1 Kag karon ako, si Moroni, magapadayon sa pagtapos sang akon kasulatan parte sa kalaglagan sang katawhan nga akon ginasulat.

2 Kay tan-awa, ginsikway nila ang tanan nga pulong ni Eter; kay matuod gid nga ginsugiran niya sila sang tanan nga butang, halin pa sa ginsuguran sang tawo; kag pagkatapos nga naghubas ang mga tubig halin sa ibabaw sining kadutaan nangin isa ini ka pinili nga duta labaw sa tanan nga iban pa nga mga kadutaan, isa ka pinili nga duta sang Ginuo; gani luyag sang Ginuo nga ang tanan nga tawo mag-alagad sa iya nga nagapuyo sa ibabaw sini;

3 Kag ini ang lugar sang Bag-ong Jerusalem, nga magapanaog halin sa langit, kag ang balaan nga santuaryo sang Ginuo.

4 Tan-awa, nakita ni Eter ang mga adlaw ni Cristo, kag naghambal sia parte sing isa ka Bag-ong Jerusalem sa sini nga kadutaan.

5 Kag naghambal man sia parte sa panimalay ni Israel, kag sang Jerusalem nga sa diin si Lehi magahalin—pagkatapos nga malaglag ini itukod ini liwat, isa ka balaan nga siyudad para sa Ginuo; gani, indi mahimo nga mangin bag-o ini nga Jerusalem kay iya pa ini sang dumaan nga panahon; apang itukod ini liwat, kag mangin isa ka balaan nga siyudad sang Ginuo; kag itukod ini para sa panimalay ni Israel—

6 Kag isa ka Bag-ong Jerusalem ang itukod sa sini nga kadutaan, para sa nagkalabilin sang kaliwatan ni Jose, nga para sa amo nga mga butang nangin may sulundan.

7 Kay pareho nga gindala ni Jose ang iya amay sa duta sang Egipto, sa amo man didto na sia napatay; gani, ang Ginuo nagdala sing nagkalabilin sang kaliwatan ni Jose pagwa sa duta sang Jerusalem, agud nga mangin maluluy-on sia sa kaliwatan ni Jose nga indi sila magkalamatay, pareho nga nangin maluluy-on sia sa amay ni Jose nga indi sia mapatay.

8 Gani, ang nagkalabilin sang panimalay ni Jose ipahamtang sa sini nga kadutaan; kag ini mangin duta nga ila palanublion; kag magapauswag sila sing isa ka balaan nga siyudad para sa Ginuo, pareho sang Jerusalem sang dumaan nga panahon; kag indi na sila masimponan pa tubtob nga mag-abot ang katapusan kon ang duta magataliwan na.

9 Kag mangin may bag-o nga langit kag bag-o nga duta; kag mangin pareho sila sang sinauna luwas lang nga ang sinauna magataliwan, kag ang tanan nga butang mangin bag-o.

10 Kag dayon magaabot ang Bag-ong Jerusalem; kag bulahan sila nga nagapuyo sa sini, kay amo ini sila inang maputi ang mga biste paagi sa dugo sang Kordero; kag sila inang mga naisip sa nagkalabilin sang kaliwatan ni Jose, nga iya sang panimalay ni Israel.

11 Kag dayon magaabot man ang Jerusalem sang dumaan nga panahon; kag ang mga pumuluyo sini, bulahan sila, kay nahugasan sila sa dugo sang Kordero; kag sila inang mga ginlapta kag gintipon halin sa apat ka pamusod sang duta, kag halin sa mga pungsod sa norte, kag mga umalambit sang katumanan sang kasugtanan nga ginhimo sang Dios upod sa ila amay nga si Abraham.

12 Kag kon mag-abot ining mga butang, ipahanabo ang balaan nga kasulatan nga nagasiling, yara sila nga mga nauna, nga mangin ulihi; kag yara sila nga naulihi, nga mangin una.

13 Kag nagahana na ako sa pagsulat sing dugang, apang ginadumilian ako; apang dalagko kag dalayawon ang mga propesiya ni Eter; apang ginkabig nila sia nga wala sing pulos, kag gintabog sia; kag gintago niya ang iya kaugalingon sa guab sing isa ka bato sa adlaw, kag sa gab-i nagagwa sia nga ginalantaw ang mga butang nga magakalatabo sa katawhan.

14 Kag samtang nagapuyo sia sa guab sing isa ka bato ginhimo niya ang nabilin sining kasulatan, nga nagalantaw sang mga kalaglagan nga nagakalatabo sa katawhan, sa gab-i.

15 Kag natabo ini nga sa sina man nga tuig nga sa diin gintabog sia halin sa katawhan nagsugod nga may isa ka dako nga giyera sa katawhan, kay may madamo nga nagtuluhaw, nga gamhanan nga mga lalaki, kag naghangad sa pagpatay kay Coriantumer paagi sa ila sekreto nga mga plano sang kalainan, nga nasambit na.

16 Kag karon si Coriantumer, nga nakatuon, mismo, sang tanan nga taktika sang giyera kag tanan nga katusohan sang kalibutan, gani nakig-away sia batok sa ila nga naghangad sa paglaglag sa iya.

17 Apang wala sia naghinulsol, kag wala man ang iya maanyag nga mga anak nga lalaki ukon mga anak nga babayi; kag wala man ang maanyag nga mga anak nga lalaki kag mga anak nga babayi ni Cohor; kag wala man ang maanyag nga mga anak nga lalaki kag mga anak nga babayi ni Corihor; kag sa malip-ot nga pulong, wala sing sin-o man sa maanyag nga mga anak nga lalaki kag mga anak nga babayi sa ibabaw sang bug-os nga duta nga naghinulsol sang ila mga sala.

18 Gani, natabo ini nga sa una nga tuig nga si Eter nagpuyo sa guab sing isa ka bato, may madamo nga katawhan nga nagkalamatay paagi sa espada sadtong sekreto nga mga pagkunsabo, nga nagapakig-away batok kay Coriantumer agud maangkon nila ang ginharian.

19 Kag natabo ini nga ang mga anak nga lalaki ni Coriantumer nakig-away sing tuman kag nag-agay ang madamo nga dugo.

20 Kag sa ika-duha nga tuig ang pulong sang Ginuo nag-abot kay Eter, nga dapat sia magkadto kag magpropesiya kay Coriantumer nga, kon maghinulsol sia, kag ang tanan niya nga panimalay, ihatag sa iya sang Ginuo ang iya ginharian kag luwason ang katawhan—

21 Kay indi gani pagalaglagon sila, kag ang tanan niya nga panimalay luwas lang sa iya kaugalingon. Kag magakabuhi lamang sia agud makita ang katumanan sang mga propesiya nga ginhambal parte sa isa pa ka katawhan nga magabaton sang kadutaan bilang ila palanublion; kag si Coriantumer igalubong paagi sa ila; kag ang tagsa ka kalag malaglag luwas lang kay Coriantumer.

22 Kag natabo ini nga si Coriantumer wala naghinulsol, kag wala man ang iya panimalay, kag wala man ang katawhan; kag ang mga giyera wala nag-untat; kag ginhangad nila nga patyon si Eter, apang nalagyo sia halin sa ila atubang kag nagpanago liwat sa guab sang bato.

23 Kag natabo ini nga may nag-abot nga si Shared, kag sia man nakig-away batok kay Coriantumer; kag ginpierde niya sia, sa bagay nga sa ika-tatlo nga tuig gindala niya sia sa pagkabihag.

24 Kag ang mga anak nga lalaki ni Coriantumer, sa ika-apat nga tuig, nagpierde kay Shared, kag gin-angkon liwat ang ginharian para sa ila amay.

25 Karon nagsugod nga may isa ka giyera sa bug-os nga ibabaw sang kadutaan, ang tagsa ka tawo upod sa iya guban nga nagapakig-away para sa sinang iya luyag.

26 Kag may mga tulisan, kag sa malip-ot nga pulong, tanan nga sari sang kalainan sa bug-os nga ibabaw sang kadutaan.

27 Kag natabo ini nga si Coriantumer tuman nga naakig kay Shared, kag nagsulong sia batok sa iya upod sa iya mga kasoldadohan agud magpakig-away; kag nagtabuay sila sa dako nga kaakig, kag nagtabuay sila sa patag sang Gilgal; kag ang inaway nangin tuman kagrabe.

28 Kag natabo ini nga si Shared nakig-away batok sa iya sa sulod sang tatlo ka adlaw. Kag natabo ini nga ginpierde sia ni Coriantumer, kag ginlagas sia tubtob nga nakaabot sia sa mga kapatagan sang Heslon.

29 Kag natabo ini nga si Shared nakig-away liwat sa iya sa mga kapatagan; kag tan-awa, ginpierde niya si Coriantumer, kag ginpaisol sia pabalik liwat sa patag sang Gilgal.

30 Kag si Coriantumer nakig-away liwat kay Shared sa patag sang Gilgal nga sa diin ginpierde niya si Shared kag ginpatay sia.

31 Kag si Coriantumer napilasan ni Shared sa iya paa, nga wala sia nakig-away liwat sa sulod sang duha ka tuig, nga sa amo nga panahon ang tanan nga katawhan sa ibabaw sang kadutaan nagapaagay sang dugo, kag wala sing bisan sin-o nga makapugong sa ila.