Auiliiliga mai le Na Ia Valaau Mai A’u i Lo’u Igoa, saunia e Michael Malm

20–26 Ianuari: “O Le a Liliu atu Loto o Fanau i o Latou Tamā”

Mataupu Faavae ma Feagaiga 2; Iosefa Samita—Talafaasolopito 1:27–65

Ua atoa le tolu tausaga talu na faaali le Atua le Tama ma Lona Alo, o Iesu Keriso, ia Iosefa Samita i le togavao, a e e le’i maua e Iosefa Samita se faaaliga faaopoopo talu mai lena taimi. Sa amata ona ia mafaufau pe sa lē fiafia le Alii ia te ia. E faapei o tatou uma, na ia faia ni mea sese, ma na ia lagona le ta’usalaina i na mea. Ae na i ai lava le galuega a le Atua mo ia e fai. Ma o le galuega na valaauina Iosefa e fai e fesootai ma le mea o loo talosaga mai le Atua e ao ona tatou fai. O le a aumai e Iosefa le Tusi a Mamona; ua valaaulia i tatou e faasoa atu lana sāvali. O le a maua e Iosefa ki o le perisitua e liliu atu ai loto o fanau i o latou tamā; ua mafai nei ona tatou maua sauniga mo o tatou tuaa i malumalu. Sa ta’u atu ia Iosefa e uiga i valoaga o le a le toe mamao ae faataunuuina; ua valaauina i tatou e fesoasoani e faataunuu nei valoaga. Pe a tatou auai i le galuega a le Atua, e mafai ona tatou iloa o le a tatou feagai ma ē e faasagatau mai e oo lava i le sauāina, faapei na oo i le Perofeta. Ae e mafai foi ona tatou faatuatua o le a faaaogaina e le Alii i tatou o ni mea faigaluega i Ona aao, faapei na Ia faia ia Iosefa.

Tagai foi i le Au Paia, 1:20–48.

Manatu mo le Aoaoina i le Aiga ma i le Lotu

Iosefa Samita—Talafaasolopito 1:27–33

O loo i ai i le Atua se galuega mo aʼu ou te faia.

O se tasi o mea e talitonu ai e i ai se galuega a le Atua mo Iosefa Samita e faia—e mafai ona tatou toe tepa i tua i lona olaga ma vaai manino ai i mea na ia ausia. Ae pe ua e mafaufau ea o loo i ai foi se galuega a le Atua mo oe? A o e faitau i le Iosefa Samita—Talafaasolopito 1:27–33, mafaufau po o le a lena galuega. E faapefea ona saofagā i le Toefuataiga faifai pea o le talalelei a le Faaola?

Na a’oa’o mai Elder Gary E. Stevenson: “A o tatou o mai ia Keriso ma fesoasoani atu i isi e faia lena lava mea e tasi, ua tatou auai i le galuega a le Atua o le faaolataga ma le faaeaga, lea e taulai atu i tiutetauave e tofia mai le lagi. O nei tiutetauave e faigofie, musuia, faaosofia, ma mafai ona fai. O tiutetauave nei:

• Ola i le talalelei a Iesu Keriso

• Tausiaina o i latou e le tagolima

• Valaauliaina o tagata uma ia talia le talalelei

• Tuufaatasi o aiga mo le faavavau (“Faigofie lona Matagofie—Matagofie lona Faigofie,” Liahona, Nov. 2021, 47).

Mafaufau loloto i aafiaga na e maua i le auai ai i nei tiutetauave taitasi na atofaina mai le lagi. O le a le mea e finagalo le Faaola e te faia? O loo i ai se itulau o Autu ma Fesili mo nei tiutetauave taitasi (tagai ‟O La Tatou Matafaioi i le Galuega a le Atua o le Faaolataga ma le Faaeaga,” Gospel Library). Atonu e te suesueina nei itulau e fesoasoani ai ia te oe e tali lenei fesili.

Atonu o nisi taimi e te lagona ai e le mafai e le Alii ona faaaoga oe ona o mea sese sa e faia. O a ni mea e mafai ona e aoao mai i le aafiaga a Iosefa Samita i le Iosefa Samita—Talafaasolopito 1:28–29? E mafai faapefea ona e iloa lou ‟tu ai i luma [o le Atua]”?

Fai fesili e uunaia ai talanoaga aoga. O fesili e sili atu i le tasi le tali sao e valaaulia tagata aoao e tali mai e faalagolago i o latou manatu patino, lagona, ma aafiaga. O fesili o i lenei otootoga o ni faataitaiga o lenei mea.

Tagai foi i le ‟Youth Responsibility in the Work of Salvation” (vitiō), ChurchofJesusChrist.org; ‟O Le Galuega o le Faaolataga ma le Faaeaga,” Tusitaulima Aoao, 1.2.

Youth Responsibility in the Work of Salvation

Elder Bednar wants the youth to recognize that recent adjustments to Young Women classes and Aaronic Priesthood quorums give them operational and executional responsibility in the work of salvation. When the youth are focused, miracles will come.

Iosefa Samita—Talafaasolopito 1:34-47

E ala i le toefuataiina o Lana talalelei, na faataunuu ai e le Faaola ia valoaga anamua.

Ina ua faaali mai Moronae ia Iosefa Samita na ia sii mai nisi o valoaga o le Feagaiga Tuai ma le Feagaiga Fou, e pei o le Isaia 11; Galuega 3:22–23; ma le Ioelu 2:28–32. A o e faitau i le Iosefa Samita—Talafaasolopito 1:34–47, mafaufau pe aisea atonu na taua ai ona iloa e Iosefa nei valoaga. Aisea e taua ai mo oe ona iloa nei valoaga?

E mafai foi ona e faitau i mea na aoao mai e Elder David A. Bednar e uiga i le asiasiga muamua a Moronae ia Iosefa Samita i le ‟Faatasi ai ma le Mana o le Atua i le Mamalu Tele” (Liahona, Nov. 2021, 28).

Ma le Mana o le Atua i le Mamalu Tele

Ua aoao mai Elder Bednar o le faamamaluina o a tatou feagaiga e fesoasoani tatou te maua ai le mana o le faaleatua i o tatou olaga.

Tagai foi i le “Se Agelu Mai Luga,” Viiga, nu. 8.

Iosefa Samita—Talafaasolopito 1:48–60

O le a saunia a’u e le Atua e galue i Lona malo.

Sa na o le 17 tausaga o Iosefa i le taimi muamua na ia vaai ai i papatusi auro. Peitai, e le’i tuuina atu i lana tausiga, seia oo i le fa tausaga mulimuli ane. Faitau le Iosefa Samita—Talafaasolopito 1:48–60, ma vaavaai mo le mea na tupu i le olaga o Iosefa i lena taimi. O le a sou manatu na faapefea ona saunia o ia e nei mea na tutupu mo le galuega na valaauina o ia e le Atua e fai? O a ni aafiaga na e maua ua saunia ai oe e auauna atu i le Atua ma isi? O le a se mea o e aafia ai i le taimi nei e mafai ona fesoasoani ia te oe e saunia ai mo le auaunaga i le lumanai?

Mauga o Kumora, saunia e Al Rounds

Mataupu Faavae ma Feagaiga 2

Na auina mai e le Alii ia Elia e liliu atu lo’u loto i o’u tuaa.

O a ni mea o aoao atu e upu e pei o le “totō,” “loto,” ma le “liliu” i totonu o lenei vaega ia te oe e uiga i le misiona a Elia ma faamanuiaga o ki o le perisitua na ia toefuatai mai? Ua faapefea ona e lagona ua liliu atu lou loto i ou augatuaa? Mafaufau i ala e mafai ona aafia soo ai oe i nei lagona. O le sailia o ou tuaa ma le faatinoina o sauniga mo i latou i le malumalu o se tasi lea o auala (tagai i le FamilySearch.org). O a isi mea e mafai ona e mafaufau i ai?

Tagai foi i le Mataupu Faavae ma Feagaiga 110:13–16; Gerrit W. Gong, ‟Fiafia ma Faavavau,” Liahona, Nov. 2022, 83–86.

Mo nisi manatu, tagai i lomiga o lenei masina o mekasini o le Liahona ma le Mo Le Malosi o le Autalavou .

Tagata, Nofoaga, Mea e Tutupu

• Iosefa Samita le Matua

• Ema Hale Samita

• Hill Cumorah

Kiliki e vaai i isi mea

Fautuaga mo le Aoaoina o Tamaiti

Iosefa Samita—Talafaasolopito 1:28–29

E mafai ona ou salamo ma maua le faamagaloga.

• O nisi taimi tatou te lagona uma ai le ‟tausalaina mo o tatou vaivaiga ma lē atoatoa,” e pei foi o Iosefa Samita. E mafai e oe ma lau fanau ona suesue faatasi i le Iosefa Samita—Talafaasolopito 1:29 ma vaavaai mo le mea na faia e Iosefa ina ua ia lagonaina faapena. O le a se mea e mafai ona tatou aoao mai ana faataitaiga e mafai ona fesoasoani ia i tatou pe a tatou faia ni mea sese? Aisea e taua ai le iloaina e faapea o Iosefa na valaauina e le Atua e ui sa lē atoatoa o ia?

Iosefa Samita—Talafaasolopito 1:27–54

Na valaauina e le Tama Faalelagi ia Iosefa Samita e fesoasoani ia te Ia e faia Lana galuega.

• Atonu e fiafia lau fanau e faafoliga ia Iosefa Samita a o e faamatalaina le tala i asiasiga a Moronae i le Iosefa Samita—Talafaasolopito 1:27–54 po o le “Mataupu 3: O Le Agelu o Moronae ma Papatusi Auro” (i le Tala o le Mataupu Faavae ma Feagaiga, 13–17, po o le vitiō e fesootai i ai i le Gospel Library). Mo se faataitaiga, e mafai ona piilima o latou lima e pei o loo latou tatalo pe faafoliga o loo latou fe’a’ei i le Mauga o Kumora, ma isi mea faapena. Ona mafai lea ona e fai atu ia i latou e talanoa e uiga i mea na valaauina e le Atua Iosefa Samita e fai ma pe ua faapefea ona faamanuiaina ai i tatou o se taunuuga. Mo se faataitaiga, ua faapefea ona faamanuiaina i tatou ona o le faaliliuina e Iosefa Samita o le Tusi a Mamona? Ua faapefea ona fesoasoani ana galuega ia i tatou e latalata atili ai i le Tama Faalelagi ma Iesu Keriso?

Mataupu Faavae ma Feagaiga 2

E finagalo le Tama Faalelagi e faamau aiga i le malumalu.

• Atonu o le a outou fiafia ma lau fanau e matamata i nisi o ata o lou aiga, atonu e aofia ai se ata o lou aiga i se malumalu (pe tagai i le Tusi Ata o le Talalelei, nu. 120). Ona outou faitauina lea o le Mataupu Faavae ma Feagaiga 2 ma faasoa atu i le tasi ma le isi ou manatu e uiga i le mafuaaga e i ai a tatou malumalu ma pe aisea e finagalo ai le Tama Faalelagi ia faatasia aiga e faavavau. Mafaufau e usu faatasi le pese “E Mafai Ona Faavavau Aiga” (Tusipese a Tamaiti, 98). O le a se mea o fai mai lenei pese e mafai ona tatou faia e faatasi ai ma o tatou aiga e faʻavavau?

Malumalu o Palamaira Niu Ioka

Mataupu Faavae ma Feagaiga 2

O le aoao e uiga i o’u tuaa e mafai ona aumaia le olioli ia te au.

• E mafai ona fiafia ma lagona e fanau le olioli o talafaasolopito o aiga. Ina ia fesoasoani ia i latou, e mafai ona e faasoa atu ni tala po o ni ata o ou tuaa. Talanoa ma lau fanau e uiga i le tulaga na i ai le olaga mo o latou tuaa a o avea i latou ma tamaiti. E mafai foi e lau fanau ona fiafia i nisi o gaoioiga o talafaasolopito o aiga i luga o le FamilySearch.org/discovery.

Mo nisi manatu, tagai i le lomiga o lenei masina o le mekasini o le Uo .

Ua Maua e Iosefa ia Papatusi, saunia e Gary E. Smith