That Ye May Know [Nga Kamo Mahibalo], ni Gary L. Kapp

Disyembre 16–22: “Duol ngadto kang Kristo, ug Paghingpit diha Kaniya”

Moroni 10

Ang Basahon ni Mormon nagsugod sa saad ni Nephi sa pagpakita kanato nga “ang malumo nga mga kalooy sa Ginoo anaa ibabaw sa tanan kinsa siya mipili, tungod sa ilang hugot nga pagtuo” (1 Nephi 1:20). Ang basahon natapos uban sa usa ka susama nga imbitasyon gikan ni Moroni: “[Hinumdomi] unsa ka maluluy-on ang Ginoo” (Moroni 10:2–3). Unsa nga mga ehemplo sa kaluoy sa Ginoo ang imong nakita diha sa Basahon ni Mormon? Mahimo kang maghunahuna sa maloloy-ong paagi ang Dios migiya sa pamilya ni Lehi ngadto sa kamingawan ug tabok sa dagkong mga katubigan, ang malumong mga kaluoy nga Siya mipakita ngadto ni Enos sa dihang ang iyang kalag mitinguha alang sa kapasayloan, o ang kaluoy nga iyang gipakita ngadto ni Alma, usa ka mabangis nga kaaway sa Simbahan kinsa nahimong usa sa walay kahadlok niini nga tigpanalipod. O ang imong mga hunahuna mabalhin ngadto sa kaluoy nga gipakita sa nabanhaw nga Manluluwas ngadto sa mga tawo sa dihang giayo Niya ang ilang masakiton ug gipanalanginan ang ilang gagmayng mga bata. Tingali ang labing importante, ang tanan niini makapahinumdom kanimo kon “unsa ka maluluy-on ang Ginoo” diha kanimo, kay ang Basahon ni Mormon gisulat aron sa pagdapit sa matag usa kanato sa pagdawat sa kaluoy sa Dios—usa ka pagdapit nga sa yanong paagi gipahayag ni Moroni diha sa mga pulong sa pagpanamilit, “Duol ngadto kang Kristo, ug paghingpit diha kaniya,” (Moroni 10:32).

Mga Ideya alang sa Pagkat-on diha sa Simbahan ug sa Panimalay

Moroni 10:3–7

Mahimo akong makahibalo sa kamatuoran sa tanang butang pinaagi sa gahom sa Espiritu Santo.

Ang saad diha sa Moroni 10:3–7 nakausab sa kinabuhi sa minilyon ka mga tawo sa tibuok kalibotan. Sa unsang paagi kini miusab sa imong kinabuhi? Samtang ikaw nagbasa sa Moroni 10:3–7, hunahunaa ang pagbasa sa mas mainampingong paagi kay sa imong nabuhat sa miagi. Makahimo ka sa pagsusi sa matag hugpong sa mga pulong, mangutana sa imong kaugalingon og sama niini: Unsay ipasabot niini? Sa unsang paagi mas maayo nako kining mahimo? Unsa nga mga kasinatian nga aduna ako uban niini?

Samtang mamalandong ka sa imong personal nga pagpangita alang sa espirituhanon nga kamatuoran, mahimong makatabang ang pagkat-on kon giunsa sa uban pagkaplag sa kamatuoran pinaagi sa gahom sa Espiritu Santo. Si Elder Mathias Held mihulagway sa iyang kasinatian isip usa ka bag-ong miyembro sa Simbahan (tan-awa sa “Pagpangita og Kahibalo pinaagi sa Espiritu,” Liahona, Mayo 2019, 31–33). Si Elder David F. Evans mihulagway sa iyang kasinatian isip usa ka tawo nga gipadako diha sa Simbahan apan aduna gihapoy mga pangutana (tan-awa sa “Ang Kamatuoran sa Tanan nga mga Butang,” Liahona, Nob. 2017, 68–70). Ikonsiderar ang pagbasa sa usa o sa duha niini nga mga mensahe ug sa pagsulat sa bisan unsa nga imong makat-onan gikan sa ilang mga pagpangita sa kamatuoran nga makatabang kanimo sa imong kaugalingon nga pagpangita sa kamatuoran.

Mahimo usab nimong suhiron kon unsay gitudlo sa Dios mahitungod sa kamatuoran pinaagi sa pagbasa sa pipila sa mga tudling diha sa Giya ngadto sa mga Kasulatan, “Kamatuoran” (Librarya sa Ebangheyo). Unsa nga mga kasulatan ang ingon og nakahatag gayod og panabot kanimo? Tingali makapili ka og usa nga ipakigbahin ngadto sa laing tawo kinsa nagtinguha usab sa kamatuoran pinaagi sa Espiritu.

Tan-awa usab sa Henry B. Eyring, “Ang Hugot nga Pagtuo alang sa Pagpangutana ug Dayon sa Paglihok,” Liahona, Nob. 2021, 74–76; “Paggiyaha ang Espiritu,” Mga Himno, nu. 85.

Irekord ang mga impresyon. Ang pagkakabig ngadto sa ebanghelyo ni Jesukristo nagpasabot sa pagkahibalo ug pagsunod sa ebanghelyo. Ikaw mas adunay kalagmitan nga mas molihok sa unsay imong nakat-onan kon imo kining isulat. Kon ikaw nagtudlo, dapita ang mga tawo nga imong gitudloan sa pagrekord sa ilang espirituhanon nga mga impresyon.

Moroni 10:8–25

Ang Dios naghatag kanako og espirituhanong mga gasa.

Adunay daghang paagi nga ang usa ka tawo “molimod … sa mga gasa sa Dios” (Moroni 10:8). Ang ubang mga tawo gani molimod nga kini nga mga gasa anaa. Ang uban molimod sa ilang mga gasa pinaagi sa yanong pagbaliwala niini o napakyas sa pagpalambo niini. Samtang imong basahon ang Moroni 10:8–25, pangita og mga kamatuoran nga motabang kanimo sa pagdiskobre sa imong espirituhanong mga gasa ug sa paggamit niini sa pagpanalangin sa mga anak sa Dios. Ang mga pangutana nga sama niini makatabang: Unsa ang espirituhanon nga mga gasa? Kang kinsa kini gihatag? Nganong gihatag man kini? Unsaon nato sa pagdawat niini? Makahunahuna ka ba og mga ehemplo sa mga tawo nga naggamit sa mga gasa nga gilista sa Moroni 10:9–16?

Moroni 10:30–33

Mahimo akong mahingpit pinaagi sa grasya ni Jesukristo.

Ang tambag ni Moroni nga “duol ngadto kang Kristo” naglakip og labaw pa sa pagkat-on ug paghunahuna mahitungod Kaniya. Hinuon, usa kini ka pagdapit sa pagduol ngadto kang Kristo sa labing hingpit nga posibleng pagbati—nga mahimong sama Kaniya. Samtang imong basahon ang Moroni 10:30–33, bantayi ang mga hugpong sa mga pulong nga makatabang kanimo sa pagsabot kon unsay gipasabot nga moduol ngadto kang Kristo, sa unsang paagi kini nahimong posible, ug ang mga resulta sa pagbuhat sa ingon.

Hinumdomi ang imong pagtuon sa Basahon ni Mormon karong tuiga, ug pamalandongi kon unsay imong nabati ug nakat-onan mahitungod ni Jesukristo. Sama pananglit, sa unsang paagi ang Basahon ni Mormon mitabang kanimo sa pagduol ngadto Kaniya? Sa unsang paagi nga kini nakatabang nimo nga mas mosalig sa Iyang grasya? Sa unsang paagi nga kini nakatabang nimo nga “dili molimod” sa gahom sa Manluluwas? Ikonsiderar ang pagpakigbahin sa imong kaugalingon nga pagsaksi sa Basahon ni Mormon ngadto sa usa ka tawo kinsa nagkinahanglan nga makadungog niini, lakip sa mga minahal ug mga higala nga tingali wala makahibalo sa mensahe niini.

Tan-awa usab sa “Si Moroni Nagdapit sa Tanan sa Pagduol ngadto kang Kristo” (bidyo), Librarya sa Ebangheyo.

Si Moroni Nagdapit sa Tanan sa Pagduol ngadto kang Kristo

Si Moroni mihuman sa pagsulat mahitungod sa kalaglagan sa mga Nephite ug milubong sa sagradong talaan aron ang mga katuyoan sa Ginoo matuman. Ang tanan mahibalo sa kamatuoran sa basahon pinaagi sa Espiritu Santo.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Anak

Moroni 10:3–4

Masayod ko sa akong kaugalingon nga ang Basahon ni Mormon tinuod.

• Sa unsang paagi makatabang mo sa inyong mga anak nga modawat sa pagdapit ni Moroni sa pagpangutana sa Dios kon tinuod ba ang Basahon ni Mormon? Ikonsiderar ang paghatag kanila og mga piraso sa papel nga adunay nga pulong nga Mobasa, Mohinumdom, Mamalandong ug Mangutana nga nakasulat niini. Ang inyong mga anak mahimong makapangita niini nga mga pulong diha sa Moroni 10:3–4. Unsa ang kinahanglan natong basahon, hinumdoman, pamalandongan, ug ipangutana aron makaangkon o malig-on ang atong mga pagpamatuod sa Basahon ni Mormon? Ang inyong mga anak makapangita usab og mga pagkasusama tali niini nga mga bersikulo ug sa awit nga “Pagsiksik, Pamalandong, ug Pag-ampo” (Songbook sa mga Bata, 66).

• Ang inyong mga anak makagamit sa hulagway sa kataposan niini nga latid sa paghisgot mahitungod ni Moroni nga naglubong sa bulawan nga mga palid (tan-awa usab sa “Kapitulo 54: Ang Saad sa Ang Basahon ni Mormon,” Mga Sugilanon sa ang Basahon ni Mormon, 156). Ang mas manghod nga mga bata mahimong malingaw nga magpakaaron-ingnon nga nagsulat diha sa mga palid ug naglubong niini. Ipakigbahin sa usag usa ang inyong mga pagpamatuod sa Basahon ni Mormon.

Moroni 10:8–19

Ang Langitnong Amahan naghatag kanako og espirituhanon nga mga gasa.

• Aron sa pagtudlo sa inyong mga anak mahitungod sa espirituhanon nga mga gasa, mahimo ninyong isulat ang mga numero 9 hangtod 16 diha sa lahi nga mga piraso sa papel ug puston ang matag papel sama sa usa ka regalo. Mahimong magpuli-puli ang inyong mga anak sa pag-abli sa mga regalo, magbasa sa mga bersikulo gikan sa Moroni 10:9–16 nga motakdo sa mga numero, ug moila sa matag espirituhanon nga gasa. Mahimo kamong maghisgot bahin sa unsang paagi gusto sa Langitnong Amahan nga gamiton kini nga mga gasa aron sa pagpanalangin sa Iyang mga anak. Makatabang usab kamo sa inyong mga anak nga makabantay sa mga gasa nga gihatag sa Langitnong Amahan kanila.

Moroni 10:32–33

Gusto ni Jesukristo nga ako moduol ngadto Kaniya.

• Nakahibalo ba ang inyong mga anak kon unsay kahulogan nga “[mo]duol ngadto kang Kristo”? Tingali mabasa ninyo ang Moroni 10:32 ug dapita sila nga balikon pagsulti ang hugpong sa mga pulong dungan nimo. Mahimo nilang piyongon ang ilang mga mata samtang imong ipahimutang ang usa ka hulagway ni Jesus sa usa ka dapit diha sa lawak. Dayon tugoti sila sa pagbuka sa ilang mga mata, pangitaon ang hulagway, magpundok libot niini, ug maghisgot bahin sa mga paagi nga kita makaduol ngadto kang Kristo. Tingali makatabang ang pagsulat sa pangutana Unsay buot ipasabot sa “pagduol ngadto kang Kristo”? Tabangi sila sa pagsiksik sa Moroni 10:32–33 aron makapangita og posible nga mga tubag (tan-awa usab sa Mga Artikulo sa Hugot nga Pagtuo 1:3–4). Pagtinabangay kamo sa paglista sa unsay gusto ni Kristo nga atong buhaton ug kon unsa ang Iyang gisaad nga buhaton alang kanato.

• Tingali ang inyong mga anak malingaw sa paghimo ug pagdayan-dayan og mga tsapa nga porma og kasingkasing nga gisulatan og “Akong gihigugma ang Dios uban sa tibuok nga gahom, hunahuna, ug kusog” (tan-awa sa Moroni 10:32). Samtang ilang buhaton, hisgoti ngadto kanila mahitungod sa giunsa nato pagpakita sa Dios nga kita nahigugma Kaniya.

Alang sa dugang nga mga ideya, tan-awa ang isyu karong bulana sa Higala nga magasin.

Sa wala pa ilubong ang mga talaan, gidapit kita ni Moroni nga “mahinumdom unsa ka maluluy-on ang Ginoo” (Moroni 10:3)