’O te fa’afāriura’a tā tātou fā

Te fā o te ’apora’a mai ’e te ha’api’ira’a tā’āto’a o te ’evanelia ’o te fa’ahōhonura’a ïa i tō tātou fa’afāriura’a ’e i te tauturura’a ia tātou ’ia riro hau atu ā mai ia Iesu Mesia te huru. Nō te reira tumu, ’ia ’imi maita’i ana’e tātou i te ’evanelia, ’aita tātou e mā’imi noa nei i te ha’amāramaramara’a ’āpī ; e hina’aro tātou ’ia riro mai ’ei « ta’ata ’āpī » (2 Korinetia 5:17). Tōna aura’a e tūru’i i ni’a i te Metua i te ao ra ’e ia Iesu Mesia nō te tauturu ia tātou ’ia taui i tō tātou ’ā’au, tō tātou nino’a mana’o, tā tātou mau ’ohipa ’e tō tātou nātura mau.

Terā rā te huru ’apora’a mai i te ’evanelia ’o tē ha’apūai i tō tātou fa’aro’o ’e e arata’i atu i te temeio o te fa’afāriura’a, e’ita ïa te reira e tupu tā’ue noa mai. E fa’atoro te reira i rāpae’au mai i te piha ha’api’ira’a, tae roa i te ’ā’au o te ta’ata ’e i te fare. E tītau te reira i te mau tauto’ora’a tāmau ’e tāmahana nō te māramarama ’e ’ia ora i te ’evanelia. E tītau te fa’afāriura’a mau i te fa’aurura’a o te Vārua Maita’i.

E arata’i te Vārua Maita’i ia tātou i te parau mau ’e e fa’a’ite pāpū i taua parau mau ra (hi’o Ioane 16:13). E ha’amāramarama ’oia i tō tātou ferurira’a, e ha’avitiviti i tō tātou hāro’aro’ara’a ’e e ha’aputapū i tō tātou ’ā’au i te heheura’a a te Atua, te puna o te parau mau ato’a. E tāmā te Vārua Maita’i i tō tātou ’ā’au. E fa’auru ’oia ia tātou i te hia’ai ’ia ora mai te au i te parau mau, ’e e muhumuhu mai ’oia ia tātou i te mau rāve’a nō te rave i te reira. ’Oia mau, « e ha’api’i te Vārua Maita’i [ia tātou] i te mau mea ato’a » (Ioane 14:26).

Nō teie mau tumu, i roto i tā tātou mau tauto’ora’a ’ia ora, ’ia ’apo mai ’e ’ia ha’api’i i te ’evanelia, e ti’a ia tātou nā mua roa e mā’imi i te auhoara’a o te Vārua. E ti’a i teie fā e fa’atere i tā tātou mau mā’itira’a ’e e arata’i i tō tātou mau mana’o ’e tā tātou mau ’ohipa. E ti’a ia tātou ’ia mā’imi i te mau mea ato’a ’o tē tītau i te fa’aurura’a a te Vārua ’e ’ia pāto’i atu i te mau mea ato’a e fa’aātea ’ē i teie fa’aurura’a—inaha ho’i ’ua ’ite tātou ē, mai te peu e mea ti’amā tātou i mua i te aro o te Vārua Maita’i, e mea ti’amā ato’a ïa tātou nō te ora i mua i te aro o te Metua i te ao ra ’e o tāna Tamaiti, ’o Iesu Mesia.