“O Leo o le Toefuataiga: O Molimau o le Tusi a Mamona,” Sau, Mulimuli Mai ia te A’u—Mo le Aiga ma le Ekalesia: Mataupu Faavae ma Feagaiga 2025 (2025)
“O Molimau o le Tusi a Mamona,” Sau, Mulimuli Mai ia te A’u—Mo le Aiga ma le Ekalesia: 2025
O Leo o le Toefuataiga
O Molimau o le Tusi a Mamona
Na faaali atu e le agelu o Moronae papatusi auro ia Iosefa Samita, Oliva Kaotui, Tavita Uitimera, ma Matini Harisi i le vao e lata ane i le fale o Uitimera i Feiete, Niu Ioka. Na asiasi atu mātua o Iosefa i le au Uitimera i lea taimi. Na faamatala e Lusi Maka Samita, le tinā o Iosefa, le aafiaga faavavega na oo i molimau:
“O le taimi o le va o le tolu ma le fa. O faletua Uitimera ma le Susuga a Samita ma a’u sa nofonofo i totonu o se potumoe. Sa ou saofai i le pito o le moega. Ina ua sau Iosefa i totonu sa ia faapau ifo i o’u autafa. ‘Tama! Tina!’ sa ia fai mai ai. ‘Lua te le iloa lo’u fiafia tele. Ua faia e le Alii ina ia faaali atu papatusi i nisi e toa 3 e ese nai lo a’u o e ua vaai foi i se agelu ma o le a molimau i le moni o mea sa ou fai atu ai. Aua ua latou iloa mo i latou lava ou te le o alu atu e taufaasese i tagata. Ma ua ou lagona ua pei ua tuumamaina se avega mamafatu, na toeitiiti lava a ou le gafatia ona tauave. A e o le a latou tauaveina nei se vaega, ma ua faafiafiaina lo’u agaga ona ua le toe na’o au nei i le lalolagi.’ Ona sau lea o Matini Harisi i totonu. Na ia foliga mai ua toeitiiti a faatoilaloina i le taumasuasua o le olioli. Ona ia molimau mai lea i le mea na ia vaaia ma faalogo i ai, na faapea foi ona faia e isi, o Oliva ma Tavita. O a latou molimau na tutusa i mataupu e pei ona i ai i totonu o le Tusi a Mamona. …
“Ae mo Matini Harisi lava ia na foliga mai ua le mafai atoa ona ia faaleoina i upu ona lagona. Sa ia faapea mai, “Ua ou vaai nei i se agelu mai le Lagi o le ua molimau mautinoa mai i le moni o mea uma na ou faalogo i ai e faatatau i le talafaamaumau, ma na vaaia e o’u mata o ia. Ua ou vaaia foi papatusi ma taulimaina e o’u lima ma e mafai ona ou molimau i na mea uma i le lalolagi atoa. A e ua ou mauaina e a’u lava se molimau e le mafaia e upu ona faamatalaina, e le mafai e se laulaufaiva ona faamatala, ma ou te faamanu i le Atua i le faamaoni o lo’u agaga ona ua ia filifilia a’u, o a’u lava, o se molimau o le silisiliese o lenei galuega ma ana fuafuaga i le avea ai ma sui [o] fanau a tagata.’ Na auai faatasi ma ia, Oliva ma Tavita i le paia o le vivii i le Atua mo lona agalelei ma le alofa mutimutivale. Na matou toe foi i le fale [i Palamaira, Niu Ioka,] i le aso na sosoo ai o se mafutaga toalaiti ua faafiafiaina, ma olioli.”
Oliva Kaotui, Tavita Uitimera, ma Matini Harisi
Sa i ai foi Lusi Maka Samita ina ua toe foi mai Molimau e Toavalu mai la latou aafiaga:
“I le mavae ai o le toe foi mai i le fale o nei molimau, na toe faaali mai le agelu ia Iosefa; na tuuina atu ai i le taimi lea e Iosefa papatusi i lima o le agelu. I lena afiafi na matou faia ai se fonotaga, lea na tuuina atu ai molimau a nei molimau uma e uiga i mea moni e pei ona tuuina atu i luga, ma o lo matou aiga uma, e oo lava ia Don Carlos [Samita], o le na’o le 14 tausaga le matua, na molimau i le moni o tisipenisione o aso e gata ai—lea ua o’o mai i lona atoatoa.”
Faatagata vane o Iosefa Samita ma Molimau e Toavalu
E faaopoopo atu i Molimau e Toatolu ma Molimau e Toavalu, o Maria Uitimera, le tinā o Tavita Uitimera, sa faamanuiaina foi e avea o se molimau o papatusi auro. Na faaali e le agelu o Moronae ia te ia papatusi auro o se aloa’iaina o osigataulaga sa ia faia a o nonofo ai Iosefa, Ema, ma Oliva i lona aiga. “‘Sa e matua faamaoni lava ma filiga i au galuega,” sa fai atu ai Moronae ia te ia. “O le mea lea, e tatau ai ona e maua se molimau ina ia mafai ona faamalosia ai lou faatuatua.”