Laj Mormon naxk’oseb’ ru li perel ch’iich’ oor, xb’aan laj Tom Lovell

28 octubre–3 noviembre: “Nawaj raj naq tinruuq chixq’unb’esinkil eech’ool chejunilex … re naq teejal eek’a’uxl”

Mormon 1–6

Laj Mormon ink’a’ kiraj xk’eeb’al “chi tz’aqal li esilal” chirix li maa’usilal ut li hoyok kik’ li kiril sa’ xyanqeb’ laj Nefita (Mormon 2:18; chi’ilmanq ajwi’ Mormon 5:8). A’b’anan, tz’aqal li k’a’ru kixtz’iib’a sa’ Mormon 1–6 re xjultikankil qe lix nimal li t’ane’k naru te’t’ane’q wi’ jun tenamit li tiikeb’ chaq xch’ool. Sa’ xyi li nimla maa’usilal a’an, maajun kiru raj chixyeeb’al naq wan xmaak laj Mormon rik’in naq tawajenaq ut kub’enaq xch’ool. A’b’anan, maak’a’ naxye li k’a’ru kiril ut kixnumsi, maajun wa kisach sa’ xch’ool lix nimal li ruxtaan li Dios, ut lix paab’aal naq rik’in li jalb’a-k’a’uxlej naru xk’ulb’al li uxtaan a’an. Ut us ta lix tenamit ke’xtz’eqtaana lix tz’aam ut lix b’oqom laj Mormon naq te’xjal xch’ool, a’an kixnaw naq toj wankeb’ naab’aleb’ chik li tento tixq’unb’esiheb’ xch’ool. “Relik chi yaal,” chan, “nintzʼiibʼak re chixjunilebʼ lix maril li ruchichʼochʼ.” Sa’ jalan chik aatin, a’an kitz’iib’ak choq’ aawe laa’at (chi’ilmanq Mormon 3:17–20). Ut li raatin choq’ aawe, sa’ li kutan a’in, juntaq’eet rik’in li aatin kiru raj chixkolb’aleb’ laj Nefita sa’ lix kutankileb’ a’an: “Teepaab’ lix evangelio li Jesukristo. … Teejal eek’a’uxl ut teekawresi eerib’ chi xaqliik chiru lix raqleb’aal aatin li Kristo” (Mormon 3:21–22).

Chi’ilmanq ajwi’ li video chirix laj Mormon naq kixk’uulaheb’ li tz’iib’anb’il esil re xch’utub’ankil lix junkab’al laj Israel rik’in li Kristo, li wan sa’ li Biblioteca del Evangelio.

Li na’leb’ re tzolok sa’ li ochoch ut sa’ li iglees

Mormon 1–6

Naru nintaaqe li Jesukristo, maak’a’ naxye k’a’ru neke’xb’aanu jalaneb’ chik li kristiaan.

Naq lajeeb’ chihab’ xyu’am laj Mormon, ak jwal jalan a’an rik’ineb’ li kristiaan ke’wan sa’ xsutam. Naq nakawil Mormon 1–6, k’e reetal chan ru naq lix paab’aal laj Mormon chirix li Jesukristo kixk’utb’esi xjalanil ut kixk’e xhoonal chi k’anjelak chiru ut chirosob’tesinkileb’ li ras riitz’in. Re xtikib’ankil, naru nakawoksiheb’ li raqal a’in:

Mormon 1:2–3, 13–17.K’a’ru lix jalanil laj Mormon rik’in lix tenamit li nakak’e reetal? K’a’ru kitenq’ank re chi kanaak chi kaw rib’ sa’ musiq’ej sa’eb’ li ch’a’ajkil kutan a’an?

Mormon 2:18–19.K’a’ruheb’ li aatin kiroksi laj Mormon re xyeeb’al resil li ruchich’och’ kiwan wi’? Chan ru naq toj kiwan xyo’onihom rik’in li yoo chi k’ulmank sa’ xyu’am?

Mormon 3:12.K’a’ru kireek’a laj Mormon chirixeb’ li kristiaan sa’ xsutam? K’a’ru naru nakab’aanu re taawanq laa rahom jo’ chanchan lix rahom a’an?

Ma wankeb’ chik li raqal sa’ Mormon 1–6 li neke’xye resil lix paab’aal laj Mormon chirix li Jesukristo? K’a’ru kik’eeman re xb’aan naq kixsik’ ru paab’ank?

Naru nakawil li raatin li Awa’b’ej Thomas S. Monson, “Chexwanq jo’ jun eetalil ut jo’ jun saqen” (Jolomil ch’utub’aj-ib’ re octubre 2015), ut taak’e reetal k’a’ut naq aajel ru naq eb’ li neke’taaqenk re li Jesukristo jalanaqeb’. Chan raj ru taatz’aqob’resiheb’ ru li ch’ol aatin a’in? “ a’an chaq jun chaab’il eetalil chiqu naq a’an . Ut a’in kinixtenq’a chirajb’al .”

Laj Mormon maare kireek’a naq maak’a’ na’ok wi’ lix b’aanuhom sa’ xtenamit. Wi ta tatruuq chi aatinak rik’in laj Mormon, k’a’ raj ru taaye re chirix li xb’aanuhom choq’ aawe?

Chi’ilmanq ajwi’ David A. Bednar, “Prestos para observar,” Liahona, diciembre 2006, 14–20; “Algo diferente en nosotros: Ejemplo” (video), Biblioteca del Evangelio; Temas del Evangelio, “Vivir el evangelio de Jesucristo ,” Biblioteca del Evangelio.

Tenq’aheb’ laa was aawiitz’in chixwotzb’al li k’a’ru neke’xtzol. Naq li kristiaan neke’xwotz li k’a’ru neke’xtzol, neke’xkawob’resi xpaab’aaleb’ a’an ut xpaab’aaleb’ li ras riitz’in (chi’ilmanq Tzol’leb’ ut Sumwank 88:122). Yal xpatzb’al re laa junkab’al malaj laa tzoleb’aal k’a’ru ke’xk’ul naq ke’xtz’il rix li raatin li Dios.

Li pleet, xb’aan laj Jorge Cocco

Mormon 2:10–15

Li rahil ch’oolej jo’ naraj li Dios naxk’am inb’e rik’in li Kristo ut li jalaak li nakana.

Naq laj Mormon kirileb’ lix tenamit chi raho’k sa’ xch’ooleb’, kiroyb’eni naq te’xjal xk’a’uxleb’. A’b’anan “li raho’k ch’oolej xb’aaneb’ maawa’ re xjalb’aleb’ xk’a’uxl” (Mormon 2:13)—maawa’ li rahil ch’oolej jo’ naraj li Dios, a’an b’an li ruchich’och’il rahil ch’oolej. Re xtawb’al ru xjalanileb’, k’oxla xtz’iib’ankil li nakatzol sa’ Mormon 2:10–15 sa’ jun kaaxukuut jo’ li wan arin:

Li rahil ch’oolejil jo’ naraj li Dios	Li rahil ch’oolejil re li ruchich’och’
Nachal rik’in li Jesus (raqal 14)	Naxmajewa li Dios (raqal 14)

Chan ru naru nakanaw wi lix rahil aach’ool a’an jo’ naraj li Dios malaj li re li ruchich’och’? Wi wan xrahil ach’ool re ruchich’och’, chan ru naru nakajal toj sa’ li rahil ch’oolej naraj li Dios?

Chi’ilmanq ajwi’ 2 Korintios 7:8–11; Michelle D. Craig, “Li choxahil ch’i’ch’i’,” Jolomil ch’utub’aj-ib’ re octubre 2018.

Mormon 3:3, 9

“Inkʼaʼ keʼxtaw xyaalal naq aʼan li Qaawaʼ li kikolok chaq xyuʼamebʼ.”

Laj Mormon kixk’e reetal naq eb’ laj Nefita ink’a’ neke’xk’e reetal chan ru naq osob’tesinb’ileb’ xb’aan li Qaawa’. Naq nakawil Mormon 3:3, 9, naru nakak’oxla chan ru naq yookat chixk’eeb’al reetal lix wankil li Dios sa’ laa yu’am. K’a’ruheb’ li osob’tesink neke’chal naq nakak’e reetal lix wankil? K’a’ru naru nakak’ul wi ink’a’ nakak’e reetal a’an? (chi’ilmanq Mormon 2:26; Tzol’leb’ ut Sumwank 59:21).

Chi’ilmanq ajwi’ Henry B. Eyring, “Aay, chijultiko’q, chijultiko’q eere,” Jolomil ch’utb’aj-ib’ re octubre 2007.

Mormon 5:8–24; 6:16–22

Xaxqo li Jesukristo chi teeto xtel re ink’ulb’al.

Wi wan hoonal naq naraho’ aach’ool chirixeb’ laa maak, li raatin laj Mormon chirix li Kolonel li naxaqli “chi teeto xtel re aak’ulb’al” naru naxk’ojob’ aach’ool. Naq nakawil Mormon 5:8–24 ut 6:16–22, k’a’ru nakatzol chirix li neke’reek’a laa Choxahil Yuwa’ ut li Jesus chawix, us ta naq nakatmaakob’k? Chan ru aaweek’ahom li Jesukristo chi nach’ok aawik’in chi teetookeb’ xtel? K’a’ru eek’asinb’ilat chixb’aanunkil xb’aan a’in?

Chi’ilmanq ajwi’ “Chalqex rik’in li Kolonel,” Eb’ li B’ich, 68.

Li na’leb’ re xtzolb’aleb’ li kok’al

Mormon 1:1–3; 2:1, 23–24; 3:1–3, 12, 17–22

Jo’ laj Mormon, naru nintaaqe li Jesukristo.

• Laj Mormon jwal saaj chaq naq kixtaw xpaab’aal chirix li Kristo, ut a’an naru nak’ehok xmusiq’ankileb’ laa kok’al. Naru nakayaab’asi Mormon 1:1–3, ut eb’ laa kok’al naru te’ab’inq re naq te’xnaw jarub’ chihab’ wan chaq re laj Mormon naq laj Ammaron kixk’e xtaqlankil. Naru ajwi’ nakapatz’ reheb’ naq tate’xtenq’a chixtawb’al sa’eb’ li raqal a’in eb’ li chaab’ilal kiril laj Ammaron rik’in laj Mormon. Chan ru naq ebʼ li naʼlebʼ aʼin nokoheʼxtenqʼa chixtaaqenkil li Jesukristo?

  

  Laj Mormon, naq wan chaq re lajeeb’ chihab’, xb’aan laj Scott M. Snow

• Laj Mormon kixtaaqe li Jesukristo, jo’kan naq kik’eeman re naab’al li hoonal re k’anjelak chiru ut rosob’tesinkileb’ li ras riitz’in. Naru nakapatz’ reheb’ laa kok’al naq te’ril jun malaj wiib’ oxib’ reheb’ li raqal a’in, ut taatenq’aheb’ chixwotzb’al li neke’xtzol chirix laj Mormon: Mormon 1:1–3; 2:1, 23–24; ut 3:1–3, 12, 20–22 (chi’ilmanq ajwi’ “Ch’ol 49: Laj Mormon ut eb’ lix k’utum,” Eb’ li Esilal sa’ lix Hu laj Mormon, 138–142). Chan ru naq a’an kixtaaqe li Jesukristo? Chan ru naq lix paab’aal chirix li Jesukristo kixtenq’aheb’ malaj kirosob’tesiheb’ li ras riitz’in? Chan ru naq li qapaab’aal laa’o naru naxtenq’aheb’ li qas qiitz’in?

Mormon 2:8–15

Li rahil ch’oolej jo’ naraj li Dios naxk’am inb’e rik’in li Kristo ut li jalaak li nakana.

• Naru nakayiib’ jun kaaxukuut jo’ li wan sa’ “Li na’leb’ re tzolok sa’ li ochoch ut sa’ li iglees” re xtenq’ankileb’ laa kok’al chixtawb’al ru lix jalanil li ruchich’och’il rahil ch’oolej rik’in li rahil ch’oolej jo’ naraj li Dios naq neke’ril Mormon 2:8, 10–15. Chirix a’an naru neke’ril Mormon 2:12 re xk’eeb’al reetal k’a’ut naq li jalb’a-k’a’uxlej tento raj tixk’eheb’ li “qaam … chi saho’k.” Chan ru naru naqak’e chi uxk naq li rahil ch’oolejil naqeek’a xb’aaneb’ li qamaak tooxk’am chixsik’b’al xtenq’ li Dios re toojalaaq?

Mormon 3:3, 9

Lin Choxahil Yuwa’ naxk’e naab’al li wosob’tesinkil.

• Xpatz’b’al reheb’ laa kok’al naq te’xtz’iib’a (malaj te’xyiib’ xjalam-uuch) li k’a’ru neke’xb’antioxi naru naxtenq’aheb’ chixb’antioxinkil li Dios. Chirix naq tz’iib’anb’il malaj yiib’anb’il a’an, naru nakawil Mormon 3:3, 9 ut nakach’olob’ naq li qaChoxahil Yuwa’ kirosob’tesiheb’ ajwi’ laj Nefita, a’b’an ink’a’ ke’xk’e reetal. K’a’ru naru naqab’aanu re xk’utb’al naq naqab’antioxiheb’ li qosob’tesinkil naxk’e li qaChoxahil Yuwa’?

Mormon 3:12

Lin Choxahil Yuwa’ naraj naq chixjunil tinraheb’.

• Us ta aj maakeb’ laj Nefita, laj Mormon toj kixraheb’. Tenq’aheb’ laa kok’al chixtawb’aleb’ li aatin “kixraheb’” ut “rahom” sa’ Mormon 3:12. Naru nekeb’icha jun li b’ich chirix xraab’aleb’ li qas qiitz’in, maare “Chiqara li qas qiitz’in” (B’ichleb’aal choq’ reheb’ li Kok’al, 39), naq yooqat chixk’utb’al xjalam-uucheb’ kok’al re chixjunil li ruchich’och’. Ch’olob’ xyaalal lix rahom li Dios choq’ reheb’ chixjunileb’ li ralal xk’ajol.

Re xtawb’al xkomon chik li na’leb’, chi’ilmanq li hu Amigos re li po a’in.

Kitz’iib’aman lix Hu laj Mormon “re taaruuq teepaabʼ lix evangelio li Jesukristo” (Mormon 3:21).