Fa’a’ohipara’a i te Mai, pe’e mai—nō te ’utuāfare ’e te fare purera’a

Nō vai teie nei mātēria ?

Teie mātēria, nō te mau ta’ata ato’a ïa e hina’aro nei e ’imi maita’i i Te Ha’api’ira’a Tumu ’e te mau Fafaura’a—’ei ta’ata hō’ē, ’ei ’utuāfare ’e i roto i te mau piha ha’api’ira’a a te ’Ēkālesia. Mai te peu ’aita ’outou i ’imi maita’i tāmau nā i te mau pāpa’ira’a mo’a nā mua a’e nei, e nehenehe teie mātēria e tauturu ia ’outou ’ia ha’amata. Mai te peu ’ua mātau maita’i a’ena ’outou i te ’imi maita’i i te pāpa’ira’a mo’a, e nehenehe teie mātēria e tauturu ia ’outou ’ia ora i te mau ’itera’a faufa’a atu ā.

Te ta’ata hō’ē ’e te ’utuāfare i te fare

Te vāhi maita’i roa a’e nō te ’apo mai i te ’evanelia ’o te fare ïa. E nehenehe tā ’outou mau ’orometua i te fare purera’a e pāturu ia ’outou, ’e e nehenehe ’outou e fa’ari’i i te mau fa’aitoitora’a a te tahi atu mau melo o te pāroita. Terā rā nō te ora mai i te pae vārua, e hina’aro tātou tāta’itahi ’ia fa’a’amuhia tātou i te mau mahana ato’a i « te parau maita’i a te Atua » (Moroni 6:4) hi’o ato’a Russell M. Nelson, « Mau parau ’ōmuara’a », Liahona, Novema 2018, 6–8).

’A fa’a’ohipa i teie mātēria ma te rāve’a e riro ’ei mea maita’i nō ’outou. E ha’apāpū mai te mau arata’ira’a ha’api’ira’a i te tahi mau parau mau mure ’ore, e vai ra i roto i Te Ha’api’ira’a Tumu ’e te mau Fafaura’a. E hōro’a ato’a mai rātou i te mau mana’o ’e te mau ’ohipa e rave nō te tauturu ia ’outou tāta’itahi ’ia ’imi maita’i i te mau pāpa’ira’a mo’a, ’e te mau melo o te ’utuāfare, ’aore rā ’e te mau hoa. ’A ’imi maita’i ai ’outou, ’a pe’e i te arata’ira’a a te Vārua nō te ’ite mai i te mau parau mau mure ’ore, ’o tē riro ’ei mea faufa’a nō ’outou. ’A mā’imi i te mau parau poro’i a te Atua nō ’outou, ’e ’a pe’e i te mau muhumuhu ’o tā ’outou e fa’ari’i.

Te mau ’orometua ’e te mau pīahi i te fare purera’a

Mai te peu tē ha’api’i nei ’oe i te hō’ē piha Paraimere, hō’ē piha a te feiā ’āpī ’aore rā a te feiā pa’ari i te Ha’api’ira’a Sābati, i te hō’ē pupu Autahu’ara’a a Aarona, ’aore rā te hō’ē piha a te Feiā ’Āpī Tamāhine, tē fa’aitoitohia nei ’oe ’ia fa’a’ohipa i te mau arata’ira’a i roto i teie mātēria ’a fa’aineine ai ’oe nō te ha’api’i. Te Mai, pe’e mai—nō te ’utuāfare ’e te fare purera’a ’o te fa’anahora’a ha’api’ira’a ïa nō tā ’oe piha ha’api’ira’a i te sābati. Te mau mana’o nō te ’apora’a mai i roto i teie mātēria, ’ua fa’ata’ahia nō te ’apora’a mai i te fare ’e i te fare purera’a. ’A fa’aineine ai ’oe nō te ha’api’i, ’a ha’amata nā roto i te orara’a i tō ’oe iho mau ’itera’a i roto i te mau pāpa’ira’a mo’a. E tupu tā ’oe fa’aineinera’a faufa’a roa a’e nā roto i te ’imi-hōhonu-ra’a i te mau pāpa’ira’a mo’a ’e te mā’imira’a i te fa’aurura’a a te Vārua Maita’i. E nehenehe ato’a ’oe e ’imi maita’i ma te tāpe’ara’a i roto i te ferurira’a i te mau hina’aro o te mau ta’ata tā ’oe e ha’api’i ra. Mā’imi i te mau parau mau mure ’ore. E nehenehe te Mai, pe’e mai e tauturu ia ’oe ’ia ’ite mai i te tahi o teie mau parau mau ’e ’ia ’apo mai, nāhea te mau pāpa’ira’a mo’a e nehenehe ai e fa’a’ohipahia i roto i tō ’oe orara’a.

’A tāpe’a noa i roto i te ferurira’a ē, te ’apora’a mai i te ’evanelia, te mea maita’i roa a’e, ’ua fa’atumuhia ïa i ni’a i te ’utuāfare ’e ’ua pāturuhia e te ’Ēkālesia. E nehenehe e parau ē, tā ’oe hōpoi’a mātāmua ’o te turura’a ïa i te mau ta’ata tā ’oe e ha’api’i nei i roto i tā rātou mau tauto’ora’a, nō te ’apo mai ’e nō te ora i te ’evanelia i te fare. ’Eiaha e ha’ape’ape’a i te fa’ari’ira’a hō’ē ana’e ’ohipa tā ’oe e vauvau atu ia rātou i roto i te piha ha’api’ira’a. ’A hōro’a atu ia rātou i te mau rāve’a nō te fa’a’ite mai i tō rātou mau ’itera’a, mau mana’o ’e tā rātou mau uira’a, nō ni’a i te mau tuha’a pāpa’ira’a mo’a tā rātou i tai’o i te fare. E ani ia rātou ’ia fa’a’ite mai i te mau parau mau mure ’ore tei ’itehia mai ia rātou. E mea faufa’a a’e te reira i te tāpo’ira’a atu i te tahi rahira’a parau tumu.

Piha Ha’api’ira’a Sābati nā te feiā ’āpī ’e nā te feiā pa’ari

Hō’ē o te mau tumu rahi e putuputu ai tātou i roto i te mau piha Ha’api’ira’a Sābati, nō te turura’a ïa ’e te fa’aitoitora’a ïa i te tahi ’e te tahi, ’a tūtava ai tātou i te mātau maita’i ’e i te pe’e ia Iesu Mesia. Hō’ē rāve’a ’ōhie nō te rave i te reira ’o te uira’a ïa i te hō’ē uira’a mai teie « e aha tā te Vārua Maita’i i ha’api’i ia ’outou i teie hepetoma, ’a ’imi maita’i ai ’outou i te mau pāpa’ira’a mo’a ’e te Mai, pe’e mai E nehenehe te mau pāhonora’a i teie uira’a e arata’i atu i te mau ’āparaura’a faufa’a rahi, ’o tē ha’apūai i te fa’aro’o ia Iesu Mesia ’e i tāna ’evanelia.

E nehenehe ’oe i muri iho e ani i te hō’ē tāu’ara’a parau, tei fa’atumuhia i ni’a i te mau mana’o nō te ’imi-maita’i-ra’a tei vauvauhia i roto te Mai, pe’e mai. ’Ei hi’ora’a, e nehenehe te hō’ē mana’o nō te ’imi-maita’i-ra’a e ani mai ’ia ’imi i roto i Te Ha’api’ira’a Tumu ’e te mau Fafau 19:15–20, e mea nāhea tō te Fa’aora fa’ata’ara’a i tōna mamae. E nehenehe ’oe e ani i te mau pīahi ’ia fa’a’ite mai e aha tā rātou i putapū i te tai’ora’a i tāna fa’ata’ara’a, ’e ’ia tātara mai e aha tā te reira i te fa’atupu mai i ni’a ia rātou, ’ia ha’amana’o ana’e rātou iāna. ’Aore rā e nehenehe ’outou e rave i te taime nō te ’imi maita’i i teie mau ’īrava ’ei piha ha’api’ira’a.

Te mau pupu Autahu’ara’a a Aarona ’e te mau piha Feiā ’Āpī Tamāhine

’Ia putuputu ana’e te mau pupu Autahu’ara’a a Aarona ’e te mau piha a te Feiā ’Āpī Tamāhine i te sābati, e mea ta’a ’ē ri’i tā rātou fā i tā te hō’ē piha Ha’api’ira’a Sābati. Hau atu i te tauturura’a i te tahi ’e te tahi ’ia ’apo mai i te ’evanelia a Iesu Mesia, e putuputu ato’a teie mau pupu nō te ’āparau ’āmui nō ni’a i te rave-fa’aoti-ra’a i te ’ohipa o te fa’aorara’a ’e te fa’ateiteira’a (hi’o Buka arata’i rahi : Tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei1.2), tei arata’ihia e tō rātou peresidenira’a o te piha ’aore rā o te pupu.

Nō teie tumu, e ti’a i te rurura’a tāta’itahi a te pupu autahu’ara’a ’aore rā a te piha tamāhine ’ia ha’amatahia e te hō’ē melo o te peresidenira’a pupu autahu’ara’a ’aore rā piha tamāhine, ’o te arata’i i te hō’ē ’āparaura’a nō ni’a i tā rātou mau tauto’ora’a. ’Ei hi’ora’a, e nehenehe rātou e ’āparau ’āmui nō tā rātou mau tauto’ora’a ’ia ora i te ’evanelia, te aupurura’a i te ta’ata i roto te fifi, te fa’a’itera’a i te ’evanelia, ’aore rā, te ’āmuira’a i roto i te ’ohipa hiero ’e te ’ā’amu ’utuāfare.

I muri mai i teie taime nō te ’āpo’ora’a ’āmui, e arata’i te hō’ē ’orometua i te piha tamāhine ’aore rā i te pupu autahu’ara’a i roto i te ’apo-’āmui-ra’a mai i te ’evanelia. E nehenehe te feiā fa’atere pa’ari ’aore rā, te mau melo o te piha ’aore rā, o te pupu e fa’auehia nō te ha’api’i. E rave te peresidenira’a o te piha ’aore rā o te pupu ma te ’āparaura’a ’e te feiā fa’atere pa’ari, i teie mau tītaura’a.

E ti’a i te mau ta’ata tei fa’ata’ahia nō te ha’api’i ’ia fa’aineine, ma te fa’a’ohipa i te mau mana’o nō te ’apora’a mai e vai ra i roto i te arata’i ha’api’ira’a tāhepetoma o te Mai, pe’e mai. I roto i te arata’i ha’api’ira’a tāta’itahi, e fa’a’ite tei ’ītona i te hō’ē ’ohipa ri’i e rave ta’a ’ē maita’i nō te feiā ’āpī, ’e e tū’ati maita’i i ni’a i te mea tā rātou e ’apo mai nei i te séminaire. Teie rā, noa atu te huru o te mau mana’o e vai ra i roto i te arata’i ha’api’ira’a, e nehenehe te reira e fa’a’ohipahia ’ei ’ohipa nō te rave nō te ’apora’a mai nā te feiā ’āpī.

Nō te hō’ē hōho’a tārena nō te mau rurura’a a te pupu autahu’ara’a ’e te piha tamāhine, hi’o te ’api hi’u D.

Paraimere

E ha’amata tā ’oe fa’aineinera’a nō te ha’api’i i te Paraimere ’a ’imi maita’i ai ’oe iho i te mau pāpa’ira’a mo’a ’e tō ’oe ’utuāfare. ’A nā reira ai ’oe, ’ia vai matara noa ’oe i te mau fa’a’itera’a ’e i te mau mana’o pae vārua nō ’ō mai i te Vārua Maita’i, nō ni’a i te mau tamari’i i roto i tā ’oe piha Paraimere. ’Ia vai noa i roto i te pure. E nehenehe te Vārua e fa’auru ia ’oe i te mau mana’o nō te tauturu ia rātou ’ia ’apo mai i te ’evanelia a Iesu Mesia.

’A fa’aineine ai ’oe nō tē ha’api’i, e noa’a mai te tahi atu ā fa’aurura’a ma te hi’o-maita’i-ra’a i te mau mana’o ha’api’ira’a e vai ra i roto i teie mātēria. Te arata’i ha’api’ira’a tāta’itahi i roto te Mai, pe’e mai—nō te ’utuāfare ’e te fare purera’a, tē vai ra te hō’ē tuha’a tei pi’ihia « Mau mana’o nō te ha’api’ira’a i te mau tamari’i » ’A feruri i teie mau mana’o mai te mau mana’o tauturu nō te fa’atupu i tō ’oe fa’aurura’a. ’Ua mātau ’oe i te mau tamari’i i roto i tā ’oe piha ha’api’ira’a Paraimere—’e e rahi atu ā ’oe i te mātau ia rātou ’a ’ohipa ’āmui ai ’oe ’e ’o rātou i roto i te piha ha’api’ira’a. ’Ua mātau ato’a te Atua ia rātou, ’e e fa’auru ’oia ia ’oe i te mau rāve’a maita’i a’e nō te ha’api’i ’e nō te ha’amaita’i ia rātou.

’Ua rave a’ena paha te mau tamari’i i roto i tā ’oe piha ha’api’ira’a i te tahi mau ’ohipa e rave i roto te Mai, pe’e mai ’e tō rātou ’utuāfare. ’Aita e fifi. E mea maita’i te nā-ni’a-iho-fa’ahou-ra’a. ’A feruri i te ani i te mau tamari’i ’ia fa’a’ite i te tahi ’e te tahi i te mea tā rātou i ’apo mai i te fare. E ti’a ato’a ia ’oe ’ia mito i te mau rāve’a e fa’ati’a i te mau tamari’i ’ia ’āmui mai, noa atu ’aita rātou e ’apo mai nei i te fare. E ’apo maita’i a’e mai te mau tamari’i i te mau parau mau o te ’evanelia, ’ia ha’api’i-ana’e-hia teie mau parau mau ma te nā-ni’a-fa’ahou-ra’a ’e te rāve’a o te mau ’ohipa e rave rau. Mai te peu e ’ite mai ’oe ē, e mea maita’i roa te hō’ē ’ohipa ri’i e rave nō te mau tamari’i nō te ’apo mai, ’a feruri i te nā-ni’a-fa’ahou-ra’a i te reira, mai te mea iho ā rā tē ha’api’i nei ’oe i te mau tamari’i ’āpī.

I roto i te mau ’āva’e e pae sābati, tē fa’aitoitohia nei te mau ’orometua ha’api’i o te Paraimere ’ia mono i te fa’anahora’a Mai, pe’e mai tei tārenahia nō te pae o te sābati, i te hō’ē ’aore rā hau atu o te mau ’ohipa e rave nō te ’apora’a mai i roto te « ’Api hi’u B : Nō te Paraimere—Fa’aineine i te mau tamari’i ’ia ora i te tā’āto’ara’a o tō rātou orara’a i ni’a i te ’ē’a o te fafaura’a a te Atua ».