1 Kag karon ako, si Moroni, magapadayon sa pagsulat sang kasulatan ni Jared kag sang iya utod.

2 Kay natabo ini, pagkatapos nga nahanda sang Ginuo ang mga bato nga gindala sang utod ni Jared sa ibabaw sang bukid, ang utod ni Jared nagdulhog halin sa bukid, kag ginpamutang ang mga bato sa sulod sang mga sakayan-dagat nga ginhanda, isa sa tagsa ka punta sini; kag tan-awa, naghatag ang mga ini sing kasanag sa mga sakayan-dagat.

3 Kag gani ginpahanabo sang Ginuo nga ang mga bato magsiga sa kadudulman, nga maghatag sing kasanag sa mga lalaki, mga babayi, kag mga kabataan agud indi sila magtabok sa dako nga mga tubig sa kadudulman.

4 Kag natabo ini nga sang nahanda nila ang tanan nga sari sang pagkaon, agud paagi sa sini mabuhi sila sa ibabaw sang tubig, kag pagkaon man para sa ila mga panong kag mga kasapatan, kag kon ano man nga sapat ukon hayop ukon pispis nga ila dal-on upod sa ila—kag natabo ini nga sang nahimo na nila ining tanan nga butang nagsulod sila sa ila mga sakayan-dagat ukon mga barkasa, kag nagtulak padulong sa dagat, nga ginatugyan ang ila mga kaugalingon sa Ginuo nga ila Dios.

5 Kag natabo ini nga ginpahanabo sang Ginuong Dios nga may mabaskog nga hangin nga magahuyop sa ibabaw sang mga tubig, padulong sa duta nga ginpanaad; kag gani gintulod sila sa ibabaw sang mga balod sang dagat sa atubang sang hangin.

6 Kag natabo ini nga madamo nga beses sila nga naglugdang sa kaidadalman sang dagat tungod sang daw-bukid nga mga balod nga nagahampas sa ila, kag amo man sang dalagko kag makahaladlok nga mga unos nga gintuga sang kabaskog sang hangin.

7 Kag natabo ini nga kon maglugdang sila sa kadadalman wala sing tubig nga makahalit sa ila, ang ila mga sakayan-dagat nga hugot pareho sing isa ka yahong, kag amo man nga hugot ang mga ini pareho sang arka ni Noe; gani sang nalikupan sila sang madamo nga mga tubig nag-ampo sila sa Ginuo, kag gindala niya sila liwat sa ibabaw sang mga tubig.

8 Kag natabo ini nga ang hangin wala gid nag-untat sa paghuyop padulong sa duta nga ginpanaad samtang yara sila sa ibabaw sang mga tubig; kag gani ginpadpad sila sa atubang sang hangin.

9 Kag nagkinanta sila sang mga pagdayaw sa Ginuo; huo, ang utod ni Jared nagkanta sang mga pagdayaw sa Ginuo, kag nagpasalamat sia kag nagdayaw sa Ginuo sa bilog nga adlaw; kag sang nag-abot ang gab-i, wala sila nag-untat sa pagdayaw sa Ginuo.

10 Kag gani ginpadpad sila; kag wala sing halimaw sang dagat nga makawasak sa ila, kag wala man sang balyena nga makahalit sa ila; kag dalayon sila nga may kasanag, bisan kon sa ibabaw man sang tubig ukon sa idalom sang tubig.

11 Kag gani ginpadpad sila, tatlo ka gatos kag kwarenta’y kwatro ka adlaw sa tubig.

12 Kag nagdungka sila sa baybayon sang duta nga ginpanaad. Kag sang nakatapak na sila sang ila mga tiil sa mga baybayon sang duta nga ginpanaad nagluhod sila sa ibabaw sang kadutaan, kag nagpaubos sang ila mga kaugalingon sa atubang sang Ginuo, kag nagpaagay sang mga luha sang kalipay sa atubang sang Ginuo, tungod sang kabugana sang iya mapinalanggaon nga mga kaluoy sa ila.

13 Kag natabo ini nga naglakat sila sa ibabaw sang kadutaan, kag nagsugod sa pag-uma sang duta.

14 Kag si Jared may apat ka anak nga lalaki; kag ginatawag sila nga sanday Jacom, kag Gilga, kag Maha, kag Orihas.

15 Kag ang utod ni Jared nangin amay man sang mga anak nga lalaki kag mga anak nga babayi.

16 Kag ang mga abyan ni Jared kag sang iya utod may kadamuon nga mga beynte dos ka tawo; kag nangin amay man sila sing mga anak nga lalaki kag mga anak nga babayi antes sila nag-abot sa duta nga ginpanaad; kag gani nagsugod sila nga magdamo.

17 Kag gintudloan sila nga maglakat sing mapainubuson sa atubang sang Ginuo; kag gintudloan man sila halin sa kahitaasan.

18 Kag natabo ini nga nagsugod sila nga maglinapta sa ibabaw sang kadutaan, kag sa pagdamo kag sa pag-uma sang duta; kag nagbakod sila sa kadutaan.

19 Kag ang utod ni Jared nagsugod nga magtigulang kag nakita nga pat-od gid nga sa indi madugay magapanaog na sia sa lulubngan; gani nagsiling sia kay Jared: Tiponon naton ang aton katawhan agud maisip naton sila, agud mahibal-an naton halin sa ila kon ano ang ila pangayuon halin sa aton antes kita magpanaog sa aton mga lulubngan.

20 Kag gani gintipon ang katawhan. Karon ang kadamuon sang mga anak nga lalaki kag sang mga anak nga babayi sang utod ni Jared beynte dos ka tawo; kag ang kadamuon sang mga anak nga lalaki kag mga anak nga babayi ni Jared dose, kag apat sini ang iya anak nga lalaki.

21 Kag natabo ini nga gin-isip nila ang ila katawhan; kag pagkatapos nga naisip nila sila, ginpamangkot nila sila sang mga butang nga luyag nila nga ila himuon antes sila magpanaog sa ila mga lulubngan.

22 Kag natabo ini nga ang katawhan nagpangayo sa ila nga maghaplas sila sing isa sang ila mga anak nga lalaki agud mangin hari nila.

23 Kag karon tan-awa, nagpakalisud ini sa ila. Kag ang utod ni Jared nagsiling sa ila: Pat-od gid nga ini nga butang magaresulta sa pagkabihag.

24 Apang si Jared nagsiling sa iya utod: Tugoti sila nga may yara sila sang hari. Kag gani nagsiling sia sa ila: Magpili kamo halin sa amon mga anak nga lalaki sing isa ka hari, bisan kon sin-o ang inyo luyag.

25 Kag natabo ini nga ginpili nila bisan ang panganay sang utod ni Jared; kag ang iya ngalan amo si Pagag. Kag natabo ini nga nagbalibad sia kag indi maluyag nga mangin ila hari. Kag luyag sang katawhan nga piliton sia sang iya amay, apang indi ang iya amay; kag ginsugo niya sila nga indi nila dapat nga piliton ang isa ka tawo nga mangin ila hari.

26 Kag natabo ini nga ginpili nila ang tanan nga utod nga lalaki ni Pagag, kag indi sila.

27 Kag natabo ini nga indi man ang mga anak nga lalaki ni Jared, bisan tanan luwas lang sa isa; kag si Orihas ginhaplas nga mangin hari sang katawhan.

28 Kag nagsugod sia sa paggahum, kag ang katawhan nagsugod sa pag-uswag; kag nangin tuman sila kamanggaranon.

29 Kag natabo ini nga napatay si Jared, kag ang iya man utod.

30 Kag natabo ini nga si Orihas naglakat sing mapainubuson sa atubang sang Ginuo, kag nagdumdum kon ano kadalagko nga mga butang ang ginhimo sang Ginuo para sa iya amay, kag gintudloan man ang iya katawhan kon ano kadalagko nga mga butang ang ginhimo sang Ginuo para sa ila mga amay.