27 Ianuari– 2 Fepuari: ‟O Le a Aga’i i Luma La’u Galuega”

Mataupu Faavae ma Feagaiga 3–5

I le gasologa o tausaga amata o le avea ma se perofeta a le Alii, e le’i iloaina ai e Iosefa Samita mea uma e uiga i le “galuega ofoofogia” ua vaalauina o ia e fai. A e o le mea e tasi na aoaoina ai o ia e ona aafiaga na ia maua muamua e faapea ina ia faia le galuega a le Alii, o lana vaai e tatau lava ona “manatu tasi i le mamalu o le Atua” (Mataupu Faavae ma Feagaiga 4:1, 5). Mo se faataitaiga, afai na fautuaina o ia e le Alii e fai se mea na te le mautinoa pe manao e fai, e manaomia ona ia mulimuli i le fautuaga a le Alii. Ma e tusa lava pe ua ia maua “faaaliga e tele, ma le … mana e fai ai galuega tetele,” afai o lona lava loto ua sili na taua ia te ia nai lo le finagalo o le Atua, o le a “pa’u o ia” (Mataupu Faavae ma Feagaiga 3:4). Ae na aoaoina e Iosefa se isi mea e talitutusa le taua e uiga i le galuega a le Alii: “Ua alofa mutimutivale le Atua,” ma afai e salamo faamaoni Iosefa, ua “filifilia pea” o ia (fuaiupu e 10). O le galuega a le Atua, i le mae’a o mea uma, o se galuega o le togiola. Ma “e le mafai ona taofia,” lena galuega (fuaiupu 1).

Manatu mo le Aoaoina i le Aiga ma i le Lotu

Mataupu Faavae ma Feagaiga 3:1–16

E mafai ona ou faalagolago i le Atua.

I le popofou o le galuega a Iosefa Samita, sa faigata ona maua ni uo lelei—aemaise lava ni uo e pei o Matini Harisi, o se alii sa faaaloalogia, faamanuiaina sa faia ni osigataulaga maoa’e e lagolago ai le galuega a Iosefa. O lea ina ua talosagaina e Matini se faatagaga e faaali atu ai itulau tusitusia muamua e 116 o le faaliliuga o le Tusi a Mamona i lona faletua, sa masani lava ona manao Iosefa e faaaloalogia lana talosaga, e ui ina sa lapatai mai le Alii e faatatau i ai. O le faanoanoaga, na leiloloa ia itulau a o i ai ia Matini, ma na matuā aoaiina ai Iosefa ma Matini e le Alii (tagai i le Au Paia, 1:51-53).

A o e faitauina le Mataupu Faavae ma Feagaiga 3:1–15, mafaufau loloto i mea e finagalo le Alii e te aoaoina mai o la’ua aafiaga. Mo se faataitaiga, o le a se mea ua e aoaoina e uiga i le:

• Galuega a le Atua? (tagai fuaiupu 1–3, 16).

• Taunuuga o le fefe i tagata nai lo o le faalagolago i le Atua? (tagai fuaiupu 4–8).

• Faamanuiaga e maua mai le tumau faamaoni? (tagai fuaiupu 8).

• O le ala na faasa’oina ma faamalosiauina ai e le Alii ia Iosefa? (tagai fuaiupu 9–16).

I lana sāvali ‟O Fea Le Itu o E Faasaga I Ai?,” ua tuuina mai ai e Elder Lynn G. Robbins le tele o faataitaiga faatusi paia o tagata o e sa matatau i le Atua ma tagata o e na gaua’i atu i uunaiga mai isi (Liahona, Nov. 2014, 9–11). Mafaufau e faitau nei faataitaiga i mau o loo ia faatatau i ai. O a ni mea ua tatou aoao mai i nei tala? O a ni aafiaga na e oo i ai lea na e faatuatuaina ai le Alii pe a feagai ma uunaiga e faia se mea e ese mai ai? O a ni taunuuga o au gaoioiga?

Tagai foi i le Dale G. Renlund, “O Se Auivi mo Faaaliga Faaletagata Lava Ia,” Liahona, Nov. 2022, 16–19; ‟O Saofaga a Matini Harisi,” i le Revelations in Context (2016), 1–9; Autu ma Fesili, ‟Seeking Truth and Avoiding Deception,” Gospel Library; ‟E Malu ma Alofa Poloaiga a le Atua,” Viiga, nu. 75.

Mataupu Faavae ma Feagaiga 4

E mafai ona ou auauna atu i le Atua ma lo’u loto, manatu, mafaufau, ma le malosi atoa.

O leVaega 4 e tele ina faatatau i faifeautalai faamisiona. A e ui i lea, e taua ona iloa o lenei faaaliga na tuuina atu muamua ia Iosefa Samita le Matua., o lē sa lei valaauina i se misiona a e sa i ai pea le “manao e auauna atu i le Atua” (fuaiupu 3).

O se tasi ala e faitau ai lenei vaega, o le mafaufau lea i ai faapei o se lisi o galuega fai mo se tasi e manao e fesoasoani i le galuega a le Alii. O le a le mea o loo sailia e le Alii? O a faamanuiaga ua Ia ofoina mai?

O a ni mea ua e aoaoina e uiga i le auauna atu i le Alii mai lenei faaaliga?

Sa ta’ua e Peresitene Russell M. Nelson le faapotopotoina o Isaraelu “o le lu’itau aupito silisili , o le faamoemoega silisili , ma le galuega aupito silisili i le lalolagi” (‟Faamoemoe o Isaraelu” [faigalotu a le autalavou i le lalolagi atoa, Iuni 3, 2018], Gospel Library). O le a se mea ua e maua i lana saunoaga e musuia ai oe e auai i lenei galuega?

O tagata uma e i ai se manao e auauna atu i le Atua ua valaauina i le galuega.

Mataupu Faavae ma Feagaiga 5

E ala i le Agaga Paia, e mafai ai ona ou maua se molimau o le Tusi a Mamona.

Ia Mati 1829, sa faila ai e le faletua o Matini Harisi, o Lusi, se tagi i le faamasinoga e faapea sa faaseseina e Iosefa Samita tagata e ala i le faafoliga e faaliliu papatusi auro (tagai i le Au Paia,, 1:56–58). O lea na talosaga atu ai Matini ia Iosefa mo ni faamaoniga faaopoopo e moni papatusi auro. O leMataupu Faavae ma Feagaiga 5 o se faaaliga e tali ai le talosaga a Matini. O a mea ua e aoao mai lenei vaega e uiga i mea o loo i lalo:

• O le mea na fetalai mai le Alii o le a tupu pe afai e faaali mai papatusi auro mo le lalolagi e vaai i ai (tagai i le Mataupu Faavae ma Feagaiga 5:7). Aisea e te manatu ai o le tulaga lena?

• O matafaioi a molimau i le galuega a le Alii (tagai i le fuaiupu 11–15; tagai foi i le 2 Koronito 13:1).

• O le ala e maua ai se molimau o le Tusi a Mamona mo oe lava (tagai i le fuaiupu 16, 24; tagai foi i le Moronae 10:3–5).

Mataupu Faavae ma Feagaiga 5:1–10

Na tuuina mai e Iesu Keriso ia i tatou Lana afioga e ala mai ia Iosefa Samita.

O a mea o loo aoao mai e le Mataupu Faavae ma Feagaiga 5:1-10 ia te oe e uiga i le matafaioi a Iosefa Samita i o tatou aso—ma i lou olaga? (Tagai foi i le 2 Nifae 3:6–24.)

Mo nisi manatu, tagai i lomiga o lenei masina o mekasini o le Liahona ma le Mo Le Malosi o le Autalavou .

Tagata, Nofoaga, Mea e Tutupu

• Feiloaiga a Matini Harisi ma Tagata Atamamai

• O Lautusi Tusitusia o le Tusi a Mamona na Leiloloa

Kiliki e vaai i isi mea

Fautuaga mo le Aoaoina o Tamaiti

Mataupu Faavae ma Feagaiga 3:5–10; 5:21–22

E mafai ona ou filifili le mea tonu pe a taumafai isi e ia ou faia le mea sese.

• Ina ia amata se talanoaga e uiga i le aoao e faalagolago i le Tama Faalelagi, atonu e te manao e toe iloilo le tala o itulau tusitusia na leiloloa (tagai i le Tala o le Mataupu Faavae ma Feagaiga, 18–21). Ona e faia lea o ni tala-faatino ma lau fanau o tulaga atonu e ono faaosoosoina ai i latou e fai se mea latou te iloa e le saʻo. O a upu po o fuaitau i le Mataupu Faavae ma Feagaiga 3: 5–8; 5:21–22 e mafai ona fesoasoani ia i latou i na tulaga?

  Chapter 4: Martin Harris and the Lost Pages: 1827–1828

Mataupu Faavae ma Feagaiga 4

Ua valaaulia a’u e le Alii e fesoasoani i Lana galuega.

• O fuaiupu taitasi i le Mataupu Faavae ma Feagaiga 4 o loo i ai upumoni taua e mafai ona fesoasoani i lau fanau e aoao ai e uiga i le auauna atu i le Atua. O nisi nei o manatu e fesoasoani ia i latou e iloa ai nei upumoni:

  • E mafai ona outou faitau faatasi le Mataupu Faavae ma Feagaiga 4:1 ma faaali atu ata o loo faaalia ai le galuega ‟ofoofogia” a le Atua i aso e gata ai (e pei o faifeautalai, malumalu, ma le Tusi a Mamona).

  • E mafai e lau fanau ona mafaufau i taga po o le tusia o ata e faaalia ai le fuaitau “auauna atu ia te ia ma lou loto atoa, mafaufau atoa, manatu atoa ma le malosi atoa” (Mataupu Faavae ma Feagaiga 4:2).

  • E mafai ona outou vaavaai faatasi i meafaigaluega e faaaoga e galulue ai i se fanua. E faapefea ona fesoasoani nei meafaigaluega ia i tatou? Ona mafai lea ona sue e lau fanau mea i totonu o le Mataupu Faavae ma Feagaiga 4:5–6 lea e pei o meafaigaluega mo le faia o le galuega a le Atua.

  • O tamaiti matutua e mafai ona suesue le tagata lava ia i le Mataupu Faavae ma Feagaiga 4 ma fai se lisi o mea latou te aoaoina e uiga i le auauna atu i le Atua.

  • E mafai foi ona usu faatasi se pese e faatatau i le galuega faifeautalai, e pei o le “Ou Te Fia Avea Nei Ma Faifeautalai” (Tusipese a Tamaiti, 90).

E mafai ona ou fesoasoani i le galuega a le Atua e ala i le auauna atu i isi.

Fetuunai gaoioiga e taulima ai ma tagata e i ai manaoga faapitoa. O fetuunaiga laiti i gaoioiga e mafai ona mautinoa ai ua tofu tagata uma ma se avanoa e aoao ai. Mo se faataʻitaʻiga, afai o se gaoioiga e fautuaina ai le faaalia o se ata, e mafai ona outou usuina se pese e fesootaʻi faatasi ma tamaiti e faaletonu la latou vaai.

Mataupu Faavae ma Feagaiga 5:1–7, 11, 16, 23–24

E mafai ona avea a’u ma se molimau e moni le Tusi a Mamona.

• Ina ia aoao lau fanau e uiga i molimau, e mafai ona e fai atu ia i latou e vaai faalemafaufau faapea na ta’u atu e se uo ia i latou sa latou vaaia se pusi o savali i ona vae pito i luma. Faamata o le a latou talitonu i ai? Ae faapefea pe afai e fai mai e se isi uo le mea lava lea e tasi? Talanoa po o le a le uiga o le ‟molimau” ma pe aisea e taua ai molimau. Ona mafai lea ona e fesoasoani i lau fanau e suesue le Mataupu Faavae ma Feagaiga 5:1–3, 7, 11 mo tali i fesili e pei o nei:

  • O le a le mea na fia iloa e Matini Harisi?

  • O ai e mafai e Iosefa Samita ona faaali atu i ai papatusi auro?

  • Aisea o le a lē faatalitonuina ai se tasi e moni le Tusi a Mamona ona o le vaai i papatusi?

  • O le a se mea e mafai ona tatou faia e avea ai ma molimau o le Tusi a Mamona? (Tagai i le Mataupu Faavae ma Feagaiga 5:16; Moronae 10:3–5).

Mo nisi manatu, tagai i le lomiga o lenei masina o le mekasini o le Uo .

Mamafatū Nauā o Itulau e 116, ata na tusia e Kwani Povi Winder