Manatu e Faaleleia ai le Aoaoina i le Aiga ma i le Lotu

A o e suesue i le talalelei a le Faaola i le aiga ma i le lotu, manatunatu i fesili nei:

• E mafai faapefea ona e valaauliaina le Agaga i au suesuega?

• E mafai faapefea ona e taula’i atu i le Faaola i au suesuega?

• E mafai faapefea ona e faaaogaina taimi e aoao ai i aso uma?

• E mafai faapefea ona e uuna’ia tagata o le aiga ma le vasega e suesue e i latou lava ia tusitusiga paia ma faasoa mai mea ua latou aoaoina?

O ni nai auala faigofie ia e faalautele ai lau suesuega o le afioga a le Atua.

Tatalo mo musumusuga.

O tusitusiga paia o afioga a le Atua, o lea ia ole atu ia te Ia mo le fesoasoani ia malamalama i ai.

Vaavaai mo upumoni e uiga ia Iesu Keriso

O mea uma lava e molimau atu ia Keriso (tagai i le 2 Nifae 11:4; Mose 6:63), o lea la, ia mafaufau e vaavaai pe faailoga fuaiupu e molimau mai i le Faaola, faaloloto ai lou alofa mo Ia, ma aoao mai ai auala e mulimuli ai ia te Ia. O nisi taimi o upumoni e faatatau i le Faaola ma Lana talalelei e tuusa’o mai lava, ma o nisi taimi e faa‘ite‘ite mai i se faataitaiga po o se tala. Fesili ifo ia te oe lava, “O a upumoni faavavau o loo aoao mai i nei fuaiupu?” O a ni mea o loo aoao mai e nei upumoni ia te a’u e uiga i le Faaola?”

Faalogo i le Agaga

Taula’i atu i ou mafaufauga ma lagona, tusa lava pe lē fesootai ma mea o loo e faitauina. O nei lagona uunai atonu o mea tonu na e finagalo lou Tama Faalelagi e te aoaoina.

Tusifaamaumau ou lagona uunai

E tele auala e tusifaamaumau ai lagona uunai ia e oo mai a o e suesue. Mo se faataitaiga, atonu e te maua ni upu ma ni fasifuaitau patino i tusitusiga paia e uuna’ia ai oe; e mafai ona e makaina ma tusifaamaumau ou manatu o se faamatalaga i au tusitusiga paia. E mafai foi ona tausi sau api faamaumau o malamalamaaga, lagona, ma uuna’iga e te maua.

Faasoa atu mea o loo e aoaoina i isi

O le talanoaina o malamalamaaga mai lau suesuega faaletagata lava ia o se auala lelei lea e aoao atu ai isi, ma fesoasoani foi e faamalosia ai lou malamalama i mea sa e faitauina. Faasoa atu mea o loo e aoaoina i tagata o le aiga ma uo (faafesaga’i pe faatekinolosi), ma valaaulia i latou e faia foi faapea.

Faatatau ia mau i lou olaga

Mafaufau pe faapefea ona faaaoga tala ma aoaoga o loo e faitauina i lou olaga. Mo se faataitaiga, e mafai ona e fesili ifo ia te oe lava, ‟O a ni aafiaga na ou maua e talitutusa ma mea o loo o’u faitauina?”

Fai fesili a o e suesue

A o e suesue i mau, e mafai ona oo atu fesili i lou mafaufau. O nei fesili e ono fesootai ma mea o loo e faitauina po o lou olaga masani. Manatunatu loloto i nei fesili ma vaavaai mo tali a o e suesue pea i tusitusiga paia.

Faaaoga fesoasoaniga mo le suesueina o tusitusiga paia

Ina ia maua ni malamalamaaga loloto faaopoopo i fuaiupu o loo e faitauina, faaaoga ia vaefaamatalaga, o le Topical Guide, o le Bible Dictionary, o le Taiala i Tusitusiga Paia, ma isi fesoasoaniga mo suesuega.

Manatunatu i le talaaga o tusitusiga paia

E mafai ona e maua ni malamalamaaga loloto naua e uiga i se mau pe a e mafaufau i lona talaaga, e aofia ai tulaga po o le nofoaga na ala mai ai. Mo se faataitaiga, o le iloaina o pogai ma talitonuga o tagata na fetalai i ai le Atua, e mafai ona fesoasoani e te malamalama lelei ai i le faamoemoega o Ana fetalaiga. E mafai ona e aoao e uiga ia i latou i le Au Paia, Revelations in Context, o faaulutala vaega i le Mataupu Faavae ma Feagaiga, ma isi punaoa.

Suesue i upu a perofeta ma aposetolo o aso e gata ai.

Faitau po o a mea na aoao mai e perofeta ma aposetolo o aso e gata ai e uiga i mataupu faavae e te maua i tusitusiga paia.

Ola i mea ua e a’oa’oina

O le suesueina o tusitusiga paia e le gata ina tatau ona musuia ai i tatou, ae e tatau foi ona taitai atu ai i tatou ina ia suia le ala tatou te ola ai. Faalogo i mea e uuna’ia ai oe e le Agaga e fai a’o e faitau, ma faatino loa ia nei uuna’iga.

Faaaoga musika

O viiga fautuaina ma pese a tamaiti o loo maua i le Sau, Mulimuli Mai ia te A’u. Faaaoga musika paia e valaaulia ai le Agaga ma ia faalolotoina ai lou faatuatua ma le molimau i upumoni o le talalelei.

Tauloto ia mau

Filifili se fuaitau o mau e anoa ia te oe, lou aiga, po o lau vasega, ma tauloto e ala i le faifai soo i aso taitasi pe fai foi se taaloga faatauloto.

Faasoa lesona faatino

Sue ni mea faitino e fetaui ma mataupu ma fuaiupu o loo outou faitauina. Manatunatu pe faapefea ona fesootai mea faitino taitasi i aoaoga i tusitusiga paia.

Tusi se ata, su’e, pe pu’e se ata

Faitau ni nai fuaiupu, ona tusi lea o se ata o se mea e faatatau i mea sa e faitauina. Pe e mafai foi ona e vaavaai mo se ata i le Tusi Ata o le Talalelei po o se isi lava nofoaga i le Potutusi o le Talalelei. E mafai foi ona e pu’eina se ata e faapupula mai ai mea sa e aoaoina.

Faatino se tala

A uma ona faitau se tala, valaaulia tagata o le aiga po o le vasega e faatino mai. A uma, talanoa pe faapefea ona fesootai le tala ma mea o loo outou feagai ai.

Ia fetuutuunai i le fale

Afai e i ai ni tagata o le aiga e le o naunau e auai i le suesuega faaleaiga o tusitusiga paia, vaavaai mo nisi auala e faafesootai ai ma i latou. Mo se faataitaiga, e mafai ona e faasoa upumoni e faavavau i se ala e masani ai i tou talanoaga po o le faasoa o se mau anoa i se auala e le foliga ai o loo e lauga atu pe faamaualuga? E le faapea e tatau lava ona tutusa le suesueina o tusitusiga paia i aiga uma. O isi tamaiti e lelei atu a latou tali mai i le suesueina o tusitusiga paia pe a faafesagai taitoatasi. Ia maua le agaga tatalo ma mulimuli i uunaiga a le Agaga.

Fonotaga a le aufono a faiaoga mo mātua. Afai e te manao i se fesoasoani faaopoopo i au taumafaiga e aoao lau fanau, saili pe o faia e lau uarota ni fonotaga a le aufono a faiaoga mo mātua (tagai i le Tusitaulima Aoao, 17.5). O nei fonotaga o se avanoa mo mātua e fefautuaai ai ma aoao faatasi e uiga i le auala e faaleleia ai a latou aoaoga. E mafai ona latou talanoaina mataupu faavae o loo i le A’oa’o Atu i le Ala a le Faaola, o manatu o i nei itulau mo le faaleleia atili o suesuega faaleaiga o tusitusiga paia, ma fautuaga mo le aoao mai ma le aoao atu o loo maua i le Sau, Mulimuli Mai ia te A’u.