Kopi o tusitusiga o le uluai Tusi a Mamona

10–16 Fepuari: “Ina ia Mafai Ona E Sau Ai o Lē Ua Manumalo”

Mataupu Faavae ma Feagaiga 10–11

A o faagasolo le faaliliuina o le Tusi a Mamona, na oo mai ai se fesili: O le a le mea e tatau ona fai e Iosefa Samita ma Oliva Kaotui e faatatau i itulau ua faaliliu ia ua leiloloa? Atonu e talafeagai le toe faaliliuina o lena vaega, ae na silafia e le Alii se mea sa le mafai ona laua vaaia: sa fuafua o latou fili e suia upu o loo i luga o na itulau e faaoo ai le masalosalo i le galuega musuia a Iosefa. Sa i ai se fuafuaga a le Atua e aloese ai mai lena faafitauli ma faatumauina le agai i luma o le galuega. I le faitau afe o tausaga na muamua atu, na musuia ai e le Atua ia Nifae e tusi se talafaamaumau lona lua lea na aofia ai le vaitau lava lea e tasi ‟mo se faamoemoega poto ia te Ia” (1 Nifae 9:5).

“O lo’u poto” na fetalai atu ai le Alii ia Iosefa, “e sili atu nai lo le faitogafiti-poto o le tiapolo” (Mataupu Faavae ma Feagaiga 10:43). O se sāvali faamautinoa lena i se aso e pei o o tatou aso, pe a faateteleina e le fili ana taumafaiga e faavaivaia le faatuatua. Faapei o Iosefa, e mafai ona tatou “faamaoni ma faaauau pea” i le galuega ua valaau tatou e le Atua e fai (fuaiupu 3). Ona tatou iloa lea ua Ia saunia le ala “e le mafai e faitotoa o seoli ona manumalo” e faasaga mai ia te i tatou (fuaiupu 69).

Tagai Au Paia, 1:51–61.

Manatu mo le Aoaoina i le Aiga ma i le Lotu

Mataupu Faavae ma Feagaiga 10:1–33

O le Atua ‟o le a le tuua ia faataunuu e Satani lana fuafuaga leaga.”

E sili atu ia Satani lo tatou faagalo o loo i ai o ia—po o le tau lava ina tatou lē iloa ana taumafaiga e faatosina ai i tatou (tagai 2 Nifae 28:22–23). Ae o afioga a le Alii i le Mataupu Faavae ma Feagaiga 10 ua faamautu mai ai e moni Satani—ma e tetee malosi o ia i le galuega a le Alii. I fuaiupu 1–33, faailoa mai mea na silafia e le Atua e uiga i taumafaiga a Satani (tagai foi fuaiupu 62–63). E mafai ona e ole atu i le Alii e fesoasoani ia te oe ia e iloaina ala o loo faaaoga e Satani e faaosooso ai oe. A o e faitauina le vaega 10, mafaufau loloto pe mafai faapefea ona fesoasoani le Faaola ia te oe e teena taumafaiga a Satani.

Mataupu Faavae ma Feagaiga 10:34–52

O le Alii, “ua sili atu [Lona] poto nai lo le faitogafiti-poto o le tiapolo.”

Sa lē iloa e Nifae pe aisea na musuia ai o ia e faia ni seti se lua o talafaamaumau o lona nuu. Ma sa lē iloa e Mamona pe aisea na musuia ai o ia e faaaofia le seti lona lua faatasi ma papatusi auro. Ae sa faatuatuaina uma e perofeta e faapea o le Atua e i ai ‟se faamoemoega poto” (1 Nifae 9:5; Upu a Mamona 1:7). O le asō ua tatou iloa ai se vaega e lē itiiti ifo o lena faamoemoega: ina ia suitulaga i itulau e 116 ua leiloloa o le Tusi a Mamona. O le a sou manatu i se mea na finagalo le Alii e te aoaoina mai nei mea uma? Mafaufau i lena fesili a o e faitauina le Mataupu Faavae ma Feagaiga 10:34–52. E mafai foi ona e faia se lisi o upumoni ua e aoaoina e uiga i le Alii mai nei fuaiupu. E faapefea ona aafia ai lou sootaga ma Ia ona o nei upumoni? O le a se mea ua faagaeetia ai oe e uiga i le atamai o le Alii ma le vaaiga mamao i le sauniaina mo le leiloloa o itulau e 116?

Atonu foi e te lagona le musuia e vaavaai mo faamaoniga o Lona atamai ma le silasila mamao i lou olaga. Faitau tala o i le sāvali a Elder Ronald A. Rasband “E Ala i le Mamanu Faalelagi”—atonu latou te aumaia ni faataitaiga i lou mafaufau (Liahona, Nov. 2017, 55–57). Mafaufau e tusi i lalo ao oo mai i latou ia te oe. O faapefea ona galue le Alii i lou olaga? Mo se faataitaiga, o a ‟mea na tupu faafuasei” na Ia saunia? O a faavae ua Ia faataatiaina mo ou faamanuiaga? O anafea na Ia taitai atu ai oe e auauna atu i se tasi e le tagolima?

Tagai foi i le Roma 8:28; Mataupu Faavae ma Feagaiga 90:24; Autu ma Fesili, ‟Ata o le Faaolataga,” Gospel Library.

Auiliiliga mai le Mamona o loo Otootoina Papatusi, saunia e Tom Lovell

Mataupu Faavae ma Feagaiga 11

“Tuu atu lou faalagolago i le Agaga [o le Alii].”

Sa naunau Ailama le uso matua o Iosefa ia iloa le finagalo o le Alii mo ia, o lea sa ia talosagaina ai Iosefa e saili se faaaliga mo ia. Sa fiafia le Perofeta e faia, ae o le itiiti ifo ma le tasi o sāvali i lena faaaliga (Mataupu Faavae ma Feagaiga 11) e faapea e mafai foi e Ailama ona sailia faaaliga mo ia lava. Ma e faapena foi mo “i latou uma ua i ai manaoga lelei, ma ua sasau atu a latou selesaito e selesele mai” (fuaiupu 27). A o e faitau i le vaega 11, o le a sou lagona i le mea o loo aoao mai e le Alii ia te oe e uiga i faaaliga faaletagata lava ia? E faapefea ona fesootai lenei mea i mea na Ia aoao atu ia Oliva Kaotui i vaega 6–9? O a isi sāvali o i le Alii mo oe?

Tagai foi i le “Agaga e Taitai Mai,” Viiga, nu. 78.

Valaaulia tagata aoao e fai ni fesili. O fesili e masani ona taitai atu ai i faaaliga. Afai o loo e aoaoina lou aiga po o se vasega o le Ekalesia, uunaia i latou e fai ni fesili, ma fesoasoani ia i latou e sue tali i tusitusiga paia. Mo se faataitaiga, afai e i ai ni a latou fesili e uiga i faaaliga faaletagata lava ia, vaavaai faatasi mo tali i le Mataupu Faavae ma Feagaiga 11:12–14.

Mataupu Faavae ma Feagaiga 11:15–26

A o o’u saili ia “maua le upu a le [Atua],” o le a ou maua Lona Agaga ma le mana.

E oo lava a o le’i faaliliuina le Tusi a Mamona, sa naunau Ailama Samita e fesoasoani i le galuega o le Toefuataiga. A o e faitau i le tali a le Alii i ona manaoga, manatunatu i le uiga ia te oe o le “maua le upu a le [Atua]” (fuaiupu 21). E faapefea e le mauaina o le upu a le Atua ona fesoasoani ia te oe e auauna ia te Ia ma le mana?

Mo nisi manatu, tagai i lomiga o lenei masina o mekasini o le Liahona ma le Mo Le Malosi o le Autalavou .

Tagata, Nofoaga, Mea e Tutupu

• Iosefa Samita le Itiiti

• Ailama Samita

• O Lautusi Tusitusia o le Tusi a Mamona na Leiloloa

Kiliki e vaai i isi mea

Fautuaga mo le Aoaoina o Tamaiti

Mataupu Faavae ma Feagaiga 10:5

A ou tatalo e le aunoa, ou te maua le malosi mai le Atua.

• Ina ia faailoa atu lenei fuaiupu i lau fanau, e mafai ona e fesili atu ia i latou e uiga i mea latou te faia ‟i taimi uma”. O le a le mea o loo fetalai mai le Alii e tatau ona tatou faia i taimi uma i le Mataupu Faavae ma Feagaiga 10:5? Aisea e finagalo ai o Ia tatou te faia lenei mea?

• E mafai faapefea ona e fesoasoani ia i latou ia manatua e tatalo e le aunoa? Atonu e mafai ona latou aoina ni nai maa lamolemole laiti, ma vali i o latou luga le “Mataupu Faavae ma Feagaiga 10:5” po o le “Tatalo e le Aunoa.” E mafai ona latou tuu a latou maa i nofoaga eseese latou te mananao e faamanatu atu ai ia i latou e tatalo, e pei o autafa o o latou moega, ma a latou api aoga, po o nofoaga latou te aai ai. E tusa ai ma le Mataupu Faavae ma Feagaiga 10:5, e faapefea ona faamanuiaina i tatou e le Atua pe a tatou tatalo? E mafai ona maua e lau fanau ni tali faaopoopo i se pese e pei o le “O le Tatalo a le Tamaitiiti” (Tusipese a Tamaiti, 6).

Mataupu Faavae ma Feagaiga 11:12–13

E taitai a’u e le Agaga Paia e faia mea lelei.

• E mafai ona a’oa’o e tamaiti pe faapefea ona iloa le taimi e talanoa mai ai le Agaga ia i latou? Ina ia fesoasoani ia i latou, e mafai ona e nanāina se matauila po o se moliuila ma se ata o se foliga fiafia i se mea i totonu o le potu; ona fai atu lea i lau fanau e sue nei mea. Faitau le Mataupu Faavae ma Feagaiga 11:13, ma fesoasoani i lau fanau ia iloa upu e fesootai ma mea na latou mauaina. O a mea o loo aoao mai e nei upu e uiga i le ala e fesoasoani mai ai le Agaga Paia ia i tatou?

• O le faasoa atu o ou lava aafiaga faaleagaga e mafai ona fesoasoani i lau fanau ia iloa le uunaiga a le Agaga Paia i o latou olaga. A o e faasoa atu, fai atu ia i latou e faasoa mai foi o latou aafiaga. E mafai foi ona outou faitau faatasi le Mataupu Faavae ma Feagaiga 11:12–13, ma vaavaai pe mafai faapefea ona tatou iloa le taimi e taitaiina ai i tatou e le Agaga Paia. Molimau atu e finagalo le Tama Faalelagi e taitaiina i tatou e ala i le Agaga Paia.

Mataupu Faavae ma Feagaiga 11:21, 26

E tatau ona ou iloa le talalelei ina ia mafai ona ou fesoasoani i isi ia maua le upumoni.

• E pei lava o Ailama Samita, atonu o le a maua e lau fanau le tele o avanoa e faasoa atu ai le talalelei i isi. E mafai ona outou faitau faatasi le Mataupu Faavae ma Feagaiga 11:21, 26 ma fai atu i lau fanau e sue le mea na ta’u atu e le Alii ia Ailama e tatau ona ia faia ina ia mafai ai ona ia aoao atu le talalelei. O le a le uiga o le “maua” o le upu a le Atua? E mafai faapefea ona tatou faia lenei mea? E faapefea ona tatou “teu” le afioga a le Atua i o tatou loto? Atonu e mafai e lau fanau ona faata’ita’i le faasoa atu o se mea e uiga ia Iesu Keriso po o le Tusi a Mamona i isi.

Mo nisi manatu, tagai i le lomiga o lenei masina o le mekasini o le Uo.

Iosefa ma Ailama Samita, saunia e Ken Corbett