Blong Yufala I Mas Savei kam long Gary L. Kapp

Disemba 16–22: “Kam long Kraes, mo Kam Stret Evriwan Tru Hem”

Moronae 10

Buk blong Momon i stat wetem promes blong Nifae, we i soem long yumi se “Lod i gat fulap sore long olgeta evriwan we hem i jusum, from fet blong olgeta” (1 Nifae 1:20 Buk ia i en wetem wan semmak invitesen we i kam long Moronae: “Tingbaot hamas sore Lod i bin gat” (Moronae 10:2–3). ?Wanem ol eksampol blong bigfala lav mo sore blong Lod we yu bin luk insaed blong Buk blong Momon? Maet bae yu tingting hevi long wei we God i bin gat sore mo i lidim famli blong Lihae tru long waelples mo oli krosem ol bigfala solwota; mo tingting hevi long ol sore we oli gud tumas we Hem i bin soem long Inos taem we sol blong hem i bin stap hanggri from fogivnes, o sore ia we Hem i bin soem long Alma, we i wan konkon enemi blong Jos we i bin kam wan long ol strong man we i stap difendem Hem. O maet bae ol tingting blong yu oli save tanem i go long sore ia we Sevya we i bin laef bakegen long ded, i bin soem long ol pipol taem Hem i bin hilim sik blong olgeta, mo i bin blesem ol smol pikinini blong olgeta. Maet, wanem i moa impoten, i we, evri samting ia oli save mekem yu yu tingbaot “hamas sore nao Lod i bin gat” long yu; from se, wan stamba tingting blong Buk blong Momon i blong invaetem wanwan long yumi blong kasem sore blong God—wan invitesen we Moronae i talem stret long gudbae toktok blong hem: “Kam long Kraes mo kam stret evriwan tru hem” (Moroniae10:32).

Ol Tingting blong stap Lanem long Jos mo long Hom

Moronae 10:3–7

Mi save kam blong save trutok tru long paoa blong Tabu Spirit.

Promes ia long Moronae 10:3–7 i bin jenisim laef blong plante milian pipol raon long wol. ?Olsem wanem hem i jenisim laef blong yu? Taem yu ridim Moronae 10:3–7, tingting blong ridim skripja ia i moa gud, i bitim we yu bin stap ridim bifo. Yu save luklukgud long wanwan sentens, mo askem yuwan ol kwestin olsem: ?Hemia i minim wanem? ?Olsem wanem nao mi save mekem hemia i gud moa? ?Wanem eksperiens nao mi bin gat wetem hemia?

Taem yu stap tingting hevi long taem we yu lukaotem trutok long saed blong spirit, bae i help blong lanem ol narawan olsem wanem blong faenem trutok tru long paoa blong Tabu Spirit. Elda Mathias Held i tokbaot eksperiens blong hem olsem wan niu memba blong Jos (luk long “Stap Lukaotem Save Tru long Spirit,” Liahona, Mei 2019, 31–33). Elda David F. Evans i tokabaot eksperiens blong hem olsem wan we i bin smol long jos be hem i gat kwestin yet (luk long “The Truth of All Things,” Liahona, Nov. 2017, 68–70). Lukluk blong ridim wan o tugeta mesej ia mo raetem daon eni samting yu lanem taem tufala i stap lukaotem trutok we i helpem yu wetem eksperiens blong yu.

Yu save lukaotem tu wanem God i bin tijim abaot trutok taem yu stap ridim sam long ol toktok long Gaed long Olgeta Skripja, “Truth” (Gospel Laebri). ?Wijwan long ol skripja nao i gat moa mining long yu? Maet bae yu pikimap wan blong serem wetem wan man we hem tu i stap lukaotem trutok long saed blong Spirit.

Luk tu long Henry B. Eyring, “Fet blong Askem mo Afta Tekem Aksen,” Liahona, Nov. 2021, 74–76; “Let the Holy Spirit Guide,” Hymns, no. 143; Gospel Topics, “Seek Truth and Avoid Deception,” Gospel Laebri.

Raetemdaon Ol Filing blong Yu. Blong konvet long gospel blong Jisas Kraes i minim blong gohed blong lanem mo stap laef folem gospel. Janis blong mekem folem wanem we yu lanem i hae sapos yu raetem daon. Sapos yu stap tij, invaetem pipol we yu tijim blong rekodem ol filing we oli kasem long saed blong spirit.

Moronae 10:8–25

God i bin givim ol presen long saed blong spirit.

I gat plante wei we wan man i save “tanem baksaed long ol presen blong God” (Moronae 10:8). Sam pipol oli no save akseptem se ol presen ia, oli tru i stap. Samfala oli talem se oli no gat ol presen ia, taem oli no wantem save long olgeta, o oli no traem blong developem olgeta. Taem yu stap ridim Moronae 10:8–25, lukaotem trutok we bae helpem yu blong faenemaot ol presen long saed blong spirit mo yusum olgeta blong blesem ol pikinini blong God. Ol kwestin olsem olgeta ia i save help: ?Ol presen long saed blong spirit hem i wanem? ?Oli givim ol presen long huia? ?From wanem nao oli givim? ?Olsem wanem nao yumi save kasem? ?Yu save tingbaot sam eksampol blong pipol we oli yusum ol lis blong ol presen long Moronae 10:9–16?

Moronae 10:30–33

Mi save kam stret evriwan tru long gladhat blong Jisas Kraes.

Moronae i givim kaonsel se blong “kam long Kraes” i moa bitim blong stap lanem blong mo tingbaot Hem nomo. Be, hemia i wan invitesen blong kam long Kraes long wan wei we i moa fulwan, olsem we i posibol—blong kam olsem we Hem i stap. Taem yu stap ridim Moronae 10:30–33, luk gud long ol sentens we oli helpem yu blong andastanem mining blong kam long Kraes, olsem wanem nao i posibol, mo ol risal blong hem taem yumi mekem.

Luklukbak long stadi blong yu long Buk blong Momon long yia ia mo tingting hevi long wanem nao yu bin filim mo bin lanem abaot Jisas Kraes. ?Eksampol, olsem wanem nao Buk blong Momon i bin helpem yu blong kam long Hem? ?Olsem wanem nao hem i bin helpem yu blong dipen moa fulwan long gladhat blong Hem? ?Olsem wanem nao hem i bin helpem yumi blong “no tanem baksaed” long paoa blong Sevya? Lukluk blong serem witnes blong yuwan abaot Buk blong Momon wetem wan narafala man o woman we i nid blong harem, long olgeta tu we yu lavem tumas mo long ol fren we ating oli no save nomo abaot mesej ia.

Luk tu long “Moroni Invites All to Come unto Christ” (video), Gospel Laebri.

Blong Evriwan i Save Trutok: Promes blong Moronae | Momon 8–9; Moronae 1, 10

Moronae i profesae abaot dei long fiuja we bae ol tabu raeting bae oli transletem long wan naesfala wei Moronae i se yumi save ridim histri ia, andastanem kavenan blong God, mo askem God blong helpem yumi blong save trutok blong evri samting.

Blong moa aedia, luk tu long spesel namba blong manis ia Liahona mo Blong Ol Yut Oli Kam Strong magasin.

Sam Tingting blong Tijim Ol Pikinini

Moronae 10:3–4

Bae mi save kam blong save miwan se Buk blong Momon i tru.

• ?Olsem wanem nao yu save helpem ol pikinini blong yu blong akseptem invitesen blong Moronae blong askem God sapos Buk blong Momon i tru.? Lukluk blong givim long olgeta smolsmol pepa wetem ol toktok ia Ridim, Tingabaot, Tingting hevi,mo Askem we yu bin raet long hem. Ol pikinini blong yu oli save faenem ol toktok ia long Moronae 10:3–4. ?Wanem nao yumi sapos blong ridim, rimemba, tingting hevi long hem, mo askem blong save kasem o mekem testemoni blong yumi abaot Buk blong Momon i kam strong moa? Ol pikinini blong yu oli save lukluk long ol samting we oli semmak long ol ves ia mo singsing “Search, Ponder, and Pray” (Children’s Songbook, 109).

• Ol pikinini blong yu oli save yusum pikja long en long aotlaen ia blong tokbaot Moronae we i stap berem ol gol plet (luk tu long “Japta 54: Ol Promes blong Buk blong Momon,” Ol Stori blong Buk blong Momon, 156). Ol pikinini we oli yang moa oli save priten se oli Moronae we oli stap raet long ol plet ia, mo berem olgeta. Serem wetem evriwan ol testemoni blong yufala abaot Buk blong Momon.

Moronae 10:8–19

Papa long Heven i givim ol presen long saed blong spirit long mi.

• Blong tijing ol pikinini blong yu abaot ol presen long saed blong spirit, yu save raet namba 9 kasem 16 long ol seperet pisis blong pepa mo kavremap papa ia olsem wan presen. Wanwan pikinini blong yu i save open wanwan presen ia, ridim ol ves long Moronae 10:9–16 we i folem ol namba we oli bin karem, mo faenemaot wanwan presen long saed blong spirit. Yu save tokbaot olsem wan Papa long Heven i wantem yumi blong yusum olgeta presen ia blong blesem ol pikinini blong Hem. Yu save helpem ol pikinini tu blong luksave ol presen we Papa long Heven i bin givim long olgeta.

Moronae 10:32–33

Jisas Kraes i wantem mi blong kam long Hem.

• ?Ol pikinini blong yu oli save wanem i minim blong “kam long Kraes”? Yu bae save ridim Moronae 10:32 mo invaetem olgeta blong ripitim ves ia wetem yu. Olgeta oli save sarem ol ae blong olgeta taem yu stap putum wan pikja blong Jisas samples insaed long rum. Afta letem olgeta oli openem ol ae blong olgeta, faenem pikja ia, stanap raon long hem, mo tokbaot ol wei we yumi save kam long Kraes. Maet bae help blong raetem daon kwestin ia ?Wanem nao i minim blong kam long Kraes? Helpem olgeta blong lukaotem Moronae 10:32–33 blong faenem ol ansa (luk tu long Ol Toktok blong Bilif 1:3–4). Wok tugeta blong mekem wan lis blong wanem Kraes i wantem yumi blong mekem, mo wanem nao Hem i promes blong mekem long yumi.

• Maet bae ol pikinini blong yu bae glad blong mekem mo flasem wan baj we sep blong hem i olsem wan hat (♥) we i talem se: “Mi lavem God wetem ful paoa blong tingting, ful maen mo ful paoa blong mi” (luk longMoronae 10:32). Taem yumi mekem, toktok wetem olgeta abaot olsem wanem yumi soem God se yumi lavem Hem.

Blong moa aedia, luk long spesel namba blong manis ia long Fren magasin.

Bifo hem i berem ol rikoda ia, Moronae i invaetem yumi blong “tingbaot hamas nao Lod i bin gat sore long yu”” (Moronae 10:3)