Kōjerbal Itok, Ļoor Eō—N̄an M̧weeo im Kabun̄ in

Wōn Eo Kein Jipan̄ In Ej N̄an E?

Kein jipan̄ in ej n̄an jabdewōt eo me ej kōņaan ekkatak kōn Katak im Bujen Ko—kajjojo armej, āinwōt juon baam̧le, im ilo kūlaaj ko an Kabun̄ in Eļan̄n̄e kwojjan̄in kar emakijkij ekkatak jeje ko rekwojarjar m̧okta, bok in katak in emaron̄ jipan̄ eok jinoe. Eļan̄n̄e em̧ōj an wōr kadede am̧ juon iminene em̧m̧an n̄an ekkatak jeje ko rekwojarjar, bok in emaron̄ jipan̄ eok kōm̧m̧an bwe en ļapļo̧k am̧ meļeļe en̄jake ko am̧.

Kajjojo Armej im Baam̧le ko ilo M̧weeo

Jikin eo em̧m̧an n̄an katak gospel eo ej ilo m̧weeo. Rūkaki ro am̧ ilo m̧ōnjar eo remaron̄ jipan̄ eok, im kwomaron̄ bōk kōketak jān ward membōr ro jet. Ak n̄an mour ilo jetōb, kwe im baam̧le eo am̧ aikuj naajdik kajjojo raan jān “em̧m̧an eo an naan in Anij” (Moronai 6:4; bar lale Russell M. Nelson, “Naan in Kōppeļļo̧k ko,” Liaona, Nob. 2018, 6–8).

Kōjerbal bok in ekkatak in ilo jabdewōt wāween me ejipan̄ eok. Unin tōl in ej kōmejajaik jet iaan m̧ool ko indeeo rej waļo̧k ilo Katak in Bujen Ko. Rej barāinwōt elmakoti ļōmņak ko im m̧akūtkūt ko n̄an jipan̄ eok ekkatak jeje ko rekwojarjar make ļo̧k, ippān ro uwaan baam̧le, ak ippān ro m̧ōttam̧. Ilo am̧ ekkatak, ļoor im̧we eo an Jetōb n̄an lo m̧ool ko indeeo me ewōr tokjeer n̄an eok. Pukot ennaan ko an Anij n̄an eok, im ļoor im̧we ko kwoj būki.

Rūkaki ro im Rikatak ro ilo M̧ōnjar eo

Eļan̄n̄e kwoj katakin kūlaaj eo an Būraimere, jodikdik ak rūtto ilo Jabōt Jikuuļ kūlaaj, doulul eo an Priesthood eo an Aron, kūlaaj eo an Doulul eo an Jiron̄ ro, em̧ōj kōketak eok n̄an kōjerbal laajrak ko ilo bok in katak in ilo am̧ kōppopo n̄an katakin. Itok, Ļoor Eō—N̄an M̧weeo im Kabun̄ ej juon laajrak in kein katak ko n̄an Jabōt kūlaaj eo am̧. Ļōmņak ko n̄an ekkatak ilo bok in katak in em̧ōj āje n̄an katak ilo m̧weeo im ilo kabun̄ in. Ilo am̧ kōppopo n̄an katakin, jino kake en̄jake ko am̧ make ilo jeje ko rekwojarjar. Kōppopo eo am̧ eaorōk tata enaaj waļo̧k ilo am̧ riiti jeje ko rekwojarjar im pukot im̧we eo an juon make jān Jetōb Kwojarjar. Kwomaron̄ barāinwōt ekkatak kōn aikuj ko an armej ro kwoj katakin ilo ļōmņak eo am̧. Kappukot m̧ool ko indeeo. Itok, Ļoor Eō emaron̄ jipan̄ eok kile jet iaan m̧ool kein im katak elmen an jeje ko rekwojarjar maron̄ jerbal ilo mour eo am̧.

Likūt wōt ilo ļōmņak bwe ekkatak gospel in, ilo ijo em̧m̧antata, ej pād ioļapļap in m̧weeo im Kabun̄ in ej rie. Ilo naan ko jet, lukkuun eddo eo am̧ ej n̄an jipan̄ armej ro kwoj katakin kōn kijejeto ko aer n̄an katak im mour kake gospel in ilo m̧weeo. Jab inepata kōn bōk ippam̧ juon katak eoktak n̄an jeere ippāer ilo kūlaaj eo. Ijello̧kin, leļo̧k n̄an er iien ko rem̧m̧an n̄an kwaļo̧k en̄jake eo aer, ļōmņak ko, im kajjitōk ko kōn eoon ko an jeje ko rekwojarjar raar riit kaki ilo m̧weo. Kajjitōk ippāer n̄an kwaļo̧k m̧ool ko indeeo rej loi. En̄in men eo eļap an aorōk jen baj lali katak ko.

Jabōt Jikuuļ Kūlaaj ko an Jodikdik ro im Rūtto ro

Juon un eļap jej kuk ippān doon ilo Jabōt Jikuuļ kūlaaj ko ej n̄an jipan̄ im kōketak doon ilo ad kajjieon̄ n̄an jeļā im ļoor Jisōs Kraist. Juon wāween epidodo n̄an kōm̧m̧ane menin ej n̄an kajjitōk juon kajjitōk āinwōt “Ta eo Jetōb Kwojarjar eaar katakin eok wiik in ilo am̧ kar ekkatak jeje ko rekwojarjar ilo Itok, Ļoor Eō?” Uwaak ko n̄an kajjitōk in emaron̄ tōlļo̧k n̄an kōnono ko ewōr tokjeer me rej kalōk tōmak ilo Jisōs Kraist im gospel in An.

Innām komi maron̄ kōnono kake pedped ioon elmotkwot in ekkatak ko ilo Itok, Ļoor Eō. N̄an waanjon̄ak, juon ļōmņak in ekkatak emaron̄ elmakote lin̄ūri Katak im Bujen Ko 19:15–20, lale ekōjkan an Rilo̧mo̧o̧r eo kōmeļeļeik en̄taan eo An. Kwomaron̄ kajjitōk ippān ro uwaan kūlaaj eo n̄an kwaļo̧k ekōjkan aer en̄jake ilo aer kar riiti kōmeļeļe eo An im kōnono ekōjkan an menin jelet wāween aer ļōmņak kōn E. Ak kwomaron̄ joļo̧k jet iien ekkatak eoon kein āinwōt juon kūlaaj.

Doulul ko an Priesthood eo an Aron im kūlaaj ko an Doulul eo an Jiron̄ ro

N̄e Doulul ko an Priethood eo an Aron im kūlaaj ko an Doulul eo an Jiron̄ ro rej ippān doon ilo Jabōt, kōttōbar eo aer eoktak jidik jān Jabōt Jikuuļ kūlaaj eo. Ilo kakkobaba n̄an jipan̄ doon katak kōn gospel eo an Jisōs Kraist, kurup kein rej bar ippān doon n̄an kapilōk doon n̄an kadedeļo̧k jerbal in lo̧mo̧o̧r im mour ijo ilōn̄tata (lale Bok in Bōk Meļeļe Eļap: Jerbal ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, 1.2), āinwōt tōl jān būreejtōnji eo an kūlaaj ak doulul eo.

Kōn un in, kajjojo kweilo̧k an doulul ak kūlaaj aikuj jino kōn an juon membōr in būreejtōji an doulul eo ak būreejtōnji an kūlaaj eo n̄an tōl juon iien ekōnono kōn kijejeto ko aer. N̄an waanjon̄ak, remaron̄ kapilōk doon kōn kijejeto ko aer n̄an mour kōn gospel eo, jerbal in karejar n̄an armej ro ilo aikuj, kwaļo̧k gospel eo, ak bōk kuņaer ilo tampeļ im jerbal in menmenbwij an baam̧le.

Ālkin iien kapilōk in ippān doon, rūkaki eo ej tōl kūlaaj eo ak doulul eo n̄an katak gospel in ippān doon. Ritōl eo erūtto ak membōr ro ilo kūlaaj ak doulul eo maron̄ in jitōn̄e n̄an katakin. Būreejtōnji eo an kūlaaj ak doulul, kōnono ippān ritōl eo erūtto, kōm̧m̧ani ijjitōn̄ ko.

Armej ro kar jitōn̄ er n̄an katakin raikuj kōppopo n̄an kōjerbal elmokwot in ekkatak ko ilo laajrak eo an wiik in ilo Itok, Ļoor Eō. Ilo kajjojo unin tōl, pija in ej kwaļo̧k juon m̧akūtkūt me ej lukkuun in jetjet n̄an jodikdik ro im ekar jokkuun wōt ippān ta eo rej katak ilo jemenere. Ijoke, jabdewōt elmokwot ko ilo laajrak in eaikuj jerbal āinwōt juon ekkatak n̄an jodikdik ro.

Kōn juon jon̄an in laajrak in kweilo̧k an doulul im kūlaaj ko , lale appendix D.

Būraimere

Kōppopo eo am̧ n̄an katakin Būraimere ej jino ilo am̧ ekkatak jeje ko rekwojarjar make im ippān baam̧le eo am̧. Ilo am̧ kōm̧m̧an āindein, bōk im̧we ko an jetōb im en̄jake ko jān Jetōb Kwojarjar kōn ajri ro ilo Būraimere kūlaaj eo am̧. Kom̧in jar. Jetōb eo emaron̄ im̧we eok kōn ļōmņak ko n̄an jipan̄ er katak kōn gospel eo an Jisōs Kraist.

Ilo am̧ kōppopo n̄an katakin, kwomaron̄ in bōk im̧we ko jet jān am̧ etali laajrak in katak ko ilo bok in jipan̄ in. Kajjojo jekjek ilo Itok, Ļoor Eō—N̄an M̧weeo im Kabun̄ in ewōr ie taitōļ jekjen “Ļōmņak ko n̄an Katakin Ajri ro.” Ļōmņaki ļōmņak kein āinwōt elmokwot n̄an jipan̄ eok en̄jake im̧we. Kwojeļā kajjien ajri ro ilo Būraimere kūlaaj eo am̧—im enaaj em̧m̧anļo̧k am̧ jeļā kajjier ilo am̧ iaio̧ ippāer ilo kūlaaj. Anij ebar jeļā kajjier, im Enaaj im̧we eok ilo wāween ko rem̧m̧antata ilo am̧ katakin im kōjeraam̧m̧an er.

Ajri ro ilo kūlaaj eo emaron̄ m̧ōj kadede aer kōm̧m̧ane m̧akūtkūt ko ilo Itok, Ļoor Eō ippān baam̧le ko aer. Ej em̧m̧an wōt! Āliji em̧m̧an. Ļōmņak in kajjitōk ippān ajri ro n̄an kwaļo̧k ippān doon ta eo raar katak ilo m̧weo. Kwoj aikuj barāinwōt ļōmņaki wāween ko n̄an ajri ro n̄an bōk kuņaer jekdo̧o̧n eļan̄n̄e rejjan̄in kar katak ilo m̧weo. Em̧m̧anļo̧k an ajri ro ekkatak n̄e m̧ool kein rej āliji ilo elōn̄ kain wāween m̧akūtkūt ko. Eļan̄n̄e kwoj loe ke em̧m̧an m̧akūtkūt in ekkatak eo n̄an ajri ro, ļōmņak in bar āliji, eļaptata n̄e kwoj katakin ajri ro reddikļo̧k.

Ilo allōn̄ ko elōn̄ ļalem Jabōt ie, rej rōjan̄ rūkaki ro an Būraimere n̄an jeneji laajrak in jikejuuļ eo an Itok, Ļoor Eō ilo laajrak eo an Jabōt ļalem ippān juon ak elōn̄ elmokwot in ekkatak ko ilo “Appendix B: N̄an Būraimere—Kōpooj Ajri ro n̄an Mour Ejjeļo̧k Jemļo̧kin ilo Iaļen Bujen eo an Anij.