Vao Paia, saunia e Greg Olsen

Ianuari 13–19: ‟Sa Ou Vaai i se Malamalama Faaniutu”

Iosefa Samita—Talafaasolopito 1:1–26

E mafai ona e faapea mai o le Mataupu Faavae ma Feagaiga o se tusi o tali i tatalo: o le tele o faaaliga paia i totonu o lenei tusi na oo mai o ni tali i fesili. O le fesili na amataina uma ai—o le fesili lea na faaosofia ai le sasaa mai o faaaliga i aso e gata ai—sa fesiligia e se tamaitiiti e 14 tausaga le matua. O se ‟taua o upu ma vevesi o taofi” (Iosefa Samita—Talafaasolopito 1:10) na tuua ai Iosefa Samita i le lē mautonu e uiga i tapuaiga ma lana sootaga ma le Atua. Atonu e mafai ona e fesootai i lena mea. Tatou te maua le tele o manatu feteenai ma leo faatauanau i o tatou aso. A tatou mananao e faavasega nei sāvali ma maua le mea moni, e mafai ona tatou faia le mea na faia e Iosefa. E mafai ona tatou fai ni fesili, suesue i tusitusiga paia, mafaufau loloto, ma i’u lava ina fesili atu i le Atua. I le tali mai i le tatalo a Iosefa, sa alu ifo se malamalama faaniutu mai le lagi. Sa faaali mai le Atua le Tama ma Iesu Keriso ma tali ana fesili. O le molimau a Iosefa i lena aafiaga faavavega na folafola malosi atu ai o soo se tasi “ua [leai] se poto ona ole atu i le Atua, ma maua mai” (Iosefa Samita—Talafaasolopito 1:26). E mafai ona tatou maua uma, a lē o se faaaliga vaaia faalelagi, ia tau o se faaaliga vaaia ua manino atili mai, ua faasusuluina atili e le malamalama faalelagi.

Manatu mo le Aoaoina i le Aiga ma i le Lotu

Iosefa Samita—Talafaasolopito 1:5–26

O Iosefa Samita o le Perofeta o le Toefuataiga.

O le faamoemoe o le talafaasolopito o Iosefa Samita o le tuuina o i tatou “ia maua tala sa’o” ona o le mea moni e uiga ia Iosefa Samita ua tele ina ave seseina (Iosefa Samita—Talafaasolopito 1:1). A o e faitauina le Iosefa Samita—Talafaasolopito 1:1–26, o le a le mea ua faamalosia ai lau molimau e uiga i lona valaauga paia?

Tagai foi i le Au Paia, 1:3–19.

Iosefa Samita—Talafaasolopito 1:5–25

E mafai faapefea ona ou maua tali i a’u tatalo?

Na i ai se taimi na e i ai i le “leai se poto” po o le lē mautonu e uiga i se faaiuga na e mana’omia ona fai? (Iosefa Samita—Talafaasolopito 1:13). O le aafiaga o Iosefa Samita i le 1820 e mafai ona avea o se mamanu lelei mo au lava faaaliga faaletagata lava ia. Mo se faataitaiga, a o e suesue i le Iosefa Samita—Talafaasolopito 1:5–25, vaavaai mo aafiaga e mafai ona e fesootai i ai. O le a se mea ua e aoaoina e uiga:

• I le ala na saunia ai Iosefa mo se aafiaga paia i le tatalo? (tagai i le fuaiupu 8, 11, 14–15).

• I le matafaioi o le suesue i tusitusiga paia i le sailia o faaaliga? (tagai i le fuaiupu 11–12).

• O le mea e fai pe a e feagai ma mea faafeagai? (tagai i le fuaiupu 15–16, 21–26).

• O le taliaina ma le faatinoina o tali e te maua? (tagai i le fuaiupu 18–25).

Valaaulia le fefaasoaai. O le suesue i tusitusiga paia e valaaulia ai uunaiga mai le Agaga Paia. O le faasoaina atu o nei uunaiga e mafai ona valaaulia ai le Agaga Paia e molimau atu i isi, faapea foi i le tagata o loo faasoa atu.

O a ni malamalamaaga faaopoopo e mafai ona e maua mai le tusiga a Peresitene Henry B. Eyring “O Le Uluai Faaaliga: O Se Mamanu mo Faaaliga Faaletagata Lava Ia”? (Liahona, Fep. 2020, 12–17).

E mafai foi ona e vaavaai mo isi faataitaiga i tusitusiga paia o tagata o loo fesootai ma le Atua. O ata i le Tusi Ata o le Talalelei po o isi tusi o le Sau, Mulimuli Mai ia te A’u e mafai ona tuuina atu ia te oe ni manatu. Taumafai e tali fesili o loo lisi atu muamua mo faataitaiga taitasi e te maua. O a ni aafiaga na e maua i le mauaina o tali i tatalo? O le a se mea e mafai ona e faia e fesoasoani ai i isi ia maua foi ni aafiaga lelei?

Tagai foi i le Russell M. Nelson, “Faalogo ia te Ia,” Liahona, Me 2020, 88–92; Autu ma Fesili, ‟Faaaliga Faaletagata Lava Ia,” Gospel Library.

Iosefa Samita—Talafaasolopito 1:15–20

Na vaai Iosefa Samita i le Atua le Tama ma Lona Alo, o Iesu Keriso.

Na mautinoa e Iosefa Samita o le a tali mai le Atua i lana tatalo, ae na te lei iloa pe o le a faapefea e lena tali ona suia ai lona olaga—ma le lalolagi. A o e faitau e uiga i le aafiaga o Iosefa, mafaufau loloto pe na faapefea ona suia e le Uluai Faaaliga lou olaga.

Mo se faataitaiga, o le Uluai Faaaliga na faaalia mai ai le tele o upumoni e uiga i le Atua le Tama ma Lona Alo, o Iesu Keriso, lea na ese mai mea na talitonu i ai le toatele o tagata i ona po o Iosefa. A o e faitau i le Iosefa Samita—Talafaasolopito 1:15–20, mafaufau e tusi i lalo ni auala eseese e faauma ai se faamatalaga faapenei: ‟Ona sa tupu le Uluai Faaaliga, ua ou iloa ai …”

O a ni ou lagona a o e mafaufau loloto i le aafiaga o Iosefa ma mea uma na oo mai ai?

Tagai foi ‟Ask of God: Joseph Smith’s First Vision” (vitiō), Gospel Library; ‟O Le Talosaga Muamua a Iosefa Samita,” Viiga, nu. 14.

Ole Atu i le Atua: O Le Uluai Faaaliga a Iosefa Samita

Ata puupuu ua gaosia mo le Falemataaga o le Talafaasolopito a le Ekalesia o loo faaalia ai le Uluai Faaaliga a Iosefa Samita, o loo aofia ai faamatalaga ua aumai mai i tala taitasi a Iosefa Samita.

Auiliiliga mai le Afai Ua Leai Se Poto i so Outou, saunia e Walter Rane

Iosefa Samita—Talafaasolopito 1:15–20

Aisea ua i ai ai faamaumauga eseese o le Uluai Faaaliga?

I le gasologa o lona soifuaga, na faamaumau ai e Iosefa Samita lona aafiaga i le Togalaau Paia e lē itiiti ifo ma le faafa, e tele ina faaaoga ai se tusiupu. E faaopoopo atu i ai, o nisi faamaumauga na tusia e tagata na faalogologo o talanoa Iosefa e uiga i lana faaaliga vaaia. E ui o nei faamaumauga e eseese i nisi o auiliiliga, e faalagolago i le tusitala, o e na i ai, ma le nofoaga na fai ai, ae o loo tutusa lava. Ma o ia faamaumauga taitasi ua faaopoopo ai auiliiliga ia e fesoasoani ia i tatou ia malamalama lelei ai i aafiaga o Iosefa Samita, e faapei o Evagelia taitasi e fa lea e fesoasoani ia i tatou ia malamalama atili ai i le auaunaga a le Faaola.

Tagai foi i Autu ma Fesili, ‟First Vision Accounts,” Gospel Library.

Iosefa Samita—Talafaasolopito 1:21–26

E mafai ona ou tumau moni i mea ua ou iloa, e tusa pe teena a’u e isi.

I le mavae ai o lana Uluai Faaaliga ofoofogia, na manao ai Iosefa Samita e faasoa atu lona aafiaga i isi. O le tetee sa feagai ma ia na faate’ia ai o ia. A o e faitau i lana faamaumauga, o le a se mea o loo musuia ai oe ia tumau moni i lau molimau? O a isi faataitaiga—mai tusitusiga paia, se tuaā, po o tagata e te iloa—ua tuuina atu ia te oe le lototele e tumau moni ai i aafiaga faaleagaga na e mauaina?

Tagai i le Gary E. Stevenson, “Fafagaina ma le Tuuina Atu o Lau Molimau,” Liahona, Nov. 2022, 111–114.

Mo nisi manatu, tagai i lomiga o lenei masina o mekasini o le Liahona ma le Mo Le Malosi o le Autalavou .

Tagata, Nofoaga, Mea e Tutupu

• Lusi Maka Samita

• Vao Paia

• O Tala i le Uluai Faaaliga Vaaia a Iosefa Samita

• O Ekalesia Kerisiano i Ona Po o Iosefa Samita

Kiliki e vaai i isi mea

Fautuaga mo le Aoaoina o Tamaiti

Iosefa Samita—Talafaasolopito 1:3–14

Na saunia Iosefa Samita e avea ma se perofeta a le Atua.

• O le aoao e uiga i le olaga talavou o Iosefa Samita e mafai ona fesoasoani i lau fanau e fesootai atu ai ia te ia a’o latou a’oa’o mai ona aafiaga. Atonu e mafai ona latou uuina se ata o Iosefa Samita ma faasoa mai mea latou te iloa e uiga ia te ia. Afai e manaomia, e mafai ona e faaopoopo nisi o mea moni e uiga ia te ia mai le Iosefa Samita—Talafaasolopito 1:3–14 (tagai foi i le “Mataupu 1: Iosefa Samita ma Lona Aiga,” i le Tala o le Mataupu Faavae ma Feagaiga, 6–8, po o le vitiō talafeagai i le Gospel Library). O le a le mea na aafia ai Iosefa na fesoasoani e saunia ai o ia e avea ma perofeta? O le a se mea atonu o loo saunia i tatou e le Atua e fai?

  Chapter 1: Joseph Smith and His Family: 1805–1820

Auiliiliga mai le Uluai Faaaliga a Iosefa Samita, saunia e Greg Olsen

Iosefa Samita—Talafaasolopito 1:10–13

E mafai ona tali mai le Atua i a’u fesili e ala mai i tusitusiga paia.

• Mafaufau e faaali atu i lau fanau ni tusi eseese, e aofia ai tusitusiga paia. Fesoasoani ia i latou e mafaufau i fesili e mafai ona taliina e nei tusi. Ona faitau faatasi lea o le Iosefa Samita—Talafaasolopito 1:10–11 e saili ai po o a fesili a Iosefa Samita na i ai ma po o a tali na ia mauaina i totonu o tusitusiga paia.

• Atonu e mafai e lau fanau ona maua upu i le fuaiupu 12 o loo faamatala ai pe na faapefea ona aafia Iosefa i le faitauina o le Iakopo 1:5 . Ona mafai lea ona outou faasoa ni aafiaga o le tasi ma le isi lea na i ai se aafiaga mamana o se mau ia te oe. E mafai fo’i ona outou usuina se pese e faatatau i tusitusiga paia, e pei o le “Saili, Mafaufau Loloto, ma Tatalo” (Tusipese a Tamaiti, 66). O le a se mea o aoao mai e le pese e uiga i le mafuaaga tatou te faitau ai i tusitusiga paia?

Iosefa Samita—Talafaasolopito 1:10–17

E faafofoga ma tali mai le Tama Faalelagi i a’u tatalo.

• Ina ia amata se talanoaga e uiga i le ala tatou te fesootai ai ma le Tama Faalelagi, atonu e mafai e oe ma lau fanau ona fesili le tasi i le isi i le faaaogaina o metotia eseese o fesootaiga, e pei o se feau tusitusia, se valaau i le telefoni, po o se faamatalaga tusitusia. E faapefea ona tatou faia ni fesili i le Tama Faalelagi? E faapefea ona tatou faaali atu ia te Ia tatou te alolofa ma faamamaluina o Ia i a tatou tatalo? Faitau faatasi le Iosefa Samita—Talafaasolopito 1:16–19 ma talanoaina pe na faapefea ona tali mai le Tama Faalelagi i tatalo a Iosefa Samita. Ona outou faasoa lea ma lau fanau ni aafiaga ina ua e ole atu i le Atua mo se fesoasoani ma maua se tali.

Iosefa Samita—Talafaasolopito 1:17–19

Na vaai Iosefa Samita i le Tama Faalelagi ma Lona Alo, o Iesu Keriso.

• Atonu e fiafia tamaiti laiti e tutu ma lima ua faaloaloa e faafoliga o ni laau i le Vao Paia a o e ta’u atu ia i latou e uiga i le Uluai Faaaliga. Fai atu i tamaiti e minoinoi e peiseai o loo lelea i le matagi a o e talanoa e uiga ia Iosefa o loo tatalo. Ona fai atu lea ia i latou e aua le minoi ma fifilemu pe a e ta’u atu ia i latou na faaali mai le Tama Faalelagi ma Iesu ia Iosefa.

• Atonu e fiafia tamaiti matutua atu e faaaoga se ata se tasi pe sili atu i lenei otootoga e ta’u atu ai ia te oe mea latou te iloa e uiga i le Uluai Faaaliga. Fautuaina i latou e tagai i le Iosefa Samita—Talafaasolopito 1:14–17 ma faasoa mai o latou manatu ma lagona e uiga i le aafiaga o Iosefa (tagai foi i le ‟Mataupu 2: O Le Uluai Faaaliga a Iosefa Samita,” i le Tala o le Mataupu Faavae ma Feagaiga, 9–12, po o le vitiō e faatatau i ai o loo i le Gospel Library).

  Chapter 2: Joseph Smith’s First Vision: 1820

Mo nisi manatu, tagai i le lomiga o lenei masina o le mekasini o le Uo .

Upumoni Toefuataiina, saunia e Leon Parson