil ch’utub’aj-ib’ re abril 2017). Naru nakatz’il rix li raatin—jo’eb’ li seraq’ li naxwotz—re xk’eeb’al reetaleb’ li na’leb’ ut eetalil chirix li jolomink jo’ li Kristo. Jo’q’e aawilomeb’ li na’leb’ ut eetalil a’in chi k’utb’esinb’ileb’ rik’ineb’ laj jolominel nakanaw ru?

Naq nakak’oxla li xatzol, k’oxla chan ru naq ak xatru chixk’amb’aleb’ xb’e malaj chixtenq’ankileb’ laa was aawiitz’in sa’ laa wochoch, sa’ laa tenamit, rik’in laa b’oqb’al sa’ li Iglees, ut wan xkomon chik. Chan ru naru nakanimob’resiheb’ li chaab’ilal re jolomink jo’ li Kristo, us ta maare maak’a’ aab’oqb’al chi jolomink?

Chi’ilmanq ajwi’ Temas del Evangelio, “Servir en los llamamientos de la Iglesia,” Biblioteca del Evangelio; “Eb’ li na’leb’ chirix b’eresink sa’ li Iglees,” Jolomil K’anjenel Hu: Li k’anjelak sa’ Lix Iglees li Jesukristo Reheb’ laj Santil Paab’anel sa’ Roso’jikeb’ li Kutan, 4.2 (ChurchofJesusChrist.org).

Eter 8:7–26

Li Qaawaʼ inkʼaʼ nak’anjelak sa’ q’ojyin.

Naq li kristiaan neke’xk’uub’ xna’leb’ chixmuqb’al lix maa’usil b’aanuhom, okenaqeb’ sa’ jun muqmuukil molam. Yeeb’ileb’ resil li muqmuukil molam sa’ Eter 8:7–18, ut naru neke’tawman xkomoneb’ sa’ Helaman 1:9–12; 2:2–11; 6:16–30; Moises 5:29–33. Naru nakajuntaq’eetaheb’ li raqal a’in rik’in 2 Nefi 26:22–24, b’ar wi’ laj Nefi naxye chan ru naq li Qaawa’ naxb’aanu xk’anjel. K’a’ut naq kitaqlaak laj Moroni chixtz’iib’ankil li kixtz’iib’a chirixeb’ li muqmuukil molam?

K’a’ru xatzol sa’ lix hu laj Eter li naru tatxtenq’a chixk’ulb’aleb’ li osob’tesink yeeb’ileb’ resil sa’ Eter 8:26?

Li na’leb’ re xtzolb’aleb’ li kok’al

Eter 6:1–12

Naru ninpaab’ naq lin Choxahil Yuwa’ tixk’ojob’ inch’ool naq wan inxiw.

• Nachal li ch’a’ajkilal sa’ xyu’am chixjunileb’—jo’eb’ ajwi’ li kok’al. Naru nakatenq’aheb’ laa kok’al chixtawb’aleb’ aatin ut ch’ol aatin sa’ Eter 6:2–12 li te’xk’utb’esi chan ru naq eb’ laj Jaredita ke’xkanab’ rib’ sa’ ruq’ li Dios chiruheb’ li ch’a’ajkil ut xuwajelil kutan. Naru nekewotz cherib’il eerib’ lee numsihom naq li Dios xexxtenq’a chiruheb’ li hoonal ch’a’aj sa’ lee yu’am.

Eter 6:9, 12, 30; 7:27; 10:2

Xjultikankil k’a’ru xb’aanuhom li Qaawa’ naxk’e b’antioxihom ut tuqtuukilal.

• Chirix naq ke’wulak sa’ li yeechi’inb’il ch’och’, eb’ laj Jaredita ke’b’antioxin toj reetal naq “ke’el xya’aleb’ ru xb’aan xsahileb’ xch’ool” (Eter 6:12). Naru nakawaklesi xch’ooleb’ laa kok’al chixb’antioxinkileb’ li rosob’tesihom li Dios wi taatenq’aheb’ chixtawb’al li aatin sa’ Eter 6:9, 12 li naxk’ut chan ru naq eb’ laj Jaredita ke’b’antioxin chiru li Dios. Maare taawulaq chiruheb’ xb’ichankil, jo’ ke’xb’aanu laj Jaredita, jun li b’ich re b’antioxink, maare “Bʼantiox, at Yuwaʼ” (B’ichleb’aal choq’ reheb’ li Kok’al, 9). Patz’ reheb’ laa kok’al naq te’xye aawe k’a’ru neke’b’antioxin wi’.

• Laa kok’al naru neke’ril Eter 6:30; 7:27; ut 10:2 re naq te’xk’e reetal k’a’ru kijultiko’ reheb’ li rey. Chan ru naq a’an kixjal chan ru naq ke’xjolomi lix tenamiteb’? Naru neketz’il rix chan ru teejultika eerib’ k’a’ru xb’aanuhom li Dios choq’ eere. Qayehaq, naru neke’tz’iib’ak malaj neke’yiib’ank jalam-uuch. Naru nakab’oqeb’ re naq te’xk’aytesi rib’ chixtz’iib’ankil resil li rosob’tesihom li Dios te’xk’e reetal (chi’ilmanq “Oh recuerda, recuerda” [video], Biblioteca del Evangelio).

Eter 7:24–27

Osob’tesinb’ilin naq nintaaqe lix profeet li Dios.

• Maare taawulaq cheru xk’utb’esinkil junjunq reheb’ li na’leb’ neke’xk’ut li profeet naq taqab’aanu. Naru ajwi’ naq a’anaq jun b’atz’unk b’ar wi’ teeq’ehi k’a’ru naraj naxye lix k’utb’esihom li jun siir chik. A’in naru naxkawresiheb’ laa kok’al chixtz’ilb’al rix k’a’ut naq aajel ru xtaaqenkil lix profeet li Dios. Naru nekeril Eter 7:24–27 re xk’eeb’al reetal k’a’ru kik’ulman naq eb’ li tenamit ke’ab’in chiru lix profeet li Dios. Chan ru naq noko’osob’tesiik naq naqataaqe li profeet sa’ li kutan a’in?

Eter 9:28–35; 11:5–8

Li Qaawa’ wan li ruxtaan naq ninjal ink’a’uxl.

• Xk’eeb’al reetaleb’ li eetalil sa’eb’ li loq’laj hu, a’an jun chaab’il seeb’al re tzolok. Sa’ lix hu laj Eter wan jun k’iilasutinb’il eetalil li naxk’ut xyaalal li ruxtaan li Qaawa’. Re xtenq’ankileb’ laa kok’al chixtawb’al li eetalil a’in, patz’ reheb’ naq te’ril Eter 9:28–35 ut Eter 11:5–8, ut te’xk’e reetal chan ru naq neke’xk’am rib’ li wiib’ chi seraq’ a’an. K’a’ru naqatzol sa’eb’ li seraq’ a’in? Naru neke’xsik’eb’ li jalam-uuch sa’ li Hu reheb’ li Jalam-uuch re li Evangelio chirixeb’ li kristiaan sa’ li loq’laj hu li ke’xjal xk’a’uxl ut ke’kuye’ xmaak.

Re xtawb’al xkomon chik li na’leb’, chi’ilmanq li hu Amigos re li po a’in.

eb’ laj k’amonel jukub’ reheb’ laj Jaredita sa’ xb’een li palaw

Eb’ laj k’amonel jukub’ reheb’ laj Jaredita, xb’aan laj Gary Ernest Smith

perel re kok’ k’anjel: Li qaChoxahil Yuwa’ kixtenq’aheb’ laj Jaredita chixyiib’ankileb’ li k’amonel jukub’