Ether Hiding in the Cavity of a Rock [Si Eter nga Nagapanago sa Guab sang Bato], ni Gary Ernest Smith

Nobyembre 25–Disyembre 1: “Paagi sa Pagtuo ang Tanan nga mga Butang Matuman”

Eter 12–15

Ang mga propesiya ni Eter sa mga Jarednon “dalagko kag makahalangyag” (Eter 12:5). “Ginsugiran niya sila sang tanan nga mga butang, gikan pa sa ginsuguran sang tawo” (Eter 13:2). Nakita na niya ang “mga adlaw ni Cristo” kag ang Bag-ong Jerusalem sa ulihing mga adlaw (Eter 13:4). Kag naghambal sia parte sa “paglaum sing pat-od sa isa ka mas maayo nga kalibutan, huo, bisan isa ka duog sa tuo nayon nga kamot sang Dios” (Eter 12:4). Pero ginsikway sang mga Jarednon ang iya mga pulong, sa pareho nga rason nga ginasikway sang mga tawo ang mga propesiya sang mga alagad sang Dios sa karon nga panahon—“sanglit wala nila [makita] ang mga ini” (Eter 12:5). Nagakinahanglan sang pagtuo agud magpati sa mga promisa kag mga paandam parte sa mga butang nga indi naton makita, pareho nga ginkinahanglan ni Eter sang pagtuo agud magpropesiya parte sa “dalagko kag makahalangyag nga mga butang” sa wala nagapati nga katawhan. Ginkinahanglan ni Moroni sang pagtuo agud magsalig nga makakas sang Ginuo ang iya “kahuyang sa pagsulat” kag bayluhan ini sang kabakod (tan-awa sa Eter 12:23–27). Amo ini ang klase sang pagtuo nga nagahimo sa aton nga “pat-od kag malig-on, nga dalayon nga nagabugana sa maayo nga mga buluhaton, nga natuytuyan sa paghimaya sa Dios” (Eter 12:4). Kag amo ini ang klase sang pagtuo kon sa diin “ang tanan nga mga butang matuman” (Eter 12:3).

Mga Ideya sa Pagtuon sa Puluy-an kag sa Simbahan

Eter 12

Ang pagtuo kay Jesucristo nagaresulta sa mga milagro.

Komon sa panahon karon, pareho man sa panahon ni Eter, nga gusto sang mga tawo sang ebidensya antes magpati sa Dios kag sa Iya gahum. Ano ang imo matun-an sa Eter 12:5–6 parte sa sini nga ideya?

Samtang imo ginabasa ang Eter 12, pwede mo tandaan ang tagsa ka tion nga makita mo ang tinaga nga “bunyag.” Pamensara kon ano ang ginatudlo sang tagsa ka instansya parte sa pagtuo. Ang mga pamangkot pareho sini mahimo nga makabulig: Ano ang pagtuo? Ano ang buot silingon sang gamiton ang pagtuo? Ano ang mga bunga sang pagtuo kay Jesucristo? Pwede mo man isulat ang imo mga panghunahuna parte sa mga saksi nga imo nabaton “pagkatapos sang pagtilaw sang imo pagtuo” (Eter 12:6).

Tan-awa man sa Russell M. Nelson, “Si Cristo Nabanhaw; Ang Pagtuo sa Iya Magasaylo sang mga Bukid,” Liahona, Mayo 2021, 101–4.

Tugoti ang iban nga mag-istorya, kag kon kaisa magtudlo. Ang mga tawo mas makatuon kon may mga oportunidad sila sa pag-istorya sang ila ginatun-an ukon bisan magtudlo sa pormal nga kapalibutan. Bisan sa balay ukon sa simbahan, pamensara nga tugotan ang iban, dala na ang mga lamharon, sa pagtudlo sang isa ka bahin sang leksyon.

Eter 12:1–9, 28, 32

Si Jesucristo nagahatag sa aton sang “isa ka mas maayo nga paglaum.”

Dugang pa sa dalagko nga mga ideya parte sa pagtuo, ang Eter 12 madamo man sang mahambal parte sa paglaum. Tugoti ining mga pamangkot nga maggiya sang imo pagtuon:

• Ano ang mga rason nga si Eter “[nagalaum] sing pat-od sa isa ka mas maayo nga kalibutan”? (tan-awa sa Eter 12:2–5).

• Ano ang katuyuan sang angkla? Ano ang ginahimo sang paglaum sa imo kalag nga daw pareho sang ginahimo sang angkla sa baruto? (tan-awa sa Eter 12:4).

• Ano ang dapat naton lauman? (tan-awa sa Eter 12:4; Moroni 7:41).

• Paano ang ebanghelyo ni Jesucristo nagahatag sa imo sang “isa ka mas maayo nga paglaum”? (Eter 12:32).

Tan-awa man sa Moroni 7:40–41.

Eter 12:23–29

Sarang ni Jesucristo nga himuon ang akon kahuyang nga kusog.

Kon basahon naton ang mabaskog nga mga sinulatan ni Moroni, mahapos malimtan nga nabalaka sia sa iya “kahuyang sa pagsulat” kag nahadlok nga yagutaon sang mga tawo ang iya mga pulong (tan-awa sa Eter 12:23–25). Kon nakabatyag ka sang kabakala tungod sa imo kaugalingon nga kahuyang, basaha ang parte sa mga kabudlayan ni Moroni—kag ang sabat sang Manluluwas—sa Eter 12:23–29. Pwede mo man binagbinagon ang tinion sang ginbuligan ka ni Jesucristo nga makita ang imo kahuyang kag ginpabakod ka—bisan wala Niya ini tanan ginkakas. Panumduma man ang mga kahuyang nga imo ginapakigbatuan sa karon. Ano ang kinahanglan mo himuon para mabaton ang promisa sang Manluluwas nga “himuon ko ang mahuyang nga mga butang nga mangin mabakod”? Eter 12:27

Pamensara ang pagbasa sang masunod nga mga dinalan para makita kon paano ang iban sa balaan nga mga kasulatan nakaagom sang kusog paagi sa grasya ni Jesucristo:

• Enoc (Moises 6:31–34; 7:13)

• Moises (Exodo 4:10–12; 14:31)

• Gideon (Mga Hukom 6:12–16; 8:22–23)

• Pedro (Lucas 5:8–10; 22:55–62; Mga Binuhatan 4:13–21)

• Moroni (Eter 12:23–29)

• Joseph Smith (Joseph Smith—Kasaysayan 1:28; Doktrina kag mga Kasugtanan 35:17; 135:3)

Eter 13:13–22; 14–15

Ang pagsikway sa mga propeta sang Ginuo nagabutang sa aton sa espirituhanon nga katalagman.

Ang mangin hari sang mga Jarednon, sa kasaysayan, isa ka delikado nga posisyon. Labi nga matuod ini para kay Coriantumr, sang ang madamo nga “gung-an nga mga lalaki … naghangad sa pagpatay sa iya” (Eter 13:15–16). Sa Eter 13:15–22, pat-ini kon ano ang ginhimo ni Coriantumr para protektahan ang iya kaugalingon kag kon ano ang ginlaygay ni propetang Eter nga iya himuon sa baylo . Sa imo pagbasa sang nabilin sa libro ni Eter, pamensara ang mga konsikwensya sang pagsikway sang mga propeta. Ano ang matabo sa mga tawo kon “ang Espiritu sang Ginuo [mag-untat na] sa pag-impluwensya sa ila”? (Eter 15:19). Ano ayhan ang gusto sang Ginuo nga matun-an mo sa sining mga istorya? Pamensara kon ano ang himuon mo para sundon ang Iya mga propeta.

Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.

Mga Ideya para sa Pagtudlo sang mga Kabataan

Eter 12:6–22

Ang pagtuo amo ang pagpati sa mga butang nga indi ko makita.

• Pamensara nga buligan ang imo kabataan nga suliton upod sa imo ang “Ang pagtuo amo ang mga butang nga ginalauman kag wala makita” sa Eter 12:6. Basi masadyahan sila sa pagtan-aw sang mga litrato nga nagapakita sang mga ehemplo sang pagtuo sa Eter 12:13–15, 19–21 (tan-awa sa Libro sang mga Larawan nga Pang-Ebanghelyo, num. 78, 85, kag sa pahina para sa kahiwatan sini na semana). Tugoti ang imo kabataan nga ipaathag ang ila nahibal-an parte sa tagsa ka istorya. Ari ang pila sa mga pamangkot nga makabulig sa imo nga hambalan ining mga ehemplo sang pagtuo:

  • Ano ang ginalauman sining mga tawo?

  • Paano gintilawan ang ila pagtuo?

  • Ano ang natabo tungod sang ila pagtuo?

  Pwede mo man iistorya ang imo kaugalingon nga mga eksperiyensya sa paggamit sang pagtuo.

Eter 12:4, 32

Ang paglaum daw pareho sang angkla sa akon kalag.

• Para mas maintiendihan kon ano ang ginatudlo sang Eter 12:4 parte sa paglaum, pwede kamo sang imo kabataan nga magtan-aw sang litrato sang baruto kag sang angkla. Ngaa kinahanglan sang mga baruto ang angkla? Ano ang matabo sa baruto nga wala sang angkla? Samtang inyo ginabasa ang Eter 12:4 sing ululupod, hambali kon paano kita ginabuligan sang paglaum pareho sang pagbulig sang angkla sa baruto. Hagara ang imo bata nga magdrowing sang litrato sang baruto kag angkla para matudloan nila ang iban parte sa paglaum.

•   Suno sa sini nga kahulugan kag sa Eter 12:4, 32, ano dapat ang aton lauman? (tan-awa man sa Moroni 7:40–42). Buligi ang imo kabataan nga magpamensar sang iban pa nga mga tinaga para sa paglaum, upod sang mga tinaga nga baliskad ang kahulugan sa paglaum. Pwede man ninyo istoryahan ang kada isa sang pila ka mga kamatuoran sang ebanghelyo nga nagahatag sa imo sang paglaum.

Eter 12:23–29

Mabuligan ako ni Jesucristo nga mangin mabakod sa espirituhanon.

• Ang mga kabataan kon kaisa nagaatubang sang mga sitwasyon kon diin pamatyag nila maluya sila, pareho kay Moroni. Buligi ang imo kabataan nga tukibon kon ngaa amo sini ang pamatyag ni Moroni sa Eter 12:23–25, kag pamangkuta sila kon may pareho sila nga mga balatyagon. Dayon hagara sila nga basahon ang mga bersikulo 26–27 para hibaluon kon paano ginbuligan sang Ginuo si Moroni.

• Basi pwede nga magdrowing ang imo kabataan sang litrato sang butang nga maluya kag butang nga mabakod. Dayon pwede nila idugang sa ila drowing ang pila ka mga tinaga kag dinalan sa Eter 12:23–29 nga nagatudlo sa ila kon paano buslan sang Manluluwas ang aton kahuyang sang kusog. Paisoga ang imo kabataan sa pagpanumdom sang ila kahuyang kag dayon magpangayo sang bulig sang Manluluwas para mangin mabaskog. Pwede ka man mag-istorya sang eksperiyensya sang ginbuligan ka sang Manluluwas nga mangin hustohan lang kabaskog para himuon ang isa ka butang nga mabudlay.

Para sa dugang nga mga ideya, tan-awa sa isyu sang Abyan nga magasin sini nga bulan.

Marvelous Were the Prophecies of Ether [Makahalangyag ang mga Panagna ni Eter], ni Walter Rane