Adwensakyera Ne Yɛn Boateɛ

Asɛmpa no adesua ne adekyerɛ botaeɛ ne sɛ yɛn adwensakyera mu bɛdɔ na aboa yɛn ama yɛabɛyɛ te sɛ Yesu Kristo bebree. Ne saa nti, sɛ yɛsua asɛmpa no a, yɛrenhwehwɛ nsɛm foforɔ kɛkɛ; yɛpɛ sɛ yɛbɛyɛ “abɔdeɛ foforɔ” (2 Korintofoɔ 5:17). Yei kyerɛ sɛ yɛde yɛn ho to Ɔsoro Agya ne Yesu Kristo so ma wɔboa yɛn sesa yɛn akoma, yɛn adwene ahodoɔ, yɛn nneyɛɛ, ne yɛn su ankasa.

Nanso asɛmpa adesua a ɛhyɛ yɛn gyidie den na ɛde yɛn kɔ adwensakyera anwanwadeɛ mu nsi prɛko pɛ. Ɛtra adesua dan mu de kɔ ankorankoro akoma mu ne efie mu. Ɛhia daadaa mmɔdemmɔ a ɛsisi so na yɛate aseɛ na yɛadi asɛmpa no so. Nokorɛ adwensakyera hia Sunsum Kronkron no nkɛntɛnsoɔ.

Sunsum Kronkron no kyerɛ yɛn kwan kɔ nokorɛ no mu na ɔdi adanseɛ fa saa nokorɛ no ho (hwɛ Yohane 16:13). Ɔbue yɛn adwene mu, na ɔma yɛn nteaseɛ yɛ ntɛm, na ɔnam Onyankopɔn adiyisɛm so ka yɛn akoma, nokorɛ nyinaa fibea no. Sunsum Kronkron no ma yɛn akoma mu te. Ɔma ɔpɛ nkanyan ba yɛn mu sɛ yɛbɛtena ase nokorɛ mu, na waka agu yɛn aso mu akwan a yɛbɛfa so ayɛ yei. Nokorɛ, “Sunsum Kronkron no bɛkyerɛkyerɛ [yɛn] nneɛma nyinaa” (Yohane 14:26

Ne saa nti, wɔ yɛn mmɔdemmɔ mu sɛ yɛsua, di so, na yɛkyerɛ asɛmpa no, ɛwɔ sɛ deɛ ɛdi kan koraa no, yɛhwehwɛ Honhom no ayɔnkofa. Ɛwɔ sɛ saa botaeɛ yi di yɛn gyinaeɛsie so na ɛkyerɛ yɛn nsusuiɛ ne nneyɛɛ kwan. Ɛwɔ sɛ yɛhwehwɛ adeɛ biara a ɛfrɛ Honhom no nkɛntɛnsoɔ na ɛpo adeɛ biara a ɛpam saa nkɛntɛnsoɔ no firi hɔ—ɛfiri sɛ yɛnim sɛ, sɛ yɛbɛtumi afata Sunsum Kronkron no anim a, yɛbɛtumi nso afata wɔ Ɔsoro Agya ne Ne Ba, Yesu Kristo anim.