Ita I Stap Haed Insaed long Wan Hol long Ston, i kam long Gary Ernest Smith

Novemba 25–Disemba 1: “Tru long Fet, Evri Samting I Hapen”

Ita 12–15

Ol profesi blong Ita i go long Ol Man blong Jared, oli “bigfala mo gudfala” (Ita 12:5). Hem “i talem long olgeta long saed blong evri samting, stat long stat blong man” (Ita 13:2). Hem i bin luk finis “ol dei blong Kraes,” mo Niu Jerusalem long ol lata-dei (Ita 13:4). Mo hem i tokbaot wan “hop blong kasem wan wol we i moa gud, yes, iven blong kasem wan ples long raet han blong God” (Ita 12:4). Be Ol Man blong Jared oli sakemaot ol toktok blong hem; hemia from semfala risen nomo we, plante taem, ol pipol oli stap sakemaot ol profesi blong ol wokman blong God tedei—“from oli no luk ol samting ia” (Ita 12:5). Hem i tekem fet blong bilivim ol promes o ol woning abaot ol samting we yumi no save luk; semmak olsem i tekem fet blong Ita i profesae abaot “ol bigfala mo gudfala samting” long wan pipol we i no bin biliv. I bin tekem fet blong Moronae i trastem se Lod i stap tekem wiknes blong hem, we hem i “no strong blong save raetemdaon samting” mo tanem i kam wan samting we hem i kam gud mo strong blong mekem (luk long Ita 12:23–27). Kaen fet olsem nao, i mekem yumi “strong gud mo [yumi] stanap strong, mo oltaem yumi mekem plante gudfala wok, mo i lidim [yumi] blong leftemap nem blong God” (Ita 12:4). Mo kaen fet olsem nao we, tru long hem, “evri samting i hapen” (Ita 12:3).

Ol tingting blong Stap Lan long Hom mo long jos

Ita 12

Fet long Jisas Kraes i save lid i go long ol bigfala merikel.

Hem i hapen tedei, olsem long taem blong Ita, we pipol oli bin wantem luk pruf, bifo oli save biliv long God mo paoa blong Hem. ?Wanem nao yu lanem long Ita 12:5–6 abaot tingting ia?

Taem yu ridim Ita 12, yu raetemdaon toktok ia “fet” evri taem yu faenem. Tingting long wanem nao wanwan eksampol i tijim abaot fet. Ol kwestin olsem olgeta ia i save help: ?Wanem hem i fet? ?Wanem nao i minim blong yusum fet? ?Wanem nao ol frut blong fet long Jisas Kraes? Yu save raetemdaon ol tingting mo filing blong yu abaot ol witnes we yu bin kasem “afta long tes blong fet blong yu” (Ita 12:6

Luk tu Russell M. Nelson, “Kraes I Girap Finis; Bilif long Hem bae I Muvumaot Ol Bigfala Hil,” Liahona, Mei 2021, 101–4.

Letem ol narafala man oli serem, mo samtaem tijim. Pipol oli lan moa taem olgeta oli gat janis blong serem wanem olgeta oli stap lanem o iven tijim long wan taem blong klas. Nomata long hom o long Jos, tingting blong letem ol narafala man, olsem ol yut, blong tijim wan pat blong lesen.

Ita 12:1–9, 28, 32

Jisas Kraes i givim yumi“ wan hop we i moa gud moa.”

Antap long ol bigfala tingting abaot fet, Ita 12 tu i gat fulap samting blong talem abaot hop. Letem ol kwestin ia i gaedem stadi blong yu:

• ?Wanem nao ol risen we Ita i gat blong “hop from wan wol we i gud moa”? (luk long Ita 12:2–5

• ?Wanem nao stamba tingting blong wan angka? ?Wanem nao hop i mekem long sol blong yu we i semak long wanem wan angka i mekem long wan bot? (Luk long Ita 12:4).

• ?Wanem nao yumi nid blong hop from? (Luk long Ita 12:4; Moronae 7:41).

• ?Olsem wanem nao gospel blong Jisas Kraes i givim yu “wan hop we i moa gud moa”? (Ita 12:32).

Luk tu long Moronae 7:40–41; Jeffrey R. Holland, “Wan Stret mo Klin Hop,” Liahona, May 2020, 81–84.

Ita 12:23–29

Jisas Kraes i save tanem wiknes blong mi i mekem i kam strong.

Taem yumi ridim ol toktok blong Moronae, we i gat paoa, hem i isi blong fogetem se hem i bin wari abaot fasin blong hem, we hem i “no strong blong save raetemdaon samting,” mo hem i bin fraet se ol pipol bae oli jikim ol toktok blong hem (luk long Ita 12:23–25 Sapos yu bin filim wari abaot ol wiknes blong yuwan, ridim abaot traehad blong Moronae, —ansa blong Sevya—long Ita 12:23–29. Yu save tingting hevi long ol taem we Jisas Kraes i bin helpem yu blong luksave ol wiknes blong yu, mo i mekem yu kam strong tru long olgeta.—iven sapos hem i no tekemaot evriwan. Tingting tu long ol wiknes we yu stap stragel wetem naoia. ?Wanem nao yu nid blong mekem blong kasem promes blong sevya blong “mekem ol wik samting oli kam strong”? (Ita 12:27).

Tingting blong stap ridim olgeta storian ia blong luk olsem wanem nao ol narafala man long skripja oli kasem paoa tru long bigfala lav blong Jisas Kraes:

• Inok (Moses 6:31–34; 7:13)

• Moses (Eksodas 4:10–12; 14:31)

• Gidion (Ol Prija 6:12–16; 8:22–23)

• Pita (Luk 5:8–10; 22:55–62; Ol Wok 4:13–21)

• Moronae (Ita 12:23–29)

• Josef Smit (Josef Smit—Histri 1:28; Doktrin mo Kavenan 35:17; 135:3)

Luk tu long Gospel Topik, “Bigfala Lav,” Gospel Library; “The Lord Is My Light,” Hym, n. 89.

Ita 13:13–22; 14–15

Blong sakemaot ol profet blong Lod, i tekem denja long saed blong spirit i kam.

Blong stap wan king blong Ol Man blong Jared, folem histri, i bin wan posisen we i gat denja long hem. Hemia i bin tru wetem Koriantuma, from se “ol strong man … oli lukaotem blong kilimded hem” (Ita 13:15–16). Long Ita 13:15–22, luk wanem Koriantuma i bin mekem blong protektem hem, mo wanem kaonsel profet Ita i bin talem long hem blong hem i mekem. Taem yu stap ridim haf buk blong Ita, tingting hevi long ol risal blong stap sakemaot ol profet. ?Wanem i hapen long ol pipol taem we “Spirit blong Lod i [stop] blong wok wetem olgeta”? (Ita 15:19). ?Wanem nao Lod i wantem yumi blong lanem long ol stori ia? Tingting long wanem yu bae mekem blong folem ol profet blong Hem

Blong moa aedia, luk long spesel namba ia Liahona mo Blong Ol Yut Oli Kam Strong magasin.

Sam tingting blong Tijim Ol Pikinini

Ita 12:6–22

Fet i blong stap biliv long ol samting we yumi no save luk.

• Tingting blong stap helpem ol pikinini blong yumi blong ripitim wetem yu “Fet i ol samting we yumi gat hop from mo yumi no luk,” long Ita 12:6. Olgeta bae laekem blong stap lukluk ol pikja we i soem ol eksampol blong fet long Ita 12:13–15, 19–21 (luk long Gospel Art Book, nos. 78, 85, mo aktiviti pej blong wik ia). Letem ol pikinini blong yu ol eksplenem wanem olgeta i save abaot wanwan stori. Hemia sam kwestin blong helpem yu tokbaot ol eksampol ia blong fet:

  • ?Wanem nao ol pipol ia oli hop from?

  • ?Olsem wanem nao fet blong olgeta i bin fesem tes?

  • ?Wanem i bin hapen long olgeta from we oli bin gat fet?

  Yu save serem eksperiens blong yuwan taem yu wok wetem fet.

Ita 12:4, 32

Hop i olsem wan angka long sol blong mi.

• Blong andastanem wanem Ita 12:4 i tijim abaot hop, yu mo ol pikinini blong yu i save luk wan pikja blong wan bot mo wan angka. ?From wanem ol bot oli nidim ol angka? ?Wanem nao bae i hapen long wan bot we i no gat wan angka? Taem yu ridim Ita 12:4 tugeta, tokbaot olsem wanem hop i bin helpem yumi long wei we wan angka i helpem wan bot. Invaetem ol pikinini blong droem pikja blong wan bot mo wan angka, blong mekem se oli save tijim ol narafala man abaot hop.

• Sapos ol pikinini oli nidim wan mining blong hop, helpem olgeta blong fanem wan insaed blong Gaed blong ol Skripja, “Hop” (Gospel Library). Folem mining ia, mo wanem i stap long Ita 12:4, 32, ?wanem nao yumi mas hop from? (Luk tu long Moronae 7:40–42 Helpem ol pikinini blong tingting long ol nara toktok blong hop, wetem ol toktok we i mining blong hem i oposit long hop. Yu save serem tu raon long yufala sam trutok blong gospel we i givim yu hop.

Ita 12:23–29

Jisas Kraes i save helpem mi kam strong long saed blong spirit.

• Samtaem, ol pikinini oli fesem ol situesen we oli filim se oli wik, semmak olsem Moronae i bin filim. Helpem ol pikinini blong yu blong faenem aot from wanem Moronae i bin filim olsem ia long Ita 12:23–25, mo askem olgeta sapos olgeta oli bin gat semak filing olsem ia bifo. Afta invaetem olgeta blong ridim ves 26–27 blong faenem aot olsem wanem nao Lod i bin helpem Moronae.

• Ol pikinini blong yu ol save droem wan pikja blong wan samting we oli no strong long hem mo wan samting we oli strong long hem. Afta olgeta oli save ademap long droing blong olgeta, sam toktok mo sam sentens we oli kam long Ita 12:23–29 we i tijim olgeta abaot olsem wanem Sevya i save tanem samting we oli no strong long hem i kam samting we oli strong long hem. Leftemap tingting blong ol pikinini blong tingbaot wan wiknes we oli gat, mo afta, lukaotem help blong Sevya blong oli kam strong long hem. Yu save serem wan eksperiens taem we Sevya i bin helpem yu blong kam strong inaf blong mekem wan samting we i bin had.

Blong moa aedia, luk long spesel namba ia blong Fren magasin.

Ol profesi blong Ita oli Gudfala Tumas,, i kam long Walter Rane