6–12 Ianuari: ‟Faalogo Maia, E Outou e Tagata”

Mataupu Faavae ma Feagaiga 1

Ia Novema 1831, faatoa tausaga ma le afa le matua o le Ekalesia toefuataina a Iesu Keriso. E ui o loo tuputupu a’e, a o se vaega e tau le iloa o ni tagata talitonu o loo nonofo i se nuu laitiiti o loo taitaia e se perofeta e silia ma le luasefulu tausaga le matua. Ae na ta’ua e le Atua nei tagata talitonu o Ana auauna ma Ana avefeau, ma Ia finagalo i faaaliga na Ia tuuina atu ia i latou ina ia faailoa atu i le lalolagi.

O leMataupu Faavae ma Feagaiga vaega 1 o le faatomuaga a le Alii, po o le folasaga, i nei faaaliga. O loo faaalia manino mai ai e ui lava ina toaitiiti tagata auai o le Ekalesia, ae sa leai se mea itiiti e uiga i le sāvali na finagalo le Atua i Lana Au Paia e faasoa atu. O se “leo o le lapataiga” mo e uma “o nonofo i le lalolagi,” e aoaoina i latou ia salamo ma faatuina le “feagaiga tumau e faavavau” a le Atua (fuaiupu 4, 8, 22). O auauna o loo tauaveina lenei sāvali o ‟e vaivai ma e faatauvaa.” Ae o auauna lotomaualalalo o i latou tonu ia ua valaau mai ai le Atua—i lena taimi ma le taimi nei—e aumai Lana Ekalesia ‟mai le lē mailoa ma le pouliuli” (fuaiupu 23, 30).

Manatu mo le Aoaoina i le Aiga ma i le Lotu

Mataupu Faavae ma Feagaiga 1

“Faalogo maia, E outou e tagata.”

O upu tomua e faailoa atu ai se tusi. E iloa ai autu o se tusi ma faamoemoega ma fesoasoani i le au faitau e sauni e faitau. A o e faitau le vaega 1—o le “faatomuaga” a le Alii i le Mataupu Faavae ma Feagaiga (fuaiupu 6)—vaai mo autu ma faamoemoega a le Alii ua aumaia mo Ana faaaliga. O le a se mea ua e aoaoina o le a fesoasoani ia te oe i lau suesuega o le Mataupu Faavae ma Feagaiga i lenei tausaga? Mo se faataitaiga, e mafai ona e manatunatu pe o le a le uiga o le “faalogo i le siufofoga o le Alii” i totonu o nei faaaliga (fuaiupu 14) po o le “suesue i nei poloaiga” (fuaiupu 37).

Tagai foi i le faatomuaga i le Mataupu Faavae ma Feagaiga.

Mataupu Faavae ma Feagaiga 1:4–6, 23–24, 37–39

E fetalai mai le Alii e ala mai i Ana auauna, e aofia ai perofeta o aso e gata ai.

O leVaega 1 e amata ma faaiu i le folafolaga a le Atua faapea e fetalai mai o Ia e ala mai i Ana auauna filifilia (tagai i le fuaiupu 4–6, 23–24, 38). Tusi i lalo mea ua e aoaoina mai lenei faaaliga e uiga i le:

• O le Alii ma Lona siufofoga.

• Aisea e manaomia ai perofeta i o tatou aso.

O le a se mea ua uunai’a oe e fai o se taunuuga o mea na e maua?

O anafea na e faalogo ai i le siufofoga o le Alii i le leo o Ana auauna? (tagai fuaiupu 38).

E mafai foi ona e vaai faalemafaufau i se uo e le malamalama e uiga i perofeta soifua o loo faitauina faatasi ma oe le vaega 1 . O a ni au fesili atonu o i ai i lau uo? O fea fuaiupu e te manao e talanoaina ma lau uo e fesoasoani ai ia te ia ia malamalama i ou lagona e uiga i le i ai o perofeta i o tatou aso?

Atonu e te manao e iloa ina ua feiloai se aufono a toeaina i le 1831 e talanoa e uiga i le faasalalauina o faaaliga a Iosefa Samita, sa tetee nisi o tagata i le manatu. Na maasiasi i latou i le vaivai o Iosefa i le tusitusi, ma na popole i latou o le lolomiina o faaaliga e ono tulai mai ai nisi faafitauli mo le Au Paia (tagai Au Paia, 1:140–43). Pe ana fai o oe o se sui o lenei aufono, faamata e faapefea ona e taulimaina nei atugaluga? O a ni malamalamaaga ua e maua i le vaega 1 atonu na fesoasoani? (tagai, mo se faataitaiga, fuaiupu 6, 24, 38).

Mafaufau e faaaofia ai se viiga e pei o le ‟O Mai Fa’alogo i le Perofeta” (Viiga, nu. 13) i au suesuega ma tapuaiga. Vaavaai mo fasifuaitau i le viiga o loo aoao mai ai mataupu faavae lava e tasi e pei o fuaiupu i le vaega 1.

Tagai foi i Autu ma Fesili, ‟Perofeta,” Gospel Library.

E fetalai mai le Alii ia i tatou e ala mai i Ana auauna, o perofeta.

Mataupu Faavae ma Feagaiga 1:12–30, 34–36

E fesoasoani le Toefuataiga ia te a’u e feagai ai ma luitau o aso e gata ai.

I le Mataupu Faavae ma Feagaiga vaega 1, o loo faamalamalama mai ai e le Alii le mafuaaga na Ia toefuatai mai ai Lana talalelei. Tagai pe fia ni mafuaaga e mafai ona e lisiina a o e faitauina fuaiupu 12–23. I lou aafiaga, e faapefea ona faataunuuina faamoemoega o le Alii mo le Toefuataiga?

Sa silafia e le Alii o le a i ai ni luitau ogaoga i o tatou aso (tagai i le fuaiupu 17). O le a se mea e te maua i fuaiupu 17–30, 34–36 e fesoasoani ia te oe e lagona ai le filemu ma le mautinoa e ui lava i nei luitau?

Tagai foi Russell M. Nelson, “Opogi le Lumanai i le Faatuatua,” Liahona, Nov. 2020, 73–76.

Mataupu Faavae ma Feagaiga 1:19–28

E faaaoga e le Alii “mea vaivai ma faatauvaa” e faataunuu ai Lana galuega.

A o e faitauina le Mataupu Faavae ma Feagaiga 1:19–28, atonu e te mafaufau loloto i le uiga o le avea ma se auauna a le Alii. O a ni uiga e finagalo le Alii ia maua e Ana auauna? O le a le mea o loo faataunuuina e le Alii e ala mai i Ana auauna? Ua faapefea ona faataunuuina valoaga i nei fuaiupu i le lalolagi atoa ma lou lava olaga?

Vaavaai mo Iesu Keriso. O le faamoemoega o tusitusiga paia o le molimau lea i le Faaola ma Lana talalelei. A o e faitau i le Mataupu Faavae ma Feagaiga 1, manatunatu e faailoga pe faailoga fuaiupu lea ua aoaoina ai oe e uiga ia Iesu Keriso.

Mo nisi manatu, tagai i lomiga o lenei masina o mekasini o le Liahona ma le Mo Le Malosi o le Autalavou .

Tagata, Nofoaga, Mea e Tutupu

• Iosefa Samita le Itiiti

• O Le Tusi o Poloaiga

• Mataupu Faavae ma Feagaiga

Kiliki e vaai i isi mea

Fautuaga mo le Aoaoina o Tamaiti

Mataupu Faavae ma Feagaiga 1:4, 37–39

E auala mai i Ana perofeta, ua lapataia ai a’u e le Alii e uiga i tulaga matautia faaleagaga.

• Ina ia amata se talanoaga e uiga i lapataiga mai le Alii, e mafai ona e talanoa e uiga i lapataiga tatou te maua mai isi tagata e uiga i mea matautia e le mafai ona tatou vaaia. O nisi faataitaiga e ono aofia ai se foloa maseesee, se afā o le a oo mai, po o se taavale ua latalata mai. Atonu e mafai e oe ma lau fanau ona vaai i faataitaiga o faailoga lapatai ma faatusatusa nei lapataiga i lapataiga ua tuuina mai e le Alii ia i tatou. E tusa ai ma le Mataupu Faavae ma Feagaiga 1:4, 37–39, o faapefea ona lapataia i tatou e le Alii? O le a le mea na Ia lapataiina ai i tatou lata mai nei? Atonu e mafai ona e matamata pe faitau se vaega o sāvali o konafesi aoao lata mai ma vaavaai mo faataitaiga o le “leo o le lapataiga” a le Atua.

• Usu faatasi se pese e faatatau i perofeta, e pei o le fuaiupu mulimuli o le “Mulimuli i le Perofeta” (Tusipese a Tamaiti, 58). Faasoa atu lau molimau e saunoa le perofeta i afioga a le Atua.

Mataupu Faavae ma Feagaiga 1:17

E fesoasoani le Toefuataiga ia te a’u e feagai ai ma luitau o aso e gata ai.

• Ina ia uunaia le talanoaga e uiga i le Mataupu Faavae ma Feagaiga 1:17, e mafai e oe ma lau fanau ona vaai faalemafaufau o loo outou sauniuni mo se malaga. O a ni mea tou te ono teuina? Afai tou te iloaina muamua o le a timu pe o le a pa le pa’u o la outou taavale po o le pasi, o le a faapefea ona aafia ai le ala na outou saunia ai mo le malaga? Faitau faatasi le fuaiupu 17, ma talanoa e uiga i le mea na silafia e le Alii o le a tupu ia i tatou. Na faapefea ona saunia o Ia mo lena mea? (Afai e manaomia, ia faamatala atu o se “mala” o se faalavelave po o se mea matautia.) E faapefea ona fesoasoani poloaiga a le Atua ia i tatou e taulima ai luitau o o tatou taimi?

Mataupu Faavae ma Feagaiga 1:17–29

Na valaauina e le Alii ia Iosefa Samita e avea ma se perofeta.

• Ina ia aoao e uiga i le matafaioi a Iosefa Samita i le toefuataina o le talalelei a le Faaola, e mafai e oe ma lau fanau ona tilotilo i se ata o le Faaola ma se ata o Iosefa Samita (tagai i ata o i lenei otootoga) ma talanoa e uiga i mea na tuuina mai e le Faaola ia i tatou e ala mai ia Iosefa Samita. E mafai e lau fanau ona vaavaai mo faataitaiga i le Mataupu Faavae ma Feagaiga 1:17, 29. Ta’u atu i lau fanau pe na faapefea ona e iloa o le Atua na “valaau atu ai i laʼu auauna o Iosefa Samita, le Itiiti, ma tautala atu ia te ia mai le lagi” (fuaiupu 17).

© 1998 David Lindsley

Mataupu Faavae ma Feagaiga 1:30.

O Le Ekalesia a Iesu Keriso o le Au Paia o Aso e Gata Ai o le “ekalesia moni ma ola” a le Alii.

• O le a le uiga o le faapea mai o le Ekalesia “moni ma ola”? Ina ia mafaufau lau fanau e uiga i lenei fesili, atonu e mafai ona e faaali atu ia i latou mea e ola ma mea e le o ola—e pei o se laau ola ma se laau mate. E faapefea ona tatou iloa o loo ola se mea? Ona mafai lea ona e faitauina le Mataupu Faavae ma Feagaiga 1:30 ma talanoa po o le a le uiga o le Ekalesia ‟moni ma ola.”

Mo nisi manatu, tagai i le lomiga o lenei masina o le mekasini o le Uo .

Autafa o Vai Filemu, saunia e Simon Dewey