Mau mana’o nō te ha’amaita’i i te ’apora’a mai i te ’utuāfare ’e i te fare purera’a

’A ’imi maita’i ai ’outou i te ’evanelia a te Fa’aora i te ’utuāfare ’e i te fare purera’a, ’a feruri i te mau uira’a i muri nei :

• Nāhea i te ani i te Vārua i roto i tā ’outou ’imi-maita’i-ra’a°?

• Nāhea i te fa’atumu i ni’a i te Fa’aora i roto i tā ’outou ’imi-maita’i-ra’a ?

• Nāhea i te navenave i te mau taime ’apora’a mai i te mau mahana ato’a ?

• Nāhea ’outou i te fa’aitoito i te mau melo o te ’utuāfare ’e o te piha ha’api’ira’a ’ia ’imi maita’i i te mau pāpa’ira’a mo’a, nō rātou iho ’e ’ia fa’a’ite atu i te mea tā rātou i ’apo mai ?

Teie te tahi mau rāve’a ’ōhie nō te ha’amaita’i i tā ’outou ’imi-maita’i-ra’a i te parau a te Atua.

Pure nō te fa’aurura’a

E parau nā te Atua te mau pāpa’ira’a mo’a, nō reira ’a ani atu iāna i te tauturu nō te māramarama i te reira.

’Imi i te mau parau mau nō ni’a ia Iesu Mesia

Tē fa’a’ite pāpū nei te mau mea ato’a i te Mesia (hi’o 2 Nephi 11:4 ; Mose 6:63), nō reira, ’a feruri i te pāpa’i ’aore rā i te tāpa’o i te mau ’īrava e fa’a’ite pāpū nei i te Fa’aora, ’a fa’ahōhonu i tō ’outou here nōna ’e ’a ha’api’i e nāhea i te pe’e iāna. I te tahi taime e parau-’āfaro-hia te mau parau mau nō ni’a i te Fa’aora ’e tāna ’evanelia, ’e i te tahi taime ’aita te reira e parauhia nā roto i te hō’ē hi’ora’a ’aore rā te hō’ē ’ā’amu. ’A ui ia ’outou iho, « e aha te mau parau mau mure ’ore e ha’api’ihia ra i roto i teie mau ’īrava ? » E aha tā teie mau parau mau e ha’api’i nei iā’u nō ni’a i te Fa’aora ?

’A faʼaroʼo i te Vārua

’A vai ara i tō ’outou mau mana’o ’e mau nino’a mana’o, noa atu ’aita te reira e tū’ati ra i te mea tā ’outou e tai’o ra. Pēnei a’e ’o teie mau fa’auru’a’ī [impression] tā te Metua i te ao ra e hina’aro ’ia ’apo mai ’outou.

Pāpa’i i tō ’outou mau fa’auru’a’ī

’Ua rau te mau rāve’a nō tē pāpa’i i te mau fa’auru’a’ī ’o te tae mai ’a ’imi maita’i ai ’outou. ’Ei hi’ora’a, e ’ite mai paha ’outou ē, ’ua fa’ahiahiahia ’outou e te tahi mau ta’o ’e mau pereota i roto i te mau pāpa’ira’a mo’a ; e nehenehe ’outou e tāpa’o i te reira ’e e pāpa’i i tō ’outou mau mana’o ’ei fa’ata’ara’a i roto i tā ’outou pāpa’ira’a mo’a. E nehenehe ato’a ’outou e tāpe’a i te hō’ē buka tāmahana nō te mau mana’o, te mau nino’a mana’o ’e te mau fa’auru’a’ī ’o tā ’outou i fa’ari’i.

’A fa’a’ite atu i te mea tā ’outou i ’apo mai ia vetahi ’ē

E rāve’a maita’i te ’āparaura’a i te mau mana’o nō roto mai i tā ’outou iho ’imi-maita’i-ra’a nō te ha’api’i ia vetahi ’ē, ’e e tauturu ato’a te reira i te ha’apūai i tō ’outou hāro’aro’ara’a i te mea tā ’outou i tai’o. ’A fa’a’ite atu i te mea tā ’outou i ’apo mai i te mau melo o te ’utuāfare ’e i te mau hoa (’ei tino ta’ata ’aore rā, nā te nūmeri), ’e e ani manihini ia rātou ’ia nā reira ato’a.

’A fa’atū’ati i te mau pāpa’ira’a mo’a i tō ’outou orara’a

’A feruri e nāhea te mau ’ā’amu ’e te mau ha’api’ira’a tā ’outou e tai’o ra e tū’ati ai i tō ’outou orara’a. ’Ei hi’ora’a, e nehenehe ’outouo e ui ia ’outou iho, « e aha te mau ’itera’a tā’u i ora e tū’ati i te mea tā’u e tai’o nei ? »

’A ui i te mau uira’a ’a ’imi maita’i ai ’outou

’A ’imi maita’i ai ’outou i te mau pāpa’ira’a mo’a, e nehenehe te mau uira’a e tae mai i tō ’outou ferurira’a. E tū’ati paha teie mau uira’a i te mea tā ’outou e tai’o ra ’aore rā i tō ’outou orara’a i mātauhia. E feruri i teie mau uira’a ’e ’a ’imi i te pāhonora’a, ’a tāmau noa ai ’outou i te ’imi maita’i i te mau pāpa’ira’a mo’a.

Fa’a’ohipa i te tauturu nō te ’imi-maita’i-ra’a i te mau pāpa’ira’a mo’a

Nō te roa’a i te tahi atu mau mana’o nō ni’a i te mau ’īrava tā ’outou e tai’o ra, ’a fa’a’ohipa i te mau fa’ata’ara’a i raro i te ’api, te Arata’i nō te mau pāpa’ira’a mo’a, ’e te tahi atu taututu nō te ’imi-maita’i-ra’a.

’A feruri i te huru tupura’a o te mau pāpa’ira’a mo’a

E nehenehe ’outou e ’ite mai i te mau fa’a’itera’a faufa’a nō ni’a i te mau tuha’a o te mau pāpa’ira’a mo’a, ’a feruri ai ’outou i tō te reira huru tupura’a ’oia ato’a te huru ’e te vaira’a o te reira. ’Ei hi’ora’a, te ’itera’a mai i te mau tupura’a nā mua atu ’e te ti’aturira’a o te ta’ata ’o tā te Atua i paraparau, e nehenehe e tauturu ia ’outou ’ia hāro’aro’a maita’i a’e i te tītaura’a o tāna mau parau. E nehenehe ’outou e ha’api’i mai nō ni’a ia rātou i roto Te feiā mo’a, te Révélations dans leur contexte [Mau heheura’a i roto i te heitupura’a], te mau upo’o parau o te tuha’a i roto i Te Ha’api’ira’a Tumu ’e te mau Fafaura’a, e te tahi atu mau mātēria.

’Imi-maita’i-ra’a i te mau parau a te mau peropheta ’e a te mau ’āpōsetolo i te mau mahana hope’a nei.

’A tai’o i te mea tā te mau peropheta ’e tā te mau ’āpōsetolo i te mau mahana hope’a nei i ha’api’i nō ni’a i te mau parau tumu tā ’outou i ’ite mai i roto i te mau pāpa’ira’a mo’a.

’A ora i te mea tā ’outou i ’apo mai

E’ita te ’imi-maita’i-ra’a i te mau pāpa’ira’a mo’a e fa’auru noa ia tātou, e fa’ataui ato’a rā i tō tātou huru orara’a. ’A fa’aro’o i te mea tā te Vārua e muhumuhu ia ’outou ’ia rave ’a tai’o ai ’outou, ’e ’a ’ohipa mai te au i teie mau muhumuhura’a.

Fa’a’ohipa i te pehe

E ’itehia te mau hīmene ’e te mau hīmene a te mau tamari’i tei fa’ata’ahia i roto te tā’āto’ara’a o te Mai, pe’e mai. ’A fa’a’ohipa i te pehe mo’a nō te tītau manihini i te Vārua ’e nō te fa’ahōhonu i tō ’outou fa’aro’o ’e te ’itera’a pāpū nō te mau parau mau.

Tāmau ’ā’au i te mau ’īrava

’A mā’iti i te hō’ē ’īrava pāpa’ira’a mo’a faufa’a rahi nō ’outou, nō tō ’outou ’utuāfare ’aore rā nō tā ’outou piha, ’e ’a tāmau ’ā’au i te reira ma te fa’ahitira’a i te mau mahana ato’a ’aore rā ma te hautira’a i te hō’ē ha’uti nō te tāmau ’ā’au.

Fa’a’ohipa i te mau ha’api’ira’a tao’a

’A ’ite mai i te mau tao’a e tū’ati i te mau pene ’e i te mau ’īrava ’o tā ’outou e tai’o ra. ’A feruri nāhea te tao’a tāta’itahi e tū’ati ai i te mau ha’api’ira’a i roto i te mau pāpa’ira’a mo’a.

Pāpa’i hōho’a, ’ite mai ’aore rā, pata i te hō’ē hōho’a

E tai’o i te tahi mau ’īrava, ’e i muri iho ’a pāpa’i hōho’a i te hō’ē mea e tū’ati i te mea tā ’outou e tai’o ra. ’Aore rā e nehenehe ’outou e ’imi mai i te hō’ē hōho’a i roto i te Buka hōho’a nō te ’evanelia ’aore rā i te tahi atu vāhi i roto i te Vaira’a buka ’evanelia. E nehenehe ato’a ’outou e pata i te hō’ē hōho’a nō te fa’ahōho’a i te mea tā ’outou i ’apo mai.

Ha’uti i te hō’ē ’ā’amu

I muri a’e i te tai’ora’a i te hō’ē ’ā’amu, ’a ani manihini i te ’utuāfare ’aore rā i te piha ’ia ha’uti mai i te reira. I muri iho, e paraparau nō ni’a i te tū’atira’a i roto i te ’ā’amu ’e te mau mea tā ’outou e ora nei.

’Ia vai apuapu [flexible] noa i te fare

Mai te mea ’aita te mau melo o te ’utuāfare e hina’aro e ’āmui mai i te ’imi-maita’i-ra’a i te mau pāpa’ira’a moa a te ’utuāfare, ’a ’imi i te tahi atu mau rāve’a nō te tū’ati atu ia rātou. ’Ei hi’ora’a, e nehenehe ānei ’outou e paraparau ’ōhie noa i te parau mau o te ’evanelia i roto i tā ’outou mau ’āparaura’a ’aore rā e fa’a’ite atu i te hō’ē tuha’a pāpa’ira’a mo’a faufa’a ma te rāve’a e ’ere ra mai te porora’a ’aore rā ma te fa’ahepora’a ? E ’ere hō’ē ā huru te ’imi-maita’i-ra’a i te mau pāpa’ira’a mo’a nō te tā’āto’ara’a o te mau ’utuāfare. E pāhono maita’i a’e te tahi mau tamari’i i te ’imi-maita’i-ra’a i te mau pāpa’ira’a mo’a ta’ata hō’ē. ’A pure ’e ’a pe’e i te mau muhumuhu a te Vārua.

Mau rurura’a ’āpo’ora’a a te mau ’orometua ha’api’i nā te mau metua. Mai te mea e hina’aro ’outou i te tahi atu tauturu i roto i tā ’outou mau tauto’ora’a nō te ha’api’i i tā ’outou mau tamari’i, ’a ani atu tē fa’atupu ra ānei tā ’outou pāroita i te mau rurura’a ’āpo’ora’a a te mau ’orometua ha’api’i nā te mau metua (hi’o Buka arata’i rahi,, 17.5). ’Ua riro teie mau rurura’a ’ei rāve’a nō te mau metua ’ia paraparau ’e ’ia ’apo ’āmui mai, nāhea i te ha’amaita’i i tā rātou ha’api’ira’a. E nehenehe rātou e tāu’aparau i te mau parau tumu i roto te Ha’api’ira’a mai tā te Fa’aora, te mau mana’o i ni’a i teie mau ’api nō te ha’amaita’i ïa i te ’imi-maita’i-ra’a i te mau pāpa’ira’a mo’a a te ’utuāfare, ’e te mau mana’o nō te ’apora’a mai ’e te ha’api’ira’a e ’itehia i roto te Mai, pe’e mai.