Faaaogaina o le Sau, Mulimuli Mai ia te A’u—Mo Aiga ma le Ekalesia

E Mo Ai Lenei Punaoa?

O lenei punaoa e mo soo se tasi e manao e aoao mai le Mataupu Faavae ma Feagaiga—taitoatasi, o se aiga, ma i vasega o le Ekalesia. Afai e te lei suesueina e le aunoa tusitusiga paia i le taimi ua tuanai, ua mafai ona fesoasoani lenei punaoa ia te oe e amata ai. Afai ua i ai sau mausa lelei i le suesueina o tusitusiga paia, e mafai ona fesoasoani lenei punaoa ia e maua ai nisi mau aafiaga ‘anoa.

Tagata Taitoatasi ma Aiga i le Fale

O le nofoaga sili e aoao ai le talalelei o le aiga. O ou faiaoga i le lotu e mafai ona lagolagoina oe, ma e mafai ona e maua le faamalosiauga mai isi tagata o le uarota. Ae ina ia ola ai faaleagaga, e manaomia e i tatou taitoatasi le fafagaina i aso taitasi mai “le afioga lelei a le Atua” (Moronae 6:4; tagai foi i le Russell M. Nelson, “Malelega Amata,” Liahona, Nov. 2018, 6–8).

Faaaoga lenei punaoa i soo se auala e fesoasoani ai ia te oe. O otootoga o loo faamamafa mai ai nisi o upumoni e faavavau o loo maua i le Mataupu Faavae ma Feagaiga. Latou te fautuaina atu foi manatu ma gaoioiga e fesoasoani ia te oe i au lava suesuega o tusitusiga paia, ma faatasi ma tagata o le aiga, po o uo. A o e suesue, mulimuli i le taitaiga a le Agaga ia maua upumoni e faavavau e taua ia te oe. Vaavaai mo sāvali a le Atua mo oe, ma mulimuli i uunaiga e te maua.

Faiaoga ma Tagata Aoao i le Lotu

Afai e te faiaoga i se vasega o le Peraimeri, se vasega a le autalavou po o tagata matutua o le Aoga Sa, se korama a le Perisitua Arona, po o se vasega a Tamaitai Talavou, ua uunaia oe e faaaoga otootoga o i lenei punaoa a o e sauni e aoao atu. O leSau, Mulimuli Mai ia te A’u—Mo Aiga ma le Ekalesia o le mataupu aoaoina mo lau vasega i le Aso Sa. O manatu e aoao ai i lenei punaoa ua mamanuina mo le aoaoina i le aiga ma i le lotu. A o e sauni e aoao atu, amata i le i ai o ou lava aafiaga i tusitusiga paia. O lau tapenaga aupito tāua lava o le a tupu a o e sailiili i tusitusiga paia ma saili musumusuga a le Agaga Paia. E mafai foi ona e suesue faatasi ma manaoga o tagata o loo e aoaoina i le mafaufau. Vaavaai mo upumoni e faavavau. O leSau, Mulimuli Mai ia te A’u e mafai ona fesoasoani ia te oe e faailoa ai nisi o nei upumoni ma aoao ai pe mafai faapefea ona faaaoga tusitusiga paia i lou olaga.

Ia manatua o le aoaoina o le talalelei, i le mea sili, e faatotonugalemu i le aiga ma lagolagoina e le Ekalesia. I se isi faaupuga, o lou tiutetauave autu lava o le lagolagoina lea o tagata o loo e aoaoina i a latou taumafaiga e aoao ma ola i le talalelei i le aiga. Aua le popole i le i ai o ni anotusi tulagaese e tuuina atu mo i latou i le vasega. Nai lo o le lena, tuu atu ia i latou ni avanoa e faasoa mai ai o latou aafiaga, manatu, ma fesili e uiga i fuaitau o mau na latou faitauina i le aiga. Valaaulia i latou e faasoa mai upumoni na latou maua. E sili atu le taua o lenei mea nai lo le taumafai ia aofia ai se aofaiga faapitoa o anomea.

Vasega a le Autalavou ma Tagata Matutua o le Aoga Sa

O se tasi o mafuaaga autu tatou te potopoto ai i vasega o le Aoga Sa o le lagolago ma uunaia e le tasi le isi a o tatou taumafai e iloa ma mulimuli ia Iesu Keriso. O se auala faigofie e faia ai lenei mea o le fai atu lea o se fesili e pei o le “O le a se mea na aoao atu e le Agaga Paia ia te oe i lenei vaiaso a o e suesue i tusitusiga paia faatasi ma le Sau, Mulimuli Mai ia te A’u?” O tali i lenei fesili e mafai ona taitai atu ai i ni talanoaga anoa e fausia ai le faatuatua ia Iesu Keriso ma Lana talalelei.

Ona mafai lea ona e valaaulia le talanoaga e faavae i fautuaga mo suesuega i le Sau, Mulimuli Mai ia te A’u. Mo se faataitaiga, o se manatu mo suesuega e ono fautuaina mai ai le suesueina o le Mataupu Faavae ma Feagaiga 19:15–20, ma vaavaai pe na faapefea ona faamatala e le Faaola Ona mafatiaga. E mafai ona e fai i tagata o le vasega e faasoa mai o latou lagona a o latou faitau i Lana faamatalaga ma talanoa pe faapefea ona aafia ai le ala latou te mafaufau ai e uiga ia te Ia. Pe e mafai foi ona e faaaluina sina taimi e suesue ai nei fuaiupu faatasi o se vasega.

Vasega o le Korama a le au Perisitua Arona ma Vasega a Tamaitai Talavou

Pe a potopoto korama a le Perisitua Arona ma vasega a Tamaitai Talavou i Aso Sa, e fai si ese o lo latou faamoemoega mai se vasega o le Aoga Sa. E faaopoopo atu i le fesoasoani o le tasi i le isi e aoao le talalelei a Iesu Keriso, e fono foi nei vaega e fefautuaai faatasi e uiga i le faataunuuina o le galuega o le faaolataga ma le faaeaga (tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 1.2), e pei ona faatonuina ai e le au peresitene o le latou vasega po o le korama.

Mo lenei mafuaaga, e tatau ai i sauniga taitasi a korama po o vasega ona amata i se uso o le au peresitene o le korama po o le vasega e taitaia se talanoaga e uiga i a latou taumafaiga. Mo se faataitaiga, e mafai ona latou fefautuaai faatasi e uiga i a latou taumafaiga e ola i le talalelei, auauna atu i tagata e le tagolima, faasoa atu le talalelei, pe auai i galuega faalemalumalu ma talafaasolopito o aiga.

A maea lenei taimi mo le fefautuaai faatasi, e taitai e se faiaoga le vasega po o le korama i le aoaoina faatasi o le talalelei. O taitai matutua po o tagata o le vasega po o le korama e mafai ona tofia e aoao atu. O le au peresitene o le vasega po o le korama, e feutagai ma taitai matutua, e faia nei tofitofiga.

O tagata ua tofia e aoao atu e tatau ona saunia e ala i le faaaogaina o fautuaga e aoao ai i le otootoga faalevaiaso o le Sau, Mulimuli Mai ia te A’u. I otootoga taitasi, o loo faailoa mai i lenei aikona se gaoioiga e faapitoa le talafeagai i le autalavou ma ogatusa ma mea o loo latou aoaoina i le seminare. Peitai, o soo se fautuaga i le otootoga e mafai ona faaaoga o se gaoioiga e aoao ai mo le autalavou.

Mo se faataitaiga o le lisi o mataupu mo fonotaga a korama ma vasega, tagai i le faaopoopoga O.

Peraimeri

O lau tapenaga e aoao atu le Peraimeri e amata a o e suesue patino i tusitusiga paia ma faatasi ai ma lou aiga. A o e faia, ia faalogo i uunaiga ma malamalamaaga faaleagaga mai le Agaga Paia e uiga i tamaiti o lau vasega Peraimeri. Ia loto tatalo. E mafai e le Agaga ona musuia oe i manatu e fesoasoani ia i latou e aoao le talalelei a Iesu Keriso.

A o e sauni e aoao atu, e te ono maua ni lagona musuia faaopoopo e ala i le suesueina o manatu taitasi e aoao atu ai i lenei punaoa. O otootoga taitasi i le Sau, Mulimuli Mai ia te A’u—Mo Aiga ma le Ekalesia o loo i ai se vaega ua faaautuina “Manatu mo le Aoaoina o Tamaiti.” Mafaufau i nei manatu o ni fautuaga e faaosofia ai au musumusuga. E te iloa tamaiti i lau vasega Peraimeri—ma o le a sili atu lou iloa o i latou a o e fegalegaleai ma i latou i le vasega. E silafia foi e le Atua i latou, ma o le a Ia musuia oe i auala sili e aoao ma faamanuia ai i latou.

Atonu ua uma ona fai e tamaiti o lau vasega nisi o gaoioiga i le Sau, Mulimuli Mai ia te A’u faatasi ma o latou aiga. Ua lelei lena. E lelei le faifai soo. Mafaufau e valaaulia tamaiti e fefaasoaai i le tasi ma le isi mea na latou aoaoina i le aiga. E tatau foi ona e fuafuaina ni auala mo tamaiti e auai ai e tusa lava pe latou te le o aoao i le aiga. E sili ona lelei le aoaoina e tamaiti o upumoni o le talalelei pe a faifai soo le aoao atu o nei upumoni i ni gaoioiga eseese. A e iloa o se gaoioiga e aoao mai ai e lelei mo tamaiti, fuafua e toe fai ma toe fai, aemaise pe afai o e faiaoga i tamaiti laiti.

I masina e lima Aso Sa, e fautuaina faiaoga o le Peraimeri e sui le otootoga ua faatulagaina o le Sau, Mulimuli Mai ia te A’u i le Aso Sa lona lima i se tasi pe sili atu o gaoioiga e aoao ai i le “Faaopoopoga E: Mo le Peraimeri—Sauniaina o Fanau mo se Olaga Atoa i luga o le Ala o feagaiga a le Atua.”