Behold the Lamb of God [’A hi’o na i te ’ārenio a te Atua], nā Walter Rane

23–29 nō Tītema : « E haere mai ’oia i te ao nei nō te fa’aora i tōna ra mau ta’ata »

Noela

Mai ia Nephi ē tae atu ia Moroni, ’ua ha’apa’o te mau peropheta ato’a o te Buka a Moromona i te fā mo’a i tātara-poto-hia i ni’a i te ’api upo’o parau o te buka : « ’Ei fa’a’ite pāpū i [te mau ta’ata ato’a] ē, ’o Iesu te Mesia. » ’Ua ’ite te tahi peropheta iāna ’ei vārua hou te tāhuti nei, ’e ’ua ’ite te tahi atu peropheta i tāna tāvinira’a i roto i te hō’ē ’ōrama. ’Ua ti’a te hō’ē i ni’a i te hō’ē patu nō te poro i te mau tāpa’o nō tōna fānaura’a ’e tōna pohera’a, ’e ’ua tūturi te tahi atu i mua i tōna tino ti’afa’ahou, nō te fāfā i te mau puta i tōna nā rima ’e te ’āvae ’e te ’ao’ao. ’Ua ’ite rātou pā’āto’a i teie parau mau faufa’a tumu : « ’Aita atu e rāve’a e ti’a ai i te mau ta’ata ’ia fa’aorahia, maori rā nā roto i te toto tāra’ehara nō Iesu Mesia, ’o tē […] haere mai […] nō te fa’aora i tō teie nei ao » (Helamana 5:9).

Nō reira, i teie pu’e tau Noela, ’a fa’ahanahana ai te feiā fa’aro’o ’ati a’e i te ao i te maita’i ’e te here o te Atua i te tonora’a mai i tāna Tamaiti, ’a feruri ’ua nāhea te Buka a Moromona i te ha’apūaira’a i tō ’oe fa’aro’o i te Mesia. ’A feruri ai ’oe nō ni’a i tōna fānaura’a, ’a feruri nō te aha ’oia i haere mai ai, ’e nāhea tōna taera’a mai i taui ai i tō ’oe orara’a. ’Ei reira ’oe e ’ite ai i te ’oa’oa mau nō Noela—te hōro’a tā Iesu Mesia i hōro’a nō ’oe.

Mana’o nō te ’apo i te ha’api’ira’a i te ’utuāfare ’e i te fare purera’a

’Ua fānauhia ’o Iesu Mesia ’ia riro ’oia ’ei Fa’aora nō’u.

E peu mātauhia te tai’ora’a i te ’ā’amu i ni’a i te fānaura’a o te Fa’aora i roto i te Faufa’a ’Āpī i te tau nō Noela, e ti’a ato’a rā ia ’oe ’ia ’ite i te mau parau tohu ha’aputapū ’ā’au nō ni’a i te reira ’ohipa mo’a i roto i te Buka a Moromona. ’Ei hi’ora’a, e ’itehia te mau tohu nō te fānaura’a o te Fa’aora ’e tāna tāvinira’a i roto i te 1 Nephi 11:13–36 ; Mosia 3:5–10 ; ’e Helamana 14:1–13. E aha te mau mana’o e tae mai nō Iesu Mesia ’a tai’o ai ’oe i teie mau tuha’a parau ma te hi’o pāpū i te aura’a o te mau tāpa’o nō tōna fānaura’a ? Nāhea te ’itera’a pāpū o teie mau peropheta tahito i Amerika i te ha’apūai i tō ’oe ’itera’a pāpū nō te Mesia ’e nō tāna misiōni ?

Teie te tahi atu mau mana’o nō te tauturu ia ’oe ’ia rōtahi i ni’a ia Iesu Mesia i te tau Noela :

• ’Ua ’ite ānei ’oe ē, e nehenehe e māta’ita’i i te mau a’ora’a o te mau purera’a Noela a te Peresidenira’a Mātāmua i ma’iri, i roto i te Vaira’a buka ’evanelia ? E ’imi ia rātou i roto i te ha’aputura’a « Mau video nō Noela ». E nehenehe e fa’a’ite i teie mau a’ora’a ’e te mau pehe nō te ha’aparare i te ’oa’oara’a o Noela.

• E ’oa’oa ato’a paha ’oe ’e tō ’oe ’utuāfare ’ia fa’aro’o i te mau pehe mā’itihia i roto i te « Pehe Noela », ha’aputuhia i roto i te Vaira’a buka ’evanelia.

• E nehenehe e fa’anahonaho i te mau ’ātivite tā ’oe, ’e ’aore rā tō ’oe ’utuāfare, e rave i te mau mahana hou te Noela, nō te putapū i te Vārua o te Mesia, mai te tauturura’a i te hō’ē ta’ata ’e ’aore rā te hīmene-’āmui-ra’a i te mau hīmene Noela. Hi’o LighttheWorld.org nō te mau mana’o.

Hi’o ato’a Mataio 1:18–25 ; 2 ; Luka 2 ; 3 Nephi 1:4–22 ; « I roto i te phātene », Te mau hīmene, N°123.

’O Iesu Mesia te Fa’aora o teie nei ao.

Te tumu rahi tātou e ha’amana’o ai i te fānaura’a o Iesu Mesia, ’o tāna ïa tusia tāra’ehara. Maoti teie ha’atusiara’a, e ti’a iāna i te fa’aora ia tātou i te hara ’e te pohe, i te tāmāhanahana ia tātou i roto i te mau ’ati, ’e i te tauturu ia tātou ’ia « maita’i roa ’outou iāna » (Moroni 10:32). E aha te ha’api’ira’a tā ’oe i ’apo mai i roto i te Buka a Moromona i teie matahiti, nō ni’a i te mana o te Fa’aora nō te fa’aora ia ’oe ? E mau ’ā’amu ānei ’e ’aore rā mau ha’api’ira’a tā ’oe e ha’amana’o ta’a ’ē nei ? ’A mātutu e aha tā te mau hi’ora’a i muri nei e ha’api’i nei ia ’oe nō ni’a i te misiōni tāra’ehara a te Fa’aora : 2 Nephi 2:6 ; Alama 7:7–13 ; 11:40 ; ’e Helamana 5:9 ; 14:16–17. E aha te mea tei fa’auruhia ’oe ’ia rave nō te fa’a’ite iāna i tō ’oe māuruuru ?

Tē fa’a’ite pāpū nei te Buka a Moromona nō Iesu Mesia.

Tē parau ra « Te tahi fa’ahou ’ite nō Iesu Mesia », ’ua hau atu ïa i te tahi upo’o parau na’ina’i nō te Buka a Moromona ; e fa’ahitira’a teie nō tāna fā hanahana. ’A feruri i te ha’api’ira’a tā ’oe e ’apo mai roto i te mau ’īrava i muri nei, nō ni’a i te misiōni a te Buka a Moromona ’ia fa’a’ite pāpū nō te Mesia : 1 Nephi 6:4 ; 19:18 ; ’e te 2 Nephi 25:23, 26 ; 33:4, 10.

E nehenehe e pāpa’i i roto i te tahi buka ’ā’amu ’ua nāhea te tuatāpapara’a i te Buka a Moromona i teie matahiti i te ha’afātatara’a atu ia ’oe i te Mesia. E nehenehe te mau parau ha’amatara’a i muri nei e tauturu atu :

• « Te hō’ē mea ’āpī tā’u i ’apo mai, ’e ’aore ra tā’u i putapū nō ni’a i te Fa’aora i teie matahiti, ’oia ho’i… »

• « ’Ua taui te ha’api’ira’a nō ni’a i te Fa’aora i roto i te Buka a Moromona, i te huru vau… »

• « Te ta’ata [’e ’aore rā te ’ā’amu] tā’u i au roa i roto i te Buka a Moromona, ’ua ha’api’i mai ’oia iā’u e ’ua riro te Fa’aora i te… »

Pēnei a’e e ta’ata tē ha’amaita’ihia i te ’itera’a i tō ’oe mana’o nō ni’a i te Buka a Moromona. E nāhea ’oe i te fa’a’ite atu i te mau ’ohipa i tupu nō ’oe, ’e tō ’oe ato’a ’itera’a pāpū ? E fa’auruhia paha ’oe ’ia hōro’a i te tahi buka ’ei tao’a hōro’a nō te Noela. Tē fa’a’ōhie nei te fa’aaura’a rorouira nō te Buka a Moromona i te fa’a’itera’a i te ta’ata.

’Ua tāpura te ’episekōpo ’o Gérald Caussé e rave rahi parau mau nō roto mai i te Buka a Moromona nō ni’a ia Iesu Mesia (hi’o « Hō’ē ’ite ora nō te Mesia ora », Liahona, Mē 2020, 39–40). E nehenehe ’oe e hi’o atu i tāna tāpura ma te feruri nāhea teie mau parau mau tāta’itahi i te tauira’a—’e ’aore rā nāhea e taui ai—i tō ’oe orara’a.

Nō te tahi atu ā mana’o, ’a hi’o i te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Nō te mea teie sābati ’o te pae ïa o te sābati o te āva’e, tē fa’aitoitohia nei te mau ’orometua ha’api’i o te Paraimere ’ia fa’a’ohipa i te ’ohipara’a ha’api’ipi’ira’a i roto te « Parau hi’u B : Fa’aineinera’a i te mau tamari’i nō te hō’ē orara’a tā’āto’a i ni’a i te ’ē’a nō te fafaura’a a te Atua ».

’O Iesu Mesia te tao’a hōro’a a te Metua i te ao ra nō’u.

• Nō te tauturu i tā ’oe mau tamari’i ’ia rōtahi i ni’a i te hōro’a a te Metua i te ao ra nō tātou nā roto i te tonora’a mai i tāna Tamaiti, e nehenehe e pū’ohu i te tahi hōho’a nō Iesu Mesia mai te tahi tao’a Noela. E nehenehe ’oe ’e tā ’oe mau tamari’i e ’aparau nō ni’a i te mau tao’a Nōela au roa a’e tei fāri’ihia, ’e ’aore rā ’o tē ti’aturi e fāri’ihia. I muri iho, e nehenehe e tātara i te hōho’a o te Mesia ma te ’āparau e aha te faufa’a rahi o teie tao’a rahi nō tātou. Te tahi hīmene mai te « Il envoya son fils aimé » (Chants pour les enfants, 20–21) tē nehenehe e fa’ananea i teie nei ’āparaura’a. ’A tauturu i tā ’oe mau tamari’i i te hi’o mai i te mau ’īrava i roto i te hīmene tei fa’ata’a i te mau ha’amaita’ira’a i roa’a mai ia tātou nā roto i te fānaura’a o Iesu.

’Ua fānauhia ’o Iesu Mesia ’ei Fa’aora nō’u.

• E au paha tā ’oe mau tamari’i i te fa’a’ite atu ia ’oe i te mea tā rātou i ’ite nō ni’a i te fānaura’a o Iesu. E rave rahi hōho’a i roto i te Buka hōho’a nō te ’evanelia ’o tē tauturu ia rātou ’ia fa’ati’a i te ’ā’amu (hi’o te mau nūmera 28, 29, 30, 31). E nehenehe ato’a e hi’o i te mau hōho’a e fa’a’ite ra i te orara’a o te Fa’aora ’e te tusia tāra’ehara. Nō te aha te Metua i te ao ra i tono mai ai ia Iesu Mesia ?

  

• E au ato’a paha tā ’oe mau tamari’i ’ia pāpa’i i tā rātou iho mau hōho’a nō te fānaura’a ’e nō te misioni a Iesu. Pēnei a’e e nehenehe rātou e pāpa’i i te hōho’a nō te mea i fa’ata’ahia i roto i te 1 Nephi 11:13–23 ; Mosia 3:5–10 ; Helamana 14:1–13 ; ’e te 3 Nephi 1:4–22. I reira e nehenehe ai rātou e fa’a’ite mai ia ’oe e aha tā tā rātou mau hōho’a e ha’api’i nei nō ni’a ia Iesu Mesia.

• Nō te ha’apāpū ē, tē ha’api’i nei te Bibilia ’e te Buka a Moromona nō ni’a i te fānaura’a o Iesu, e nehenehe e tāpura i te mau ’ohipa i tupu tei fa’a’itehia i roto i te Luka 2:4–14 ; Mataio 2:1–2 ; e te 3 Nephi 1:15, 19–21. I reira e nehenehe ai tā ’oe mau tamari’i ’ia mā’imi i roto i teie mau ’īrava e aha te ’ohipa i tupu i Betelehema, i Amerika, ’e ’aore rā, i nā vāhi e piti. Nō te aha tātou e māuruuru ai e ’ite piti te Buka a Moromona nō te fānaura’a o Iesu ?

Mea au nā te mau tamari’i te mau ’ā’amu. E mau rāve’a maita’i roa te mau ’ā’amu nō te tauturu i te mau tamari’i ’ia ’apo mai ’e ’ia ha’amana’o noa i te mau parau mau. ’Ia fa’ati’a ’oe i te ’ā’amu nō te fānaura’a o Iesu, e nehenehe ato’a e fa’a’ite i te mau ’ā’amu nō roto mai i tō ’oe orara’a tei tauturu i te ha’apa’arira’a i tō ’oe fa’aro’o i te Fa’aora.

Tē fa’a’ite pāpū nei te Buka a Moromona nō Iesu Mesia.

• ’A fa’aoti ai ’outou tā ’oe mau tamari’i i tā ’outou tuatāpapara’a i te Buka a Moromona i teie matahiti, e taime maita’i paha nō te fa’a’ite te tahi i te tahi i tā ’outou mau ’ā’amu ’e ’aore rā mau tuha’a au-roa-hia i roto i teie nei buka mo’a. E nehenehe te hi’ora’a i te tahi mau hōho’a i roto i te Mai, pe’e mai ’e ’aore rā te mau ’Ā’amu o te Buka a Moromona e tauturu i tā ’oe mau tamari’i ’ia ha’amana’o i te mea tā rātou i ha’api’i mai i teie matahiti. E tauturu ia rātou ’ia ’ite e aha tā teie mau ’ā’amu e ha’api’i nei ia tātou nō ni’a ia Iesu Mesia.

• E nehenehe ato’a ’oe e hōro’a i tā ’oe mau tamari’i i te hōho’a nō Iesu, ’e ’aore rā, e vaiiho ia rātou ’ia pāpa’i i tā rātou iho hōho’a. E ani ia rātou ’ia ’āfa’i mai i ni’a i tā rātou mau hōho’a i te mau taime ato’a e fa’aro’o rātou i te i’oa o te Mesia ’a tai’o ai ’oe i te 2 Nephi 25:23, 26. E fa’a’ite pāpū ē, ’ua pāpa’ihia te Buka a Moromona nō te tauturu ia tātou ’ia « ti’aturi i te Mesia » (2 Nephi 25:23).

Nō te tahi atu ā mana’o, ’a hi’o i te ve’a Hoa nō teie ’āva’e.

Nephi’s Vision of the Virgin Mary [Te ’ōrama a Nephi nō te paretenia ra ia Maria], nā Judith A. Mehr