Minerva Teichert (1888–1976), Alma Baptizes in the Waters of Mormon [Si Alma Namunyag sa Katubigan sa Mormon], 1949–1951, lana nga naa sa masonite, 35 7/8 × 48 ka pulgada. Brigham Young University Museum of Art, 1969

Disyembre 2–8: “Aron Pag-agak Kanila sa Matarong nga Agianan”

Moroni 1–6

Human matapos ang rekord sa iyang amahan kabahin sa mga Nephite ug sa pagpamubo sa rekord sa mga Jaredite, si Moroni naghunahuna nga nahuman na ang iyang buhat sa paghimo og rekord (tan-awa diha sa Moroni 1:1). Unsa pa man ang ikasulti mahitungod sa duha ka nasod nga hingpit nga nalaglag? Apan nakita ni Moroni ang atong mga panahon (tan-awa sa Mormon 8:35), ug nadasig siya nga “mosulat og dugang nga pipila ka mga butang, nga tingali sila mahimo nga bililhon … sa umaabot nga adlaw” (Moroni 1:4). Nahibalo siya nga ang halapad nga apostasiya nagsingabot, nagdala uban niini og kalibog mahitungod sa mga ordinansa sa pagkapari ug mahitungod sa relihiyon sa kinatibuk-an. Mao tingali nganong mihatag siya og makapatin-aw nga mga detalye mahitungod sa sakramento, bunyag, pagtugyan sa gasa sa Espiritu Santo, ug sa mga panalangin sa pagpundok sa isig ka tumutuo aron sa “pag-agak [sa usag usa] sa matarong nga agianan, … mosalig lamang diha sa mga maayo nga buhat ni Kristo, kinsa mao ang tigpasiugda ug ang tighingpit sa [atong] hugot nga pagtuo” (Moroni 6:4). Ang bililhong mga panabot nga sama niini naghatag kanato og rason nga magmapasalamaton nga gipatunhay sa Ginoo ang kinabuhi ni Moroni aron siya “mosulat og dugang nga pipila ka mga butang” (Moroni 1:4).

Mga Ideya alang sa Pagkat-on diha sa Panimalay ug sa Simbahan

Moroni 1

Makasunod ako ni Jesukristo bisan pa sa oposisyon.

Samtang basahon nimo ang Moroni 1, unsa ang nagdasig kanimo mahitungod sa kamatinud-anon ni Moroni ngadto sa Ginoo ug sa iyang calling? Unsa ang pipila ka paagi nga ang usa ka tawo mahimong “makalimod kang Kristo”? (Moroni 1:2–3). Pamalandongi kon unsaon nimo nga mahimong matinud-anon ngadto ni Jesukristo, bisan kon ikaw nag-atubang og mga pagsulay ug oposisyon.

Moroni 2–6

Ang mga ordinansa sa pagkapari kinahanglan gayod nga ipahigayon sumala sa sugo sa Ginoo.

Si Moroni naninguha nga makaikyas sa dakong peligro sa dihang gisulat niya kini nga mga kapitulo. Nganong maghasol pa man siya sa pagsulat mahitungod sa pang-administratibo nga mga detalye sama unsaon sa pagpahigayon sa mga ordinansa? Pamalandongi kini samtang imong basahon ang Moroni 2–6. Ngano kahang importante kini nga mga detalye ngadto sa Ginoo? Ania ang pipila ka pangutana nga makagiya sa imong pagtuon:

Pagkompirma (Moroni 2; 6:4).Unsa ang gitudlo kanimo sa mga panudlo sa Manluluwas diha sa Moroni 2:2 mahitungod sa ordinansa sa pagkumpirma? Unsaon nimo sa pagpasabot kon unsa ang kahulogan nga “nabag-o ug nahugasan pinaagi sa gahom sa Espiritu Santo”? (Moroni 6:4).

Pag-orden sa Pagkapari (Moroni 3).Unsay nakita nimo dinhi niini nga kapitulo nga makatabang sa usa ka tawo sa pag-andam nga i-orden ngadto sa pagkapari? Unsay imong nakaplagan nga motabang sa usa ka tawo nga mangandam sa pagpahigayon og usa ka pag-orden?

Ang sakramento (Moroni 4–5; 6:6).Unsa ang imong mabuhat aron himoon ang sakramento nga mao ang espirituhanong importante nga hitabo sa imong semana?

Bunyag (Moroni 6:1–3).Unsa ang imong gibuhat aron magpadayon sa pagtuman sa mga kwalipikasyon sa bunyag?

Mitudlo si Jesus kon unsaon gayod pagpahigayon sa mga ordinansa

Base sa unsay imong nakat-onan, unsaon nimo pag-usab ang mga paagi sa imong paghunahuna mahitungod niana, pagsalmot, o pag-andam sa uban alang niini nga mga ordinansa?

Tan-awa usab sa Doktrina ug mga Pakigsaad 84:20.

Pagdrama-drama [role-play]. Usa ka nindot nga paagi sa paghinumdom sa unsay imong nakat-onan mao ang pagpasabot niini ngadto sa uban. Sama pananglit, sulayi ang pagdrama-drama og mga sitwasyon sama niini: Ang usa ka higala dili segurado kon andam na siya nga magpabunyag. Unsaon nimo paggamit sa Moroni 6 sa pagtabang kaniya?

Moroni 4–5

Ang pag-ambit sa sakramento makatabang nako nga mapaduol ngadto ni Jesukristo.

Tingali nadungog na nimo ang mga pag-ampo sa sakramento sa daghang higayon, apan unsa ka sagad nga gihinuktokan gayod nimo kon unsa ang gipasabot sa mga pulong? Tingali mahimo nimong sulayan ang pagsulat sa duha ka pag-ampo sa sakramento gikan sa nahinumdoman. Dayon itandi ang unsay imong nasulat sa Moroni 4:3 ug 5:2. Aduna ka bay nabantayan nga bisan unsa kabahin niini nga mga pag-ampo nga wala nimo mabantayi kaniadto?

Ikonsiderar ang paglakip og himno sa sakramento sa imong pagtuon, sama sa “Paghinumdom sa Gilansang” (Mga Himno, nu. 111).

Moroni 6:4–9

Ang mga disipulo ni Jesukristo nagpakabana sa kalag sa usag usa.

Indibidwal ang pagpili nga mosunod ni Jesukristo, apan ang isig ka tumutuo makatabang kanato nga magpabilin “sa matarong nga agianan” (Moroni 6:4–5). Unsa ang gibuhat sa mga miyembro sa Simbahan sa panahon ni Moroni aron sa paglig-on sa usag usa? Samtang imong basahon ang Moroni 6:4–9, palandonga ang mga panalangin nga moabot gikan sa “giihap uban sa mga katawhan sa simbahan ni Kristo” (Moroni 6:4).

Mahimong maghunahuna usab ka mahitungod sa mga tawo nga nagtambong sa inyong ward o branch. Aduna bay bisan kinsa nga tingali adunay espesyal nga panginahanglan sa imong gugma—tingali usa ka tawo nga bag-o o bag-ohay lang mibalik? Unsay matabang nimo sa paghimo sa ilang mga kasinatian sa simbahan nga mas sama sa unsay gihulagway ni Moroni? Mahimong makakita ka og pipila ka inspirasyon diha sa seksiyon I sa mensahe ni Presidente Dallin H. Oaks “Ang Panginahanglan alang sa usa ka Simbahan” (Liahona, Nob. 2021, 24–25).

Samtang pamalandongan nimo kon unsay gipasabot nga “maamumahan pinaagi sa maayo nga pulong sa Dios” (Moroni 6:4), mahimong makatabang ang paghunahuna mahitungod sa pag-amuma nga gikinahanglan sa usa ka luyong o sa usa ka masuso—ug kon unsay mahitabo kon kini ibaliwala. Siksika ang Moroni 6:4–9 alang sa mga ideya mahitungod kon sa unsang paagi makatabang ka sa “pag-amuma” sa uban sa espirituhanon nga paagi. Sa unsang paagi ang isig ka disipulo mitabang sa pag-amuma kanimo?

Dili klaro sa tanan kon nganong importante nga “giihap uban sa mga katawhan sa simbahan ni Kristo” ug sa “[p]agtigom kanunay” diha sa mga miting sa Simbahan. Unsaon nimo sa pagpasabot kon nganong mapasalamaton ka nga nahimong usa ka miyembro sa Simbahan ni Jesukristo? (tan-awa ang ubang mga seksiyon sa mensahe ni Presidente Oaks “Ang Panginahanglan alang sa usa ka Simbahan”).

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Anak

Moroni 2–6

Ang Espiritu Santo usa ka sagrado nga gasa.

• Ang Espiritu Santo o ang Espiritu gihisgotan sa pipila ka higayon diha sa Moroni 2–6. Tingali mahimo ninyong hangyoon ang inyong mga anak sa pagpangita sa matag bersikulo nga naghisgot Kaniya, basaha kadto nga mga bersikulo, ug ilista ang unsay ilang nakat-onan mahitungod sa Espiritu Santo. Mahimo usab kamong mopakigbahin sa usag usa sa mga kasinatian sa dihang nabati ninyo ang impluwensiya sa Espiritu.

Moroni 4–5

Moambit ko sa sakramento aron ipakita nga kanunay nakong hinumdoman si Jesukristo.

• Ang pagbasa sa mga pag-ampo sa sakramento ngadto sa inyong mga anak mahimong mosangpot ngadto sa usa ka panaghisgotan mahitungod kon unsaon nga makabaton og mas makahuloganon nga mga kasinatian sa sakramento. Mahimong makatabang nila ang paghanduraw nga ang usa ka higala motambong sa sakramento sa unang higayon. Unsaon nato sa pagpasabot ngadto sa atong higala kon unsa ang sakramento ug kon ngano nga sagrado kini? Awhaga ang inyong mga anak sa paggamit og usa ka butang gikan sa Moroni 4 o 5 diha sa ilang mga pagpasabot. Ang mas manghod nga mga bata mahimong mogamit sa pahina sa kalihokan niining semanaha o sa Libro sa mga Hulagway sa Ebanghelyo, nu. 108.

• Ikonsiderar ang pagkanta og dungan sa usa ka awit nga motabang sa inyong mga anak sa paghunahuna mahitungod sa Manluluwas (sama sa “Nagtahod, Naghilom,” Songbook sa mga Bata, 11). Makabansay usab kamo nga maglingkod nga may balaang pagtahod atol sa sakramento.

Moroni 6:1–3

Makapangandam ko nga mabunyagan.

• Kinsa ang mahimong bunyagan? Tabangi ang inyong mga anak sa pagpangita og mga tubag niini nga pangutana diha sa Moroni 6: 1–3. Unsay ipasabot sa pagbaton og “masulub-on nga kasingkasing ug mahinulsulon nga espiritu”? (Moroni 6:2). Sa unsang paagi kini nagtabang kanato sa pag-andam alang sa bunyag? Ikonsiderar ang pagsulti ngadto sa inyong mga anak kon giunsa ninyo pagpangandam aron mabunyagan.

Moroni 6:4–6, 9

Mosimba kita aron sa pag-ambit sa sakramento ug pagsuporta sa usag usa.

• Nakahibalo ba ang inyong mga anak kon nganong ganahan mo nga mosimba? Ang pagbasa sa Moroni 6:4–6, 9 makahatag ninyo og kahigayonan nga magkaubang maghisgot sa pipila sa mga butang nga atong gibuhat sa simbahan. Tingali makadrowing sila og mga hulagway sa ilang kaugalingon nga nagbuhat niini nga mga butang (sama sa pag-ampo, pagtudlo, pagpanganta, ug pag-ambit sa sakramento).

• Human magkauban nga mabasa ang Moroni 6:4, kamo ug ang inyong mga anak makatan-aw sa mga hulagway o mga ehemplo sa makapabaskog nga mga pagkaon ug itandi ang pag-amuma sa atong mga lawas ngadto sa pagkahimong “maamumahan pinaagi sa maayo nga pulong sa Dios.”

Alang sa dugang nga mga ideya, tan-awa ang isyu karong bulana sa Higala nga magasin.

Moroni in the Cave [Moroni diha sa Langob], ni Jorge Cocco