1 Kag karon nagsugod nga may isa ka dako nga sumpa sa bug-os nga kadutaan tungod sang kalainan sang katawhan, nga sa diin, kon ang isa ka tawo magbutang sang iya galamiton ukon sang iya espada sa iya tulongtungan, ukon sa lugar nga sa diin ginatago niya ini, tan-awa, pagkaaga, indi na niya ini makita, sa pagkadako sang sumpa sa kadutaan.

2 Gani ang tagsa ka tawo nagakapyot sing hugot sa sinang iya ginapanag-iyahan, sa iya mga kamot, kag indi magpanghulam kag indi man magpahulam; kag ang tagsa ka tawo nagakapot sa uluyatan sang iya espada sa iya tuo nga kamot, sa pagpangapin sang iya pagkabutang kag sang iya kaugalingon nga kabuhi kag sang iya mga asawa kag mga anak.

3 Kag karon, pagkaligad sang duha ka tuig, kag pagkatapos sang kamatayon ni Shared, tan-awa, nagtuhaw ang utod ni Shared kag nakig-away sia batok kay Coriantumer nga sa diin ginpierde sia ni Coriantumer kag ginlagas sia padulong sa kamingawan sang Akis.

4 Kag natabo ini nga ang utod ni Shared nakig-away batok sa iya sa kamingawan sang Akis; kag ang inaway nangin tuman kagrabe, kag madamo nga linibo ang nalaglag paagi sa espada.

5 Kag natabo ini nga ginpalibutan ni Coriantumer ang kamingawan; kag ang utod ni Shared naggwa sa kamingawan sa gab-i, kag ginpamatay ang isa ka bahin sang kasoldadohan ni Coriantumer samtang hubog sila.

6 Kag nagkadto sia sa duta sang Moron, kag ginpahamtang ang iya kaugalingon sa trono ni Coriantumer.

7 Kag natabo ini nga si Coriantumer nagpuyo upod sa iya kasoldadohan sa kamingawan sa sulod sang duha ka tuig nga sa diin nagbaton sia sang dako nga kusog sa iya kasoldadohan.

8 Karon ang utod ni Shared, nga ang ngalan amo si Galaad, nagbaton man sang dako nga kusog sa iya kasoldadohan tungod sang sekreto nga mga pagkunsabo.

9 Kag natabo ini nga ginpatay sia sang iya mataas nga pari samtang nagapungko sia sa iya trono.

10 Kag natabo ini nga isa sang sekreto nga mga pagkunsabo ang nagpatay sa iya sa isa ka sekreto nga alagyan, kag gin-angkon para sa iya kaugalingon ang ginharian; kag ang iya ngalan amo si Lib; kag si Lib isa ka lalaki nga dako sing panglawason, labaw sangsa bisan sin-o nga lalaki sa tanan nga katawhan.

11 Kag natabo ini nga sa una nga tuig ni Lib si Coriantumer nagkadto sa duta sang Moron, kag nakig-away batok kay Lib.

12 Kag natabo ini nga nakig-away sia batok kay Lib nga sa diin ginlabo ni Lib ang iya butkon nga napilasan sia; apang, ang kasoldadohan ni Coriantumer nagsalakay kay Lib, nga nalagyo sia padulong sa mga dulonan sa baybayon.

13 Kag natabo ini nga ginlagas sia ni Coriantumer; kag si Lib nakig-away batok sa iya sa baybayon.

14 Kag natabo ini nga ginpierde ni Lib ang kasoldadohan ni Coriantumer, nga nalagyo sila liwat padulong sa kamingawan sang Akis.

15 Kag natabo ini nga ginlagas sia ni Lib tubtob nga nakaabot sia sa mga kapatagan sang Agos. Kag gindala ni Coriantumer ang tanan nga katawhan upod sa iya samtang nagpalagyo sia sa atubang ni Lib sa sinang bahin sang kadutaan nga sa diin sia nalagyo.

16 Kag sang nakaabot sia sa mga kapatagan sang Agos nakig-away sia batok kay Lib, kag ginlabo niya sia tubtob nga napatay sia; apang, ang utod ni Lib nagsalakay, bulos sa iya, batok kay Coriantumer, kag ang inaway nangin tuman kagrabe, nga sa diin si Coriantumer nalagyo liwat sa atubang sang kasoldadohan sang utod ni Lib.

17 Karon ang ngalan sang utod ni Lib amo si Siz. Kag natabo ini nga ginlagas ni Siz si Coriantumer, kag ginlaglag niya ang madamo nga siyudad, kag ginpamatay niya ang mga babayi kag mga kabataan, kag ginpanunog niya ang mga siyudad.

18 Kag naglapnag ang kahadlok kay Siz sa bug-os nga kadutaan; huo, may pagsinggit nga naglapnag sa bug-os nga kadutaan—Sin-o ang makatindog sa atubang sang kasoldadohan ni Siz? Tan-awa, ginalaglag niya ang duta sa iya atubang!

19 Kag natabo ini nga ang katawhan nagsugod sa pagtipon bilang mga kasoldadohan sa bug-os nga ibabaw sang kadutaan.

20 Kag nabahin-bahin sila; kag ang isa ka bahin sa ila nalagyo padulong sa kasoldadohan ni Siz, kag ang isa ka bahin sa ila nalagyo padulong sa kasoldadohan ni Coriantumer.

21 Kag sa pagkadako kag pagkatayuyon sang giyera, kag sa pagkalawig sang talan-awon sang pagpaagay sang dugo kag pagpamatay, nga ang bug-os nga ibabaw sang kadutaan natabunan sang mga lawas sang mga nagkalamatay.

22 Kag sa pagkadasig kag sa pagkaabtik sang giyera nga wala na sing nabilin agud ilubong ang mga patay, kundi nga nagapadayon sila halin sa pagpaagay sang dugo pakadto sa isa pa gid ka pagpaagay sang dugo, nga ginabayaan ang mga lawas sang mga lalaki, mga babayi, kag mga kabataan nga nagalinapta sa ibabaw sang kadutaan, agud mangin kalan-on sang mga ulod sa unod.

23 Kag ang baho sini nagaalisngaw sa ibabaw sang kadutaan, bisan sa tanan nga ibabaw sang kadutaan; gani ang katawhan ginatublag sa adlaw kag sa gab-i tungod sang baho sini.

24 Apang, si Siz wala nag-untat sa paglagas kay Coriantumer; kay nagpanumpa sia nga itimalus sa iya kaugalingon kay Coriantumer ang dugo sang iya utod, nga ginpatay, kag suno sa pulong sang Ginuo nga nag-abot kay Eter nga si Coriantumer indi mapatay paagi sa espada.

25 Kag gani makita naton nga ginbisita sila sang Ginuo sa kabug-osan sang iya kaakig, kag ang ila kalainan kag mga kangil-aran naghanda sang paagi para sa ila wala’y katubtuban nga kalaglagan.

26 Kag natabo ini nga ginlagas ni Siz si Coriantumer pa-este, bisan tubtob sa mga dulonan malapit sa baybayon, kag didto nakig-away sia batok kay Siz sa sulod sang tatlo ka adlaw.

27 Kag sa tuman ka makakululba ang kalaglagan sa mga kasoldadohan ni Siz nga ang katawhan nagsugod nga mahadlok, kag nagsugod sa pagpalagyo sa atubang sang mga kasoldadohan ni Coriantumer; kag nalagyo sila sa duta sang Corihor, kag gin-ubos pamatay ang mga pumuluyo sa ila atubang, tanan sila nga indi magbuylog sa ila.

28 Kag nagpatindog sila sang ila mga tolda sa patag sang Corihor; kag si Coriantumer nagpatindog sang iya mga tolda sa patag sang Siur. Karon ang patag sang Siur malapit sa bungyod sang Comnor; gani, gintipon ni Coriantumer ang iya mga kasoldadohan sa bungyod sang Comnor, kag nagpatunog sang trumpeta sa mga kasoldadohan ni Siz agud hangkaton sila sa inaway.

29 Kag natabo ini nga nagsulong sila, apang napanabog liwat; kag nagsulong sila sa ika-duha nga tion, kag napanabog sila liwat sa ika-duha nga tion. Kag natabo ini nga nagsulong sila liwat sa ika-tatlo nga tion, kag ang inaway nangin tuman kagrabe.

30 Kag natabo ini nga ginlabo ni Siz si Coriantumer nga ginhatagan niya sia sing madamo nga madalom nga mga pilas; kag si Coriantumer, nga nadulaan sing iya dugo, nalipong, kag gindala palayo nga daw patay na.

31 Karon ang pagkadula sang mga lalaki, mga babayi kag mga kabataan sa duha ka bahin tuman kadako nga si Siz nagsugo sa iya katawhan nga indi na nila paglagson ang mga kasoldadohan ni Coriantumer; gani, nagbalik sila sa ila kampo.