Minerva K. Teichert (1888–1976), Alma Baptizes in the Waters of Mormon1949–1951, oil sa masonite, 35⅞ x 48 ka pulgada. Brigham Young University Museum of Art, 1969

Disyembre 2–8: “Sa Pagtipig sa Ila sa Husto nga Dalan”

Moroni 1–6

Sang matapos niya kumpleto ang rekord sang iya amay parte sa mga Nefinhon kag ang pagpalip-ot sang rekord sang mga Jarednon, abi ni Moroni nga natapos na ang iya buluhaton sang pagtipig-sang-mga-kasulatan (tan-awa sa Moroni 1:1). Ano pa ang dapat ihambal parte sa duha ka nasyon nga napapas na sing lubos? Pero nakita ni Moroni ang aton panahon (tan-awa sa Mormon 8:35), kag nainspirar sia sa “pagsulat sang pila pa ka dugang nga mga butang, agud ayhan mahimo nga mangin may bili … sa pila ka adlaw nga palaabuton” (Moroni 1:4). Nahibal-an niya nga magaabot ang malapnagon nga apostasiya, nga nagadala sang kagumon parte sa mga ordinansa sang priesthood kag sa relihiyon sa kabilugan. Siguro amo ini ang rason nga naghatag sia sang nagaklaro nga mga detalye parte sa sakramento, bunyag, paghatag sang regalo sang Balaan nga Espiritu, kag sang mga bugay sang pagtililipon upod sa pareho nga tumuluo sa “pagtipig [sang kada isa] sa husto nga dalan, … nga nagasandig lamang sa mga merito ni Cristo, nga amo ang pangulo kag manughimpit sang [aton] pagtuo” (Moroni 6:4). Ang malahalon nga mga panan-aw pareho sang mga ini ang nagahatag sa aton sang rason nga magpasalamat nga gintipigan sang Ginuo ang kabuhi ni Moroni agud sa “pagsulat sang pila pa ka dugang nga mga butang” (Moroni 1:4).

Mga Ideya sa Pagtuon sa Puluy-an kag sa Simbahan

Moroni 1

Sarang ko sundon si Jesucristo bisan pa may oposisyon.

Sa imo pagbasa sang Moroni 1, ano ang nagainspirar sa imo parte sa pagkatampad ni Moroni sa Ginuo kag sa iya buluhaton? Ano ang pila ka mga paagi nga ang isa ka tawo mahimo nga “[magpanghiwala] [sang] mga hiyas sang Dios”? Moroni 1:2–3 Binagbinaga kon paano ka mangin tampad kay Jesucristo, bisan pa nga magapangatubang ka sang mga pagtilaw kag oposisyon.

Moroni 2–6

Ang mga ordinansa sang priesthood kinahanglan hikuton suno sa ginasugo sang Ginuo.

Si Moroni nagapalagyo para mabuhi samtang ginasulat niya ining mga kapitulo. Ngaa nga ginhimulatan pa niya nga magsulat parte sa administratibo nga mga detalye pareho sang kon paano maghikot sang mga ordinansa? Binagbinaga ini samtang imo ginabasa ang Moroni 2–6. Ngaa sa banta mo nga importante ining mga detalye sa Ginuo? Ari ang pila ka mga pamangkot nga mahimo makagiya sa imo pagtuon:

Kumpirmasyon (Moroni 2; 6:4).Ano ang ginatudlo sa imo sang mga instruksyon sang Manluluwas sa Moroni 2:2 parte sa ordinansa sang kumpirmasyon? Paano mo ipaathag kon ano ang buot silingon sang “maliso kag matinluan paagi sa gahum sang Balaan nga Espiritu”? (Moroni 6:4).

Ordinasyon sa priesthood (Moroni 3).Ano ang makita mo sa sining kapitulo nga makabulig sa isa ka tawo sa paghanda nga ma-ordinan sa priesthood? Ano ang imo makita nga makabulig sa isa ka tawo nga maghanda sa paghikot sang ordinasyon?

Ang sakramento (Moroni 4–5; 6:6).Ano ang pwede mo obrahon para himuon ang sakramento nga tampok nga espirituhanon nga eksperiyensya sang imo semana?

Bunyag (Moroni 6:1–3).Ano ang imo ginahimo para padayon nga mangin kwalipikado sa bunyag?

Si Jesus nagtudlo kon paano dapat hikuton ang mga ordinansa

Base sa imo natun-an, paano mo liwaton ang mga paagi nga nagapamensar ka, nagapartisipar, ukon nagahanda sang iban para sa sining mga ordinansa?

Tan-awa man sa Doktrina kag mga Kasugtanan 84:20.

Magrole-play. Isa ka maayo nga paagi para madumduman ang imo ginatun-an amo nga ipaathag ini sa iban. Halimbawa, tilawi nga i-role-play ang mga sitwasyon pareho sini: Ang isa ka abyan indi sigurado kon handa na sia nga bunyagan. Paano mo gamiton ang Moroni 6 para buligan sia?

Moroni 4–5

Ang pag-ambit sang sakramento nagabulig sa akon nga mas mahilapit kay Jesucristo.

Siguro kapila mo na ka beses nabatian ang mga pangamuyo sa sakramento, pero kapila mo ginapamensar sang maayo kon ano ang buot silingon sang mga pulong sini? Basi pwede mo tilawan nga isulat ang duha ka mga pangamuyo sa sakramento halin sa imo memorya. Dayon ikumparar ang imo ginsulat sa Moroni 4:3 kag 5:2. May natalupangdan ka bala sa sining mga pangamuyo nga wala mo matalupangdi sang una?

Moroni 6:4–9

Ang mga disipulo ni Jesucristo nagaulikid para sa mga kalag sang kada isa.

Ang magpili nga sundon si Cristo iya sang indibidwal, pero ang kapareho nga mga tumuluo makabulig sa aton nga magpabilin “sa husto nga dalan” (Moroni 6:4–5). Ano ang ginhimo sang mga miyembro sang Simbahan sa panahon ni Moroni para pabakuron ang kada isa? Sa imo pagbasa sang Moroni 6:4–9, binagbinaga ang mga bugay nga nagaabot bangud ikaw “gin-isip sa tunga sang katawhan sang simbahan ni Cristo” (Moroni 6:4

Pwede mo man hunahunaon ang mga tawo nga nagatambong sa imo ward ukon branch. May ara bala nga posible nagakinahanglan sang imo pagpalangga—siguro inang bag-o nangin miyembro ukon bag-o lang nagbalik?   Basi makakita ka sang inspirasyon sa seksyon I sang mensahe ni Pangulong Dallin H. Oaks nga “Ang Kakinahanglanon sang Simbahan” (Liahona, Nob. 2021, 24–25).

Samtang ginabinagbinag mo kon ano ang kahulugan sang “mabatiti sang maayo nga pulong sang Dios” (Moroni 6:4), basi makabulig ang pagpanumdom sang mga panginahanglan sang binhi ukon sang lapsag—kag kon ano ang matabo kon mapabay-an ini. Magpangita sa Moroni 6:4–9 sang mga ideya kon paano ka makabulig sa “pagbatiti” sang iban sa espirituhanon. Paano ka nabuligan batiti sang imo isigka-disipulo?

Indi maathag sa tanan kon ngaa importante nga “[ma]isip sila sa tunga sang katawhan sang simbahan ni Cristo” kag “masunson nga [mag]tililipon sing tingob” sa mga miting sa Simbahan. Paano mo ipaathag kon ngaa nagapasalamat ka nga mangin miyembro sang Simbahan ni Jesucristo? (tan-awa sa iban nga mga seksyon sang mensahe ni Pangulong Oaks nga “Ang Kakinahanglanon sang Simbahan”).

Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.

Mga Ideya para sa Pagtudlo sang mga Kabataan

Moroni 2–6

Ang Balaan nga Espiritu isa ka sagrado nga regalo.

• Ang Balaan nga Espiritu ukon ang Espiritu ginmitlang sang madamo nga beses sa Moroni 2–6. Basi pwede mo pangabayon ang imo kabataan nga pangitaon ang tagsa ka bersikulo nga nagamitlang sa Iya, basahon ina nga mga bersikulo, kag ilista ang ila natun-an parte sa Balaan nga Espiritu. Pwede mo man iistorya sa kada isa ang mga eksperiyensya sang nabatyagan mo ang impluwensya sang Espiritu.

Moroni 4–5

Nagaambit ako sang sakramento para ipakita nga dumdumon ko pirme si Jesucristo.

• Ang pagbasa sang mga pangamuyo sa sakramento upod sa imo kabataan mahimo nga magaresulta sa paghambalanay kon paano makaangkon sang makahulugan nga mga eksperiyensya sa sakramento. Basi makabulig sa ila ang paghunahuna nga kuno abi isa ka abyan ang makadto sa sakramento nga miting sa una nga bes. Paano naton ipaathag sa aton abyan kon ano ang sakramento kag kon ngaa sagrado ini? Paisoga ang imo kabataan nga maggamit sang isa ka butang halin sa Moroni 4 ukon 5 sa ila mga paathag. Ang mas magagmay nga kabataan pwede maggamit sang pahina para sa kahiwatan sini nga semana ukon sang Libro sang mga Larawan nga Pang-Ebanghelyo, num. 108.

•   Pwede ka man magpraktis sa pagpungko sing matinahuron sa tion sang sakramento.

Moroni 6:1–3

Sarang ko maghanda nga mabunyagan.

• Sin-o ang pwede bunyagan? Buligi ang imo kabataan nga magpangita sang mga sabat sa sining pamangkot sa Moroni 6:1–3. Ano ang buot silingon sang mag-angkon sang “buong nga tagipusuon kag isa ka mahinulsulon nga espiritu”? (Moroni 6:2). Paano ini nagabulig sa aton nga maghanda para sa bunyag? Pamensara nga sugiran ang imo kabataan kon paano ka naghanda para mabunyagan.

Moroni 6:4–6, 9

Nagasimba kita para mag-ambit sang sakramento kag suportahan ang kada isa.

• Nakahibalo bala ang imo kabataan kon ngaa nanamian ka nga magsimba? Ang pagbasa sang Moroni 6:4–6, 9 makahatag sa imo sang oportunidad nga hambalan sing ululupod ang pila ka mga butang nga ginahimo naton sa simbahan. Basi pwede sila magdrowing sang mga litrato sang ila kaugalingon nga ginahimo ining mga butang (pareho sang pagpangamuyo, pagtudlo, pagkanta, kag pag-ambit sang sakramento).

• Pagkatapos nga basahon ang Moroni 6:4 sing ululupod, pwede kamo magtan-aw sang mga litrato ukon sang mga halimbawa sang masustansya nga pagkaon kag ikumparar ang pagsagod sang aton nga mga lawas sa “[pag]batiti sang maayong pulong sang Dios.”  

Para sa dugang nga mga ideya, tan-awa sa isyu sang Abyan nga magasin sini nga bulan.

Moroni in the Cave [Si Moroni sa Sulod sang Kweba], ni Jorge Cocco