Parau hi’u A

Nā te mau metua—Fa’aineine i tā ’oe mau tamari’i nō te hō’ē orara’a maoro i ni’a i te ’ē’a nō te fafaura’a a te Atua

Nō tōna here ia ’oe, tōna ti’aturira’a ia ’oe ’e tōna ’ite i tō ’oe fāito pūai, ’ua hōro’a mai te Metua i te ao ra ia ’oe i te rāve’a nō te tauturu i tā ’oe mau tamari’i ’ia tomo ’e ’ia haere i mua i ni’a i tōna ’ē’a nō te fafaura’a, te ’ē’a e tae atu ai i te ora mure ’ore ra (hi’o Te Ha’api’ira’a Tumu ’e te mau Fafaura’a 68:25–28). ’O te tauturura’a ato’a ïa ia rātou ’ia fa’aineine nō te rave ’e nō te ha’apa’o i te mau fafaura’a mo’a, mai te fafaura’a nō te bāpetizora’a ’e te mau fafaura’a e ravehia i roto i te hiero. Nā roto i teie mau fafaura’a, e nati tā ’oe mau tamari’i ia rātou iho i te Fa’aora, ia Iesu Mesia.

E rave rahi rāve’a nō te fa’aineine i tā ’oe mau tamari’i nō teie tere i ni’a i te ’ē’a nō te fafaura’a, ’e e tauturu te Metua i te ao ra ia ’oe ’ia ’ite i te rāve’a maita’i roa a’e nō te tauturu ia rātou. ’A ’imi ai ’oe i te fa’aurura’a, ’a ha’amana’o noa ē, ’aita te tā’āto’ara’a o te ha’api’ira’a e tupu i roto i te hō’ē ha’api’ira’a i tārenahia. ’Oia mau, te hō’ē tuha’a nō te pūai rahi o te ha’api’ira’a i te fare ’o te fāna’ora’a ïa e ’apo i te mau ha’api’ira’a nā roto i te hi’ora’a maita’i ’e te tahi mau taime ri’i ’ōhie—te huru taime e tupu mai terā noa i roto i te orara’a tāmahana. Mai te pe’era’a i te ’ē’a nō te fafaura’a e ’ohipa tāmau ïa te ha’api’ira’a nō ni’a i te ’ē’a nō te fafaura’a, i te roara’a o te orara’a. (Hi’o « Te fare ’e te ’utuāfare », Ha’api’ira’a mai tā te Fa’aora [2022], 30–31.)

E rave rahi rāve’a nō te fa’aineine i tā ’oe mau tamari’i nō tō rātou tere i ni’a i te ’ē’a nō te fafaura’a a te Atua.

Teie i raro nei te tahi mau mana’o ’o tē nehenehe e arata’i atu i te tahi atu ā fa’aurura’a. E ’itehia ia ’oe te tahi atu ā mau mana’o nō te ha’api’ira’a i te mau tamari’i pa’ari i roto i te « Parau hi’u B : Nō te Paraimere—Fa’aineine i te mau tamari’i nō te orara’a maoro i ni’a i te ’ē’a nō te fafaura’a a te Atua. »

Te bāpetizora’a ’e te ha’amaura’a

’Ua ha’api’i Nephi ē « te ’ūputa e tomohia e [tātou] ra » i ni’a i te ’ē’a nō te fafaura’a, « ’o te tātarahapa ïa, ’e te bāpetizora’a i te pape » (2 Nephi 31:17). E nehenehe tā ’oe mau tauto’ora’a nō te tauturu i tā ’oe mau tamari’i ’ia fa’aineine nō te bāpetizora’a ’e te ha’amaura’a, e tu’u pāpū i tō rātou ’āvae i ni’a i taua ’ē’a nō te fafaura’a ra. E ha’amata teie mau tauto’ora’a nā roto i te ha’api’ira’a ia rātou nō ni’a i te fa’aro’o ia Iesu Mesia ’e te tātarahapara’a. Tei roto ato’a i te reira te ha’api’ira’a nō ni’a i te huru tātou e fa’a’āpī i tā tātou mau fafaura’a nō te bāpetizora’a nā roto i te ravera’a i te ’ōro’a mo’a i te hepetoma tāta’itahi.

Teie te tahi mau rāve’a e nehenehe e tauturu ia ’oe : 2 Nephi 31 ; ve’a ta’a ’ē o te ve’a Hoa nō ni’a i te bāpetizora’a.

• I te mau taime ato’a e tupu te hō’ē ’ohipa ’o tē ha’apūai i tō ’oe fa’aro’o i te Metua i te ao ra ’e ia Iesu Mesia, ’a fa’a’ite i te reira i tā ’oe tamari’i. ’A tauturu iāna ’ia hāro’aro’a ē, te fa’aro’o ’o te hō’ē ïa mea ’o tē nehenehe e tupu ’e ’o tē pūai atu ā i te roaara’a o te orara’a. E aha te tahi mau mea tā tā ’oe tamari’i e nehenehe e rave nō te fa’atupu i te fa’aro’o pūai a’e i te Mesia hou ’a bāpetizohia ai ?

• ’Ia rave ana’e tā ’oe tamari’i i te hō’ē mā’itira’a hape, ’a parau ma te ’oa’oa nō ni’a i te hōro’a nō te tātarahapara’a. ’E ’ia rave ana’e ’oe i te tahi mā’itira’a hape, ’a fa’a’ite i tō ’oe ’oa’oa ’ia tātarahapa ana’e ’oe. ’A parau pāpū ē, nō tō Iesu Mesia mamaera’a ’e te pohera’a nō tā tātou mau hara, ’ua hōro’a mai ’oia ia tātou i te mana nō te taui. ’Ia ’imi ana’e tā ’oe tamari’i i te fa’a’orera’a hapa, ’a fa’a’ore hua atu ’e ma te ’oa’oa.

• ’A fa’ati’a i te parau nō tō ’oe bāpetizora’a i tā ’oe tamari’i. ’A fa’a’ite i te mau hōho’a ’e te mau ha’amana’ora’a. ’A paraparau e aha tā ’oe i fāri’i, e mea nāhea tā ’oe mau fafaura’a nō te bāpetizora’a i te tauturura’a ia ’oe ’ia mātau maita’i a’e ia Iesu Mesia, ’e nāhea te reira i te tāmau noa i te ha’amaita’i i tō ’oe orara’a. ’A fa’aitoito i te mau tamari’i ’ia ui i te mau uira’a.

• Mai te mea ē, tē vai ra te hō’ē bāpetizora’a i roto i tō ’oe ’utuāfare ’aore rā, i roto i tā ’oe pāroita, ’a ’āfa’i atu i tā ’oe tamari’i nō te fa’a’ite i te reira. ’A paraparau ’āmui nō ni’a i te mea tā ’outou tā ’oe tamari’i i ’ite ’e i fāri’i. Mai te mea e nehenehe, e paraparau i te ta’ata e bāpetizohia ra nō te ui i te mau uira’a mai teie i muri nei : « Nāhea ’oe i te ravera’a i teie fa’aotira’a ? Nāhea ’oe i te fa’aineinera’a ia ’oe ? »

• I te mau taime ato’a e ’ite ’oe i tā ’oe tamari’i i te ravera’a i te hō’ē mea tāna i fafau e rave, ’a ha’apoupou iāna ma tō ’ā’au ato’a. ’A fa’ata’a atu ē, e tauturu mai te ha’apa’ora’a i tā tātou parau, ’ia fa’aineine nō te ha’apa’o i te mau fafaura’a tā tātou e rave i te bāpetizora’a. E aha tā tātou e parau fafau i te Atua ’ia bāpetizohia tātou ? E aha tāna e parau fafau mai ia tātou ? (hi’o Mosia 18:8–10, 13).

• ’Ia tupu ana’e te hō’ē ’ohipa mo’a nō ’ōrua tā ’oe tamari’i (i te fare purera’a, ’a tai’o ai i te mau pāpa’ira’a mo’a, ’aore rā ’a tāvini ai i te hō’ē ta’ata), ’a parau iāna i te mau mana’o pae vārua ’aore rā te mau mana’o i tae mai ia ’oe. ’A ani i tā ’oe tamari’i ’ia fa’a’ite mai i tōna mana’o. ’A hi’o na i te mau rāve’a huru rau tā te Vārua e nehenehe e paraparau i te ta’ata, tae noa atu te mau rāve’a tāna e paraparau ia ’oe iho. ’A tauturu i tā ’oe tamari’i ’ia ’ite i te mau taime e tae mai te fa’aurura’a a te Vārua Maita’i iāna.

• ’A māta’ita’i ’āmui i te tahi mau video i roto i te Vaira’a buka ’evanelia tei topahia « Fa’aro’o iāna ! » ’A paraparau ’āmui nō ni’a i te mau rāve’a ta’a ’ē e fa’aro’o ai te mau tāvini o te Fatu i tōna reo. ’A ani i tā ’oe tamari’i ’ia pāpa’i i te hō’ē hōho’a ’e ’aore rā, ’ia hāmani i te hō’ē video nō ni’a i te huru ’oia e fa’aro’o nei i te reo o te Fa’aora.

• ’A paraparau e ’ua nāhea te rirora’a ’ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei i te ha’amaita’ira’a ia ’oe. Nāhea ’oe i te ha’afātata-atu-ā-ra’a i te Metua i te ao ra ’e ia Iesu Mesia ’a tāvini ai ’oe i te ta’ata ’ē ’e ’a tāvini ai te ta’ata ia ’oe ? ’A tauturu i tā ’oe tamari’i ’ia feruri i te mau rāve’a nō te hō’ē melo o te ’Ēkālesia ’ia tāvini ’e ’ia ha’apūai ia vetahi ’ē.

• ’A fa’ariro i te ’ōro’a mo’a ’ei taime mo’a ’e te ’oa’oa i roto i tō ’oe ’utuāfare. ’A tauturu i tā ’oe tamari’i ’ia fa’anaho i te mau rāve’a nō te fa’atumu i ni’a ia Iesu Mesia i te taime nō te ’ōro’a mo’a. E nāhea tātou ’ia fa’a’ite ē, e mea mo’a te ’ōro’a mo’a nō tātou ?

• I roto i te mau ve’a Hoa i te mau ’āva’e ato’a tē vai ra te mau parau pāpa’i, te mau ’ā’amu ’e te mau ’ohipa e rave nō te tauturu i te mau tamari’i ’ia fa’aineine ia rātou nō te bāpetizora’a ’e te ha’amaura’a. ’A vaiiho i tā ’oe tamari’i ’ia mā’iti i te tahi nō te tai’o nā muri ia ’oe. (’A hi’o ato’a i te mau ha’aputura’a « Fa’aineine nō te bāpetizo » i roto i te tuha’a a te mau tamari’i nō te Vaira’a buka ’evanelia.)

  

  ’Ua ha’api’i Nephi ē « te ’ūputa e tomohia e [tātou] » i ni’a i te ’ē’a nō te fafaura’a, « ’o te tātarahapa ïa, ’e te bāpetizora’a i te pape » (2 Nephi 31:17).

Te mana, te ha’amanara’a ’e te mau tāviri o te autahu’ara’a

Te autahu’ara’a o te ha’amanara’a ïa a te Atua ’e te mana o te Atua nā roto i te reira ’oia e ha’amaita’i ai i tāna mau tamari’i. Tei ni’a i te fenua nei te autahu’ara’a a te Atua i teie mahana, i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei. E ha’amaita’ihia te mau melo ato’a o te ’Ēkālesia—’āmui ato’a hia tā rātou mau tamari’i—’o tei ha’apa’o i tā rātou mau fafaura’a nā roto i te mana nō te autahu’ara’a a te Atua i tō rātou fare nō te ha’apa’ari ia rātou iho ’e tō rātou ’utuāfare (hi’o Buka arata’i rahi : Te tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei, 3.5, Vaira’a buka ’evanelia). E tauturu teie mana i te mau melo i te ravera’a i te ’ohipa a te Atua nō te fa’aorara’a ’e te fa’ateiteira’a i roto i tō rātou iho orara’a ’e tō rātou ’utuāfare (hi’o Buka arata’i rahi, 2.2).

E fāri’i tātou i te mau ’ōro’a nā roto i te ha’amanara’a nō te autahu’ara’a. ’Ia tāvini ana’e te mau tāne ’e te mau vahine i roto i te mau pi’ira’a o te ’Ēkālesia, e nā reira rātou ma te ha’amanara’a nō te autahu’ara’a, i raro a’e i te fa’aterera’a a te feiā tei mau i te mau tāviri nō te autahu’ara’a. E ha’amaita’ihia te tā’āto’ara’a o te mau tamari’i a te Metua i te ao ra—tāna mau tamaiti ’e tāna mau tamāhine—’ia māramarama maita’i ana’e rātou i te autahu’ara’a.

Nō te ha’api’i rahi atu ā nō ni’a i te autahu’ara’a, hi’o Russell M. Nelson, « Te mau tao’a pae vārua », Liahona, Novema 2019, 76–79 ; Russell M. Nelson, « Te ho’o o te mana autahu’ara’a », Liahona, Mē 2016, 66–69 ; « Mau parau tumu o te Autahu’ara’a », pene 3 i roto i te Buka arata’i rahi.

• ’A fa’ariro i te mau ’ōro’a o te autahu’ara’a ’ei tuha’a tāmau nō tō ’oe orara’a ’utuāfare. ’Ei hi’ora’a, ’a tauturu i tā ’oe tamari’i ’ia fa’aineine i te pae vārua nō te ’ōro’a mo’a i te hepetoma tāta’itahi. ’A fa’aitoito i tā ’oe tamari’i ’ia tītau i te ha’amaita’ira’a autahu’ara’a ’ia ma’i-ana’e-hia ’oia ’aore rā ’ia hina’aro ’oia i te tāmāhanahanara’a ’aore rā i te arata’ira’a. ’A fa’ariro ’ei peu mātau ’ia fa’a’ite i te mau rāve’a a te Fatu nō te ha’amaita’i i tō ’oe ’utuāfare nā roto i te mana autahu’ara’a.

• ’A tai’o ’āmui ai ’outou i te mau pāpa’ira’a mo’a, ’a hi’o i te mau rāve’a nō te ’āparau e nāhea te Atua i te ha’amaita’i i te ta’ata nā roto i tōna mana. ’A fa’a’ite i te mau ’ohipa i tupu nō ’oe iho, i te ha’amaita’ira’ahia ’oe e te Atua nā roto i tōna autahu’ara’a. Nō te mau hi’ora’a nō ni’a i te mau ha’amaita’ira’a tā tātou e fāri’i nō ’ō mai i te Atua ra nā roto i te autahu’ara’a, hi’o Buka arata’i rahi, 3.2, 3.5.

• ’A tāmau mai i te rēni autahu’ara’a o te hō’ē ta’ata i roto i tō ’oe ’utuāfare. (E nehenehe te mau taea’e tei mau i te Autahu’ara’a a Melehizedeka e fāri’i i te hōho’a nō tā rātou rēni autahu’ara’a nā roto i te hāponora’a i te rata uira i te [e-mail] ; hi’o ato’a « Request a Priesthood Line of Authority » i te Pū Tauturu i ni’a ia ChurchofJesusChrist.org.) ’A paraparau nō te aha e mea faufa’a ’ia ’ite ē, nō ’ō mai te ha’amanara’a autahu’ara’a ia Iesu Mesia iho. Nō te aha ’oia e hōro’a ai i te reira ia tātou ?

• ’A ha’api’i i tā ’oe tamari’i ē, i muri a’e i te bāpetizora’a, e nehenehe tāna e fāri’i i te mana autahu’ara’a nā roto i te ha’apa’ora’a i te fafaura’a nō te bāpetizora’a. ’A hi’o ’āmui fa’ahou ā i te a’ora’a a te peresideni Russell M. Nelson « Te mau tao’a pae vārua » (Liahona, Novema 2019, 76–79). ’A parau i tā ’oe tamari’i ’ua nāhea te mau ’ōro’a nō te autahu’ara’a i te fa’ataera’a mai i te mana o te Atua i roto i tō ’oe orara’a. Nō te tahi tāpura nō te mau rāve’a e ha’amaita’ihia nei tātou e te mana o te autahu’ara’a, hi’o Buka arata’i rahi, 3.5.

• ’A ’āparau i te uira’a « Mai te aha te huru te hō’ē tāvini a te Fatu ? » E tai’o ’āmui i Te Ha’api’ira’a Tumu ’e te mau Fafaura’a 121:36–42, ’e e ’imi i te mau pāhonora’a. I te mau taime ato’a e ’ite ’oe i tā ’oe tamari’i (’e ’aore rā te tahi atu ta’ata) ’ia ha’apa’o i te hō’ē o te mau parau tumu ’aore rā te mau huru i roto i teie mau ’īrava, ’a fa’a’ite i te reira.

• ’Ia fa’a’ohipa ana’e ’oe ’aore rā, tā ’oe tamari’i i te mau tāviri nō te ’īriti i te hō’ē ’ōpani ’aore rā nō te fa’aharuru i te pere’o’o, ’a rave i te tahi taime nō te fa’aau i te reira mau tāviri i te mau tāviri tā te feiā fa’atere o te autahu’ara’a e mau ra. (Nō te tahi tātarara’a e aha te mau tāviri nō te autahu’ara’a, hi’o Buka arata’i rahi, 3.4.1). E aha tā te mau tāviri o te autahu’ara’a e « ’īriti » ’e ’aore rā e « ha’amata » nō tātou ? Hi’o ato’a Gary E. Stevenson, « Tei hea te mau tāviri ’e te mana o te autahu’ara’a ? », Liahona, Mē 2016, 29–32 ; « Where Are the Keys ? [Tei hea te mau tāviri ?] » (video), Vaira’a buka ’evanelia.

• ’Ia fa’ata’a-ana’e-hia ’oe nō te hō’ē pi’ira’a, ’a ani i tā ’oe tamari’i ’ia haere ato’a mai, mai te mea e nehenehe. ’Ia ’ite tā ’oe tamari’i ia ’oe i te ravera’a i tō ’oe pi’ira’a. E nehenehe ato’a ’oe e ’imi i te mau rāve’a tano nāna ’ia tauturu ia ’oe. ’A fa’ata’a mai te aha te huru ’oe i te ’ite i te mana o te Fatu i roto i tō ’oe pi’ira’a.

Haere i te hiero—Te mau bāpetizora’a ’e te mau ha’amaura’a nō te feiā pohe

’Ua riro te mau hiero ’ei tuha’a nō te fa’anahora’a a te Metua i te ao ra nō tāna mau tamari’i. I roto i te mau hiero, e rave tātou i te mau fafaura’a mo’a ’e te Metua i te ao ra ’a ’āmui ai i roto i te mau ’ōro’a mo’a, ’o tē fa’atoro pā’āto’a i ni’a ia Iesu Mesia. ’Ua hōro’a mai te Metua i te ao ra i te hō’ē rāve’a i tāna mau tamari’i ato’a ’ia rave i te mau fafaura’a ’e ’ia rave i te mau ’ōro’a, tae noa atu i te feiā tei ’ore i fāri’i i te reira i roto i teie orara’a. I te ’ōmuara’a o te matahiti e ra’ehia tōna 12 matahiti, e mea pa’ari tā ’oe tamari’i nō te mau bāpetizora’a ’e te mau ha’amaura’a i roto i te hiero, nō te mau tupuna i pohe.

• ’A haere pinepine i te hiero mai tē noa’a ia ’oe. ’A paraparau i tā ’oe tamari’i nō ni’a i te tumu ’oe e haere ai i te hiero ’e te huru te reira e tauturu nei ia ’oe ’ia ha’afātata atu ā i te Metua i te ao ra ’e ia Iesu Mesia.

• ’A hi’o fa’ahou ’e ’a ’āparau ’āmui i te mau uira’a nō te parau fa’ati’a nō te hiero. ’A paraparau i tā ’oe tamari’i nō ni’a i te ’ohipa e tupu i roto i te hō’ē uiuira’a nō te parau fa’ati’a nō te hiero. ’A fa’a’ite nō te aha e mea faufa’a ai te fāri’ira’a i te hō’ē parau fa’ati’a nō te hiero, ia ’oe.

• ’A tai’o ’āmui i te Malaki 4:6. ’A paraparau e nāhea tō ’outou ’ā’au e nehenehe ai e fāriu i ni’a i tō ’outou mau tupuna. ’A ha’api’i atu ā nō ni’a i tō ’outou hui tupuna nā roto i te hi’o-’āmui-ra’a i tō ’outou ’ā’amu ’utuāfare i ni’a ia FamilySearch.org. ’A ’imi i te mau tupuna tei tītauhia ’ia bāpetizohia ’e ’ia ha’amauhia. E nehenehe te tauturu ’ohipa hiero ’e ’ā’amu ’utuāfare o te pāroita e tauturu ia ’outou.

• ’A hi’o ’āmui fa’ahou i te tahi o te mau mātēria i roto i te ha’apu’era’a tei parauhia « Hiero » i roto i te tuha’a a te mau tamari’i nō te Vaira’a buka ’evanelia. (Hi’o ato’a « Fa’aineine i tā ’oe tamari’i nō te bāpetizora’a ’e te ha’amaura’a i te hiero » i ni’a ia ChurchofJesusChrist.org.)

Fāri’i i te hō’ē ha’amaita’ira’a patereareha

E nehenehe te hō’ē ha’amaita’ira’a patereareha e riro ’ei puna nō te arata’ira’a, nō te tāmāhanahanara’a ’e nō te fa’aurura’a. Tei roto i te reira te a’o ta’ata hō’ē nō ’ō mai i te Metua i te ao ra, e a’o ia tātou iho nei, nō te tauturu ia tātou ’ia hāro’aro’a i tō tātou ti’ara’a mure ’ore ’e tā tātou ’ōpuara’a mure ’ore. ’A tauturu i tā ’oe tamari’i ’ia fa’aineine nō te fāri’i i te hō’ē ha’amaita’ira’a patereareha nā roto i te ha’api’ira’a iāna i te aura’a ’e te huru mo’a o te mau ha’amaita’ira’a patereareha.

• ’A fa’a’ite i tā ’oe tamari’i i te ’ohipa i tupu i te fāri’ira’a ’oe i tō ’oe ha’amaita’ira’a patereareha. E nehenehe ’oe e fa’a’ite i te mau mea mai te fa’aineinera’a nō te fāri’i i te reira, ’e nāhea te reira i te tauturura’a ia ’oe ’ia ha’afātata atu ā i te Atua, ’e nāhea ’oe i te fa’a’ohipa i te ha’amaita’ira’a i roto i tō ’oe orara’a. E nehenehe ato’a ’oe e ani i tā ’oe tamari’i ’ia paraparau i te tahi atu mau melo o te ’utuāfare tei fāri’i i tō rātou ha’amaita’ira’a patereareha.

• Nō te ha’api’i atu nō ni’a i te fāri’ira’a i te ha’amaita’ira’a patereareha, hi’o Buka arata’i rahi, 18.17.

• Mai te mea tē vai ra tō ’oe mau tupuna tei fāri’i i te ha’amaita’ira’a patereareha, e noa’a paha ïa te fa’aurura’a i te tai’ora’a i te reira ’e tā ’oe tamari’i. Nō te ani i te mau ha’amaita’ira’a o te mau tupuna tei pohe, e tomo i ni’a ia ChurchofJesusChrist.org, e tāumi i te ītona nō te tomora’a i te poro ’atau o te paruai, ’e e mā’iti « Patriarchal Blessing [Ha’amaita’ira’a patereareha] ».

• I muri a’e i te fāri’ira’a tā ’oe tamari’i i tāna ha’amaita’ira’a patereareha, ’a ani i te mau melo o te ’utuāfare i reira ato’a ’ia pāpa’i i tō rātou mau mana’o ’e ’ia fa’a’ite i te reira i terā tamari’i.

Haere i te hiero—Te ’ōro’a hiero

’Ua hina’aro te Atua e hōro’a i te ’ōro’a hiero, ’oia ho’i e ha’amaita’i, i tāna mau tamari’i ato’a ma te « mana nō ni’a mai ra » (Te Ha’api’ira’a Tumu ’e te mau Fafaura’a 95:8). Hō’ē noa taime tātou e haere ai i te hiero nō te fāri’i i tō tātou iho ’ōro’a hiero, terā rā, te mau fafaura’a tā tātou e rave i mua i te Atua ’e te mana pae vārua ho’i tāna e hōro’a mai ia tātou ’ei tuha’a nō te ’ōro’a hiero, e nehenehe ïa te reira e ha’amaita’i ia tātou i te mau mahana ato’a o tō tātou orara’a.

• ’A pia i te hō’ē hōho’a nō te hiero i roto i tō ’oe fare. ’A parau i tā ’oe tamari’i nō ni’a i te mau mana’o tā ’oe i fāri’i i roto i te hiero. ’A paraparau pinepine nō ni’a i tō ’oe here i te Fatu ’e i tōna fare ’e i te mau fafaura’a tā ’oe i rave i reira.

• Hi’o ’āmui temples.ChurchofJesusChrist.org. Tai’o ’āmui i te mau parau ve’a mai te parau ra « La dotation [Te ’ōro’a hiero] » ’e « Se préparer à aller au temple [Fa’aineine nō te haere i te fare o te Fatu]. » E vaiiho i tā ’oe tamari’i ’ia ui mai i tāna mau uira’a ato’a nō ni’a i te hiero. Nō te arata’ira’a nō ni’a i te mea tā ’oe e nehenehe e paraparau nō ni’a i te hiero, hi’o i te a’ora’a a Elder David A. Bednar « Fa’aineinehia nō te noa’a mai te mau mea ato’a i hina’arohia ra » (Ensign ’e ’aore rā Liahona, Mē 2019, 101–4 ; hi’o ta’a ’ē i te tuha’a parauhia « Te ha’api’ira’a ’e te fa’aineinera’a hiero fa’atumuhia i ni’a i te ’utuāfare ’e turuhia e te ’Ēkālekia »).

• ’A ’āmui ai ’oe, ’aore rā ’a ’āmui ai ’outou tā ’oe tamari’i i te tahi atu mau ’ōro’a (mai te ’ōro’a mo’a ’e ’aore rā te hō’ē ha’amaita’ira’a ta’ata ma’i), ’a rave i te hō’ē taime nō te tāu’aparau i te mau tāpa’o tei ravehia i roto i te ’ōro’a. E aha te aura’a o te mau tāpa’o ? Nāhea te reira i te parau pāpū nō Iesu Mesia ? E nehenehe te reira e tauturu i tā ’oe tamari’i ’ia fa’aineine i te feruri i te aura’a ’e te tāpa’o nō te mau ’ōro’a o te hiero, ’o tē parau pāpū ato’a nei nō Iesu Mesia.

• Tauturu i tā ’oe tamari’i ’ia ’ite ē, tē nāhea ra ’oia i te ha’apa’o i te fafaura’a nō te bāpetizora’a tei fa’ata’ahia i roto i te Mosia 18:8–10, 13. E tauturu ato’a i tā ’oe tamari’i ’ia ’ite ē, tē nāhea ra te Fatu i te ha’amaita’i iāna. ’A patu i te ti’aturira’a o tā ’oe tamari’i i roto i tōna ’aravihi ’ia ha’apa’o i te mau fafaura’a.

• ’A paraparau matara noa ’e te pinepine e nāhea tā ’oe mau fafaura’a nō te hiero i te arata’i i tā ’oe mau mā’itira’a ’e i te tauturu ia ’oe ’ia ha’afātata atu ā ia Iesu Mesia. E nehenehe ’oe e fa’a’ohipa i te Buka arata’i rahi, 27.2, nō te hi’o fa’ahou i te mau fafaura’a tā tātou e rave i roto i te hiero.

Tāvini i te hō’ē misiōni

’Ua ha’api’i Elder David A. Bednar : « Te mea hau atu i te faufa’a rahi ’o tā ’outou e nehenehe e rave nō te fa’aineine nō te hō’ē pi’ira’a ’ia tāvini, ’o te rirora’a ïa ’ei misiōnare hou roa ’a haere atu ai ’outou i te misiōni […] Te faufa’a, e ’ere i te haerera’a i te misiōni ; te faufa’a rā, ’o te rirora’a ïa ’ei misiōnare ’e te tāvinira’a, i roto i te tā’āto’ara’a o tō tātou orara’a ma tō tātou ’ā’au ato’a, tō tātou pūai ato’a, tō tātou mana’o ato’a ’e tō tātou itoito ato’a […] Tē fa’aineine nei ’outou nō te hō’ē orara’a roa nō te ’ohipa misiōnare » (« Te rirora’a ’ei misiōnare », Liahona, Novema 2005, 45–46). Te mau ’ohipa e tupu nō tā ’oe tamari’i, i te rirora’a ’ei misiōnare, e ha’amaita’i ïa iāna ē a muri noa atu, ’eiaha nō terā taime noa ’oia e tāvini ai ’ei misiōnare.

Nō te ha’api’i rahi atu ā, ’a hi’o Russell M. Nelson, « Porora’a i te ’evanelia o te hau », Liahona, Mē 2022, 6–7 ; M. Russell Ballard, « ’Ua ha’amaita’i te tāvinira’a misiōnare i tō’u orara’a ē a muri noa atu », Liahona, Mē 2022, 8–10 ; Préparation missionnaire : L’adaptation à la vie missionnaire [Fa’aineinera’a misiōnare : te fa’aaura’a i te orara’a misiōnare], Vaira’a buka ’evanelia.

• ’A fa’a’ite i te hi’ora’a e nāhea i te fa’a’ite i te ’evanelia mai te huru e peu iho ā nāna. E vai ara noa i te mau taime nō te fa’a’ite ia vetahi ’ē i tō ’oe mana’o nō ni’a i te Metua i te ao ra ’e te Fa’aora, ’e te mau ha’amaita’ira’a tā ’oe i fāri’i ’ei melo nō tāna ’Ēkālesia. ’A ani i te tahi atu mau ta’ata ’ia ’āmui mai i tō ’oe ’utuāfare i roto i te mau ’ātivite a te ’Ēkālesia ’e a te ’utuāfare.

• ’A ’imi i te mau rāve’a ’ia fārerei tō ’oe ’utuāfare i te mau misiōnare. ’A ani ia rātou ’ia ha’api’i i tō ’outou mau hoa, ’aore rā, ’a vaiiho ia rātou ’ia ha’api’i i te ta’ata i tō ’outou fare. ’A ani i te mau misiōnare nō ni’a i te mau ’ohipa i tupu nō rātou e nāhea te tāvinira’a misiōnare i te tauturu ia rātou ’ia ha’afātata atu ā ia Iesu Mesia. ’A ani ato’a e aha tā rātou i rave (’aore rā, te mea ’āhani rātou i rave) nō te fa’aineine ia rātou ’ei misiōnare.

• Mai te mea ’ua tāvini ’oe i te hō’ē misiōni, ’a paraparau rahi ’e te pinepine i te mau ’ohipa i tupu nō ’oe. ’Aore rā, ’a ani i te mau hoa ’aore rā i te mau melo o te ’utuāfare tei tāvini i te misiōni, ’ia paraparau nō ni’a i tā rātou misiōni. E nehenehe ato’a ’oe e paraparau nō ni’a i te mau rāve’a tā ’oe i fa’a’ite i te ’evanelia ia vetahi ’ē, i roto i tō ’oe orara’a. ’A tauturu i tā ’oe tamari’i ’ia feruri i te mau rāve’a nāna nō te fa’a’ite i te ’evanelia.

• ’A hōro’a i tā ’oe tamari’i i te taime au nō te ha’api’i i te mau parau tumu o te ’evanelia i tō ’oe ’utuāfare. E nehenehe ato’a tā ’oe tamari’i e ha’api’ipi’i i te fa’a’ite i tōna ti’aturira’a ia vetahi ’ē. ’Ei hi’ora’a, e nehenehe tā ’oe e tāu’aparau i te mau uira’a mai teie « Nāhea tātou i te fa’a’ite atu i te Buka a Moromona i te hō’ē ta’ata tei ’ore ā i fa’aro’o a’enei nō ni’a i te reira ? » ’aore rā « Nāhea tātou i te fa’a’ite i te hō’ē ta’ata e ’ere i te keresetiano ē, e tītauhia te Fa’aora ? »

• Tauturu i tā ’oe tamari’i ’ia mātau i te paraparau i te ta’ata. E aha te tahi mau rāve’a maita’i nō te ha’amata i te hō’ē ’āparaura’a ? Fa’aitoito i tā ’oe tamari’i ’ia ha’api’i i te fa’aro’o i te mea tā vetahi ’ē e parau ra, ’ia māramarama e aha tō roto i tō rātou ’ā’au, ’e ’ia fa’a’ite i te mau parau mau o te ’evanelia ’o tē nehenehe e ha’amaita’i i tō rātou orara’a.

• ’A ’imi i te mau rāve’a nō tā ’oe tamari’i ’ia ha’api’i mai nō ni’a i te tahi atu mau ta’ere ’e te mau fa’aro’o. ’A tauturu iāna ’ia ’ite e aha te mau parau tumu maita’i ’e te mau i roto i te ti’aturira’a o vetahi ’ē, ’e ’ia fa’atura i te reira.

Haere i te hiero—Te tā’atira’a

I roto i te hiero, e nehenehe te hō’ē tāne ’e te hō’ē vahine e fa’aipoipohia ē a muri noa atu. E tupu te reira i roto i te hō’ē ’ōro’a tei pi’ihia te tā’atira’a. Noa atu ē, e rave rahi matahiti te ātea teie ’ōro’a nō tā ’oe tamaiti ’aore rā tamāhine, te mau mea iti ’e te ’ōhie ’e te tāmau tā ’outou e rave ’āmui i roto i taua mau matahiti ra, e nehenehe te reira e tauturu iāna ’ia fa’aineine nō teie ha’amaita’ira’a fa’ahiahia.

• ’A tai’o ’āmui i te « Te ’Utuāfare : E Poro’i i tō te Ao nei » i roto i te Vaira’a buka ’evanelia. E aha tā teie poro’i e ha’api’i nei nō ni’a i te ’oa’oa i roto i te orara’a ’utuāfare ’e nō ni’a i te mau fa’aipoipora’a manuia ? ’A mā’iti ’e tā ’oe tamari’i i te hō’ē o te mau parau tumu i tāpurahia i roto i te poro’i nō te tuatāpapa atu. E nehenehe ’oe e hi’o i te mau pāpa’ira’a mo’a e tū’ati i te reira parau tumu i roto i te Arata’i nō te mau pāpa’ira’a mo’a. E nehenehe ato’a ’outou e ha’amau i te mau fā, nō te fa’a’ohipa hope atu ā i te reira parau tumu i roto i tō ’outou ’utuāfare. ’A ’ohipa ai ’outou i ni’a i tā ’outou mau fā, ’a ’āparau ’āmui i te maita’i nō te orara’a i taua parau tumu ra i roto i te orara’a ’utuāfare.

• ’A tai’o ’e tā ’oe mau tamari’i i te a’ora’a a te peresideni Dieter F. Uchtdorf « ’Ei fa’ahanahanara’a i te feiā ’o tē pāruru nei » (Ensign ’e ’aore rā Liahona, Mē 2016, 77–80). ’Ia tae ana’e ’oe i te tuha’a ra « Te hō’ē sōtaiete nō te mau mea fa’a’ohipahia ’e ’o tei tā’uehia », e nehenehe ’oe e mā’imi i te mau mea i roto i tō ’oe fare e nehenehe e tā’ue, ’e te mau mea ’aita. ’A paraparau nō ni’a i tō ’oe huru ta’a ’ē i ni’a i te mau mea tā ’oe e hina’aro ’ia vai maoro roa atu ā. E aha tā te reira e parau nei nō ni’a i tō tātou huru i ni’a i te fa’aipoipora’a ’e te mau tā’amura’a ’utuāfare ? E aha atu ā te ha’api’ira’a tā tātou e ’apo nei i roto i te a’ora’a a te peresideni Uchtdorf nō ni’a i te huru te Fa’aora e nehenehe e tauturu ia tātou ’ia patu i te mau fa’aipoipora’a ’e te mau ’utuāfare pa’ari ?

• Mai te mea ’ua fa’aipoipohia ’oe, ’ia matara noa tō ’oe mana’o i ni’a i tā ’oe tamari’i nō ni’a i te mau mea tā ’oe e mana’o ra ē, tē rave maita’i ra ’oe ’ei ta’ata fa’aipoipo, ’e te mau mea tā ’oe e ha’api’i nei, ’e te mau rāve’a tā ’oe e tāmata nei i te ha’amaita’i ia ’oe. Mai te mea ’ua tā’atihia ’oe i te hoa fa’aipoipo i roto i te hiero, ’a fa’a’ite i tā ’ōrua tamari’i i te hi’ora’a, tē nāhea ra ’ōrua i te tūtava i te ha’apa’o i tā ’ōrua mau fafaura’a i te tahi ’e te tahi ’e i te Fatu. E parau i tā ’oe tamari’i tē nāhea ra ’oe i te tūtava i te fa’ariro i te Metua i te ao ra ’e te Fa’aora ’ei pū nō tō ’oe mau tā’amura’a, ’e tē nāhea ra rāua i te tauturu ia ’oe.

• Mai te mea e tītauhia ’ia rave i te mau fa’aotira’a ’utuāfare, ’a fa’atupu i te mau ’āpo’ora’a ’utuāfare ’e te mau ’āparaura’a. ’A ha’apāpū ē ’ua fa’aro’ohia ’e ’ua ha’afaufa’ahia te mau mana’o ato’a o te ’utuāfare. ’A fa’a’ohipa i teie mau ’āparaura’a ’ei rāve’a nō te fa’ahi’o i te ’āparaura’a au ’e te maita’i i roto i tō tātou mau tā’amura’a ’utuāfare, noa atu ā ’aita hō’ē ā huru hi’ora’a.

• ’Ia tupu ana’e te mārōra’a ’aore rā te pe’ape’a i roto i te ’utuāfare, ’a fa’a’ite i te fa’a’oroma’i ’e te aumihi. ’A tauturu i tā ’oe tamari’i ’ia ’ite e nāhea te fa’arurura’a i te pe’ape’a mai te Mesia ra te huru, e tauturu ai iāna ’ia fa’aineine nō te hō’ē fa’aipoipora’a ’oa’oa. ’A tai’o ’āmui i Te Ha’api’ira’a Tumu ’e te mau Fafaura’a 121:41–42, ’e ’a ’āparau e nāhea te mau parau tumu i roto i teie mau ’īrava e nehenehe ai e fa’a’ohipahia i roto i te fa’aipoipora’a.