Disyembre 9–15: “Kabay nga Ibayaw Ka ni Cristo.” Moroni 7–9
“Disyembre 9–15: ‘Kabay nga Ibayaw Ka ni Cristo.’ Moroni 7–9,” Dali, Magsunod sa Akon—Para sa Puluy-an kag Simbahan: Libro ni Mormon 2024 (2023)
“Disyembre 9–15. Moroni 7–9,” Dali, Magsunod sa Akon—Para sa Puluy-an kag Simbahan: 2024 (2023)
Litrato
Si Moroni nga nagasulat sa bulawan nga mga lamina
Minerva K. Teichert (1888–1976), Moroni: The Last Nephite [Si Moroni: Ang Katapusan nga Nefinhon], 1949–1951, oil sa masonite, 34¾ x 47 ka pulgada. Brigham Young University Museum of Art, 1969
Antes gintapos ni Moroni ang kasulatan nga ginakilala naton sa karon nga ang Libro ni Mormon gamit ang iya kaugalingon nga panghingapos nga mga pulong, nagpaambit sia sang tatlo ka mensahe halin sa iya amay, nga si Mormon: isa ka pamulong-pulong sa “mga mahidaeton nga mga sumolunod ni Cristo” (Moroni 7:3) kag duha ka mga sulat nga ginsulat ni Mormon kay Moroni. Siguro ginlakip ni Moroni ining mga mensahe sa Libro ni Mormon bangud nakita na niya nga daan ang mga pagkaanggid sang mga peligro sa iya panahon kag sa aton. Sang ginsulat ining mga pulong, ang katawhan nga Nefinhon nagaamat na talikod sa Manluluwas. Madamo sa ila ang “nadulaan na sang ila gugma, ang isa tuhoy sa isa” kag nagakasadya sa “tanan nga butang luwas sa sinang maayo” (Moroni 9:5, 19). Pero sa gihapon nakakita si Mormon sang rason nga maglaum, nga nagatudlo sa aton nga ang paglaum wala nagakahulugan sang pagbale-wala ukon kakulang sang ihibalo sa mga problema sang kalibutan. Ang paglaum nagakahulugan sang pag-angkon sang pagtuo sa Amay nga Langitnon kag kay Jesucristo, nga ang gahum mas labaw kag mas wala katubtuban sangsa sining mga problema. Nagakahulugan ini sang “[pag]kapyot sa tagsa ka maayo nga butang” (Moroni 7:19). Nagakahulugan ini sang pagtugot sang Pagbayad-Sala ni Jesucristo “kag sang paglaum sang iya himaya kag sang kabuhi nga wala’y katapusan [nga] magapabilin sa imo kaisipan” (Moroni 9:25).
Ang Kasanag ni Cristo nagabulig sa akon mga mahibal-an ang kamatuoran sa sala.
Madamo nga mga tawo ang nagapamangkot, “Paano ko mahibal-an kon ang isa ka panghunahuna naghalin sa Dios ukon sa akon kaugalingon nga pamensaron?” ukon “Sa kadamo sang pagpatalang sa karon nga panahon, paano ko mahibal-an kon ano ang husto ukon sayop?” Ang mga tinaga ni Mormon sa Moroni 7 nagahatag sa aton sang pila ka mga prinsipyo nga pwede naton gamiton para sabton ining mga pamangkot. Pangitaa ang mga ini ilabi na gid sa mga bersikulo 12–20. Pwede mo gamiton ining mga kamatuoran para buligan ka nga timbangon ang mga mensahe nga imo masugata kag ang imo mga eksperiyensya sini nga semana.
Tungod kay Jesucristo, sarang ko “magkapyot sa tagsa ka maayo nga butang.”
May ginpamangkot si Mormon nga daw importante gid sa karon nga panahon: “Paano mangin posible ang pagkapyot sa tagsa ka maayo nga butang?” Moroni 7:20 Dayon nagtudlo sia parte sa pagtuo kay Jesucristo, paglaum, kag pagpalangga sa isigkatawo. Samtang imo ginabasa ang mga bersikulo 20–48, pangitaa kon paano ang tagsa ka kinaiya nagabulig sa imo nga makita kag “magkapyot” sa kaayo nga nagahalin kay Jesucristo. Ngaa kinahanglanon ining mga kinaiya para sa isa ka disipulo ni Jesucristo?
“Ang pagpalangga sa isigkatawo amo ang putli nga gugma ni Cristo.”
Naghambal si Mormon nga ang aton pagtuo kag paglaum kay Jesucristo nagatulod sa aton nga makaangkon sang putli nga pagmahal. Ano ang putli nga pagmahal? Pwede mo isulat Ang Putli nga Pagmahal amo ang … kag dayon basaha ang Moroni 7:44–48, nga nagapangita sang mga tinaga ukon mga dinalan nga makakompleto sang pahayag. Pagkatapos mo, pamensara nga islan ang tinaga nga Putli nga pagmahal sang ngalan nga Jesucristo. Ano ang ginatudlo sini sa imo parte sa Manluluwas? Paano ginpakita ni Jesucristo ang Iya puro nga paglangga? Magpanumdom sang mga halimbawa sa balaan nga mga kasulatan kag sa imo kaugalingon nga kabuhi.
Si Pangulong Dallin H. Oaks nagsiling: “Ang rason nga ang putli nga pagmahal wala nagapalya kag ang rason nga ang putli nga pagmahal mas dako pa sangsa pinakamapuslanon nga mga binuhatan sang kaayo … amo nga ang putli nga pagmahal, ‘ang putli nga gugma ni Cristo’ [Moroni 7:47, indi isa ka buhat kundi isa ka kondisyon ukon kahimtangan. … Ang putli nga pagmahal kahimtangan nga ginatinguhaan sang isa ka tawo nga malab-ot” (“The Challenge to Become; EnsignNob. 2000, 34). Sa ano nakaapekto ang putli nga pagmahal sa imo pagkadisipulo? Paano ka “magkapyot sa putli nga pagmahal”? (bersikulo 46).
Maggamit sang mga leksyon gamit ang isa ka bagay. Siguro ang pagpanumdom sang tatlo-tiil nga bangko makabulig sa imo nga mas maintiendihan ang kaangtanan sang pagtuo, paglaum, kag putli nga pagmahal.
Baliskad sa mensahe ni Mormon sang pagpalangga sa Moroni 7:44–48, ang ikaduha nga sulat ni Mormon kay Moroni nagaunod sang mga paandam batok sa butang nga ginabudlayan gid ang kadam-an sa karon nga panahon—kaakig. Suno sa Moroni 9:3–5, ano ang pila sa mga konsikwensya sang kaakig sang mga Nefinhon? Ano nga mga paandam ang pwede naton kuhaon sa mga bersikulo 3–5, 18–20, 23?
Makaangkon ako sang paglaum kay Cristo bisan ano pa ang akon sirkumstansya.
Pagkatapos nga ilaragway ang kalautan nga iya nakita, ginhambalan ni Mormon ang iya anak nga indi magkasubo. Ano ang nanamian mo sa mensahe ni Mormon parte sa paglaum? Ano ang buot silingon sa imo sang “ibayaw [ka]” ni Cristo? Ano nga mga kinaiya ni Cristo kag mga prinsipyo sang Iya ebanghelyo ang “nagapabilin sa imo kaisipan” kag nagahatag sa imo sang paglaum? (Moroni 9:25).
Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.
Kon may pagtuo ako kay Jesucristo, sarang ko himuon ang bisan ano nga kinahanglan Niya ipahimo sa akon.
Pamensara nga magtan-aw sing ululupod sa pila ka mga litrato nga nagapakita sang tawo sa balaan nga mga kasulatan nga nagahimo sang isa ka importante nga butang (tan-awa halimbawa, sa Libro sang mga Larawan nga Pang-Ebanghelyo, num. 19, 70, 78, 81). Paano ang pag-angkon sang pagtuo kayJesucristo nagahimo sang kinalain sa sining mga halimbawa? Dayon pwede ninyo basahon sang imo kabataan ang Moroni 7:33, nga ginapangita kon ano ang pwede naton himuon kon may pagtuo kita kay Jesucristo. Pwede mo man iistorya sa kada isa ang mga eksperiyensya sang ginbugayan ka sang Dios sang gahum para himuon ang Iya pagbuot.
Ang pagtuo kay Jesucristo makahatag sa akon sang paglaum.
Samtang ginabasa mo ang Moroni 7:41 sa imo kabataan, basi pwede nila alsahon ang ila kamot kon mabatian nila ang ginsiling ni Mormon nga dapat naton lauman. Sugiri sila parte sa paglaum nga imo nabatyagan tungod kay Jesucristo.
Pwede man kamo sang imo kabataan magpanumdom sang tawo nga basi ginabudlayan sa isa ka butang. Basi pwede ang imo kabataan magdrowing sang litrato para sa sina nga tawo nga makapadumdom sa iya nga maglaum kay Jesucristo.
Sarang ko maglaum kay Jesucristo, bisan pa sa tion sang mabudlay nga mga pagtilaw.
Para tudloan ang imo kabataan parte sa paglaum kay Jesucristo, pwede mo sudlan ang silang nga suludlan sang tubig kag hulugan ini sang duha ka butang—isa nga nagalutaw kag isa nga nagalugdang. Samtang ginabasa ninyo sang ululupod ang Moroni 7:40–41 kag 9:25–26, pwede nga pangitaon sang imo kabataan kon ano ang ginahimo sang paglaum para sa aton. Dayon pwede nila ikumparar ang nagalutaw nga bagay sa tawo nga may paglaum kay Cristo. Paano Niya kita “pagabangunon” kon nagaatubang kita sang mabudlay nga mga pagtilaw? Buligi ang imo kabataan nga magpanumdom sang mga paagi nga mapatiner nila ang Manluluwas kag ang Iya nagapaisog nga mga pinanudlo “sa [ila] kaisipan sa wala’y katubtuban.”
“Ang putli nga pagmahal amo ang putli nga gugma ni Cristo.”
Pwede mo basahon ukon ihambal sa malip-ot ang Moroni 7:47 kag hagaron ang imo kabataan nga magdrowing sang mga litrato sang ila kaugalingon nga nagapakita sang pagpalangga sa iban. Ipanugyan nga ibutang nila ang ila drowing kon diin mapadumdom sila sini nga palanggaon ang iban pareho sang ginhimo ni Jesus.
Paano mo papagsikon ang imo kabataan nga pangitaon kag magpatubo sang putli nga pagmahal ni Cristo sa ila mga kabuhi? Basi pwede mo sila mabuligan sa pagpanumdom sang mga paagi nga ginpakita ni Jesus ang putli nga pagmahal (tan-awa halimbawa, sa Lucas 23:34; Juan 8:1–11; Eter 12:33–34). Paano naton sundon ang Iya ehemplo?
Para sa dugang nga mga ideya, tan-awa sa isyu sang Abyan nga magasin sini nga bulan.
Litrato
Jesucristo
Portrait of Christ the Savior [Larawan ni Cristo nga Manluluwas], ni Heinrich Hofmann