Laj Eter naxmuq rib’ sa’ xtehelal jun pek, xb’aan laj Gary Ernest Smith

25 noviembre–1 diciembre: “Rik’in li paab’aal natz’aqob’resiik ru chixjunil li k’a’aq re ru”

Eter 12–15

“Xninqaleb’ ru ut sachb’a-ch’oolejil” lix profeetil aatin laj Eter chiruheb’ laj Jaredita (Eter 12:5). A’an “kixye chixjunil li k’a’aq re ru, chalen chaq xtiklajik li winq” (Eter 13:2). A’an kiril chi rub’elaj “lix kutankil li Kristo” ut li Ak’ Jerusalen re roso’jikeb’ li kutan (Eter 13:4). Ut a’an ki’aatinak chirix “xyo’oninkil jun ruchich’och’ li chaab’il wi’chik; relik chi yaal, jun na’ajej sa’ xnim uq’ li Dios” (Eter 12:4). A’b’anan, eb’ laj Jaredita ke’xtz’eqtaana li raatin, ut li rajb’al ke’xtz’eqtaana wi’ juntaq’eet rik’in li rajb’al neke’tz’eqtaanaman wi’ lix profeetil aatineb’ lix moos li Dios sa’ li kutan a’in—“xb’aan naq moko ke’ril ta” (Eter 12:5). Na’ajman ru li paab’aal re xpaab’ankileb’ li yeechi’ihom malaj li tijom chirix li ink’a’ naru naqil, jo’ chanchan naq ki’ajman ru li paab’aal choq’ re laj Eter re taa’aatinaq rik’in profeetil aatin chirix “xninqal ru ut sachb’a-ch’oolejil na’leb’” chiru jun tenamit maak’a’eb’ xpaab’aal. Ki’ajman ru li paab’aal choq’ re laj Moroni re xpaab’ankil naq li Qaawa’ taaruuq tixjal “xq’unal xmetz’ew chi tz’iib’ak” choq’ kawilal (chi’ilmanq Eter 12:23–27). A’an a’in li paab’aal li nokoxk’e chi wank “chi chapcho, xaqxooqo junelik, numtajenaq junelik li chaab’il k’anjel qik’in, k’amb’ilo chixnimankil xloq’al li Dios” (Eter 12:4). Ut a’an a’in li paab’aal “natz’aqob’resiik wi’ ru chixjunil li k’a’aq re ru” (Eter 12:3).

Li na’leb’ re tzolok sa’ li ochoch ut sa’ li iglees

Eter 12

Li paab’aal chirix li Jesukristo naru taak’amoq sa’ li sachb’a-ch’oolej.

Jo’ sa’ xkutankil laj Eter, ak re naq li kristiaan neke’raj rilb’al li eetalil rub’elaj naq te’xpaab’ li Dios ut lix wankil. K’a’ru nakatzol sa’ Eter 12:5–6 chirix li na’leb’ a’in?

Naq yooqat chirilb’al Eter 12, naru nakak’e reetal rajlal sut naq nakataw li aatin “paab’aal.” K’oxla k’a’ru naxk’ut li junjunq chirix li paab’aal. Naru neke’k’anjelak li patz’om a’in: K’a’ru li paab’aal? K’a’ru naraj naxye xk’anjelankil li paab’aal? K’a’ru li naruuchini li paab’aal chirix li Jesukristo? Naru ajwi’ nakatz’iib’a li nakak’oxla chirix xnawom aach’ool xak’ul “chirix naq yalb’il rix aapaab’aal” (Eter 12:6).

Chi’ilmanq ajwi’ Russell M. Nelson, “Xwakli li Kristo; Li paab’aal chirix a’an tixjal xna’ajeb’ li tzuul,” Jolomil ch’utub’aj-ib’ re abril 2021.

K’e xhoonaleb’ li kristiaan chi wotzok, ut wan naq, chi k’utuk. Mas neke’tzolok li kristiaan naq wankeb’ xhoonal chixwotzb’al li yookeb’ chixtzolb’al, malaj chixk’utb’al li na’leb’ a’an sa’ jun tzoleb’aal. Sa’ ochoch malaj sa’ iglees, naru nakakanab’eb’ li kristiaan, jo’eb’ ajwi’ li saaj, chixk’utb’al jun raqal re li tzolok.

Eter 12:1–9, 28, 32

Li Jesus naxk’e qe “jun qayo’onihom q’axal chaab’il wi’chik.”

Rochb’een li xninqal ru na’leb’ chirix li paab’aal, sa’ Eter 12 wan ajwi’ naab’al li aatin chirix li yo’onink. Kanab’eb’ li patz’om a’in chixk’amb’al aab’e sa’ li tzolok:

• K’a’ut naq aajel ru choq’ re laj Eter naq “tixyo’oni jun ruchich’och’ li chaab’il wi’chik”? (chi’ilmanq Eter 12:2–5).

• Kʼaʼru aj-e jun li chapleb’? K’a’ru naxb’aanu li yo’onink choq’ re laa waam li chanchan li naxb’aan jun chapleb’ choq’ re jun li jukub’? (chi’ilmanq Eter 12:4).

• K’a’ru li tento taqayo’oni? (chi’ilmanq Eter 12:4; Moroni 7:41).

• Chan ru naq lix evangelio li Jesukristo naxk’e aawe “jun aayo’onihom q’axal chaab’il wi’chik”? (Eter 12:32).

Chi’ilmanq ajwi’ Moroni 7:40–41; Jeffrey R. Holland, “Tzʼaqal xlemtzʼunkil li yoʼonink,” Jolomil ch’utub’aj-ib’ re abril 2020.

Eter 12:23–29

Li Jesukristo naru naxq’ajsi lix q’unal inmetz’ew choq’ kawilal.

Naq naqileb’ li xnimal ru raatin laj Moroni, naru nasach sa’ qach’ool naq a’an yoo chaq lix k’a’uxl chirix “xq’unal xmetz’ew chi tz’iib’ak” ut kixxuwa naq eb’ li kristiaan te’reetz’u li raatin (chi’ilmanq Eter 12:23–25). Wi jun sutaq xaweeka’ xrahil aach’ool xb’aan xq’unal laa metz’ew, il li kich’a’ajko’ wi’ laj Moroni—ut k’a’ru kixye li Kolonel re—sa’ Eter 12:23–29. Naru ajwi’ nakak’oxlaheb’ li hoonal naq li Jesukristo xatxtenq’a chixk’eeb’al reetal lix q’unal aametz’ew ut xatxkawob’resi—us ta ink’a’ kirisi lix q’unal aametz’ew chi tz’aqal. Naru ajwi’ nakak’oxla lix q’unal aametz’ew li ch’a’ajkilanb’ilat wi’ anajwan. K’a’ru tento taab’aanu re xk’ulb’al lix yeechi’ihom li Kolonel naq “tixkʼe li kʼaʼru qʼun xmetzʼew choqʼ kawilal”? (Eter 12:27).

K’oxla xtz’ilb’aleb’ rix li raqal a’in re xk’eeb’al reetal chan ru naq li kristiaan sa’ li loq’laj hu ke’xtaw xmetz’ew sa’ xk’ab’a’ li rusilal li Jesukristo:

• Laj Enok (Moises 6:31–34; 7:13)

• Laj Moises (Exodo 4:10–12; 14:31)

• Laj Gedeon (Jueces 6:12–16; 8:22–23)

• Laj Pedro (Lukas 5:8–10; 22:55–62; Hechos 4:13–21)

• Laj Moroni (Eter 12:23–29)

• Laj Jose Smith (Jose Smith—Resilal 1:28; Tzol’leb’ ut Sumwank 35:17; 135:3)

Chi’ilmanq ajwi’ Temas del Evangelio, “Gracia,” Biblioteca del Evangelio; “Laa’at lin saqen,” Eb’ li B’ich, 47.

Eter 13:13–22; 14–15

Xtz’eqtaanankil lix profeet li Qaawa’ nikinixk’e sa’ li musiq’ejil xiwxiw.

Na’ilman sa’ resil lix tenamiteb’ naq xiwxiw li wank jo’ rey sa’ xb’eeneb’ laj Jaredita. Tz’aqal yaal a’in choq’ re laj Koriantumr, xb’aan naq naab’aleb’ li “winq ninqeb’ xmetz’ew … ke’xsik’ xsachb’al” (Eter 13:15–16). Sa’ Eter 13:15–22, k’e reetal li kixb’aanu laj Koriantumr re xkolb’al rib’, ut li kixye li profeet aj Eter naq tixb’aanu ruuchil a’an. Naq nakawil lix hu laj Eter toj sa’ xraqik, k’oxla li naru nachal xb’aan xtz’eqtaanankileb’ li profeet. K’a’ru nak’ulman rik’ineb’ li kristiaan naq “lix Musiq’ li Qaawa’ naxkanab’ xyalb’al xq’e rik’ineb’”? (Eter 15:19). K’a’ru naraj li Qaawa’ naq taatzol sa’eb’ li seraq’ a’in? K’oxla k’a’ru taab’aanu re xtaaqenkileb’ lix profeet.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Eter 12:6–22

Li paab’aal a’an xpaab’ankil li ink’a’ ninru chirilb’al.

• Naru nakatenq’aheb’ laa kok’al chixyeeb’al aawik’in “Li paab’aal a’an li k’a’aq re ru yo’oninb’il ut moko ilb’il ta” jo’ naxye sa’ Eter 12:6. Maare taawulaq chiruheb’ rilb’aleb’ li jalam-uuch li te’reetali li seraq’ chirix li paab’aal sa’ Eter 12:13–15, 19–21 (chi’ilmanq Hu reheb’ li Jalam-uuch re li Evangelio, 78, 85, ut li perel re kok’ k’anjel re li xamaan a’in). Kanab’eb’ laa kok’al chixyeeb’al k’a’ru neke’xnaw chirixeb’ li seraq’ a’an. Wahe’ junjunq li patz’om re eetenq’ankil chi aatinak chirix li paab’aal li xk’utman:

  • K’a’ru ke’xyo’oni li kristiaan a’an?

  • Chan ru naq kiyale’ rix lix paab’aaleb’?

  • K’a’ru kik’ulman xb’aan naq ke’wan xpaab’aal?

  Naru ajwi’ nakawotz laa numsihom naq xak’anjela laa paab’aal.

Eter 12:4, 32

Li oyb’enink a’an chanchan jun li chapleb’ re li waam.

• Re xtawb’al ru li k’utb’il sa’ Eter 12:4 chirix li yo’onink, naru nekerileb’ xjalam-uuch jun li jukub’ ut jun li chapleb’. K’a’ut naq eb’ li jukub’ neke’raj ru li chapleb’? K’a’ raj ru tixk’ul jun jukub’ maak’a’ xchapleb’? Naq yooqex chirilb’al Eter 12:4, tz’ilomaq rix chan ru naq li yo’onink nokoxtenq’a jo’ chanru naq lix chapleb’ naxtenq’a li jukub’. Patz’ reheb’ laa kok’al naq te’xyiib’eb’ xjalam-uuch jun jukub’ ut jun chapleb’ re naq te’xtzoleb’ li ras riitz’in chirix li yo’onink.

• Wi eb’ laa kok’al neke’raj xnawb’al xyaalal li aatin yo’onink, tenq’aheb’ chixtawb’al sa’ li K’utul Raqal reheb’ li Loq’laj Hu, “Yo’onink” (Biblioteca del Evangelio). Jo’ naxye lix ch’olob’ankil a’an ut Eter 12:4, 32, k’a’ru li tento taqoyb’eni? (chi’ilmanq ajwi’ Moroni 7:40–42). Tenq’aheb’ laa kok’al chixk’oxlankileb’ aatin li juntaq’eeteb’ xyaalal rik’in yo’onink, ut aatineb’ li neke’xch’olob’ xjunpak’alil li aatin yo’onink. Naru ajwi’ nekewotz cherib’il eerib’ junjunq chik li na’leb’ re li evangelio li nekexxk’e chi yo’onink.

Eter 12:23–29

Li Jesukristo naru nikinixtenq’a chixkawob’resinkil inmetz’ew sa’ musiq’ej.

• Wan naq eb’ li kok’al neke’xnumsi hoonal b’ar wi’ neke’reek’a naq q’uneb’ xmetz’ew, jo’ laj Moroni. Tenq’aheb’ laa kok’al chixk’eeb’al reetal k’a’ut naq kireek’a laj Moroni chi jo’kan sa’ Eter 12:23–25, ut patz’ reheb’ ma reek’ahomeb’ a’an ajwi’. Chirix a’an patz’ reheb’ naq te’rileb’ li raqal 26–27 re naq te’xk’e reetal chan ru naq li Qaawa’ kixtenq’a laj Moroni.

• Laa kok’al naru neke’xyiib’ xjalam-uuch k’a’ruhaq q’un xmetz’ew ut k’a’ruhaq kaw xmetz’ew. Chirix a’an naru neke’xtz’iib’a chiruheb’ lix jalam-uuch junjunqeb’ li aatin ut ch’ol aatin sa’ Eter 12:23–29 li te’xk’ut chiruheb’ chan ru naq li Kolonel naru naxq’ajsi lix q’unal qametz’ew choq’ kawilal. Waklesi xch’ooleb’ laa kok’al chixk’oxlankil jun xq’unal xmetz’eweb’ ut chirix a’an chixsik’b’al xtenq’ li Qaawa’ re xkawob’resinkil a’an. Naru ajwi’ nakawotz jun aanumsihom b’ar wi’ naq li Kolonel xatxtenq’a chi kawuk re xb’aanunkil k’a’ruhaq ch’a’aj.

Re xtawb’al xkomon chik li na’leb’, chi’ilmanq li hu Amigos re li po a’in.

Sachol ch’oolej lix profeetil aatin laj Eter, xb’aan laj Walter Rane