“Disyembre 9–15: ‘Hinaot Unta nga si Kristo Mobayaw Kanimo.’ Moroni 7–9,” Dali, Sunod Kanako—Alang sa Panimalay ug sa Simbahan: Basahon ni Mormon 2024 (2024)
“Disyembre 9–15. Moroni 7–9,” Dali, Sunod Kanako—Alang sa Panimalay ug sa Simbahan: 2024 (2024)
Minerva Teichert (1888–1976), Moroni: The Last Nephite [Moroni: Ang Kataposang Nephite], 1949–1951, lana nga naa sa masonite, 34 3/4 × 47 ka pulgada. Brigham Young University Museum of Art, 1969
Disyembre 9–15: “Hinaot Unta nga si Kristo Mobayaw Kanimo”
Moroni 7–9
Sa wala pa gitapos ni Moroni ang rekord nga nailhan nato karon nga Basahon ni Mormon pinaagi sa iyang kaugalingong kataposan nga mga pulong, nakigbahin siya og tulo ka mensahe gikan sa iyang amahan, si Mormon: usa ka pamulong ngadto “sa malinawon nga mga sakop ni Kristo” (Moroni 7:3) ug duha ka sulat nga gisulat ni Mormon ngadto ni Moroni. Tingali gilakip ni Moroni kini nga mga mensahe diha sa Basahon ni Mormon tungod kay nakita niyang daan ang mga pagkasusama tali sa mga peligro sa iyang panahon ug sa ato. Sa dihang gisulat kini nga mga pulong, ang katawhang Nephite mibiya gikan sa Manluluwas. Daghan kanila “nawad-an sa ilang gugma, sa usag usa” ug nahimuot sa “matag butang nga bisan unsa gawas niana nga maayo” (Moroni 9:5, 19). Ug gani si Mormon nakakita gihapon og hinungdan alang sa paglaom, nagtudlo kanato nga ang paglaom wala magpasabot sa pagbaliwala o pagpakainosente mahitungod sa mga problema sa kalibotan. Ang paglaom nagpasabot sa pagbaton og hugot nga pagtuo diha sa Langitnong Amahan ug ni Jesukristo, kansang gahom mas dako pa ug mas walay kataposan kay sa niini nga mga problema. Nagpasabot kini nga “maghupot sa matag maayo nga butang” (Moroni 7:19). Nagpasabot kini sa pagtugot nga ang Pag-ula ni Jesukristo “ug ang paglaom sa iyang himaya ug kinabuhi nga dayon, moabot sa imong salabotan” (Moroni 9:25).
Si Mormon Nagtudlo mahitungod sa Pagtuo, Paglaom, ug Gugmang Putli
Nakita ni Mormon ang paspas nga impluwensiya sa daotan apan nagtawag sa iyang katawhan ngadto sa pagtuo, paghinulsol, ug paglaom kang Jesus. Ang malinawon nga mga sumusunod ni Kristo nakakat-on unsaon sa paghukom sa maayo gikan sa daotan.
Mga Ideya alang sa Pagkat-on diha sa Panimalay ug sa Simbahan
Ang Kahayag ni Kristo makatabang nako nga makaila sa husto gikan sa sayop.
Daghang tawo maghunahuna, “Unsaon nako pagkahibalo kon ang usa ka impresyon naggikan sa Dios o gikan sa akong kaugalingon nga mga hunahuna?” o “Sa daghan kaayong pagpanglimbong karon, unsaon pagkahibalo kon unsay husto o sayop?” Ang mga pulong ni Mormon diha sa Moroni 7 naghatag kanato og pipila ka baroganan nga atong magamit sa pagtubag niini nga mga pangutana. Pangitaa kini ilabi na diha sa mga bersikulo 12–20. Mahimo nimong gamiton kini nga mga kamatuoran sa pagtabang kanimo sa pagtimbang-timbang sa mga mensahe nga imong masugatan ug sa mga kasinatian nga ikaw aduna niini nga semana.
Tan-awa usab sa Giya ngadto sa mga Kasulatan, “Kahayag, Kahayag ni Kristo”.
Tungod ni Jesukristo, makahimo ako sa “paghupot sa matag maayo nga butang.”
Nangutana si Mormon og pangutana nga ingon og importante kaayo karon: “Sa unsang paagi nga posible ang paghupot sa matag maayo nga butang?” (Moroni 7:20). Siya dayon mitudlo mahitungod sa hugot nga pagtuo kang Jesukristo, paglaom, ug gugma nga putli. Samtang imong basahon ang mga bersikulo 20–48, sutaa kon sa unsang paagi ang matag hiyas makatabang nimo sa pagpangita ug “paghupot” sa kamaayo nga moabot gikan kang Jesukristo. Ngano nga kini nga mga hiyas kinahanglan alang sa usa ka disipulo ni Jesukristo?
Tan-awa usab sa “Mga Pagtulon-an ni Mormon mahitungod sa Hugot nga Pagtuo, Paglaom, ug Gugma nga Putli” (bidyo), Gospel Library.
“Ang gugma nga putli mao ang tiunay nga gugma ni Kristo.”
Naobserbahan ni Mormon nga ang hugot nga pagtuo ug paglaom diha ni Jesukristo mogiya kanato nga makabaton og gugmang putli. Apan unsa man ang gugmang putli? Mahimo nimong isulat Ang gugmang putli mao ang … ug dayon basaha ang Moroni 7:44–48, mangita alang sa mga pulong o mga hugpong sa mga pulong nga makakompleto sa kapahayag. Sa dihang mahuman ka, ikonsiderar ang pagpuli sa pulong nga Gugmang putli sa ngalan ni Jesukristo. Unsa ang gitudlo niini kanimo mahitungod sa Manluluwas? Giunsa ni Jesukristo pagpakita sa Iyang tiunay nga gugma? Paghunahuna og mga ehemplo gikan sa mga kasulatan ug sa imong kaugalingon nga kinabuhi.
Si Presidente Dallin H. Oaks miobserbar: “Ang rason nga ang gugmang putli dili gayod mapakyas ug ang rason nga ang gugmang putli mas labaw pa kay sa labing mahinungdanong mga buhat sa kamaayo … mao nga ang gugmang putli, ‘ang tiunay nga gugma ni Kristo’ [Moroni 7:47], dili usa ka buhat apan usa ka kondisyon o kahimtang sa tawo. … Ang gugma nga putli usa ka butang nga ang usa ka tawo mamahimo” (“The Challenge to Become,” Ensign, Nob. 2000, 34). Uban niini nga pamahayag sa hunahuna, mahimo nimong basahon ang mensahe ni Elder Massimo De Feo “Tiunay nga Gugma: Ang Tinuod nga Timaan sa Matag Tinuod nga Disipulo ni Jesukristo” (Liahona, Mayo 2018, 81–83). Sa unsa nga paagi ang gugma nga putli makaapekto sa imong pagkadisipulo? Sa unsang paagi nga ikaw “[mo]unong ngadto sa gugma nga putli”? (bersikulo 46).
Tan-awa usab sa 1 Mga Taga-Corinto 13:1–13; Ether 12:33–34; “Maghigugmaay,” Mga Himno, nu. 308.
Gamit og mga leksiyon nga naggamit og butang. Tingali ang paghunahuna sa usa ka bangko nga adunay tulo ka tiil makatabang kanimo nga mas makasabot mahitungod sa relasyon tali sa hugot nga pagtuo, paglaom, ug gugma nga putli (tan-awa sa Dieter F. Uchtdorf, “Ang Walay Kinutoban nga Gahom sa Paglaom,” Liahona, Nob. 2008, 21–24).
Ang kasuko mosangpot ngadto sa kasubo ug pag-antos.
Agig kalainan sa mensahe ni Mormon bahin sa gugma diha sa Moroni 7:44–48, ang ikaduha nga sulat ni Mormon ngadto ni Moroni naglakip sa mga pasidaan batok sa usa ka butang nga gipanglimbasogan sa daghan karon—kasuko. Sumala sa Moroni 9:3–5, unsa ang pipila sa mga sangpotanan sa kasuko sa mga Nephite? Unsa nga mga pasidaan ang atong makat-onan gikan sa bersikulo 3–5, 18–20, 23?
Tan-awa usab sa Gordon B. Hinckley, “Hinay nga Masuko,” Liahona, Nob. 2007, 62–66.
Makabaton ako og paglaom diha ni Kristo sa walay pagsapayan sa akong mga kahimtang.
Human sa paghulagway sa kadaotan nga iyang nakita, gisultihan ni Mormon ang iyang anak nga lalaki nga dili magbangotan. Unsay nagdani kanimo mahitungod sa mensahe ni Mormon kabahin sa paglaom? Unsay ipasabot niini nganha kanimo nga si Kristo “mobayaw [kanimo]”? Unsa nga mga hiyas ni Kristo ug mga baroganan sa Iyang ebanghelyo ang “moabot sa imong salabotan” ug mohatag kanimo og paglaom? (Moroni 9:25).
Tan-awa sa Russell M. Nelson, “Hingpit nga Kalipay ug Espirituhanon nga Pagsugakod,” Liahona, Nob. 2016, 81–84.
Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.
Mga Ideya sa Pagtudlo sa mga Anak
Kon ako adunay hugot nga pagtuo ni Jesukristo, mahimo nako ang bisan unsa nga Iyang gikinahanglang ipabuhat kanako.
-
Ikonsiderar ang pagtan-aw og dungan sa pipila ka hulagway nga nagpakita sa usa ka tawo gikan sa mga kasulatan nga nagtuman sa usa ka butang nga importante (tan-awa, sama pananglit sa, Libro sa mga Hulagway sa Ebanghelyo, mga nu. 19, 70, 78, 81). Sa unsang paagi ang hugot nga pagtuo diha ni Kristo nakahimo og kalainan niini nga mga ehemplo? Kamo ug ang inyong mga anak makabasa dayon sa Moroni 7:33, mangita alang sa unsay atong mabuhat kon kita adunay hugot nga pagtuo ni Jesukristo. Mahimo usab kamong mopakigbahin og mga kasinatian sa usag usa sa dihang ang Dios mipanalangin kaninyo og gahom sa pagbuhat sa Iyang kabubut-on.
Ang pagtuo kang Jesukristo makahatag kanako og paglaom.
-
Samtang basahon ninyo ang Moroni 7:41 ngadto sa inyong mga anak, tingali ilang maisa ang ilang mga kamot kon makadungog sila og usa ka butang nga gisulti ni Mormon nga kinahanglan natong laoman. Sultihi sila mahitungod sa paglaom nga imong gibati tungod ni Jesukristo.
-
Kamo ug ang inyong mga anak mahimong makahunahuna sa usa ka tawo nga tingali naglisod sa usa ka butang. Tingali ang inyong mga anak makadrowing og usa ka hulagway alang sa tawo nga makapahinumdom kaniya sa pagbaton og paglaom ni Jesukristo.
Ako makaangkon og paglaom diha kang Jesukristo, bisan sa panahon sa mga malisod nga mga pagsulay.
-
Sa pagtudlo sa inyong mga anak mahitungod sa paglaom diha kang Jesukristo, mahimo ninyong pun-on sa tubig ang usa ka sihag nga sudlanan, ug hulgi kini og duha ka butang—usa nga molutaw ug usa nga mounlod. Samtang magkauban ninyong basahon ang Moroni 7:40–41 ug 9:25–26, ang inyong mga anak mahimong mangita alang sa unsay mabuhat sa paglaom alang kanato. Dayon mahimo nilang itandi ang naglutaw nga butang ngadto sa usa ka tawo nga adunay paglaom diha ni Kristo. Sa unsang paagi Siya “mobayaw [kanato]” kon mag-atubang kita og malisod nga mga pagsulay? Tabangi ang inyong mga anak sa paghunahuna og mga paagi nga sila makahupot sa Manluluwas ug sa Iyang makapadasig nga mga pagtulon-an “sa [ilang] hunahuna sa kahangtoran.”
“Ang gugma nga putli mao ang tiunay nga gugma ni Kristo.”
-
Ang usa ka awit mahitungod sa gugma, sama sa “Maghigugmaay” (Songbook sa mga Bata, 74), mahimong makasugod og panaghisgotan mahitungod kon unsa ang gugma nga putli. Mahimo ninyong basahon o i-summarize ang Moroni 7:47 ug dapita ang inyong mga anak sa pagdrowing og mga litrato sa ilang kaugalingon nga nagpakita og gugma ngadto sa usa ka tawo. Isugyot nga ilang ibutang ang ilang hulagway sa dapit diin kini makapahinumdom kanila sa paghigugma sa uban sama sa gibuhat ni Jesus.
-
Unsaon ninyo pagdasig ang inyong mga anak sa pagtinguha ug pagpalambo sa tiunay nga gugma ni Kristo diha sa ilang kinabuhi? Tingali makatabang kamo nila sa paghunahuna og mga paagi nga gipakita ni Jesus ang gugma nga putli (tan-awa, sama pananglit sa, Lucas 23:34; Juan 8:1–11; Ether 12:33–34). Unsaon nato pagsunod sa Iyang ehemplo?
Alang sa dugang nga mga ideya, tan-awa ang isyu karong bulana sa Higala nga magasin.
Portrait of Christ the Savior [Hulagway ni Kristo ang Manluluwas], ni Heinrich Hofmann