Vaitafe o Susquehanna e lata i Haramoni, Penisilevania

17–23 Fepuari: ‟I Luga o Oulua O’u Uso a Auauna”

Mataupu Faavae ma Feagaiga 12–17; Iosefa Samita—Talafaasolopito 1:66–75

O le toatele o tagata o le lalolagi atonu latou te le’i faalogo lava ia Haramoni, Penisilevania. E tele ina filifilia e le Alii nofoaga e lē mailoa mo ni mea e tutupu sili ona taua i Lona malo. I se vaega e tele ai laau e latalata i Haramoni i le aso 15 o Me, 1829, na faaali mai ai Ioane le Papatiso ia Iosefa Samita ma Oliva Kaotui. Ua tuu ona lima i luga o o la ua ulu ma faaee atu i ai le Perisitua Arona, valaau i la’ua “o’u uso a auauna e” (Mataupu Faavae ma Feagaiga 13:1).

O Ioane le Papatiso o le auauna faatuatuaina a le Atua o lē na papatisoina le Faaola ma saunia le ala mo Lona afio mai (tagai i le Mataio 3:1–6, 13–17). I nei alii talavou e toalua i le luasefulu ma ona tupu o o la tausaga, atonu sa faalotomaualaloina, masalo e oo lava i le lofituina, e ta’ua o uso a auauna a Ioane. I lea taimi, e le’i mailoaina lava e ni isi Iosefa ma Oliva, faapei o le nuu o Haramoni. Ae o auaunaga i le galuega a le Atua sa faatatau i taimi uma i le ala tatou te auauna ai, a e le faatatau po o ai o iloa mai. Po o le a lava le itiiti po o le lē mailoa o lau saofaga i nisi taimi, o oe lava o se uso a auauna i le “galuega tele ma le ofoofogia” a le Alii (Mataupu Faavae ma Feagaiga 14:1).

Manatu mo le Aoaoina i le Aiga ma i le Lotu

Mataupu Faavae ma Feagaiga 12; 14

E mafai ona ou auai i le “galuega taua ma le ofoofogia” a le Atua.

Sa fia iloa uma e Iosefa Knight ma Tavita Uitimera pe faapefea ona la fesoasoani atu i le galuega a le Alii. A o e faitau i le tali a le Alii ia i la’ua (Mataupu Faavae ma Feagaiga 12; 14), mafaufau i le uiga ia te oe o le “aumai i luma ma faatu le faamoemoe o Siona” (12:6; tagai foi i le 14:6). O a mataupu faavae ma uiga faa-Keriso e te maua i nei vaega e mafai ona fesoasoani ia te oe e faia ai lenei mea?

Tagai foi i le “O Aiga o Knight ma Uitimera,” i le Revelation in Context, 20–24.

Mataupu Faavae ma Feagaiga 13

Na auina mai e Iesu Keriso ia Ioane le Papatiso e toefuatai mai le Perisitua Arona.

Sa valaauina e Ioane le Papatiso ia Iosefa Samita ma Oliva Kaotui o ona ‟uso a auauna.” O le a sou manatu i le uiga o le avea ma se uso a auauna faatasi ma Ioane le Papatiso? (Tagai i le Mataio 3:13–17; Luka 1:13–17; 3:2–20).

A o e faitau i le mea na ta’ua e Ioane le Papatiso e uiga i le Perisitua Arona i le vaega 13, mafaufau loloto pe faapefea ona fesoasoani ki o lenei perisitua e faataunuu ai le misiona a Ioane e saunia ai le ala o le Alii. Mo se faataitaiga:

• O le a “le auaunaga a agelu”? (tagai i le 2 Nifae 32:2–3; Moronae 7:29–32; Taiala i Tusitusiga Paia, “Agelu,” Gospel Library).

• O le a ‟le talalelei o le salamo”? (tagai Mataupu Faavae ma Feagaiga 84:26–27; Dale G. Renlund, “O Le Perisitua ma le Mana Togiola o le Faaola,” Liahona, Nov. 2017, 64–67).

E faapefea e sauniga o le Perisitua Arona (e pei o le papatisoga ma le faamanatuga) ona fesoasoani e saunia le ala mo oe e talia ai le Faaola i lou olaga?

O a ki o le perisitua?

Na ofoina atu e Elder Dale G. Renlund ma lona faletua o Ruth, lenei faamatalaga e uiga i ki o le perisitua:

“O le faaupuga ki o le perisitua e faaaoga i ni auala eseese se lua. O le muamua e faatatau i se aiā tatau faapitoa po o le avanoa e tuuina atu i luga o i latou uma o e mauaina le Perisitua Arona po o le Perisitua Mekisateko. … Mo se faataitaiga, o e umia le Perisitua Arona e maua ki o le auaunaga a agelu ma ki o le talalelei sauniuni o le salamo, ma le papatisoga e ala i le faatofuina mo le faamagaloga o agasala (tagai i le Mataupu Faavae ma Feagaiga 13:1; 84:26–27). O e umia le Perisitua Mekisateko e maua ki o mealilo o le malo, le ki o le malamalama o le Atua, ma ki o faamanuiaga faaleagaga uma lava o le Ekalesia (tagai i le Mataupu Faavae ma Feagaiga 84:19; 107:18). …

“O le auala lona lua e faaaoga ai le faaupuga ki o le perisitua e faatatau i le taitaiga. E maua e taitai perisitua isi ki faaopoopo o le perisitua, le aiā tatau e pulefaamalumalu ai i se faalapotopotoga o le Ekalesia po o se korama. I lenei tulaga, o ki o le perisitua o le pule ma le mana e faatonutonu ai, taitai ai, ma pulea le Ekalesia” (The Melchizedek Priesthood: Understanding the Doctrine, Living the Principles [2018], 26).

Ua papatisoina e Iosefa Samita ia Oliva Kaotui, saunia e Del Parson

Iosefa Samita—Talafaasolopito 1:66–75

O Sauniga e aumaia ia te a’u le ala i le mana o le Atua.

Pe na i ai se taimi na e mafaufau ai pe faape’i le faatasi ai ma Iosefa Samita ma Oliva Kaotui mo mea tetele na tutupu i le Toefuataiga? A o e faitau i le Iosefa Samita—Talafaasolopito 1:66–75, e aofia ai le faamatalaga o loo i le faaiuga o le fuaiupu 71, atonu e mafai ai ona e malamalama i nisi o mea sa la’ua lagonaina. O le a se mea ua faagaeetia ai oe e uiga i a la’ua upu? Ia mātau, aemaise lava, o faamanuiaga na la’ua maua ona sa la’ua mauaina le perisitua ma sa papatisoina. O a faamanuiaga ua tuuina atu e le Faaola ia te oe e ala i sauniga o le perisitua?

Ina ia aoao atili, mafaufau e fatu se siata faatasi ma ulutala Sauniga ma Faamanuiaga. Ona e suesue lea i mau e pei o nei e faauma ai le siata: Ioane 14:26; Galuega 2:38: Mataupu Faavae ma Feagaiga 84:19–22; 131:1–4; Iosefa Samita—Talafaasolopito 1:73–74. O a nisi faamanuiaga e mafai ona e faaopoopoina i le lisi? Na faapefea ona aumaia e sauniga ua e mauaina le mana o le Faaola i lou olaga?

Tagai foi i le David A. Bednar, “Faatasi ai ma le Mana o le Atua i le Mamalu Tele,” Liahona, Nov. 2021, 28–30; Au Paia, 1:65–68; “Le Atua o le Mana, Le Atua e Sa’o,” ,” Viiga, nu. 15; Autu ma Fesili, “Feagaiga ma Sauniga,” Gospel Library.

Mataupu Faavae ma Feagaiga 15–16

O le aumaia o agaga ia Keriso e taua tele lea.

Pe na i ai se taimi na e mafaufau ai, e pei ona sa faia e Ioane ma Peteru Uitimera, o le a le mea ‟o le a sili ona taua” i lou olaga? (Mataupu Faavae ma Feagaiga 15:4; 16:4). A o e faitauina le Mataupu Faavae ma Feagaiga 15–16, mafaufau loloto pe aisea ua avea ai le aumaia o agaga ia Keriso ma mea ua sili lona taua. O le a se mea o loo e faia e “aumai ai agaga” ia Keriso?

Tagai foi i le Au Paia, 1:68–71.

Mataupu Faavae ma Feagaiga 17

E faaaoga e le Alii molimau e faatu ai Lana upu.

O le a le molimau? Aisea e faaaoga ai e le Alii molimau i Lana galuega? (tagai i le 2 Korinito 13:1). Mafaufau loloto i fesili nei a o e faitauina upu a le Alii i Molimau e Toatolu i totonu o le Mataupu Faavae ma Feagaiga 17. (Tagai foi i le “O Mau a Molimau e Toatolu” i totonu o le Tusi a Mamona.) E faapefea e molimau ona fesoasoani e faataunuu “faamoemoega amiotonu a le Atua”? (fuaiupu 4).

O le a se mea e mafai ona e molimau atu ai?

Tagai foi i le Au Paia, 1:73–75; ‟O Se Aso mo le Faavavau” (vitiō), Gospel Library.

O se Aso mo le Faavavau

O lenei vitio o loo faaalia ai aafiaga o Tavita Uitimera ao nonofo Iosefa Samita ma Oliva Kaotui i lona aiga i Faiete, Niu Ioka, e faamaea le faaliliuina o le Tusi a Mamona.

Mo nisi manatu, tagai i lomiga o lenei masina o mekasini o le Liahona ma le Mo Le Malosi o le Autalavou .

Tagata, Nofoaga, Mea e Tutupu

• Mataupu Faavae ma Feagaiga Punaoa o Talafaasolopito: Iosefa Knight le Matua.

• Nofoaga o le Toefuataiga o le Perisitua

• Toefuataiga o le Perisitua Arona

Kiliki e vaai i isi mea

Fautuaga mo le Aoaoina o Tamaiti

Mataupu Faavae ma Feagaiga 13; Iosefa Samita —Talafaasolopito 1:68–74

O Ioane le Papatiso na toefuatai maia le Perisitua Arona.

• O le galuega faatufugaga i lenei otootoga e mafai ona fesoasoani i lau fanau e vaai faalemafaufau ai i le toefuataiga o le Perisitua Arona (tagai foi i le “Mataupu 6: Ua Tuuina Atu ia Iosefa ma Oliva le Perisitua,” i le Tala o le Mataupu Faavae ma Feagaiga, 26–27, po o le vitiō talafeagai i le Gospel Library). Faamata e latou te fiafia e tusia se ata o le mea na tupu, e faavae lea i mea na latou faitau i ai faatasi ma oe i le Iosefa Samita—Talafaasolopito 1:68–74?

  Chapter 6: Joseph and Oliver Are Given the Priesthood: May 1829

• E mafai foi ona e faaali atu se ata o Ioane le Papatiso a o outou faitau faatasi le Mataio 3:13–17; Iosefa Samita—Talafaasolopito 1:68–70. Aisea na taua ai le auina atu e le Alii o Ioane le Papatiso e tuuina atu ia Iosefa Samita le pule o le perisitua e papatiso ai?

Sauniaina o lau fanau mo se olaga atoa i luga o le ala o feagaiga a le Atua. Mo nisi manatu e fesoasoani ai i lau fanau e aoao e uiga i le mana o le perisitua, pule, ma ki, tagai i le faaopoopoga A po o le faaopoopoga E.

Ata o Iesu o loo papatiso, saunia e Dan Burr

Mataupu Faavae ma Feagaiga 13

E faamanuiaina a’u e le Tama Faalelagi e ala i le Perisitua Arona.

• Ina ia uunaia se talanoaga e uiga i ki o loo ta’ua i le Mataupu Faavae ma Feagaiga 13, e mafai e oe ma lau fanau ona vaai i se seti o ki ma talanoa e uiga i mea e mafai e ki ona faataga i tatou e fai. Atonu e mafai ona e fesoasoani ia i latou e sue le upu ki i le vaega 13. O a isi upu po o fasifuaitau i le Mataupu Faavae ma Feagaiga 13 o loo faamatala mai ai faamanuiaga o le Perisitua Arona? E mafai foi e lau fanau ona faailoa mai auala e faamanuiaina ai i tatou e le Tama Faalelagi e ala i le perisitua i le vitiō ‟Blessings of the Priesthood” (Gospel Library).

O Famanuiaga o le Perisitua

O le perisitua o le mana lea o le Atua, ua tuuina mai i le tagata e galue ai i Lona suafa.

Mataupu Faavae ma Feagaiga 15:4–6; 16:4–6

O le fesoasoani atu i isi e o mai ia Iesu Keriso ‟ua sili ona taua.”

• Na mananao uma Ioane ma Pita Uitimera ia la iloa po o le a le “mea lea ua sili ona taua” i o la olaga (tagai i le Mataupu Faavae ma Feagaiga 15:4; 16:4). Atonu e mafai e oe ma lau fanau ona talanoa e uiga i mea e taua tele ia te oe. A’o outou faitau i le Mataupu Faavae ma Feagaiga 15:6 po o le 16:6, fesili atu i lau fanau e sii o latou lima pe a latou faalogo i le mea na fetalai mai le Alii “ua sili ona taua.”

• O le a le uiga o le “aumai o agaga ia [Iesu Keriso]”? Fesoasoani i lau fanau e fai se lisi o auala e pei o le avea ma uo i isi, faasoa atu tusitusiga paia ma se uo, po o le tatalo mo se tasi o loo manaomia le fesoasoani. E mafai e lau fanau ona vaavaai mo ata o nei mea i mekasini a le Ekalesia po o le Tusi Ata o le Talalelei. E mafai foi e tamaiti ona tusi a latou lava ata. Valaaulia i latou e filifili se mea mai a latou lisi o le a latou faia. E mafai foi ona outou usuina faatasi le fuaiupu lona fa o le “Le Alofa o Lo’u Faaola” (Tusipese a Tamaiti, 42).

Mataupu Faavae ma Feagaiga 17

E mafai ona avea aʻu ma se molimau o le Tusi a Mamona.

• “Mataupu 7: Ua Vaai Molimau i Papatusi Auro” (i le Tala o le Mataupu Faavae ma Feagaiga, 31–33, po o le vitiō talafeagai i le Gospel Library) e mafai ona fesoasoani i lau fanau e aoao ai e uiga i Molimau e Toatolu. A uma ona faitau le Mataupu Faavae ma Feagaiga 17:5–6, ta’u atu i lau fanau pe faapefea ona e iloa e moni le Tusi a Mamona. E mafai faapefea ona avea i tatou ma molimau o le Tusi a Mamona?

  Chapter 7: Witnesses See the Gold Plates: 1829–1830

Mo nisi manatu, tagai i le lomiga o lenei masina o le mekasini o le Uo .

I Luga o Oulua O’u Uso a Auauna, saunia e Linda Curley Christensen