30 Tesema–5 Ianuari: ‟Ua Agai i Luma le Toefuataiga Folafolaina”

O Le Toefuataiga o le Atoatoaga o le Talalelei a Iesu Keriso

E faapefea ona e faamanatuina le 200 tausaga o se mea na tupu na suia ai le lalolagi? O le fesili lena sa mafaufau loloto i ai le Au Peresitene Sili ma le Korama a Aposetolo e Toasefululua a o latalata mai Aperila 2020, e faailogaina ai le 200 tausaga talu le Uluai Faaaliga ia Iosefa Samita. ‟Sa matou taumanatunatu pe tatau ona faatu se maafaamanatu,” na toe manatunatu ai Peresitene Russell M. Nelson. “Ae a o matou iloiloina le tulaga ese faasolopito ma aafiaga faavaomalo o lena Uluai Faaaliga, sa matou lagonaina le uunaiga e fatu se ma’a faamanatu e le o se karanite po o se ma’a ae o upu—upu o folafolaga faamaoni ma paia—e tusia, e lē vaneina i “papatusi maa” ae ia vaneina i “papatusi aano” o o tatou loto [2 Korinito 3:3]” (“Faalogo ia te Ia,” Liahona, Me 2020, 90).

O le ma’afaamanatu o upu na latou fatuina e faaautuina “O le Toefuataiga o le Atoatoaga o le Talalelei a Iesu Keriso: O se Folafolaga o le Faamanatuina o le Lua Seneturi i le Lalolagi.” O se maa faamanatu e le mo na o le Uluai Faaaliga ae faapea foi i mea uma na faia e Iesu Keriso—ma o loo faia pea—talu mai lena taimi. Na amata le Toefuataiga o Lana talalelei ina ua liliu atu se tagata e toatasi i le Atua ma faalogo ia te Ia. E faaauau pea i lena lava ala e tasi: tasi le loto, tasi le aafiaga paia i le taimi—e aofia ai ma oe.

Manatu mo le Aoaoina i le Aiga ma i le Lotu

“E alofa le Atua i Lana fanau i atunuu uma o le lalolagi.”

I lou manatu, aisea o le a amata ai se folafolaga e uiga i le Toefuataiga i se faamatalaga e uiga i le alofa o le Atua? A o e suesue i le folafolaga, vaavaai mo faailoaga o le alofa o le Atua mo ‟Lana fanau i atunuu uma o le lalolagi.” Na faapefea ona fesoasoani le Toefuataiga o le talalelei ia te oe e lagona ai Lona alofa?

Tagai foi i le Gerrit W. Gong, “Atunuu Uma, Ituaiga ma Gagana,” Liahona, Nov. 2020, 38–41.

Na amata le Toefuataiga i se tali i se fesili.

E mafai ona faapea, na amata e le Faaola le Toefuataiga o Lana talalelei e ala i le tali atu i se fesili. O le a le sāvali e te lagonaina o loo i ai i le folafolaga o le Toefuataiga mo se tagata e i ai fesili e uiga i le Atua, le talalelei, po o le ‟faaolataga o lona agaga”? E mafai foi ona e suesue i le Iosefa Samita—Talafaasolopito 1:5–20 e vaai ai i mea e mafai ona e aoao mai ia Iosefa Samita e uiga i le mauaina o tali i fesili o le talalelei.

Tagai foi i le Topics and Questions, ‟Seeking Answers,” Gospel Library.

Auiliiliga mai le The Desires of My Heart, saunia e Walter Rane

Ua toe fuata’i mai e Iesu Keriso Lana Ekalesia.

O le a se mea ua e iloa e uiga i le ‟Ekalesia o le Feagaiga Fou a Keriso,” lea na toefuatai mai e le Faaola e ala mai ia Iosefa Samita? Mafaufau e suesue nei mau ma lisi nisi o matapule o Lana Ekalesia:

• Mataio 16:15–19

• Mareko 16:15–18

• Luka 6:12–13

• Galuega 4:34–35

• 1 Korinito 15:29

• Efeso 4:11–15

O le isi, e mafai ona e faafetauia mau o loo i luga ma mau o loo i lalo, lea e faamatala ai le ala na toefuatai mai ai e Iesu Keriso nā matapule o Lana Ekalesia e ala mai ia Iosefa Samita:

• Mataupu Faavae ma Feagaiga 18:37–38; 107:23–24

• Mataupu Faavae ma Feagaiga 51:3; 70:14

• Mataupu Faavae ma Feagaiga 84:64–72

• Mataupu Faavae ma Feagaiga 110:11–16

• Mataupu Faavae ma Feagaiga 124:31, 36

• Mataupu Faavae o le Faatuatua 1:6

Aisea e te faafetai ai mo le Toefuataiga o le talalelei a Iesu Keriso?

Sa taumafai Elder Jeffrey R. Holland ma lona faletua e vaai faalemafaufau pe faamata o a ni o la lagona i le ola ai a o lei toefuata’iina mai le Ekalesia. ‟O le a se mea ma te moomoo maimau pe ana i ai?” sa la fesili ai ia i laua lava. Faitau e uiga i o la’ua aafiaga i le ‟O Se Susulu Atoatoa o le Faamoemoe” (Liahona, Me 2020, 81–82). Na faapefea ona fesoasoani le Toefuataga e faataunuu ai ou faamoemoega faaleagaga?

Tagai foi i Autu ma Fesili, ‟Apostasy and the Restoration of the Gospel” Gospel Library.

‟Ua agai i luma le Toefuataiga folafolaina.”

Pe ua e mafaufau ea ia te oe lava o se vaega o le Toefuataiga o le talalelei? Mafaufau i upu nei mai ia Peresitene Dieter F. Uchtdorf: ‟O nisi taimi tatou te mafaufau ai i le Toefuataiga o le talalelei o se mea ua atoatoa, ua uma ona i tua atu o i tatou. … Ae o le mea moni, o le Toefuataiga o se faagasologa faifai pea; o loo tatou ola ai i le taimi nei” (‟O E Moe i le Toefuataiga?,” Liahona, Me 2014, 59).

A o e sauni e suesue pe na faapefea ona toefuatai mai le talalelei i le vaitaimi o le 1800, e mafai ona e amata i le mafaufau loloto pe na faapefea ona toefuatai mai i lou olaga. Faitau le Folafolaga o le Toefuataiga faatasi ma ni fesili e pei o nei i le mafaufau: Na faapefea ona ou iloa e moni lenei mea? E mafai faapefea ona ou auai i le Toefuataiga i le asō?

“Ua matala le lagi.”

O le a le uiga o le fuaitau “ua matala le lagi” ia te oe? O le a se faamaoniga ua e vaaia—i le Folafolaga o le Toefuataiga, i le Ekalesia i aso nei, i tusitusiga paia, ma i lou olaga—e faapea o loo matala moni lava le lagi?

E mafai foi ona e faaaofia ai le “Ua Tafa Ata” (Viiga, nu. 1) o se vaega o lau suesuega. O le a se mea e te maua i lenei viiga e faaopoopo atu i lou malamalama i le fasifuaitau ‟ua matala le lagi”?

Tagai fo’i i le Quentin L. Cook, “O Le Faamanuiaga o Faaaliga Faifai Pea i Perofeta ma Faaaliga Faaletagata Lava Ia e Taiala ai o Tatou Olaga,” Liahona, Me 2020, 96–100.

Aoao faatasi. Na valaaulia i tatou e Peresitene Nelson ia “suesue i le folafolaga o le Toefuataiga] na o oe ma faatasi ai ma [o tatou] aiga ma uo” (“Faalogo ia te Ia,” 92). Mafaufau pe mafai faapefea ona e faaaofia ai isi i lau suesuega.

Mo nisi manatu, tagai i lomiga o lenei masina o mekasini o le Liahona ma le Mo Le Malosi o le Autalavou .

Fautuaga mo le Aoaoina o Tamaiti

‟Matou te folafola atu ma le faamaoni.”

• A o e faitauina vaega o le folafolaga o le Toefuataiga faatasi ma lau fanau (pe matamata i le vitiō a Peresitene Nelson o loo faitauina), fesoasoani ia i latou e sue fuaiupu e amata i fasifuaitau e pei o le “matou te folafola atu,” “matou te tautino atu,” po o le “matou te molimau atu.” O a upumoni o loo folafola mai e o tatou perofeta ma aposetolo? Atonu e mafai e oe ma lau fanau ona faasoa atu a outou lava molimau e uiga i nisi o nei lava upumoni e tasi.

  The Restoration of the Fulness of the Gospel of Jesus Christ

  President Russell M. Nelson, with the First Presidency and Quorum of the Twelve Apostles, makes a bicentennial proclamation on The Restoration of the Fulness of the Gospel of Jesus Christ.

‟Sa i ai ni fesili … a Iosefa Samita.”

• Atonu e manaia i lau fanau le suesueina o nisi o fesili sa i ai a Iosefa Samita lea na taitai atu ai i le Toefuataiga o le talalelei a le Faaola. Fesoasoani ia i latou e sue ni faataitaiga i le Iosefa Samita—Talafaasolopito 1:10, 29, 68. O faapefea ona faamanuiaina i tatou i aso nei ona sa tali mai le Atua i fesili a Iosefa Samita?

• E mafai foi ona e tuu atu i lau fanau se avanoa e talanoa ai e uiga i a latou fesili o i ai. O le a se mea ua tatou aoao mai ia Iosefa Samita e uiga i le auala e maua ai tali? (tagai i le Iosefa Samita—Talafaasolopito 1:8–17; tagai foi i fuaiupu 3 ma le 4 o le “This is My Beloved Son,” Tusipese a Tamaiti, 76).

‟Na o mai avefeau faalelagi e aoao Iosefa.”

• O ai ‟avefeau faalelagi [o e] na o mai e aoao Iosefa”? Atonu e fiafia lau fanau e vaavaai mo ata o i latou i le Tusi Ata o le Talalelei (tagai i nu. 91, 93, 94, 95). Na faapefea ona fesoasoani nei avefeau taitasi e ‟toe faatuina le Ekalesia a Iesu Keriso”? O mau o loo fautuaina atu i le itulau o gaoioiga o lenei vaiaso e mafai ona fesoasoani i lau fanau e tali ai lenei fesili.

Ua toefuatai mai e Iesu Keriso Lana Ekalesia.

• E mafai faapefea ona e fesoasoani i lau fanau ia malamalama i le uiga o le toefuataiina o le Ekalesia a le Faaola? Atonu e mafai ona latou fauina se olo faigofie i poloka po o ipu ma ‟toefuatai,” pe toe fausia. Pe, afai e i ai se taimi na suia ai e lau fanau se mea ona sa leiloa pe ua faaleagaina, e mafai ona e faatusatusaina lena aafiaga i le toefuataiga e le Faaola o Lana Ekalesia. Fesoasoani ia i latou e saili ni mea patino o loo ta’ua i le folafolaga o le Toefuataiga lea na toefuatai mai e le Faaola.

“Ua matala le lagi.”

• Ina ia faapupula le uiga o le fasifuaitau “ua matala le lagi”, atonu e mafai ona e faasoa atu se sāvali i lau fanau, muamua i tua atu o se faitotoa na tapunia ona sosoo ai lea ma se faitotoa o loo matala. Tuu atu ia i latou e āuāua’i e faasoa mai foi se sāvali. O a sāvali o loo i ai ia Iesu Keriso mo i tatou? O a ni aafiaga ua fesoasoani ia i tatou e iloa ai o loo tatala mai le lagi ia i tatou?

Mo nisi manatu, tagai i le lomiga o lenei masina o le mekasini o le Uo .