Disemba 2–8: ‘Blong Holemtaet Olgeta I Stap long Stret Rod.’ Moroniae1–6,” Kam Folem Mi—Blong Hom mo Jos: Buk buk blong Momon 2024 (2023)
“2–8 Disemba. Moronae 1–6,” Kam Folem Mi—Blong Hom mo Jos: 2024 (2023)
Minerva Teichert (1888–1976), Alma i Baptaes insaed long Wota blong Momon, 1949–1951, oel peinting antap long mesonaet, 35 7/8 × 48 inj. Brigham Yang Yunivesiti Miusiom blong Art, 1969
Disemba 2–8: “Blong Holemtaet Olgeta I Stap long Stret Rod.”
Moronae 1–6
Afta we hem i finisim histri blong papa blong hem abaot Ol Man blong Nifae, mo afta we hem i finisim blong raetem sot histri blong Ol Man blong Jared, Moronae i ting se wok blong hem blong kipim histri, i finis ia nao (luk long Moronae 1:1). ?Wanem moa i stap yet blong tokbaot abaot tufala nesen ia, we oli prapa spolem gud tufala evriwan? Be Moronae i bin luk taem blong yumi (luk long Momon 8:35), mo hem i bin kasem insperesen blong” raetem sam smol samting moa, blong maet bae oli save gat yus … long samfala dei long fiuja” (Moronae 1:4). Hem i bin save se apostasi we bae i stap long evri ples, i stap kam, i kam wetem tingting we i fasfas abaot ol prishud odinens mo abaot relijin. Maet, hemia nao risen we hem i givim ol klia ditel abaot sakramen, baptaes, mo fasin blong pasem presen we i Tabu Spirit, mo olgeta blesing blong stap kam tugeta wetem ol narawan we oli stap biliv, blong “holem taet olgeta i stap long stret rod, … oli dipen nomo long ol gudfala wok blong Kraes, we i bin man we i bin statem mo finisim fet [blong yumi]” (Moronae 6:4). Ol gudfala niu tingting olsem, oli givim yumi ol risen blong stap talem tangkyu se Lod i bin holemtaet laef blong Moronae blong mekem se hem i save “raetem sam smol samting moa” (Moronae 1:4).
Ol tingting blong Stap Lan long Hom mo long Jos
Mi save folem Jisas Kraes nomata long fasin blong agens.
Taem yu stap ridim Moronae 1, wanem nao i stap givim insperesen long yu abaot fasin blong Moronae blong stap fetful long Lod mo long koling blong hem? ?Wanem sam long ol wei we wan man o woman i save “tanem baksaed long Kraes”? (Moronae 1:2–3). Tingting hevi long olsem wanem yu save stap fetful long Jisas Kraes, iven taem yu fesem ol hadtaem mo fasin blong agens.
Oli mas mekem ol prishud odinens olsem we Lod i givim komanmen from.
Moronae i bin stap ron from laef blong hem taem hem i raetem ol japta ia. ?From wanem hem i bin wari blong raet abaot ol smolsmol samting long saed blong administresen, olsem fasin blong mekem ol odinens? Tingting hevi long hemia taem yu ridim Moronae 2–6. ?From wanem nao yu ting se ol smolsmol samting ia oli impoten long Lod? Hemia samfala kwestin we oli save lidim stadi blong yu:
-
Konfemesen (Moronae 2; 6:4).?Wanem nao ol instraksen long Moronae 2:2 i tijim yu abaot odinens blong konfemesen? ?Olsem wanem yu save eksplenem wanem i minim blong “tabu Spirit i lidim olgeta mo oli kam klin tru long paoa blong hem”? Moronae 6:4
-
Prishud odinesen (Moronae 3).?Wanem nao yu faenem long japta ia we i save helpem wan man blong rere blong oli odenem hem i go long prishud? ?Wanem nao yu faenem we i save helpem wan blong rere blong mekem wan odinesen?
-
Sakramen (Moronae 4–5; 6:6).?Wanem nao yu save mekem, blong mekem sakramen i kam nambawan samting long saed blong spirit blong wik blong yu?
-
Baptaes (Moronae 6:1–3).?Wanem nao yu stap mekem blong gohed blong kasem ol kwalifikesen blong baptaes?
Jisas i tijim olsem wanem oli mas mekem olgeta odinens ia.
Folem wanem we yu bin lanem, ?olsem wanem nao bae yu jenisim ol wei we yu tingting, tekpat, o mekem ol narawan oli rere, from ol odinens ia?
Luk long Doktrin mo Ol Kavenan 84:20.
Rolplei. Wan gudfala wei blong tingbaot wanem we yu stap lanem i blong eksplenem long narafala man. Eksampol, traem blong aktem ol defdefren pat olsem hemia: Wan fren i no save gud se hem i rere blong kasem baptaes o no yet. ?Olsem wanem nao yu yusum Moronae 6 blong helpem hem?
Blong tekem sakramen i helpem mi blong kam kolosap moa long Jisas Kraes.
Yu bin harem ol prea blong sakramen plante taem, be hamas taem nao yumi tingting hevi abaot wanem ol toktok ia oli minim? Yu save traem blong raetem daon tufala sakramen prea folem hamas yu tingbaot. Afta, komperem wanem we yu raetem wetem Moronae 4:3 mo 5:2. ?Yu faenem eni samting abaot ol prea ia, we bifo, yu no bin faenem?
Lukluk blong gat wan sakramen hym long stadi blong yu, olsem “In Memory of the Crucified” (Hym, namba. 190).
Ol disaepol blong Jisas Kraes oli kea from sol blong narafala man.
Fasin blong jusum blong folem Kraes hem i blong wanwan man, be olgeta pipol blong Jos oli save help blong kipim yumi “long stret rod” (Moronae 6:4–5). ?Wanem nao ol Jos memba long taem blong Moronae oli bin mekem blong holemtaet wanwan memba i stap strong? So taem yu stap ridim Moronae 6:4–9, tingting hevi long ol blesing we oli kam taem oli “kaontem [yu] wetem ol pipol blong jos blong Kraes” (Moronae 6:4
Yu save tingbaot ol nara pipol we oli bin kam long wod o branj blong yu. ?I gat eniwan we i gat spesel nid blong lav blong yu—ating wan man we i niu o i jes stap kambak? ?Olsem wanem nao yu save help blong mekem ol eksperiens blong olgeta long Jos i semmak olsem wanem Moronae i bin talem? (Blong moa aedia, luk long My Covenant Path o “Strengthening New Members” videos in the Gospel Library). Yu save faenem ol eksampol long seksen I long mesej blong Presiden Dallin H. Oaks “Nid blong Gat Wan Jos” (Liahona, Nov. 2021, 24–25).
Taem yu stap tingting hevi long wanem i minim blong “fidim olgeta wetem gudfala toktok blong God” (Moronae 6:4), bae i help blong tingbaot gudfala kakae we wan sid o wan bebi i nidim—mo wanem i hapen taem yumi no fidim gud olgeta. Lukaotem long Moronae 6:4–9 ol aedia abaot olsem wanem yu save help blong “fidim gud” narafala man long saed blong spirit. ?Olsem wanem nao ol narafala disaepol oli help blong fidim gud yu?
Hem i klia long evriwan from wanem i impoten blong “oli kaontem olgeta long medel blong ol pipol blong Kraes” mo blong “mit tugeta fulap taem” long ol Jos miting. ?Olsem wanem nao yu save eksplenem from wanem yu yu glad blong stap wan memba blong Jos Ia blong Jisas Kraes? (Luk long ol narafala seksen long mesej blong Presiden Oaks “Nid blong Gat wan Jos”).
Blong moa aedia luk long spesel namba ia blong manis ia blong Liahona mo Blong Ol Yu Oli Kam Strong magasin.
Samting tingting blong Tijim Ol Pikinini
Tabu Spirit i wan we i tabu presen.
-
Tabu Spirit o Spirit oli bin tokbaot plante taem finis long Moronae 2–6. Ating bae yu save askem ol pikinini blong yu blong faenem evri ves we i tokbaot Hem, ridim ol ves ia, mo mekem lis blong wanem olgeta oli lanem abaot Tabu Spirit. Yu save serem tu wetem olgeta raon long yu ol eksperiens taem yu filim paoa blong Spirit i strong.
Mi tekem sakramen blong soem se, oltaem nomo, bae mi tingbaot Jisas Kraes.
-
Ridim ol prea blong sakramen wetem ol pikinini blong yu i save lidim storian blong yufala i go long olsem wanem blong mekem ol eksperiens blong sakramen oli gat moa mining. I save helpem olgeta blong traem pikjarem se wan fren i stap kam long sakramen miting blong fas taem. ?Olsem wanem nao bae yumi eksplenem long fren blong yumi wanem i sakramen, mo from wanem hem i tabu? Leftemap tingting blong ol pikinini blong yu blong yusum wan samting long Moronae 4 o 5 taem oli stap eksplenem. Ol yangfala pikinini oli save yusum aktiviti pej blong wik ia o Gospel Art Book, namba. 108.
-
Tingting hevi blong singsing wan singsing tugeta we bae helpem ol pikinini blong yu blong tingbaot Sevya (olsem “Reverently, Quietly,” Children’s Songbook, 26). Yu save praktisim blong sidaon kwaet long taem blong sakramen.
Mi save rere blong kasem baptaes.
-
?Hu i save baptaes? Helpem blong faenem ansa long kwestin ia long Moronae 6:1–3. ?I minim wanem blong gat wan “wan hat we i fulap wetem sore mo wan spirit we i wantem blong sakem sin”? (Moronae 6:2). ?Olsem wanem nao hemia i helpem yumi blong rere from baptaes? Tingting hevi blong stap talem long ol pikinini blong yu olsem wanem yu save stap rere blong baptaes.
Yumi go long jos blong tekem sakramen mo blong sapsapotem wanwan long yumi.
-
?Ol pikinini blong yu oli save from wanem yu yu laekem blong go long jos`? Ridim Moronae 6:4–6, 9 i save givim yu wan janis blong toktokraon tugeta long sam long ol samting we yumi stap mekem long jos. Oli save droem ol pikja blong olgeta wan we oli stap mekem olgeta samting ia (olsem stap prea, stap tij, stap singsing, mo stap tekem sakramen).
-
Afta we yu ridim Moronae 6:4 tugeta, yu mo ol pikinini blong yu i save lukluk long ol pikja o ol eksampol blong ol helti kakae, mo komperem yumi fidim bodi long helti kakae, wetem, yumi “fidim wetem gudfala toktok blong God.” Yu save wajem vidio ia “Children Sharing the Gospel” (Gospel Library).
3:33Children Sharing the Gospel
Children make great missionaries because they are genuine, like Coen and Genna. Their thoughtful friendship prepared Isaiah and his sister Alessia for baptism by helping them feel loved.
Blong moa aedia, luk long spesel namba blong manis ia long Fren magasin.
Moronae insaed long Hol blong Ston, i kam long Jorge Cocco