1 Kag natabo ini nga nangin amay sia ni Omer, kag si Omer ang naggahum bulos sa iya. Kag si Omer nangin amay ni Jared; kag si Jared nangin amay sang mga anak nga lalaki kag mga anak nga babayi.

2 Kag si Jared nagrebelde batok sa iya amay, kag nagkadto kag nagpuyo sa duta sang Het. Kag natabo ini nga gin-into niya ang madamo nga katawhan, tungod sang iya tuso nga mga pulong, tubtob nga nakuha niya ang katunga sang ginharian.

3 Kag sang nakuha niya ang katunga sang ginharian nakig-away sia sa iya amay, kag gindala ang iya amay sa pagkabihag, kag ginpaalagad sia sa tion sang iya pagkabihag;

4 Kag karon, sa mga adlaw sang pagginahum ni Omer yara sia sa pagkabihag sa katunga sang iya mga adlaw. Kag natabo ini nga nangin amay sia sang mga anak nga lalaki kag mga anak nga babayi, nga nalakip diri sanday Esrom kag Coriantumer;

5 Kag tuman sila kaakig tungod sang mga kahimoan ni Jared nga ila utod, sa bagay nga nagtipon sila sang kasoldadohan kag nakig-away kay Jared. Kag natabo ini nga nakig-away sila sa iya sa gab-i.

6 Kag natabo ini nga sang napamatay na nila ang kasoldadohan ni Jared naghana sila nga patyon man sia; kag nagpakitluoy sia sa ila nga indi nila sia pagpatyon, kag iampo niya ang ginharian sa iya amay. Kag natabo ini nga gintugotan nila sia nga mabuhi.

7 Kag karon si Jared nangin tuman kamasinulub-on tungod sang pagkadula sang iya ginharian, kay ginpahamtang niya ang iya tagipusuon sa ginharian kag sa himaya sang kalibutan.

8 Karon ang anak nga babayi ni Jared nga tuman kaalam, kag nakita ang kasubo sang iya amay, naghunahuna sa pagpadihot sing isa ka plano nga paagi sa sini mapanumbalik niya ang ginharian sa iya amay.

9 Karon ang anak nga babayi ni Jared tuman kaanyag. Kag natabo ini nga nakighambal sia sa iya amay, kag nagsiling sa iya: Ano bala ang kabangdanan nga ang akon amay nagakasubo sing tuman? Wala bala sia makabasa sang kasulatan nga gindala sang aton mga amay halin sa tabok sang dako nga kadadalman? Tan-awa, wala bala sang kasaysayan parte sa ila sang dumaan nga panahon, nga sila paagi sa ila sekreto nga mga plano nag-angkon sang mga ginharian kag dako nga himaya?

10 Kag karon, gani, ipatawag sang akon amay si Akis, ang anak ni Kimnor; kag tan-awa, maanyag ako, kag magasaot ako sa iya atubang, kag palipayon ko sia, agud handumon niya ako nga pangasaw-on; gani kon pangayuon niya sa imo nga ihatag mo ako sa iya agud pangasaw-on, dayon magasiling ka: Ihatag ko sia kon dal-on mo sa akon ang ulo sang akon amay, ang hari.

11 Kag karon si Omer isa ka abyan ni Akis; gani, sang ginpatawag ni Jared si Akis, ang anak nga babayi ni Jared nagsaot sa iya atubang kag napalipay niya sia, sa bagay nga ginpangayo niya sia nga pangasaw-on. Kag natabo ini nga nagsiling sia kay Jared: Ihatag sia sa akon agud akon pangasaw-on.

12 Kag si Jared nagsiling sa iya: Ihatag ko sia sa imo kon dal-on mo sa akon ang ulo sang akon amay, ang hari.

13 Kag natabo ini nga gintipon ni Akis sa balay ni Jared ang tanan niya nga paryente, kag nagsiling sa ila: Magapanumpa bala kamo sa akon nga mangin tampad kamo sa akon sa butang nga akon pangayuon sa inyo?

14 Kag natabo ini nga tanan sila nanumpa sa iya, sa Dios sang langit, kag amo man sa kalangitan, kag amo man sa duta, kag sa ila mga ulo, nga kon sin-o man ang magtalikod sa bulig nga ginapangayo ni Akis madulaan sang iya ulo; kag kon sin-o man ang magabuyagyag sang kon ano nga butang nga ginpahibalo sa ila ni Akis, ang amo man madulaan sang iya kabuhi.

15 Kag natabo ini nga gani nagkaisa sila upod kay Akis. Kag ginpasumpa sila ni Akis sang mga panumpa nga ginhatag nila sadtong dumaan nga panahon nga naghangad man sang gahum, nga ginpasa-pasa bisan halin kay Cain, nga isa ka manugpatay-tawo halin pa sang ginsuguran.

16 Kag ginhuptan ang mga ini paagi sa gahum sang yawa agud ipahayag ining mga panumpa sa katawhan, agud mapabilin sila sa kadudulman, agud buligan inang mga nagahangad sang gahum nga mag-angkon sang gahum, kag magpamatay, kag magpangagaw, kag magbinutig, kag maghimo sang tanan nga sari sang kalainan kag mga pagkamakihilawason.

17 Kag ang anak nga babayi ni Jared ang nagbutang sini sa iya tagipusuon nga usisaon ining mga butang sang dumaan nga panahon; kag ginbutang ini ni Jared sa tagipusuon ni Akis; gani, ginpahayag ini ni Akis sa iya mga paryente kag mga abyan, nga ginapatalang sila paagi sa matahum nga mga promisa nga himuon ang kon ano man nga butang nga iya luyag.

18 Kag natabo ini nga nagtukod sila sing isa ka sekreto nga pagkunsabo, bisan pareho sa ila sang dumaan nga panahon; nga ang amo nga pagkunsabo labing makangilil-ad kag malain sa tanan, sa panulok sang Dios;

19 Kay ang Ginuo wala nagahikot paagi sa sekreto nga mga pagkunsabo, kag indi man niya buot nga ang tawo magpaagay sang dugo, kundi nga sa tanan nga butang gindumilian ini, halin pa sa pagsugod sang tawo.

20 Kag karon ako, si Moroni, wala nagasulat sang sari sang ila mga panumpa kag mga pagkunsabo kay ginpahibalo na ini sa akon nga yara ang mga ini sa tanan nga katawhan, kag yara ang mga ini sa mga Lamanhon.

21 Kag ang mga ini ang gintunaan sang kalaglagan sining katawhan nga amo karon ang akon ginatumod, kag sang kalaglagan man sang katawhan ni Nefi.

22 Kag kon ano man nga nasyon ang magasakdag sinang sekreto nga mga pagkunsabo, agud mag-angkon sang gahum kag manggad, tubtob nga maglapnag ang mga ini sa bug-os nga nasyon, tan-awa, malaglag sila; kay ang Ginuo indi magtugot nga ang dugo sang iya mga santos, nga ipaagay nila, dalayon nga magpakitluoy sa iya halin sa duta agud itimalus sila apang wala niya sila pag-itimalus.

23 Gani, O kamo nga mga Gentil, kinaalam ini sa Dios nga ining mga butang ipakita sa inyo, nga paagi sa sini makahinulsol kamo sang inyo mga sala, kag indi magtugot nga ining makamamatay nga mga pagkunsabo magpangibabaw sa inyo, nga gintukod agud mag-angkon sing gahum kag manggad—kag ang buhat, huo, bisan ang buhat sang kalaglagan magatupa sa inyo, huo, bisan ang espada sang hustisya sang Wala’y Katapusan nga Dios magatupa sa inyo, sa inyo kapierdihan kag kalaglagan kon tugotan ninyo nga matabo ining mga butang.

24 Gani, ang Ginuo nagasugo sa inyo, kon makita ninyo ining mga butang nga matabo sa inyo nga magabugtaw kamo sa paghangop sang inyo makahaladlok nga kahimtangan, tungod sining sekreto nga pagkunsabo nga mangin yara sa inyo; ukon kalisud sa sini, tungod sang dugo nila nga nagkalamatay; kay nagapakitluoy sila halin sa yab-ok agud itimalus sa sini, kag amo man sa mga nagtukod sini.

25 Kay matabo ini nga kon sin-o man ang nagatukod sini nagahangad sa pagguba sang kahilwayan sang tanan nga kadutaan, mga nasyon, kag mga pungsod; kag ginapahanabo sini ang kalaglagan sang tanan nga katawhan, kay gintukod ini sang yawa, nga amo ang amay sang tanan nga kabutigan; bisan inang amo man nga butigon nga nagsulay sang aton una nga mga ginikanan, huo, bisan inang amo man nga butigon nga nagsugo sa tawo nga magpatay halin sa ginsuguran; nga nagpatig-a sang mga tagipusuon sang mga tawo nga ginpamatay nila ang mga propeta, kag ginpangbato sila, kag ginpanabog sila halin sa ginsuguran.

26 Gani, ako, si Moroni, ginsugo sa pagsulat sining mga butang agud ang kalainan mauntat na, kag ang tion magaabot nga si Satanas wala sing gahum sa mga tagipusuon sang mga anak sang katawhan, kundi nga makumbinsi sila sa paghimo sang maayo sing dalayon, agud nga makaabot sila sa tuburan sang tanan nga pagkamatarong kag maluwas.