24 Fepuari–2 Mati: “Ua Tele Lava le Taua o Agaga”

Mataupu Faavae ma Feagaiga 18

E tele auala eseese e taumafai e fuaina ai le taua o se tagata. O taleni, aoaoga, oa, ma foliga vaaia faaletino e mafai ona aafia uma ai le auala tatou te iloiloina ai e le tasi le isi—ma i tatou lava. Ae i fofoga o le Atua, o lo tatou taua o se mataupu e sili atu ona faigofie, ma o loo ta’ua manino mai i le Mataupu Faavae ma Feagaiga 18: ‟Ia manatua ua tele lava le taua o agaga i le silafaga a le Atua” (fuaiupu 10). O lenei upumoni faigofie o loo faamalamalama mai ai le tele o mea e faia e le Atua ma le mafuaaga Na te faia ai. Aisea na Ia faatonuina ai Iosefa Samita ma Oliva Kaotui e faatuina le Ekalesia a Iesu Keriso i o tatou aso? (Tagai i fuaiupu 1–5). Ona ua tele lava le taua o agaga. Aisea na Ia ‟poloaiina ai tagata uma i soo se mea ia salamo” ma auina atu Aposetolo e talai atu le salamo? (fuaiupu 9). Ona ua tele lava le taua o agaga. Ma aisea na puapuagatia ai Iesu Keriso i le “oti i la le tino” ma “le tiga o tagata uma”? (fuaiupu 11). Ona ua tele lava le taua o agaga. Afai e oo lava i se tasi o nei agaga e filifili e talia le meaalofa a le Faaola, e olioli o Ia, aua ‟ua tele lava lona olioli i le agaga e salamo” (fuaiupu 13).

Manatu mo le Aoaoina i le Aiga ma i le Lotu

Mataupu Faavae ma Feagaiga 18:1–5

‟Ati a’e la’u ekalesia.”

I le vaega 18, na tuuina mai ai e le Alii ia Oliva Kaotui ia faatonuga e fesoasoani e faataatia le faavae o le Ekalesia a Iesu Keriso. O le a se mea ua e matauina e uiga i le fautuaga na Ia tuuina mai—aemaise lava i fuaiupu 1–5? Atonu e te mafaufau pe faapefea ona faatatau lenei lava fautuaga e tasi ia te oe a o e ‟atiina a’e” lou faatuatua ia Keriso. Mo se faataitaiga:

• O le a se mea ua e manao “e te fia iloa” mai le Alii? (fuaiupu 1).

• O le a le uiga ia te oe o le ‟faalagolago i mea ua tusia”? (fuaiupu 3). Na faapefea ona ‟faaali atu ia te oe” e le Agaga ua moni nei mea? (fuaiupu 2; tagai foi i le Mataupu Faavae ma Feagaiga 6:22–24).

• E faapefea ona e fausia lou olaga i luga ‟o le faavae o le talalelei [a le Faaola] ma lana papa”? (fuaiupu 5).

Fai fesili. O Le Mataupu Faavae ma Feagaiga o se faamaoniga lea o fesili e taitai atu ai i faaaliga. A o e suesue i tusitusiga paia, faamaumau fesili o loo ia te oe. Ona manatunatu loloto lea ma tatalo e saili tali.

Mataupu Faavae ma Feagaiga 18:10–13

“Ua tele lava le taua o agaga i le silafaga a le Atua.”

E faapefea ona tatou fuaina le taua o se mea? Mo se faataitaiga, aisea e sili atu ai ona taugata le tasi aitema i se maketi nai lo le isi? A o e faitauina le vaega 18 i lenei vaiaso, aemaise lava ia fuaiupu 10–13, atonu e te faatusatusaina le auala e masani ona fuaina ai e tagata le taua ma le mafuaaga e taua ai se agaga i fofoga o le Atua. Mafaufau e sui i lou igoa le upu ‟agaga,” ‟o agaga,” ma ‟tagata uma.” E mafai faapefea e nei fuaiupu ona fesoasoani i se tasi o fesiligia lona taua?

O nisi nei o fuaitau o loo aoao mai e uiga i le taua o se agaga: Luka 15:1–10; Ioane 3:16–17; 2 Nifae 26:24–28; Mose 1:39. E faavae i nei fuaitau, e faapefea ona e aoteleina lagona o le Atua e uiga ia te oe? E mafai foi ona e suesue i le sāvali a Peresitene Dieter F. Uchtdorf “E Taua Oe ia te Ia” (Liahona, Nov. 2011, 19–22) e sue ai upu ma fasifuaitau e fesoasoani ia te oe e iloa ai lou taua i le Atua.

E faapefea ona faaali mai e le Atua ia te oe e taua tele oe ia te Ia? E faapefea e le iloa o lenei upumoni ona aafia ai ou lagona e uiga ia te oe faapea ma isi?

Tagai foi i le Joy D. Jones, “O Le Taua e Le Mafuatiaina,” Liahona, Nov. 2017, 13–15; Autu ma Fesili, ‟Fanau a le Atua,” Gospel Library.

Mataupu Faavae ma Feagaiga 18:11–16

E olioli le Alii pe a ou salamo.

Matau le faaaogaina faifai pea o upu e pei o le salamo ma le salamo i le Mataupu Faavae ma Feagaiga 18. Mafaufau loloto i mea ua e aoaoina mai nei upu i taimi taitasi e faaaoga ai. Mafaufau faapitoa i fuaiupu 11–16. E faapefea e nei fuaiupu ona aafia ai ou lagona e uiga i le salamo—lou lava salamo ma le tiute o le valaaulia o isi tagata ia salamo ma faaleleia? O se tasi lenei o auala e faamaumau ai mea ua e aoaoina: lisi ni auala o le a e faaumaina ai le fuaiupu ‟O le salamo o le .”

Tagai foi i le Alema 36:18–21; Taiala i Tusitusiga Paia, ‟Salamo,” Gospel Library; Dale G. Renlund, ‟Salamo: O Se Filifiliga Fiafia,” Liahona, Nov. 2016, 121–24.

Auiliiliga mai le O le Atalii Faamaimau Oa, saunia e Clark Kelley Price

Mataupu Faavae ma Feagaiga 18:14–16

O le olioli e sau mai le fesoasoani atu i isi ia o mai ia Keriso.

A o e faitauina fuaiupu 14–16, mafaufau loloto i le uiga o le ‟alagaina o le salamo”—ma pe aisea e aumaia ai lena olioli. O a nisi o auala ua e maua e fesoasoani ai i isi ia o mai i le Faaola ma maua le faamagaloga? Na faapefea ona faia e isi tagata lena mea mo oe?

Tagai foi i le Craig C. Christensen, “E Leai Se Mea e Sili Ona Matagofie ma Suamalie e pei ona Sa I Ai Lo’u Olioli,” Liahona, Me 2023, 45–47.

Mataupu Faavae ma Feagaiga 18:34–36

E mafai ona ou lagonaina le siufofoga o le Alii i totonu o tusitusiga paia.

Afai e fesili atu se tasi ia te oe pe faape’i le siufofoga o le Alii, o le a lau tala e fai? Mafaufau i le fesili lea a o e faitauina le Mataupu Faavae ma Feagaiga 18:34--36. O le a le mea ua e aoaoina mai e uiga i le siufofoga o le Alii mai le faitauina o le Mataupu Faavae ma Feagaiga? O le a se mea e mafai ona e faia ia lagona ai ma le manino atili Lona Siufofoga?

Tagai foi i le “A Ou Suesue i Mau Paia,” Viiga, nu. 174.

Mo nisi manatu, tagai i lomiga o lenei masina o mekasini o le Liahona ma le Mo Le Malosi o le Autalavou .

Tagata, Nofoaga, Mea e Tutupu

• Mataupu Faavae ma Feagaiga Punaoa o Talafaasolopito: Tavita Uitimera

• Faatoaga a Uitimera: Nofoaga o le Faatulagaina o le Ekalesia

Kiliki e vaai i isi mea

Fautuaga mo le Aoaoina o Tamaiti

Mataupu Faavae ma Feagaiga 18:10–13

O i tatou taitoatasi e taua tele i le Atua.

• A o outou faitauina ma lau fanau le Mataupu Faavae ma Feagaiga 18:10–13, mafaufau e sui igoa o le tasi ma le isi e sui ai upu ‟agaga,” ‟o agaga,” ma ‟tagata uma.” Ona mafai lea ona outou talanoa e uiga i le auala e fesoasoani ai nei fuaiupu ia i tatou ia malamalama i lagona o le Tama Faalelagi e uiga ia i tatou taitoatasi.

• E mafai foi ona e fesili i lau fanau e uiga i mea e manatu tagata e taua. Pe e mafai foi ona e faaali atu ia i latou se mea e taua ia te oe. E faapefea ona tatou taulimaina mea e taua ia i tatou? Ona tuu atu lea ia i latou e auauai e tilotilo i se faaata. A o latou faia, ta’u atu i tamaiti taitasi o i latou o se atalii/afafine o le Atua ma e taua tele i latou. E faapefea ona tatou faaali atu i isi tagata e “taua tele o [latou] agaga” i la tatou vaai?

• Ina ia faamamafa atu e taua tele tagata uma i le Tama Faalelagi, e mafai e lau fanau ona vaai i le ata o loo i le faaiuga o lenei otootoga a o e faitauina le Mataupu Faavae ma Feagaiga 18:10–13. O le usuina faatasi o se pese e pei o le ‟E Eseese Fetu Uma” (Tusipese a Tamaiti, 66) e mafai ona fesoasoani e faamalosia ai lenei manatu.

Auiliiliga mai le Taua o se Agaga, saunia e Liz Lemon Swindle

Mataupu Faavae ma Feagaiga 18:13–16

O le faasoaina atu o le talalelei e aumai ai le olioli tele.

• Ina ia musuia lau fanau e faasoa atu le talalelei a Iesu Keriso, e mafai ona e talanoa i le tasi ma le isi e uiga i aafiaga ina ua e maua se mea na e manao e faasoa atu i au uo po o le aiga. Aisea na e manao ai e faasoa atu, ma o le a sou lagona i le faasoaina atu? Ona e faitauina lea o le Mataupu Faavae ma Feagaiga 18:13, 16. O le a se mea e aumaia ai le olioli i le Alii? O le a se mea na Ia fetalai mai o le a aumaia ia i tatou le fiafia? E mafai e oe ma lau fanau ona talanoa e uiga i soo se aafiaga na e maua i le faasoaina atu o le olioli o le talalelei a le Faaola.

• O se pese e faatatau i le faasoaina atu o le talalelei, e pei o le “Ou Te Fia Avea Nei Ma Faifeautalai” (Tusipese a Tamaiti, 90), e mafai ona fesoasoani i lau fanau e mafaufau ai i auala e mafai ona latou faasoa ai le talalelei.

Mataupu Faavae ma Feagaiga 18:34–36

E mafai ona ou lagonaina le siufofoga o le Alii i totonu o tusitusiga paia.

• Atonu e fiafia lau fanau i se taaloga lea latou te taumafai ai e faailoa leo o tagata eseese, e pei o tagata o aiga, uo, po o taitai o le Ekalesia. E faapefea ona tatou iloa leo o le tasi ma le isi? E faapefea ona tatou iloa le siufofoga o le Alii? E mafai ona outou faitau faatasi le Mataupu Faavae ma Feagaiga 18:34–36 e talanoaina ai lenei fesili. E mafai foi ona e faasoa atu i le tasi ma le isi pe na faapefea ona e faalogo i le siufofoga o le Alii i tusitusiga paia.

Mo nisi manatu, tagai i le lomiga o lenei masina o le mekasini o le Uo .

E matuā taua agaga uma i le Atua.