16–22 Tesema: “O Mai ia Keriso, ma Faaatoatoaina ia te Ia.” Moronae 10
“16–22 Tesema: ‘O Mai ia Keriso, ma Faaatoatoaina ia te Ia.’ Moronae 10,” Sau, Mulimuli Mai ia te A’u—Mo le Aiga ma le Ekalesia: Tusi a Mamona 2024 (2023)
“16–22 Tesema. Moronae 10,” Sau, Mulimuli Mai ia te A’u—Mo le Aiga ma le Ekalesia: 2024 (2023)
Ata
Ua faaali atu Iesu i sa Nifae
Ina ia Outou Iloa, saunia e Gary L. Kapp
16–22 Tesema: “O Mai ia Keriso, ma Faaatoatoaina ia te Ia”
Ua amatalia le Tusi a Mamona i le folafolaga a Nifae e faaali mai ai ia i tatou, “o le alofa mutimutivale agamalu o le Alii i luga o i latou uma o e ua ia filifilia, ona o lo latou faatuatua” (1 Nifae 1:20). E faaiu le tusi i se valaaulia tutusa mai ia Moronae: ia “Manatua le alofa mutimutivale tele o le Alii” (Moronae 10:2–3). O a faataitaiga o le alofa mutimutivale o le Alii ua e vaaia i le Tusi a Mamona? Atonu e te mafaufau i le auala alofa na taitaia ai e le Atua ia le aiga o Liae e ui atu i le vao ma sopoia ai vai e tele, le alofa mutimutivale sa Ia faaalia ia Enosa ina ua matelaina lona agaga mo le faamagaloga, po o le alofa mutimutivale sa Ia faaalia ia Alema, o se fili saua o le Ekalesia o lē na avea ma se tasi o ona talipupuni lē fefe. Pe atonu e liliu atu foi ou manatu i le alofa mutimutivale na faaalia e le Faaola toetu i tagata ina ua Ia faamaloloina e mama’i ma faamanuiaina a latou fanau laiti. Ae atonu o le mea aupito taua, o ia mea uma e mafai ona faamanatu ai ia te oe le “alofa tunoa o le Alii” ia te outou, aua o le Tusi a Mamona na tusia e valaaulia ai i tatou taitoatasi ia maua le alofa mutimutivale o le Atua—o se valaaulia na faaalia faafaigofie mai i upu faatofa a Moronae, “O mai ia Keriso, ma faaatoatoaina ia te ia” (Moronae 10:32).
E mafai ona ou iloa le moni o mea uma lava e ala i le mana o le Agaga Paia.
O le folafolaga i le Moronae 10:3–7 ua suia ai olaga o le faitau miliona o tagata i le lalolagi atoa. Ua faapefea ona suia ai lou olaga? A’o e faitau i le Moronae 10:3--7, mafaufau ia faitau ma le toto’a e sili atu nai lo lau faitauga i taimi ua sola. E mafai ona e iloiloina ia fasifuaitau taitasi, ma fesili ifo ia te oe lava i fesili e pei o nei: O le a le uiga o lenei mea? E faapefea ona ou faia lenei mea ia lelei tele atu? O a ni aafiaga na ou maua i lenei mea?
A o e mafaufau loloto i lau sailiga patino mo le upumoni faaleagaga, atonu e fesoasoani le aoao pe na faapefea ona maua e isi le upumoni e ala i le mana o le Agaga Paia. Sa faamatala e Elder Mathias Held lona aafiaga o se tagata fou o le Ekalesia (tagai “Sailia o le Malamalama e ala i le Agaga,” Liahona, Me 2019, 31–33). Sa faamatala e Elder David F. Evans lona aafiaga o se tasi sa ola ae i le Ekalesia ae sa i ai lava ni ana fesili (tagai “O Le Moni o Mea Uma,” Liahona, Nov. 2017, 68–70). Mafaufau e faitau se tasi po o savali uma nei e lua ma tusi i lalo soo se mea e te aoaoina mai a latou sailiga mo le upumoni lea e fesoasoani ia te oe lava ia.
E mafai foi ona e suesue i mea na aoao mai e le Atua e uiga i le upumoni e ala i le faitauina o nisi o fuaitau i le O le Taiala i Tusitusiga Paia, “Upumoni” (Potutusi o le Talalelei). O a mau e foliga mai e sili ona malamalama ia te oe? Atonu e mafai ona e filifili se tasi e faasoa atu i se isi tagata o loo sailia foi le upumoni e ala i le Agaga.
Tusifaamaumau lagona uunaia. O le liua i le talalelei a Iesu Keriso o lona uiga o le iloa ma le ola ai i le talalelei. O le a sili atu ona e faatinoina mea ua e aoaoina pe a e tusia i lalo. Afai o loo e aoao atu, valaaulia tagata o loo e aoaoina e tusifaamaumau o latou lagona uunai faaleagaga.
Ua tuuina mai e le Atua ia te a’u ni meaalofa faaleagaga.
E tele auala e mafai ai e se tagata ona “faafitia … meaalofa a le Atua” (Moronae 10:8). O nisi tagata ua faafitia le i ai o nei meaalofa. Ae o isi foi e faafitia a latou meaalofa i le le amanaiaina lea po o le le atinaeina o meaalofa. A o e faitau i le Moronae 10:8–25, vaavaai mo upumoni o le a fesoasoani e te iloa ai au meaalofa faaleagaga ma faaaoga i latou e faamanuia ai fanau a le Atua. O fesili faapenei e mafai ona fesoasoani: O a meaalofa faaleagaga? O ai e tuuina atu i ai? Aisea e tuuina atu ai? E faapefea ona tatou mauaina? E mafai ona e mafaufau i faataitaiga o tagata e faaaogaina meaalofa o loo lisiina i le Moronae 10:9–16?
E mafai ona faaatoatoaina a’u e ala i le Togiola a Iesu Keriso.
O le fautuaga a Moronae ia “o mai ia Keriso” e aofia ai le sili atu nai lo le aoaoina ma le mafaufau e uiga ia te Ia. Ae, o lenei valaaulia ia o mai ia Keriso i lona aano aupito atoatoa e mafai ona oo i ai—o le avea e pei o Ia. A o e faitau i le Moronae 10:30–33, matau fuaitau e fesoasoani e te malamalama ai i le uiga o le o mai ia Keriso, le ala e mafai ai, ma taunuuga mo le faia o lena mea.
Toe tepa i tua i lau suesuega o le Tusi a Mamona i lenei tausaga, ma mafaufau loloto i mea na e lagonaina ma aoaoina e uiga ia Iesu Keriso. Mo se faataitaiga, na faapefea ona fesoasoani le Tusi a Mamona ia te oe e sau ai ia te Ia? Na faapefea ona fesoasoani ia te oe ia sili atu le faalagolago atoatoa i Lona alofa tunoa? Na faapefea ona fesoasoani ai ia te oe ia “le faafitia” le mana o le Faaola? Mafaufau e faasoa atu lau lava molimau o le Tusi a Mamona i se tasi e manaomia ona faalogo i ai, e aofia ai e pele ma uo atonu e le iloa lana savali.
Tagai foi “Ua Valaaulia e Moronae Tagata Uma ia O Mai ia Keriso” (vitio), Gospel Library.
Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .
E mafai ona ou iloa mo au lava ia e moni le Tusi a Mamona.
E faapefea ona e fesoasoani i lau fanau e talia le valaaulia a Moronae e fesili atu i le Atua pe moni le Tusi a Mamona? Mafaufau e tuu atu ia i latou ni fasipepa ma upu Faitau, Manatua, Mafaufau Loloto, ma le Fesili o loo tusia ai. Atonu e mafai e lau fanau ona sue upu ia i le Moronae 10:3–4. O a mea e tatau ona tatou faitau, manatua, mafaufau loloto, ma fesili atu ia maua ai pe faamalosia ai a tatou molimau o le Tusi a Mamona? E mafai foi e lau fanau ona saili ni mea talitutusa i le va o nei fuaiupu ma le pese “Saili, Mafaufau Loloto, ma Tatalo” (Tusipese a Tamaiti, 66).
E mafai e lau fanau ona faaaoga le ata i le faaiuga o lenei otootoga e talanoa ai e uiga i le tanumia e Moronae o papatusi auro (tagai foi “Mataupu 54: O Le Folafolaga o le Tusi a Mamona,” Tala o le Tusi a Mamona, 156). Atonu e fiafia lau fanau e faafoliga e pei o Moronae o loo tusitusi i luga o papatusi ma tanumia i latou. Faasoa atu i le tasi ma le isi a outou molimau o le Tusi a Mamona.
Ua tuuina mai e le Tama Faalelagi ia te au meaalofa faaleagaga.
Ina ia aoao lau fanau e uiga i meaalofa faaleagaga, e mafai ona e tusia numera 9 e oo i le 16 i ni fasipepa eseese ma afifi pepa taitasi e pei o se meaalofa. E mafai e lau fanau ona auauai i le tatalaina o meaalofa, ma faitauina fuaiupu mai le Moronae 10:9–16 e ogatusa ma fuainumera, ma faailoa mai meaalofa faaleagaga taitasi. E mafai ona e talanoa e uiga i le ala e finagalo le Tama Faalelagi tatou te faaaoga ai nei meaalofa e faamanuia ai Ana fanau. E mafai foi ona e fesoasoani i lau fanau ia matau ia meaalofa ua tuuina mai e le Tama Faalelagi ia i latou.
O iloa e lau fanau le uiga o le “o mai ia Keriso”? Atonu e mafai ona e faitau i le Moronae 10:32 ma valaaulia i latou e toe fai faatasi ma oe le fasifuaitau. Ona mafai lea ona moeiini o latou mata a o e tuuina se ata o Iesu i se mea i totonu o le potu. Ona tuu atu lea ia i latou e pupula o latou mata, sue le ata, faapotopoto faataamilo ai, ma talanoa e uiga i auala e mafai ona tatou o mai ai ia Keriso. Atonu o le a fesoasoani le tusi i lalo o le fesili O le a le uiga o le o mai ia Keriso? Fesoasoani ia i latou e suesue i le Moronae 10:32–33 e sue ai tali talafeagai (tagai foi Mataupu Faavae o le Faatuatua 1:3–4). Galulue faatasi e lisi mea e finagalo Keriso tatou te faia ma mea ua Ia folafola mai e fai mo i tatou.
Atonu e fiafia lau fanau e fai ma teuteu ni pine siepi fatu e i ai le faamatalaga lea “Ou te alofa i le Atua ma loʻu manatu atoa, mafaufau, ma le malosi atoa” (tagai Moronae 10:32). A o latou faia, talanoa ma i latou e uiga i le ala tatou te faaali atu ai i le Atua tatou te alolofa ia te Ia.
Mo nisi manatu, tagai i le lomiga o lenei masina o le mekasini o le Uo .
