O Leo o le Toefuataiga

Faaliliuina o le Tusi a Mamona

Ia Aperila 1829, le masina lea na maua ai le vaega 6–9 o le Mataupu Faavae ma Feagaiga, o le vaega tele o le galuega a Iosefa Samita o le faaliliuina o le Tusi a Mamona. Tatou te le iloa ni faamatalaga se tele e uiga i le faagasologa faavavega o le faaliliuga, ae ua tatou iloa o Iosefa Samita o se tagatavaai, sa lagolagoina i meafaigaluega na saunia e le Atua: e lua maa manino sa faaigoaina o le Urima ma le Tumema ma le isi maa sa ta’ua o se maa vaai.

Ina ua fesiligia mulimuli ane e faasoa mai pe na faapefea ona faaliliuina lenei faamaumauga, na faapea mai Iosefa “e lei i ai se manatu e faailoa i le lalolagi mea uma.” E tele lava ina ia faapea mai sa faaliliuina “i le meaalofa ma le mana o le Atua.”

O faamatalaga nei, mai molimau i le faasologa o le faaliliuga, o loo lagolagoina le molimau a Iosefa.

E talitonu faapea o le pusa lea, o le pusa a Ailama Samita, sa faaaoga mo se taimi lē tumau e nanā ai papatusi auro.

Ema Samita

“Ina ua faaliliuina e lo’u toalua le Tusi a Mamona, sa ou tusia se vaega, a o ia faalauina fuaiupu taitasi, upu i le upu, ma pe a oo i igoa patino e le mafai ona ia faaleoa, po o upu uumi, na te sipelaina mai, ma a o ou tusiaina, a i ai se mea sese i le sipelaina, na te taofi au ma faasao mai la’u sipelaga e ui lava e le mafai ona ia iloa mai mea o loo ou tusitusia i lena taimi. E oo i le upu Sara na te lei mafai ona faaleoina i le amataga, a e na manaomia ona sipelaina, ma ou te faaleoina mo ia.”

E tele taimi na taatitia ai papatusi i luga o le laulau e aunoa ma se taumafaiga e nā nā, sa afifi i se ie laulau laitiiti, sa ou tuuina ia te ia e gaugau i ai. Sa i ai se taimi sa ou pa’i ai i ai, a o taatitia i luga o le laulau, ma faasolosolo ai i pito ma le tosi. Sa foliga mai e gaugofie e pei o se pepa mafiafia, ma e gasēsē pei o se metale pe a leua ia pito i le limamatua, e pei o nisi taimi pe a susue e se tasi ia pito o se tusi i le limamatua. …

“O lo’u talitonuga o le Tusi a Mamona e moni a’ia’i lona paia—e leai ma sina o’u masalosalo i ai. Ua faamalieina a’u e leai se tagata e mafai ona ia faalauina ia tusitusiga o faamaumauga sei vagana ua musuia o ia; aua, ina [ua ou] galue e avea ma ana tusiupu, e faalau mai ia te au e [Iosefa] mai lea itula i lea itula; ma pe a toe foi mai i le maea ai o se taumafataga, pe uma foi se mea sa faalavelaveina ai, e toe amata tonu lava i le mea sa gata ai, e aunoa ma se vaai i le faamaumauga pe faitau atu foi ia te ia se vaega. O se mea masani lea mo ia e fai. Semanu e le mafai e se tagata aoaoina ona faia lenei mea; ma, mo se tasi e matua valea ma le’i aoaoina e pei o ia, e matuai le mafaia lava.”

Oliva Kaotui

“Sa ou tusia i la’u lava peni, le Tusi a Mamona atoa (vagana ai ni nai itulau) a o saunoa mai ai fofoga o le Perofeta o Iosefa Samita, ma sa ia faaliliuina e ala i le meaalofa ma le mana o le Atua, e ala i le Urima ma le Tumema, po o, e pei ona tauina ai e lena tusi o, faaliliuupu paia. Sa vaai i ai o’u mata, ma uuina i o’u lima, ia papatusi auro ia na faaliliu mai ai. Sa ou vaai foi i mea faamatalaupu.”

Faamatalaga

1. Mo nisi faamatalaga, tagai i le Autu ma Fesili, “Faaliliuga o le Tusi a Mamona,” Gospel Library; Richard E. Turley Jr., Robin S. Jensen, and Mark Ashurst-McGee, “Iosefa le Tagata Vaai,” Ensign, Oke. 2015, 48–55).

2. “Minutes, 25–26 October 1831,” Minute Book 2, 13, josephsmithpapers.org.

3. I le “Talafaasolopito o le Ekalesia,” Times and Seasons, Mat. 1, 1842, 707; tagai foi i le Aoaoga a Peresitene o le Ekalesia: Iosefa Samita (2007),441.

4. I le Edmund C. Briggs, “O se Asiasiga i Navu i le 1856.” Journal of History, vol. 9, nu. 4 (Oke. 1916), 454; upusii mai i le Russell M. Nelson, “O Se Molimau Taua,” Ensign, Iulai 1993, 62.

5. I le “Last Testimony of Sister Emma,” Saints’ Herald, Oke. 1, 1879, 290; sipelaga faaonapo nei.

6. I le talafaamaumau a Reuben Miller, Oke. 21, 1848, Faletusi o Talafaasolopito o le Ekalesia, Aai o Sate Leki; sipelaga, maka o faailoga, ma mataitusitetele faaonapo nei.